Nikonghong

Home » Politic » USA le Kawl Ngam Kizopna

USA le Kawl Ngam Kizopna

American te Secretary of State, Hilary Clinton November tha bo Kawl ngam khuapi Naypyidaw theng hi. Kum 56 zawk ciang American te ulian bel khat Kawl ngam hong thetna ahi hi.

December ni 1 nitak sang in president U Thei Sein, Pyithu Hlutdaw chairman Thura Shwe Mann, Amyotha hlutdaw chairman Khin Maung Myint le foreign minister Wunna Maung Lwin te taw kisi thu sonna nei tu hi.

Kawl ngam le US ii kizopna taangthu en kik in hi leang Min done Min kumpi hun lai pan kipan om zo hi. 1853 kum ah kumpi a suak Min Done Min in 1856 kum in US president John Buchanan tung ah lai thak ngei hi. President Buchanan in zong 1857 kum in Min Done Min lai thak kik aa, Kawl ngam taw kiit kilem in kizopnopna thin a neina le, Kawl ngam minamdang khut nuai a thet tu a oai ngawlna thu at hi ci hi. Ahihang 1948 independence nga zawk Fah-Sah-Pah-Lah (ဖဆပလ) kumpi hun sungah ki nasia zop bel hi. Independence nga sawng lai, Kawl ngam ah communist party le veisang kai (leftist) party te haat mama ahikom, tute nan kik natu Prime Minister U Nu hun lai US kumpi te taw nasia kizop mama hi. US kumpi te tung pan Asia Foundation, Ford Foundation te tawn in huna tam ma kinga ngei hi.

1950 kum Shan state ah Sen kaang, Kuomintang te hong tum ciang US te in huna pia ahikom Kawl kumpi le US kumpi ki laklaw ah tawm na ki tel khial uh hi. Sen kaang, Kuomintang te sia Sen Communist Maosi dong kumpi a do tapung te ahi hi. Tua hunlai CIA te in Shan state Mine Sat khua paam ah vanleang len no khat Kawl kumpi heak ngawl in vawt ku aa, Kuamintang tapung te nasia tak in napan pui aa, leitung tadensar te tungah datpung taw bang taw hong suak ngei hi. Ahihang 1988 Kawl ngam buai mama kum dong US Kawl ngam ki zopna om suak hi.

US le Kawl ngam ulian te kizopna pawl khat en tu hi leang, 1952 kum sungah, US president Richard Nixon Kawl ngam hong haw aa, U Nu zong US ah haw hi. US Senate le House te 2 ah U Nu in thu son khuan nga hi. Korea ngaal lai US vanleang hawl te pawl khat Sen te in mat sak ngei aa, tuteng suataakna nga natu U Nu in Sen le US kilaklaw palai sep sak ngei si hituak hi. President Eisenhower hun lai hi.

Brig. General Maung Maung hun, 1960 mahiat kawl ngam ngaalkap uliante tam ma US ah ngaal lamsang pilna sin ih kipai sak bek dom ngawl, CIA taw zong nasia kizop mama ngei hi. MI pan midal Tin Oo ci in ih heak, General Tin Oo, General Thura Kyaw Htin, General Tun Kyi, General Nyan Linn, Col. Aung Koo cite sia USA ah pilna sin a pai ngei Kawl ngam ngaalkap ulian pawl khat hi.

1962 U Ne Win in Arnar hong laak lai in US te in bangma kamkum ngawl hi. Sen kumpi te in Kawl Ne Win kumpi sia Fascist Ne Win kumpi ci in Beijing pan lang vadeap aa, Burma communist party te sen ngam sungah omsak aa, nasia tatak in pan pui hi. Kawl ngam le Sen te kilaklaw akisiat bel hun hi. Vietnam ngam sung zong ah thangsang le saksang ngaal kido in Vietnam ngaal a nasiat mama hun ahihi. Sen te in Ne Win kumpi ataak thathei natu BCP (Burma communist party) nasia tatak huna pia aa, kawl ngam communist ngam suak sak nuam in hanciam mama aa, USA te in Vietnam te Democracy ngam sua nuam in South Vietnam te nasia tatak huna a piak hun ahihi. USA te in Vietnam le Indochina sung teng a laang communist te sucipmit suk nuam leilam ahikom Kawl ngam sia a hi theiza hong kam kum ngawl hi. Ne Win le Sen kumpi kilaklaw kizopna hoi ngawl si ahikom Ne Win kumpi sia pha sa vavan ngawl ahihang, Sen te lang pang tu in Ne Win kumpi sia a uk bangpo ngamta sak hilhel, tha hilhel hi. Kawl ngam sia veisang ahizong ziatsang ahizong koi sang mama kai ngawl din mun ah na om kici thei hi.

1966 kum ciang in General Ne Win USA pai aa, president Johnson taw kimu hi. Tasia zawk nungsang Kawl ngam le US ii kizopna sia hong dai vaial hi. Ahihing, tasia zawk zong bing le kham thei ngui thei vawt te zon natu le sim natu US te tungpan huna pawl khat sia kinga lai hi.

1988 kum ciang, Kawl ngam bup buaina ah Kawl kumpi in mihon te ciza ngawl tak in hong nuai valeap lek, mipi thu neina (rights) hong thu sim ngawlna hong tam vaial ciang in US le Kawl kumpi ii kizopna sia aniambel dong in taak suk aa, tu ni dong ciang Yangon ah US in ambassador ngangawn hong koi ngawl ngawl aa, consular bekma koi hi.

Kum te hong bo tato aa, nuntaak zia le ngai sutna te zong hong kilai tatou hi. Sen te hong khangto mama aa, ngaal vanh lam sang zong ah hong haat vaial hi. India zong hong khang mama aa, ngaal vanh lam sang hong haat mama hi. Ahihang US te in India te khut sung a nei ngaal vanh le Sen te khut sung a nei ngaal vanh te a mu dan kibang ngawl hi. India te sia patang ciim mama khat ii thau ahibawle naam a toai daan in mu aa, Sen te aa sia, patang ngilo vaphuai mama khat ii thau ahibawle naam a toai daan in mu hi. Tua ahikom Sen ngam in kiim le paam ngamno teng a khut nuai sua nuam in hong kipat tu sia, mu khol uh ahikom Sen ngam in Kawl ngam sung hong nasia luut leima khiang man leang ci ngai sutna taw Hillary Clinton Kawl ngam hong haw hi ci in a ngai sun zong tam mama hi.

2020 kum khawng ciang in leitungbup business theampo ii 50% sia Asia ngam sungah om tu ci in business lamsang pilna neite in mu khol hi. Asia business theampo ii 60% bang sia South East Asia le India continent sung ah om tu in ka um hi. Tua ahikom, Indian Ocean le South East Asia ii dawn ah a om, Kawl ngam tungah thu hong nei nuam tek tu, a hi theiza hong tum nuam tu ci sia ih mu khol thei hi. US le Europe teng in Kawl ngam hong nusia vaial le, Sen te hong haat vaial tu hi lel thong hi. Kawl kumpi te mihing thu neina (human rights ) zakta bo ci in abo sa hun sung ah hong nusiat bibek bang in mai lamsang hong nusia bikbek ngam nawn ngawl tu in ka um hi.

TN

Source: Irrawaddy, ABC, Wikipedia

Advertisements

2 Comments

  1. Thangta' pa says:

    Sizang kamin thu bel ka son theih loh hang, lai pen tel sam ing, i Tedim kam bangin hong suaksak zo lai lecin mipi in tam tel zaw tu-in ka um hi, lungdam.

    Thangta’ pa
    Seoul

    • thawngno says:

      Thangta’pa, comment na na koih lungdam. Sizang pau in lai a kisuak sak tawm lua peuh mah ahih ciang in Sizang pau ka zatna thu hi. Just want to uplift Siyin literature. Tedim pau in lai suak tam peuh mah hi. A sem ding zong tam, a sim ding zong tam hi. Tedim pau pen mi a tam zaw ii zat kampau ahih bangmah pi cing mahmah khin ta hi. Mai lamsang ah kei lai at te sim taak ki sa in, kisamh hong kisak aa leh zong Tedim pau in at ding zong ong hak khat ning.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html