Nikonghong

Home » Sizang (Khamtung) » A Taangtungsa Ka Sun Mang Pawl Khat

A Taangtungsa Ka Sun Mang Pawl Khat

(Some Of My Day Dreams Fulfilled) By Kenneth Htang Suanzanang

Thuklai (Fort White) Tuimei:
A khang a khang in tuimei vak nuamin ih hanciam a, L.Tun Htawng (Chin State Cooperative) hanciamna zongh tangtung la kale, tua lai Ral Lian Sang Plan sia ma tu laitak a kizangh sia ahi hi.

27 Mar 1991: Sizang upa 14 le ko nupa in ‘tuinak-weir’ mun ka vil uh hi. Ral Lian Sang Plan (Suangpi) le Lian Kop Cin Plan (Sanlei) sanh mun nii ka et zawk uh ciang, Luipinaak pan ‘high head system’ taw tuimei nga natu ngaisun in, Zomual tawnin Luipi naak ka zong uh hi. Liang om ahikom Khai Nang, Hau Za’Pum, Mang Khaw Khai le Thang Khaw Lian te Luipinaak dong theng a, datpung hong zaih uh hi.- Hi plan sia Lian Kop in hong thinbot pui a, 1995 kum a survey sungah kihel hi. Luipi naak pan Zomual dong pi 3333; Zomual pan Khuum Tungnung pi 1515 ahi hi. Plan # 1: Zomual pan Luipi PH dong pi 6363; Plan # 2: Khuum Tungnung pan Luipi PH dong 4848′ ahi hi.

USA ah Techno a kici SDA company khat om a, tuate taw ka kizopna tam mama om zo hi. Weir, canal line,,pondage kul ngawl ahikom nasep tawm mama hi. Tuhun ciang PVC penstock hoih mama om zo ahikom, tu laitak ih zak mei a siat ciang hi Plan # 1 or Plan,# 2 khangthakte sep tu in kong nusiat hi.

14 Jun 1994: Hiangzing ngamdang mi 6 taw ka pai uh a, Sizang u le naute in honlap taw leangna hong do a, leangnate zongh nuamsa mama hi. Hydel ngetna lai khat hong pia uh hi.

16 Jun 1994: Hiangzing pan kathetsuk kik uh ciang ADRA Japan director Pastor Kiyoshi Fujita le Peter Cooper taw Japan Embassy ah First Secretary Mr. Kimata taw ka kimu uh a, tuimei $40,000 project khat ka kikup uh hang deadline kilap zo ngawl hi. Kilap hile, Ral Lian Sang et sia sep tu ahi hi. Japan Embassy taw kizopna hoih ahikom 1995 May ciang Mr. Kimata in Grass-Roots Grant Assistance $1.00, 000 nga natu hong Jen tan hong ci a, Lian Kop Cin Plan taw kiten ahi hi.

21 Apr 1995: Ministry of Energy (MOE) minister tungah Thuklai (Fort White) Hydel project atu technical assistance ngetna lai ka puak hi. 25 April ni ciangin Dy Minister in MD (MEPE) te vaipuak aap hi.

18 May 1995: Deputy Chief Engineer U Sein Ti in survey vawt tu thu hong pia a, hong piak engineer sia Lian Kop Cin (MEPE, Yeechaung Project) ahi hi. Lian Kop in 22- 29 May 1995 sung teng survey hong vawt sak hi.

6 Jun 1995: Lian Kop in U Sein Ti tungah survey report pia thei hi. 26 Jun 95: U Sein Ti in 200KW se $600, 000 bo tu a, diesel generator taw $114, 500 bo tu ahikom, na budject taw kinai tu hi hong ci ahihang Japan Embassy in tuijuei ma hong deisak zaw a, a nozaw sia taw ahizong seam zaw vun hong ci hi.

A ceiling sia $100, 000 ahihang, ih ten pawlkhat hong piak ngawl phamaw ahikom, US$ 100, 920 kinga hi. 1996 kum tha 2 ni 22 ni sun nai 2 hunin ambassador pa taw letmat ka thu hi. Sandy Dee, ADRA Myanmar Board Chairman; Mr. Kimata, the first secretary; Ral Lian Sang, MEPE representative le YSBC panin Zo Zam Cin Pau (Zozam), community representative in hong uap thei uh hi.

Sum $100, 920 Nga zawkciang Buai saan:
5 Feb 1996 ni in Japan Embassy te in $100, 920 nga tu ni hi. Golden Brothers Company taw,._Contract Agreement le, electrical, machinery, penstock estimate breakdown vawt kik in hong puak tan hong ci hi. Japanese GRGA tangkalh bangin, company 3 ii quotation kiten hi a, Golden Brothers te in zongh vawtsak takpi nuam hi. ngawl hi. Sum hong la ngawlin hong hu tek hi bek hi. 5 Feb 1996 Embassy pan lungdam in ka cia sia khuazing zo hi. Technical Consultant Peter Cooper le a zi Betty zum ah na om a, lungdam thu ka ko ciang thin uuk ma ma thonghial hi. 8 Feb 1996 ni zong ka kikamtam mama uh a, ADRA Myanmar Board Minutes ma kiten sa hi kasap, board approval la kik in. hong ci hi. ADRA Asia- Pacific pan zong’thukim sa sia, black and white taw approval la in hong ci hi. 9 Feb 96 ni Golden Brothers Co. taw Contract Agreement letmat ka thu uh a, ka puakik estimate taw kopin, Japan Embassy ah ka puak hi.

12 Feb 1996: Coopers te Golden Brothers te in seam takpi ngawl tu a, $100, 000 taw na zaw ngawl ciang Japan kumpi tungah ADRA min sia tu hi hong ci hi. YSBC in tavuan la tu hi ka ci a, tua ni Pome Ko Khai in YSBC Bank Account Xerox copy hong puak hi. Thinngim kawm pan ‘miracle’ khat hong piang hi. Telephone zum panin Singapore sam nu ziam hong ci a, ADRA phone nambat pia in Ken Flemmer taw haksatna ka kikum thei uh hi.

14 Feb 1996: MOE ah hu ngen tu in ka pai a, Advisor U Saw Lwin in ka lai ten tu hong awi bua hi. Col. Sein Tin Nyunt in MEPE ah U Sein Ti phone hong set sak hi.

16 Feb 1996: Singapore ADRA Regional Office pan Thuklai (Fort White) Hydro thukim khu hi ci in Fax hong puak hi. Mang Nang taw MOE ah Dy Minister U Tin Tun le Col. Sein Tin Nyunt ka mu uh a, hong hu tu khu hi hong ci hi.

20 Feb 1996: Minister le Dy Minister (MOE), MD (MEPE) application lai ka at hi. 21 Feb 96: Col Ngo Cin Pau taw MOE ah Dy Minister taw ka kimu uh hi. Major Lua Cin le Ngin Pau Pastor Sandy Dee (ADRA Board Chairman) le Pastor V. Kipzanang (MYUM Executive Secretary) kung ka haw pui a, Thuklai Hydel vai hong thukim pui natu thu ka sonpui uh hi.

22 Feb 1996: Tuni 2 pm Japan Embassy Contract Agreement sign tu hi zo a, Col. Ngo Cin Pau le Mang Nang Pr. Sandy Dee zum ah a tuam tetek in haw a, thuson pui uh hi. Tua ni ADRA Board in Thuklai hydel project approval vai kikum a, Sizang upa 4 in so.npui ahiciang uliante hong nial tu om nawn ngawl kawm pan member khatTh, tuak khua zong hydel project na vawt sak tu ahibale ci in hong pau a, tu sia a kipatna hi maisang ah ih vawt batu ziam ci in ka thin ka nipsak thei hi. Letmat thuna ah Peter Cooper pai nuam ngawl hi.

23 Feb 1996: Col. Ngo Cin Pau taw Dy Minister (MOE) le MD (MEPE) kung ka haw uh a, thu ka kikum thei uh hi. 25 Feb 1996: Vanleang taw Kalay ka theng to hi Zeechaung Project en kawm le Lian Kop Cin tonpui tu ka zong hi. 26 Feb 1996: Sizang hausate taw ka kisi uh hi. Lian Kop taw Ralliansang ii proposed canal line, pondage, penstock lam. Power House mun ka en uh hi.

27 Feb 1996: Lian Kop ii proposed plan canal line pi 3000 khawng a pha mun thak tee tu kipan, pi 2700 ciang tee tu ka man uh hi. Ka lam zTdnna, luipi tung pi 300 bang a saang mincim tung pan ka tol a, ka thikhial hi. Ka tholpui Liankop le A. Zam Cin Pau te le mualkhum zo a, C. Mang Za Khai in molh khat hong thaak in hong hun hi. 28 Feb 1996: Tuni pi 3000 dong tee, pondage mun pan Khumlui PH dong tee suk in 4 pm dong ka diang uh hi. Azingciang 2 pm dong double checking vawt in ka tee kik uh hi.

25 Mar 1996: Na-ta-la (Border Ministry) laiten tu Lian Kop rough drawing, Zozam in fair drawing hong sep sak hi. 28 Mar 1996: Col. Ngo Cin Pau na zum computer taw Nata- la puak tu lai khen sak a, ka ten uh hi. 26 Apr 96: Ministry of Border Area Development (Na-ta-la) Lt. Col. Thein Han (DG) in Chin Pa-wa-ta heak kul tu hi hong ci hi.

2 May 1996: Yangon pan Kalay ka leangto hi. 3 May 1996: Azingciang Tiddim kato, Dim Za Ciang le Cin Za Kam taw recommendation nga natu hu ka ngen hi. 6 Apr 1996: Ka lawmpa A. Cin Pau (SAE) in jeep taw Khuasak nilee in hong cia pui a, tui lam hong etpui in Lian Kop Plan hong lungkim pui mama hi. 14 May 1996: Falam hka-wa-ta Chairman Col. Tin Shwe taw ka kimu hi. Thuklai Hydel vai hka-wa-ta secretary Major Aung Khin kungah Sister Ciang Khai taw ka pai uh a, Tiddim ma-wata lai ngak ngawlin thakhat thu in recommendation hong pia hi.

27 May 1996: ADRA Asia-Pacific director Ken Flemmer le ADRA Japan director Stephano te Sizangte in M3 ah nitak anvak a, Dr. Vum Ko Hau zong kihel hi. Col. Ngo Cin Pau in a sumsii thong hi.

28 May 1996: ADRA director te Mandalay leangto in Mandalay Division nasepna ka et pui hi. Azingciang 2:30 pm. Kalay Airport ka tuu uh hi. Hong tonpui Dr. Oke Soe (DOH) in ‘Da-ka-sa* ah a report ciang, Thuklai pai tu hong khak hi. ‘Ka-kahlan – ngalkap thudawp zumpi’ ka paupui uh a, zingciang nai 9 dong ngak tavun hong ci hi.

30 May 1996: ‘Ka-ka-kyee’ Major Tin Aung na Yangon heak kik tavun hong ci hi. 31 May 1996: Flight cancelled a, charter plane om napi ka nga zo bua uh hi. 2 Jun 96: Tuni Mdy dong vanleang ka nga uh a, Mandalay pan Jet taw Yangon ka zuan uh hi.

13 Jun 1996: Col. Ngo Cin Pau ii Chin State Council a laithak Laito pan ka khia hi. 14 Jun 1996: Dy Minister (MOE) taw ka kimu zawk ciang, MEPE pai in, MD (MEPE) application lai ka pia hi.

17 Jun 1996: Dy MD (MEPE) U Sein Ti taw ka kimu a, MD tungah Lay Out Plan nga natu lai pia in hong ci a ka pia hi. 18 Jun 96: U Sein Ti taw phone ka pau hi. 23 Jun 96: YSBC ah nai 2 vai Committee meeting ka nei uh hi. Thuklai (Fort White) Hydel Plant vai YSBC in a/c khat a nei tu kivaihawm hi. 26 Jun 96: Japan Embassy ah Sandy Dee, Peter Cooper taw 8:30 pan 9:30 am appointment ka pai uh hi.

8 Jul 1996: MEPE ka pai a, MD atu vanngit a sua ngawl natu Minister (MOE) ahibale Minister (Border) na thu hong pia le ka seam bek tu uh hong ci hi. MOE te in ‘Na-ta-la’ taw vaihawm un ci in lai hong pia ahikom Col. Ngo Cin Pau ka kikup pui hi. 12 Jul 96: Minister (Border) ka laithak Col.
Ngo Cin Pau in,ama kudai puak hi.

4 Aug 1996: Yangon – Col. Dr. Suang Za Pau (professor) taw Kalay vanleang ka to khawm a, ama hired jeep hong zuito sak ahikom, Thuklai khuaziin zawk ka theng hi. Thuklai ah zan taam in hong kici tek ahihang, Hiangzing ah Pa Vum Mang thi a, ka tupa Mang Khaw Thawng in, “Pu Nang, hu heu taw maw, zingsang ciang ka pa luang pua to tu, zingan na kinging hen ci in, kamtai sak taw maw,” hong ci a, khuaziing, nguatui nuai ma ah kamtai tu sia Mang Cin Pau (RC Lampui) in hong tha hi. Hausapa Kam Za Pum in ama kudai mithi ah pai in thu na puak a, Mang Cin Pau Thuklai zuan kik hi. Lian Kop Survey vawt in Khuasak pan kei hong ngak hi.

5 Aug 1996: Liankop taw survey vawt 3 pm ciang ka man a, Pa Vum Mang thimun ah ka to hi. Rev. Mang Khaw Pau in mihon zak in, “A u Suanzanang, na mei hong manlang taw, ka thi ma ka lupna pan switch hong vakek nuam khi, na manciang Sizangte a lang SDA suak sak aw/” hong ci hi. Moral support hong pia ci in ka ngaisun hi. E. K. Kim Ngin hong nusiat lai, Bosunpat EK inn ah ka om hong mu ciang, “A u Suanzanang, SDA te hatma ma nu zei! Hiangzing na tuipiak ka lungdam zei! Hiangzingte a vekpi SDA suak sak aw, kei haza bong ngei,” hong ci ngei zo hi.

6 Aug 1996: Khuasak pan Thang del in Kawl ka zuan a, 7 Aug Tiddim ka kaato hi. 8 Aug ni ‘Ma-wa-ta’ recommendation ka nga hi. 9 Aug 1996: Telegram taw Kam Khan Thang hu ka ngen a, 16 Aug 96 ni Chin Pawata Recommendation ka nga hi. Application – ngetna lai sia Col. Ngo Cin Pau in a ten sa hi a, ‘hkarwa-ta’ zong a kinga sa hi. 30 Aug 1996: Chin Pa-wa-ta recommendation Na-ta-la ka puak hi.

1 Sep 1996: A. Zam Cin Pau inn ah Thuklai Hydel vai kikupna ah upa khat in Col. Ngo Cin Pau hanciamna langpang in Thuklai hydel yat-tan-ka-yat’ – ‘tawlnga lian vun’ hong ci thong hi.

5 Nov 1996: Col. Ngo Cin Pau taw Dy Minister (MOE) kung ka pai uh a, Col. Ngo Cin Pau in letsong a pia hi. 24 Nov 1996: Hydro vai kikum tu YSBC ka pai a, kuama hong kikhawm ngawl hi. 27 Nov 1996: Ministry of Energy Sub Committee taw ka ki mu hi. Col. Mya Thein, Capt. Than Aung te in Diesel Generator taw kheal in ‘Pa-wa-ta’ seau in Na-ta-la te copy pia in hong ci hi.

1 Dec 1996: YSBC ah kikhawm in Hydel meeting ah YSBC in thein 18 nong sik kul tu hi ka ci a, upate in phamaw ngawl hi. Give up ngawl het tu hi. Donation ih khon tu zam hong ci a, ka lungdam hi.

19 Feb 1997: Peter Cooper ‘Na-ta-la’ pai nuam a, pai heak in ci in ka khaam hi. .20 Feb 97: Kei hong laih ADRAdirector thak Tember Chit ‘Na-ta-la’ ka paipui a, Lt. Col. Nyi Pyu le Capt. Kyaw Win taw ka kimu uh hi.

27 Feb 1997: MEPE pan remark a ngana bangin ‘Na-ta-la” te in Thuklai Hydel se diesel generator taw vawt tuak zaw hi hong ci hi. Col. Nyi Pyu om ngawl a, Major Nay Win taw ka kimu hi. 28 Feb 1997: Col Ngo Cin Pau kung Tember Chit taw ka pai uh a, Lt. Col. Thein Han (na-ta-la) kungah hong paipui ahihang, ama om ngawl a, seaulua ka nusia uh hi.

3 Mar 1997: Lt. Col. Thein Han in hong sam a, Col. Ngo-Cin Pau ka paa uh le om ngawl a, Tember Chit taw bek ka pai uh hi. 4 Mar 97: ADRA Board in Thuklai Hydel se generator taw kheal tu in khensat hi.

Ahihang $100, 000 taw hong sep sak nuam U Aye Pe company Topa in hong vaihawm sak a, tuni ciang dong mei kivak thei ahikom Topa in minthanna tang tahen!

Lungdamkona
Min kihel theampo tungah lungdam hong ko ka hi hi. Japan Embassy pan ambassador Yoichi Yamaguchi le first secretary Mr. Kimata; MEPE pan Dy Chief Engineer Sein Ti le Lian Kop Cin; tangpi tangta lampui Khuasak hausa Kam Za Pum le Dr. Thawngpi; zin hong do hausa nu Ciang Khan Pum; koma ka ludin tu a ci YSBC; kumpi project suasak tu hong hanciam pui, sum le paai a zangh Col. Ngo Cin Pau; meikhuam tu kisamh babang Tuanlui dol hong pia Dr. Thawngpi le a zi Neampui; Proposal hong at pui D. Son Za Howe le a tholpuite; laivawt tu theampo a sun a zan ah hong sep sak ADRA Myanmar office secretary/receptionist Lian Huai; hydro min zaak po ciang luaksua huai phial kale, ‘moral support – tha’ hong pia a, khualmi, tualmi, ngamdang mi leangna hong dosak ka zi Lian Za Dim; sawl tangzang a kisamh bang hong taisak, ka pairibp napo mawtaw hong hawl sak Thang Pau; a kisamh bangin hong hu valian hong ngimpui bul thuk Kim, Khuppi le Awn Za Twang; leaplaw nei ngawl Lophei, Buanman, S;altuzang le Pumva khua mite, Hydro Project Chairman seam in tuilam to khawngte sunsia hong vak sak ngei Capt. V.Ngo Lian Cope le I ei hong laih Pastor Tember Chit tungah lungdam ka ko hi.

Hiangzing Tui:
ADRA Canada pan C$ 22, 934 kinga a, Unicef le AMD te in technical assistance hong pia ahikom, ka lungdam hi. Proposal hong hu Major Shwang Howe; zin le vak sisan hong dian pui L. Vum Cin Thang (hausapa); Copepi (Khup Za Lian); thatang ngimsi khuamite; honpoai lai khui le vok a ngo Hiangzing te; thunial ngawlin, lampi kan tuidot theampo a phiat sitset Taingen, Aicik, Vauna, Theizang, Vomsem le Mualpi khua mite; khui le vok taw hon poai a etlawm sak Hiangzingte tungah ka lungdam hi. Tui pipe tai 9 vai kizangh hi. 4 June 1993 ni honpoai kivawt a, a lampui Tun Lam le Hau Zam -tungah ka lungdam hi.

Hiangzing Tuimei:
Mei bek hi ngawl, Asia-Pacific Division of SDAs te in $4060 hong pia a, Sayama Cing Khan Nuam le Sayama Do Kang Cing Hiangzing sang sayama hong seam in, tuni dong meitaang lai hi. Turb’ne khat kibul a, a spare zongh Hiangzingte ki aap hi. Kawlngam Section 5 panin hi nasep en tu in 1995 kum mihing 5 hong pai uh a, a lung uh dam mama hi.

Lezang le Zampi Tui:
AHS/West hong piak US$ 9285 sia, Thangnuai a kipia sa hi a, Thangnuaite thu a tuiton thei ngawl ciang, Lezang ka pia hi. Unicef le WRUD taw kiseam ahikom sumval a, Zampi tui kipia hi.

Thangnuai Tui:
Thangnuai te sia Esau taciilza taan bang phet ma in Yangon ah hong del leleau a, Unicefah ka paipui taw tui a nga hi.

Khuasak Tui:
Thangnuai ka ngasak bangin, Khuasak zong tui pia thei tu ka hi hang, khuapuite in Mualsan ah hong pia tavun ci a, Unicef in teang phot vun a kici teng taw a nga ngawl ahi hi.

Falam Ngam Tuipiakna:
Cong Kham khua Bualkhua tui ka nga sak ka lungdam mama a, Thang Tsin khua Lumbang atu dei sak mama lai ka hihang Old Sun Thla, New Sun Thla le Cerhmun ka pia man bek hi. Unicef le WRUD taw sepna hi a, Matupi atu taw ADRA Canada piak US$25, 354 taw kicing hi.

Matupi Ngam Tuipiakna:
Old Saltaurrg, New Saltaung, Langli khua thum in tui ka ngasak hi. Unicef, WRUD, ADRA lungthu suangthum kipawlin naseam tu kipan kimlai ka dinkhawl hi. Seam lai hi leng, tui kisamh na mun ah tam ma ka vawt sak zo tu hi. Ka sep nawn ngawl ciang zong Bumzang, Lunmual, Kaptel, Ngennung te ka hanciam pui a, ahihang, tua mun te a pia om ahiciang kei NGO kizop pui sia in Saizang khua pia zaw hi.

Tedim Balzang Tuineak:
Sialtangtui a kineak ciang, Balzang tui kiphiat a, Sialtangtui kihawmthaw ahikom hong kingetna bangin SDA te Ingathering Fund taw Balzang tui kipia a, Pastor Tember in implementation vawt sak hi.

Yenantha Leprosy Hospital Tui:
Zato le Nanthmyaing miphakte khua atu US$62, 000 bo in tui kipia hi.

Yenantha Vehicle:
Nissan Homy 12-seater van (1 Ka 2401) kipia hi.

Prosthesis Workshop:
Khut le peang theam vawt natu ADRA Sweden tung pan $ 9, 146″le Bogyoke Tun Kyi tung pan $ 3, 875 ka nga hi.

Dammawte Ta Sangpatang Huna:
Nanthamyaing dammawte tate sangkaa natu uniform, sunsia $ 15, 854 ADRA Sweden tung pan ka nga sak hi.

Sewing Center Project:
Dammawte nuntakna tu puankhui set 10 kilei sak a, dammaw damkikte 28 puankhui thiam kisua in a nuntakna tu zong thei suak hi.

National Rehabilitation Hospital:
Thamaing ah National Rehabilitation Hospital atu khut/peang theam vanh le set man ADRA Sweden pan US$ 3333 ka nga sak hi.

Yangon Children’s Hospital:
Yangon Patang Zato ah meikangte banlatee tung po a kilumsak a, Children’s Hospital Burn Unit Center atu $10, 000 bo in ward khat aircon kithua sak a, zatui kuang 65, US$419, 926 man kipia hi.

Loma Linda University Huna:
USA ngam California state, Loma Linda University pan doctor te in Kawlngam doctor 180 (Sept 25-Oct 3, 1995) Cardiac Life Support pilna pia a, Sept 25-Oct 9, 1995 sung lungtang 15 at a, a thi om ngawl hi. A bona $ 500, 000 le vanh a piak $300, 000 man hi.

Myaungmya District Hospital:
Myaungmya Zato ah a tui $3000 taw a pipe kilaih sak a, Nissan Vannette 9 Seater (1Ka 2402) kipia hi.

Vehicle Project:
SDA phualpi ah Grace Van (2Ka/777) khat le ADRA tuikhuk taw natu KIATruck (2 Ka/555) khat, ADRA Myanmar zum atu Honda Civic (1Ka 2400) ADRA pan ka ngasak hi. Department of Religious Affairs (DORA) pan U Acnt Maung in vehicle 6 hong import sak a, Mishubishi Galant Saloon (1 Ka 2399) kipia hi. Ki ukna a kikheal ciang Dy Minister in zangh hi.

Immunization Project:
Mandalay Division Immunization Natkham zatui sut nasep natu in, bicycle 200 kipia a, $10., 000 kizangh hi.

Dongtawk Huna:
Disaster Response Dongtawk mihing 28, 000 kihu a, sum K 1, 200, 000 bo hi.

Kumpi Ulian Official Visit:
Kumpi Ulian Minister le Deputy Minister, Central Command taw 20 vei kimu a, TV le Tadensa sung 25 vei kihel hi. Pathian in minthanna tangjahen!

Snake Bite Control:
Ngultuk tu khaamna le nat khoi natu in ADRA Canada tung pan US$34, 328 ka ngasak a, kumpi taw kiseam khawm hi.

Computer Lab & Training Center:
ADRA Canada pan US$16, 563 ka nga sak a, Yangon SDA huangah kihong a, a pua panin zong manpiak ngawlin hong sin uh hi.

Kiseam Man Ngawl Project:
Hiangzing sialkhoai natu US$ 16, 329 ADRA Canada in hong piak kingasa, Peter Cooper te nupa in Khamtung le pai thei ngawl ahiciang, a pai thei na Hleku Township Mayanchaung Physiotherapy atu in funder te munah ngenin zangh phot a, sial kikhoai man ngawl hi. Kinga le Hiangzing bek hi ngawl Kaptel, Suangzang ngam ah sialvulh nasepna (Mithun Cow Bank) ahi hi.

Puan Taw Huna:
1992 kum in, ADRA International pan 40′ container (350 bales) ka nga a, 1995 ciang ADRA Korea panin 20′ container 2 dim (400 boxes) huna ka nga a, kumpi sung hi kale, pawlpi tatuam ah hikale kihawm kakoai hi.

Tu a bang teng sia Topa hong panpuina honkhat bek hi a, Pathian hong sep pui tam mama om lai hi. TOPA in minthanna tang tahen!

Heaktu: SCC Magazine pan aki la hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html