Ngeau-ngaw Hau Bel
Tommaso aki ci Rome khua ah om ngeau-ngaw khat sia leitungbup ah ngeau-ngaw a hau bel ci hi. Kum 94 a pha a to nu Maria Assunta hong thi ciang a neisa Euro 10 million sia tua ngeau-ngaw in lua hi. Tu laitak in tua ngeau-ngaw Tommaso sia Euro 10 million bek hi ngawl Rome, Milan le Calabria khua te ah inn le taik-khaan (apartment) tam mama nei hi.
Italy te upadi ah nganhing te in to te neisa lua bup thei ngawl hikale, a muan huai a cing a keam tu om po le, nei thei zangh thei hi ci hi. A to nu thi ma tawntung a keam, acing, a ou nurse ahi Stefania tungtawn in Tommaso in tua hauna teng ama neibang in a zangh thei suak hi.
__________________________________________________
Ha Syavuan Khat in John Lenon Ha Lei
Canada te ha syavuan (dentist) khat a hi, Michael Zuk in Beatles te la sa thiam a minthang John Lenon ii ha tang khat sia ley-laan vanh zuakna (auction) pan US $ 31,000 taw lei hi ci in BBC in son hi. Ama in tua John Lenon ii hatang sia ha bawl in a vaak kakoaina theampo le apaina college te ah ngual mu tu in ken sawm aa, tua zawk ciang ama sii-khaan ah hoi tak koi sawm ci hi.
1960 kiim lai John Lenon in a ha a phai zawk ciang, tua ha sia a inn naseam nu pia ci hi. A vawk tu in a piak ziam tua ahibawle, tua naseam nu ii tanu sia Beatles te a paakta mama khat hitana a tanu atu a piak ziam hi tha tu hi ki ci hi.
__________________________________________________
Romania Ngam Ah Nau Min Ukpo Kiphuak Thei Ngawl
Romania ngam ah kumpi te in patang min sia ukpo kiphuak thei ngawl tu ci in upadi vawt hi. Tua upadi bang ahile, patang nauno min phuak ciang a nuizaak huai, kam mal lamdang, a tumdang nano phuak thei ngawl tu ci hi.
Hi upadi hong pian theina thu in, pa le nu tam mama te in a ta te min sia Emperor, Police, Tarzan, TV set….etc ci khawng in phuak zazan uh ahikom hi ci hi.
Eima sang zong ka no lai ciamui khat ka za ngei hi. Syavuan pa na suak nuam le na ta nei phit sia Syavuan ci in min phuak le te, a pa sia Syavuan pa hong ki ci pai tu aa, a nu sia Syavuan nu hong ki ci pai tu ci te pawl hi ngawl tu zi….
__________________________________________________
Vanleang Hawl Kawm Mu Tha
Hong Kong te ii vanleang line lian bel ahi, Cathay pacific airline te ii vanleang hawl pilot khat sia meter 11,000 sang na pan a lean laitak mu hi ci in zum ah thu sit ngei uh hi. A vanleang hawl pui pilot khat in datpung zai hi tuak hi.
Thu khensatna pan, khual khawla lean ciang minit 40 sung mut khuan nga aa, tua a thu neina sia a zangh hi, maw ngawl hi, ahihang vanleang hawlna khaan sung ah datpung zai khuan kipia ngawl hi tana, tua datpung zai pilot pa in upadi paltan aa, dan piak a thuak kul tu hi ci hi. (Radio Svoboda)
Source: VOR (Voice of Russia)
Nikonghong 