Nikonghong

Home » Sizang » Peng Lam University

Peng Lam University

Leitung ah University tam kawm kalak sungah Peng Lam University zongh a na kihel hi lei hi. Hi university sia leitung ah a minthang mama sang khat hi a, minthang leilamh zaw bilbel sia, kuama na he ngawl liang hi. Hi University ah pilna sindan sia mundang a te taw kibang ngawl hi. Hi sia sin tu ci vakek om ngawl a, sin ngawl tu ci zongh om tuan ngawl hi.

Peng Lam’University pan a tambel ii a laak degree sia General Service [B. Gs] hi. Hi sanginn pan degree nga khat peuma sia leitung ah vawt mawk nei ngawl hi. Sep mawk zongh nei ngawl, heak ngawl zongh nei ngawl bang ahihang, vawt thei vaset nei ngawl, sep thei vaset nei ngawl, heak vaset zongh nei ngawl hideap hi. Peng Lam University ii thu bulphu sia “Heak ngawl nei ngawl tu, heak vaset le kul ngawl” ci dan khat hi. Kawl te na “အတတ္ၾကဴးအရူးျဖစ္” (atat kyuu-azuu phyit) ci bangdan hi.

Peng Lam University ah lai sin Subject nam tam tatak ma om hi. Ahizong subject papo a man dong kisin sak ngawl hi. Hi sang pan degree a ngasa te sia a Certificate lak ta bale zong en leang, ih khua sung ah ih inn paam ah na om lel hi. Hanbawm khawng sa thei napi, ngual a bangh hi ngawl hi. Lettama zongh diang thei napi ngual a bangh hi ngawl hi. Hi University ah အာကသယဥ္ vawt dan pan kipan inn nuai a, aklui cil nget dan dong a kisin sak hi. Aklui bangh a cil nget leang ki ne pal mama hi. အဂၤါၿဂိဳလ္ (Mars) ah khuai kai zon tu le ေျမရႈး၊ မိုးပ်ံ၊ ဂမၻီရ (myay shuu- moe pyan gambi yah) cite a kipan ngaknu kidan sak, lampai khial a, siakmit hekte bawldan dong a kisin sak hi. Pathian thu zong sin a, leitung thu zongh sin hi. Tulai information pilna ci khawng, Global Village vai khawng, S C C vai khawng dong ma sin neknok hi.

Ih innpaam, ih khua sung, ih pawlpi sung khawng ah kuama pok peu ngawl a, ama le ama a ki pok tan te sia Peng Lam sang pan degree ngasa te veu nahi paih hi. Khua le tui Pawlpi sungah “Keima a hanciam bel, keima a haubel hi vak ing, Pawlpi sung ah kei sang a hanciam zaw om buan teh. Keima bang  hi ve vua!” a ci tan te, nipi ni Biakinn theng lei tei ahihang Pastor pa thuhil lan a, laibu dang khawng a simte sia Peng Lam Syllabus a mansa te na hideap hi?

Bangbangh po ahizong Peng Lam University ah Professor seam tu te sia thu no hi tuan ngawl hi. University sang dangte
sang in a niamzaw tu uuk tuan ngawl deap hi. A mamaw leibak tu sia uuk tuan ngawl deap solnawn po hi. Tua hi a, tu laitak Peng Lam University Professor te ii tu hun paidan le a ngaisutnat  tawm ih ensuk lai tu hi.

(a) Golbal Village
Tu laitak numei patang theampo ii a son thei leitung bup khuano hi zo ci thu hi. Peng Lam Professor te muna ah leitung bup khuano khat ci sia, tu tawm a hong piang hi ngawl a, nidang pek in a omsa hi ci hi. Pathian in leitung a vawt lai khuano khat taw a pat hi a, tasia Adam Global Village kici hi. Khuano khat taw a kipan leitung sia khuano khat ah theng kik ahikom kot khat (circle) a cing hi ci in ngaisun hi.

Hi khuano khat taw a kipan Adam Global sia mihing le ngeina a tam vaial ciang Pathian in Babylon Tower ah mal tham siat hi. Pathian in information le communication pan a khen thap hi leitung sia tu in Technology Tower zangh in information le communication ma taw in hong ngawmtua kik hi ci in Peng Lam Professor te in ngaisun hi. Tua hi a, leitung khuano vai hi sia thu lamdang pi hi ngawl a, Pathian ii a ngeal diudeusa hi ci hi.

—>page 2

Advertisements

Pages: 1 2


2 Comments

  1. thawngno says:

    Sizang sung sia Pem Lam University graduate kitam bilbel tu um khi….

  2. khaipu says:

    tu bang va deap te ma hoi sa ing a zom zong sim nuam lai veang.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html