Nikonghong

Home » Sizang (USA) » Thanksgiving le Sizang Mi

Thanksgiving le Sizang Mi

Thanksgiving ii khiakna sia Pathian tung ah lungdam kona a hi hi. Leitung ah minam tam mama te in Pathian tung ah lungdam ko biak piakna kinei tek aa, a hun sia khat le khat kibang ngawl hi. American ah thanksgiving sia kum sim November tha nipi 4 na ii nipizawk ni 4 ni (Thursday) ni a hi hi. A ni zui in kivawt ngawl hi. Tua ahikom 2011 kum thanksgiving sia November 24 ah tung ahihang, 2012 ciang November 22 ni hi tu aa, 2013 ciang sia November 28 hi tu hi.

American te in thanksgiving avawt kipat sia a nanam in kison hikale, 1621 kum Massachusetts state Plymouth khua ah mikang te le Indian te a vawt khop uh lungdam ko neak khopna sia a tambel kison aa, kiciamte hi. Mikang te Europe pan America leitang tung hong thet sawng lai khua thak, mun thak ii om zia te tel cian ngawl lai a hi uh man, haksa sa mama in tam mama thi hi. Tua hun lai in America leitang tung ah a teangtopsa ahi Indian te in, bangbang lo tho ta, bangbang nungta tu ci sia na hil uh hi. Tua ahikom Europe pan a thet sawng lai bang hi ngawl in, ngam thak, lei thak ah nuntak daan hong thiam uh hi. A thet sawng lai bang in thi ngawp nawn ngawl hi. Tua ahikom, Pathian tung ah lungdam a na ko uh ahi hi. Indian te zong in hu, panpui ahikom, amate zong tua lungdam ko neak khopna ah na sam uh hi.

Sizang mi te zong US ngam ih thet zawk ciang, “Rome ih theng le Rome mi te bangma ngamta tu” ci in kawl te paunak om bangma, American ngam ii thanksgiving sia kum simma eima san tek ah kivawt hi. Mikang te in Thanksgiving sia pawlpi zui hi ngawl in, innkuan zui in vawt zaw uh hi. Thanksgiving ni sia innkuan ki siktua ni, kimu ni dan hong suak hi. Ei Sizang mi te laleao ciang, khat le khat aki meal he tingteng vive kihi siat lel tana, inn kuan zui ci zong, pawlpi zui ci zong ei atu sia kibang siat lel ci leang kikhial ngawl hi.

2011 Thanksgiving vawtna teng en leang, a tam zaw sia SBMC pawlpi lampuina taw akivawt ahi Frederick khua sung hotel khat ah, pai in vawt uh hi. Inn pan neak thei a keng thei teng in keng aa, la sakna, Topa tung ah lungdam kona, biakpiakna te vawt in nuam tak in vawt ci in kiza hi.

Calvary Burmese Church pawlpi pan Sizang u le nau pawl khat in Laurel khua Pa Nang Khan Pum inn ah ki situa in neak khopna ma vawt in nuam tak in thanksgiving hun te na zangh thei uh hi.

USSBC pawlpi zong thanksgiving ni Upa Tual Vum inn ah, pawlpi by law, constitution et khopna le nitak an neak khopna vawt aa, nuam tak in hun te zangh thei hi. November 26, Nino ni ah ngupna thusonna le tentan khat vawt thei hi. Tentan sung ah, Rev. Kip Thian Pau in ngupna (salvation), s/m Awi Khawm Huai in nungzui hina (Discipleship) le Rev. Dr. Thuam Cin Khai in Pawlpi mi hina (Membership) taw kisai hilna nei thei hi. Thu ngai tu in mihing 15 kiim khong bek pha ahihang, nuamsa mama in a khiakna nei in thanksgiving kizangh thei ci in lungkim tek peuma uh hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Twitter Updates

Error: Twitter did not respond. Please wait a few minutes and refresh this page.

Live Trific

google-site-verification: googled172884ff34d55c0.html