Nikonghong

Home » Leitung » Leitung Ah A Thiangtho Ngawl Bel Munh Te

Leitung Ah A Thiangtho Ngawl Bel Munh Te

By, Zaangsi Phualva

Leitung ah mihing awn 7000 bang pha zo ahikom, mihingte hangin kiim le paam a thiangtho sitset mun tawm vaial hi. Leitung ah a thiangtho ngawlbel, a niinbel mun 15 te a nuai a bang ahi hi.

1. Citarum ngun (Indonesia)
Indonesia ngam a om Citarum ngun sia leitung ah a niinbel, a thiangtho ngawlbel ngun ci in kiciamtee hi. Hi nguntui zangh in a nungta mihing awn 5 bang pha a, ngun hui ah teangin, nguntui zangh, nguntui ne in nuntakna zong uh hi.

(Citarum ngun sungah tui taw aluang khawm niinteak)

2. Chernobyl (Ukraine)
Chernobyl khuapi sia Ukraine ngam saksang ah om hi. 1986 kumin nuclear datset phualpi puaktham a, leitung ah nuclear hangin a nasiabel ngimna thuak hi. Tua hun lai in inn 14000 vaal om hikale tu hunin nuclear dat ii ngim ngasakna hangin a teentol om nawn ngawl phial hi.

3. Linfen (China)
Sen (China) ngam ah om Linfen khuapi sia leitung ah vui a niinbel khuapi ahi hi. Suangmeihol khuk, set phualpi pan a piang meikhu, mawtaw pan a pusuak meikhu te hangin khuapi sung meikhu in tuamcip hi. Vui niin tu ci son ngawl muna theampo meikhu hangin khuaziing nuam bang hi liang hi. Hi khuapi inn pua sang ah puan bang pho hi leang a ko maa in a vom suak tu hi tuak liang hi.

(A nuai ah, Linfen khua nitdaan youtube sung pan kien thei)

4. Saksang Pacific Tuipi ii luanna tui lampi
Pacific tuipi ii lai ah a laam leitung pan a kivawt niinhon, niinlom te saksang Pacific tuipi luanna tui lampi ah tui taina zui in kikhiin a, a tuanin plastic taw kisai tambel hi. Tua niinlom sia tuikul bang phial in om a, a maitang panin pi 30 bang tui sungah om hi. Tua niinlom tui tung a laam sia ii a letna sia Taxes State ii a zaa nii bang pha tu ci hi.

(Click on image to enlarge)

5. Rondonia (Brazil)
Rondonia sia Brazil ngam ii a saksang bel a om state hi a, Amazone dui thukpui ii thingkung a kamhbelna mun ahi hi. Thingkung tam mama lo thaw natu le an thing tu in kiphuk a, ngam kaang mei ii lal sakna hang si taw ngam lalthamna mun ahi hi.

6. Yamuna (India)
Yamuna ngun sia Ganges ngun pan a kaa, ngun lianbel ahi hi. India ngam Delhi kantan in luang ahikom Delhi khuapi sung pan niin kivawk te ii 58% bang hi ngun sungah kivawk hi. Tua hi kasap India ngam mi awn tam mama te in niinteak taw a kidim hi nguntui ma tui zak tui neak in nei veve uh hi.

(Yamuna ngun sung ah India patangte kimai)

7. La Oroya (Peru)
Peru ngam a om La Oroya khuapi sia meikhu ii tuamcip leisung sumpiang thiansuana khua khat hi. Tua khuapi a om patang 99% sia a chi sung ah hakdat (lead) a om tu za sangin a tamzaw pek om hi. Leisung sumpiang thiansuana set phualpi koina ahikom 1922 kum pan kipan kiim le paam a thiangtho ngawl hi zo hi.

8. Lake Karachay (Russia)
Russia ngam a om Karachay Tuili sia nuclear taw kisai a encikte (The World-watch Institute on nuclear waste) ii pualaakna, a sonna bang ahile leitung ah a niinbel, a thiangtho ngawlbelna mun khat hi ci hi. Soviet Union hun lai in zongh nuclear taw kisai vanh te a kivawkna mun ahikom tu hun ciang tua tuili ii radio dat kisatsuana (Radiation Level) nai khat sung bang thuak leang a kithi thei tu za hi zo ci hi.

9. Haiti
Khatvei lai in Haiti ngam ii 60% sia thingkung a po duipui hikale tu ciangin, ngam ii 2% bang bek thingkung om lai hi. Haiti zinliinna hangin a ngam ii kiim le paam taw kisai tam mama siacip hi.

10. Kabwe (Zambia)
Leisung sumpiang vawtna hangin Kabwe mualdung sia hak (Lead) le Cadmium dat taw in kidim a, tuasung a teang patangte ii chi sungah hak (Lead) dat a om tu a kilawm sia sangin a zaa 5 pan 10 ciang bang saangzaw hi. Tua bek dom ngawlin leitangh mama bangma kiciing thei nawn ngawl hi.

11. Appalachia (Virginia)
Mual bup to tham, dynamine taw kaptham in leisung sumpiang laakna sia kiim le paam a lal sakbel lampi khat ahi hi. Virginia ii saksang Appalachia mualdung dawn teng sia suang meihol laak natu in kito tham, dynamine taw kaptham uh ahikom a thiangtho ngawl leisung sumpiang thikte kizelh a, luite ngunte neak thei ngawl, zak thei ngawl ngutui (poison) luanna lui le ngunte suak hi.

12. Dzerzhinsk (Russia)
Russia ngam a om Dzerzhinsk khuapi sia chemical taw kisai a thiangtho ngawl bel le chemical hangin ngu (poison) suak a tambelna khua ahi hi. 2003 kumin mithi sia a suak a piang sangin 260% tamzaw ci hi. 1930 pan 1998 hun sung chemical taw kisai vanh pha ngawl a kivawk sia ton 300,000 bang hi a, bawlpel takin vawk cip lelna khuapi ahi hi.

13. Riachuelo Basin (Agentina)
Agentina ngam a om Riachuelo Basin a ci sia tuiluanna ngun lian khat hi a, niin (Pollution) ci nopna hi. Ngundung tuivaal ah setinn setphual 3500 vaal, mizawngte teenna hawng 13 le ngun sungah a kitum sak tuiniin vawkna dot (pipe) a kisim zo ngawl za dongin om hi. A kidalna a om ngawl niin kholna phual 42 zongh tua ngun vaal ah om hi.

14. Vapi (India)
India set phualpi (စက္မႈဇံု) ii thang sang a om Vapi khuapi sia chemical taw kisai vanh vawkna phual khat hi. Khuapi ii lei nuai tui sungah a kihel pada (mercury) sia a om thei za, a kilawm za sangin a zaa 96 in tamzaw hi. Heavy Metals te zongh vui sung le tua mun pan a kivawt vanhte sungah kihel hi.

15. Leitung totna lampi (Earth’s Orbit)
Ih ngaisut bat zawk ngawl zongh hi tha vak. Van awng pui sung ngangawn thiangtho nawn ngawl ci hi. Leitung ii totna lampi kiim le paam tengah pound awn 400 bang a pha niin phual in zui a, tua sungah nut(nat), nut tang (nat tang), thik bek, carbon,… cite ban ah a lal rocket (အာကာသယ်ဥ္) buppi ngangawn kihel ci hi. Tuate in leitung pai, leitung kikhiinzia zui in van awng sungah laam uh a, satelite, communication taw kisai le rocket hawl, rocket uk te nawngkai sak thei zo ci hi.

Ngaisut huai
Hi bangin a tunga mun teng le leitung mun tatuamte niin vaial, thiangtho ngawl vaial a hina sia kuama dang ii vawt hi ngawl a, mihingte ii vawt vive ahi hi. Ei ngam zongh mihing tam vaial a, set zakna a khanto vaial hun ciang kiim le paam kepcingna phatak ih nei bale a niinbelte sung ih kihel maw batu hi. Lam khat pan Singapore ngam bang leitung ah a thiangthobel ngam ahi thei sia leisung sumpiang tam a pian ngawl hang le kiim le paam kepcing theina a nei zawk hang hi ci leang kikhial ngawl tha tu hi. Ih Khamtung Zongam zongh leisung sumpiang a om ngawl sia kiim le paam thianthona khat hi bilbel a, ahizong mihing tam vaialin kiim le paam kepcing natu ih seam bale ih ngam niin maw tuan ngawl tu hi. Mihing tambel ngam ahi Sen (China), India, … ci ngamte le kiim le paam kepcingna a kin ngawl, a bawlpel ngam te ma niin vaial ci sia kimu thei hi. Tua ahiciang ei zongh ih ngam sung a thiantho natu ih nasep maa panna te ah bawlpel ngawlin citakna taw kiim le paam keamcing thiam tek tawng.

Doppha:- Health Digest Jounal, Vol.7, No.5, 6Oct:2010
– The 15 Most polluted places in the world

Heaktu: – The Siyin Baptist Vol 54 pan

Advertisements

1 Comment

  1. anseaulme says:

    Amazing !!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html