Nikonghong

Home » Ngeina » Thu Thun Le Ngeina

Thu Thun Le Ngeina

Thiampite 23:2 Minam ngeina,
“Constitution” Pathian Kammal sungah a omsa thu hi. Thuhilkikna 32:7 A bosa hun taangh lai thute Biology (or) Chronicle te ngaisun kik suut kik tavun ci hi. Sawltakte 17:26 sungah Pathian in minam bitphua a, a teen natu hunte, munte le ngeinate koi sak tingtengh hi ci hi.

Tua hi a minam khat in ih piang na le zui tu ngeina le thuthun a kinei tek hi a, Sizang mite zongh Pathian in minam, kampau khat ma in hong vawtte kihi a, nop thei hun, nop mawk hun le biakpiak hun ci in kikhen a, biakna le ngeina ci in ih pu ih pate in na na nei sinsen uh hi.

Tua hi a, nidang lai ih pu ih pate in doai le kau bia ahizongin, Pathian, nungzai bia ahizongin, nop hun daa hun le ni thupi le poai a vawt uh ciangin vawt thathong ngawlin, citapa/thiampupa, phuisampa tungtawn in, zui tu ngeina le thuthun na nei tiuteu hi. Nop ni daa ni, thina, nunna te le poai vawt hunte ah mihonte in amate uuk tek po in om ci bang hi ngawl a, lap ngangawn zongh nuam ta ci in, laam memeen ngawlin citate thupiak bangin ahun le a mun taw kizui in lap ngangawn thuthun (စည္းမဲ့ကမ္းမဲ့) khat taw laam bek hi. Tua thuthun paltan te sia doaiphit ahibale ngeina palsat in kingaisun a, ciina thei, kithi thei ci za dongin um in kuama in ngeina le thuthun “Constitution and Bylaw palsat ngam ngawl hi. Tabang za in upa le muanna a nei uh za khat ma in thuthun paltan ngam ngawl uh ahikom, ciidam in khansau takpi uh hi. Zui tu ngeina, thuthun ci sia minam kim in kinei tek a, Sizang mite ngeina, ih Zominam ngeina ci in kinei a, ciik thei mama hi.

Tua ahile ei khangthak te le Tapidaw hi ing, piangthak ing a kicite in doai bia hi, kau bia hi ci in ih nomu mama ih pu ih pa ngeina le thuthunte zuidan, pomdan, updan pha zo ngawlin (©p5tooo6»$) in biakina sung hikale, nop hun daa hun, poai hun, biakpiak hunte sungah ih uuk bang po in ih om tu kilawm ih sa ziam? Ih pu ih pate ii a biak doai le kau hun lai in taza ta in ciliapna le zatakna taw ngeina zui in leen thei ahile ei khang kikte ii ih biak Pathian sia, a lianzaw hi ngawl ziam? Pathian maan biak hun citak hun, thumaan hun, na theampo etkaak thei hun, Tapidaw pianthak hunsungah u le naute awng, ih pu ih pate ii zu neak, sa neak ahizong ngamtat
iuheaknate ahizongin, ettee kik thei leang a, ki puapha thei leang cina taw ahizongin, minam thupi khat a ih pian ciang, ngeina ci in zui tu, “Constitution and Bylaw” cite sia biakna sang hikale kipawlna khat papo ah ih nei ngei thuthun ahi\bangma in ih Sizang ngeina sungah a thupibel khat ahi nop hun, daa hun, thi ni, nop ni a, ih pu ih pate ii zui ngeina le thuthunte ih tel a, ih ettee kik thei natu ci in hi SCC Annual Magazine sungah Mithi maina, Mithi nginna le Mithi vuina ci in, keima ii heak ban, tel ban ciaciang bek hi ngawlin, ih pu ih pa ngeina sungah ngeina len ngei, hong nusia sa pute pate dok vateak, lai taw ka teptee thei sun teng khangthakte in ih tel kul a hina taw2011 kum SCC annual Magazine sungah kong suasak ahi hi.

Minam dangte ii taangthu (History) bangzata in he phial, tel phial tu hi ka leang, eima Sizang ngeina, thuthun, paidan, taanghthu te ih tel bale minamdangte simmawk, zawnsak in ih om tu hi. (Deut 32:7) na thu ngaisun kawmin ih ngeina paizia kan tek tawng.

Cita Palap. a kizakdan le a kizakna mun
Mithi mai, Mithi vui le Sano aih hun, Palap laam tu in a kipat ciang, innkaa tung leitual nguamung zaang a saksang ah “suumh” kot thum kot phot hi. Tua suumh kot thum kot in a laam zawkciang “liam” uh hi. Mithi mai ahile bitha nuam thaam mung sia kantan in paiphei suakin laam thei ngawl hi. Mithi vui ahile inn sungsang “zu bealpi” ngakna mun kantan in, paisuak in laam thei ngawl hi. Zu bealpi ngakna pan in khuang sat hamtang hi. Sano aih hun ciang leteau in leitual nguamung khuam ii inn sungsang kantan in pai thei ngawl hi.

Mithi mai ciangin thaam mung nuai ah innteak zaangpi, zaangh khat ij zu, “Zaangh leih zubeal khat” kiluup hi. Tua bealpi zu ngakna mun kantan in kilaam thei ngawl hi. Hi bangin suumh kot thum pai a lap zawkciang a liam sia a kipatna pan liam a, a mai a pai tuak, a nung leelam in pai tuak, nungkiin kikin a kipatna nii vei, mai a thetna nii vei veve zawkciang in a thum veina a cin ciang, kot pai kik leleau in, kong sangah nii vei, innsung sangah nii vei, a thum veina a cin ciang vakhu tawn in tawn vekeu hi. Vakhu tawn ci ciang kal khakhat veu in suan a, kilawn kawm vazeu hi. A vakhu tawn vakeu bek sia ngangawn zongh, lamtak sanga meipum (sial, loai, khui) ci bang khawngte a ngo zona mun ahile sali veina in kiheak a, thum vei dong tawnin tua zawkciang, kilum heak in, a nii vei zawkciang palap a lap man hi. “A lum sui” sia nga vei sui hi. Sali vei sui thei ngawl hi. Banghangziam cile vok po, keal po ngo zo bek ahihang hi.

Palap vakhu tawn, a tawn ciangin ahibale a kalsuan ciangin a veisang peang suan masa phot a, thum vei a sii dong, thum vei a sii zawkciang kilumheak a, a ziatsang ah suan hi. Nii vei dong a man zawkciang, a tawpna ah khuang kivil in, a la sa kik a, a la a sat natu mun dongin laam hi. Lasakna tu mun ciangin sano aih le mithi vui ahile kong sang zubealpi ngakna hui panin la kisat hi. Mithi mai ahile innsung sang thaam mung nuai panin la kisat hi. “Huizaa, Hii, Huizaa hii hii Huih” ci in la sat in tawlnga hi.

“Lappi denna” la ngui thum teng sia hi bang danin laam hi.

Vakhu tawn ciangin veisang a suan masak sali vei zawkciang, a ziat sangah tawm kiheakin suan kik a, thum vei dong kiheak hi. Thum vei a cin ciang kilumheak a, ziatsang ah suan sali veina ciangin vei sangah kiheak a nii veina dong suan hi. Tasia a man zawkciang in “Khuangvil” a, a la sak kik hi. Lamtak sangaw sia vok le keal khawng bek a ngo zo a, a kitung zo ngawl ahile a laamte in a kalsuan nga vei bek masuan thei hi. Mithi sung ahile “Aksa baak” hun ciangin vakhu tawn lap sia om nawn ngawl hi.

Ngalthiang aih le Sapi aih ciangin, Cita Palap lapdan:
Palap lap dan papo a vekpi in kibang siat hi. Ahizong Ngalthiang aih le Sapi aih sia Palap lap ciangin innkaa tungah Lappi a den tu ciangin zubeal lap zu ci in Zubeal thum luup hi. A lap ciangin a laam kotna ah tua zubeal thum teng sungsuam in laam hi. A lappi den ciangin kong sang khak sia le inn sungsang khak bel sia taw a kilaklaw tengah lappi deang hi. Lappi den tawpna sia kong sang lap zu luupna ah la kisat in lap kikhia hi. La a thipna sa in kitawlnga hi.

Bang mun tengah palap kizangh a om thei ziam cile “Taangh Ngeina” tatak a len bangkuate bek ah om thei hi.’

Biakna ngeina tatak a, a omna mun teng bek ma ah kizangh thei bek hi. Tua mun ah bang hun tengin kizangh thei ziam ci le:-

1. Sano aih ciang
2. Ngalthiang aih ciang
3. Sapi aih ciang
4. Mithi mai ciang
5. Mithi ngin ciang
6. Mithi vui ciang

ci bang hun teng ah kizangh hi. Hi sia hun lai in biakna le ngeina in kinei khawm hi,

Biakna le Ngeina vawt Palap daak tum hun teng:
Palap lap hun ciangin daakbu sia a laamte a kot pai kot thum a lap, a pai zawkciang daakpi tum pheang hi. Tua a lap po ciangin daakpi tum, daaklep kipan paih hi. Lappi denna ngui thum sung teng, ngai aihna mun ahile lappi den ngui thum le la thipna teng sak taw kizom in daakpi tum in sa sak hi. Lap lakaih sak man dongin daak tum top hi. A thipna a sak dong tum hi. Tuateng a man zawkciang, inn sungah koi zii hi.

Mithina mun ah daakpi tumdan:
Mithi vui tu ciangin thi innkaa daw nitak panin zingsang rtgal la tawp dongin daak kitum suak hi. Mithi pusua tu ciangin “buubeng la” sak taw kipan vaciat in, Tonko, Hang suan, Tongkim, Khua mi la pan kipan, Baibek la, Hangbal la dong daakpi veu kitum in, la kisa hi. Nitak sanolh hun, suankal dongin daak kitum tan paih hi. Inn sungah “sungmaii” ahizong “vui” ahizongin la sak patna le, inn tarn la sak lai tengin daakpi veu kitum hi.

Mithi maii hun ciangin a kimaii ni zingsang mithi pusua tu ciang buubeng la a pat sia, a kitum phitbek ma ahi hi. A thudangte mithi maii thu sungah hong kihel pheang tu hi. Mithi maii nitakin inn sung panin inn tarn la kisa a, a daak tum sia a zing nitak sang a tawp tu ciang dongin tum hi. Daakpi tum kik ngawlin kitawp thathong thei ngawl hi.

Kiminhlawna dan
Palap ciang kiminhlaw sia, mithi maii, mithi vui, ngalthiang aih, sapi aih, sano aih ciang ahizong, suumh kot thum veu pai in a lap zawkciang, “Liam” hi. Tabangin a liam sim veu in kiminhlaw tiuteu hi. Akiminlawna sia a tatuam om hi. Mithi minhlaw dan a tuam, ngai aih minhlaw dan a tuam, sapi aih ciang minhlaw dan a tuam ahi hi.

Sano aih ciang, Daak tum hun
Sano aih ciangin Mual panin khat vei kitum a, “Khuamui Zawlphai pui hausa la” sa in lappi den ciangin innthet dong daakpi kitum sak hi.

Sanolh ciangin daakpi kitum hi. Mual pan cia in inn thet ciangin Lappi den ngui thum sung teng daak kitum hi. Nitak lap lakai ciangin kitum hi.

Inn sungah inntam lasak kipat ciangin kitum hi. A maii nitak ahizong, a vui nitak ahizong sung tum ciangin kitum hi.

Saaibe thu
Saaibe ih ci sia “ngua” a kivawt tawm ahi hi. Tua saaibe sia a vawt ciangin “meipum” lamsang khui, sial, loai, siphu cite pawl a ngo zo ahile a mung, mung sali in zen hi. A naangpheak meak sia (9) dongin sato hi. Kipheak sak bikbek hi. Tua saaibe tung ahibale a sungah zuhaiphei khat koi hi. Tua haiphei sungah sapi baak hun pan kipanin aksa baak dongin zu tui topha kinei hi. Mithi pa, mithi nu a phii a piak zu taatsa tui teng topna in kinei hi.

Heaktu: SCC Annual Magazine 2011 pan

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Twitter Updates

Error: Twitter did not respond. Please wait a few minutes and refresh this page.

Live Trific

google-site-verification: googled172884ff34d55c0.html