Nikonghong

Home » Cidamna » Cidam in Khan sau theina

Cidam in Khan sau theina

Cidam khansau thei natu in ih zui tu ih vawt tu thu tam mama om sung panin, ei Khamtung mite atu a thinlet huai, ih vawt thei tu thu khat om hi. Mihing khat a cidam natu in vui thiangtho, tui thiangtho le tukna dianna cite kisamh a, tuate sia, ei atu in haksa ngawl ahi bangma, anneak tuidawn taw kisai in, ih khansau natu in, thingnga le antee tam mama neak tu kuulsak a, tuate zongh ei atu in, a haksa leih hingawl ahikom, Topa Thupha hi, ih ci thei tu ahi hi. Ei ii kisamh tu a ih up bel, sa neakna sia, cidam natu in a kisamh bel hi ngawl hi.

Sa na neak kekeak zawk ngawl hu in na khuangai ngei ziam? Kawlngam sungah, natna a pung mama pawlkhat Khamtung ah kimu lalawm ngawl hi. Sonteena: Zunthum chithum, chi-khang, lungtang chivui zim, sunghuu ci bangte hi. Hi natnate sia, sa le nganhing thau neakna taw veu in kipee-aw a, ei Khamtung pan, sa ih neak zawkngawl sia, ih hamphatna hizaw bilbel hi. Pathian in mihing a bitphua ciil lai in, sa ne in na sawl ngawl a, mihingte atu a kisamh teng thingnga thingtee sungahna koi a, nga le tee ne in na sawl hi. Nga le tee sungah ih pumpi atu in a kisamh dat nam teng cingsiat hi. Be (beli, beloai, benaang cite) nam sungah sadat om a, a hing nga le tee sungah ih ci ih sa kipua natu dat, a engte sungah ih mittang atu dat ci bangin dat namkim om hi. Bekdomngawlin nga le tee sungah a om sathau te sungah chivui zimsak thei sathau (cholesterol) te omngawl zaw pek hi.

Pathian in,“Keima in note neak tu in thaici nam tatuam le thingnga nam tatuamte kong pia hi” (Pian 1:29) ci hi.

“…duisung thingkung pan a piangte na ne tu uh hi” (Pian.3:18) ci si hi. Pathian ii a dei maksak sia, sa ne ngawlin nga le tee bek neak tu hi a, tabangin nga le tee bek neakna sia, leitung ngam mun khakhat ah “PIANCIL 1:29 AN” (Genesis 1:29 Diet) kici a, Americate in “HALLELUJAH AN” (Hallelujah Diet) ci a, Europe ngamah “MEDITERRINEAN AN” (Mediterrinean Diet) kici hi.

Leitung pianciil hun, nga le tee bek neak tu a kithupi sak hun lai in, mihingte nuntak kum sia, kum 1000 paam teng veu hi a, ahihang tuipi liim zawkciang kum 1300 paam khawng, Moses hun khawng ciang, kum 120 kiim khawng bek a kinuntak sia, bang hu hi tu ziam? Nga le tee bek a kineak lai, a khan kum uh sau ahile, nga le tee ma tam ih neak tu kisamh hi ngawl tu ziam?

Khatvei lai in, Mangkaang ngam ah, thuak pilna taw kisai in, sa ne te le sa ne ngawlte sung, a kikat ciang, mihing 8170 a ki-etna sungah, sa ne ngawlte ii thuak sia, sa ne te a sangin phazaw hi ci in mu hi. A syavuante ii sonna pan, kum 30 sung sa ne ngawlte sia, kum 10 sung sa ne ngawl bekte sangin a thuak pilna (IQ) mat 5 in saangzaw hi. Sa ne ngawl mihingte sia, a tambel numeite hi a, tua zawkciang sumneite le pilna neite veuhi, ci in mu uh hi. Kum 10 sung sa ne te sia, kum 10 sung sa ne ngawlte sangin a thuak pilna (IQ) mat 10 in niamzaw hi, ci in mu uh hi.

Tu nung kum 100 khawng lai in, Himalaya mual nai ah a teang Hunza a kici minam khat ii a nuntak kumkimhawm (ပ်မ္းမွ်အသက္) sia kum 90 pha a, pawlkhat bang kum 120 dong nungta uh hi. Dr. Robert McGarrison in 1940 kum sungin, Hunza minamte nuntakzia a katsuut ciang cancer natna, pumpisung meima, ngilpeang le ngilzang sung natna khat zongh mu ngawl hi. Lungtang natna le chikhang natna zongh om ngawl het hi. Cidamna sang mipilte in a kat ciang, tua minamte in sa ne ngawl, antee le be veu ne a, tui thiangtho vaset veu dawn a, nisim in tukna dianna nei tawntung uh hi, ci in mu hi. Tua hu in a khan uh sau hi, ci hi.

Ahizong, 1949 kum, Pakistante taw a kingawm uh ciang, a khan uh tom uh hi. A an neak uh kilaih a, sa le sathau ci bangte tam ne a, tua hang hi, ci in mu uh hi.
Tuhun ciang, leitung ah a cidam le a khansau minam te ii anneakte a ki-et ciang, nga le tee veu tam mama ne in, a sa neak tam ngawl a, a neak bel uh sia, pumpi cidamna a pia ngasa veu hibel hi, ci in kimu hi.

Ei Khamtung ngam sia thingnga thingtee tam mama piangna ngam hi a, cidam natu a kisamh thingkung lopadangte zongh ciing thua lai leang a, sa neak tu bebek lungngulh ngawlin, leitung pianciil pan Topa Pathian ii a sungah a cidam natu dat a koi khol thingnga thingteete, a tam thei zaza in ne leang, ei zongh ih cidam in, ih khansau tu a, midangte dungawk kul tuan ngawl tu hi ngawl ziam! Topa vawtsa thute hu in, Topa tungah lungdam ko tek tawng!

Dr. Mang Cin Pau (Mangpui)
Doppha: 1.Dr. Don Corbet 2.The Good Health
Note: Khuavaak (06) pan kilakik hi.
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,411 hits

A Lui Te

Live Trific

google-site-verification: googled172884ff34d55c0.html