Nikonghong

Home » Sizang » Pu Vum Son La

Pu Vum Son La

(click on image to enlarge)

 

Global Sizang Community (sizang@yahoogroups.com) sia 2000 kum April 21 ni kipan aa kum 11 vaal kum 12 cing dektak zo hi. Leitung pilna te hong khang tato in nidang hun hi le, laithak khat ih at tu sia hamsa mama aa, lailu bel kul, laito pai kul a te, ih lai at sia ih thakna munh theng ziam, theng ngawl ziam zong kihe meal ngawl. A theng hial zong ni tam mama zawk ciang theng pheang. 

Computer pilna le email khawng hong pian zawk ciang, lailu le lei kul nawn ngawl, laito le pai kul ngawl aa minutes khat sung ih son nop thu sia leitung bup kizel pai ci ka ngaisut ciang, email system ii manh neina sia ka mu saseam hi.

Email ka nei phit kum sia 1996 kum bo 1997 kipat kiim sung hi aa, tua hun lai Sizang mi kua peuma taw email ka kithak thei katawm maw ci in ka zon kakoai le, Pu Vum Son le, Pu Kipp email te, Chin email list akici website khat (tu om nawn ngawl) sung ah ka mu hi. Amate taw kiheak ngawpna om ngei ngawl, kei ngual le hi ngawl tana keima ki-introdue in email kana thak hi. Amate tung pan reply ka nga kik aa, nuam kana sa hiimhum peuma hi. Pu Kipp na kei zong tusung khawng tatak ma email ka nei pheang ci in hong reply zong tuma ka ciamte lai hi. Pu Son taw sia email kithak thei vakek aa, ZO History thu ka dok le, na sim nuam le laito pan thak tu khi ci aa, hong thak takpi hi. Tu dongma keam lai ing.

2000 zawk Sizang mailling group emailte en kik in hi leang lai manpha khat po ka mu tha katawm ci in ka et kik le, April 23, 2000 ni Pu Son ii email subject “vum son la” sia ka mu aa, Pu Son phawkna le, Pu Son la phuak a sim ngei ngawl zong om tu ih hi te ci in kong thak kik hi. sizang mailling group a kipat pan a 21 veina hong tum email ahi hi. Sim tek tawng..

A nuai a lai sia Pu Vum Son ii email sung hong tha bang lian ahi hi.

………………………….

Ka la phua sia Zo mi u le nau te na, na he nuam u le ci in kong at hi. A khiak na toh in kong at suk hi.

  1. Mim bang pian na sen pu von aw, zai tha hiam bang hat ve cia Za taang khua le sawm sial khawi thiam mim bang paw, hau ka na cia (Akhiak na:  I Zo la te sia ih pu leh ih pa nah na dang khat toh veu na te ngat lui lam hi. Te ngat na in: I pian na ci ciang: Mim bang pian na : Vaimim toh na na te ngat hi. Sen pu von aw : ci ciang in Pu ci na hi. Zai tha hiam bang hat ve cia: ci ciang in na tha hat ve te aw : na lam sa tam ve aw :ci na hong hi. Taang hau ni hi, sial se khawi thiam ni hi, hau mama ni hi : ka ci nop na hi.
  2. Cin ni tha kiak ki zom ta e, sen pu von le, zua ngeal thin lai liap hi e Sen pu von le tun le zua in thian mang lim sawl bang beal e (Akhiak na:Ka u te 2 ( Vum Nang leh Thian Za Khai) sia ni thum sunga hong thi khawm a, ka pu leh pi; ka nu leh ka pa na he peu ma in nah; Ni dang a a biak uh, ih ngeina biak na sia hawm thaw in,( Christian ) Pathian sia ni sat ciang a, sawl ih beal bang na na beal ta uh hi.)
  3. Thei bang sen na thian mang ih bel tuan sen pu pa khan mim beal ngual na meal mang nge Mim beal ngual na meal ma ing nge, zaih na kai zia, meal ma hing nge (A khiak na: Ka no pan a Pathian (christian) biakna in ki om a, ta sia hu in ih pu ih pa ngei na ih dan (ih culture) a he ngawl suak ing. Ta sia bang ma la sak na leh la phua na sia he ngol khi hi.)
  4. I pian puan bang theak leang ci hing nge, piang dang phei phung len zang no taw tuai mang in zal na nei e Tuai mang in zal na nei e, tuai lian nu hul na hi e. (Akhiak na: Ih pian na dan teng puan bang lai leang ci hing ii, ngual dang mi te ii na te toh, lai nuam hing in, ka nau pa nah hong thi law hi. (Ka nau te motor accident aa, Mang Pau a thi sia ka phua hi.) Ka nau pa nah thi na nei ih ka nau nu nah a lal na nei hi. ( Ka nau nu Dim Hau sia a thin amp cip a hong lal hi)
  5. Tun le zua, ma ciang suan le, thei lo thiam thil phak sap a va zil ing nge Tai nga ka law, se sum ka lam, tun le zua taw lai kuang um meal in ma nge (A khiak na: Nu le pa in hong ma pui in a ma te pat sa zui in ngam khua la na ah lai sim in ka pai hi.Ka sum tha law le ka lam sa nu le pa toh ka neak khop thei ngawl sia he bel ing ka ci na hi.)
  6. Tha kia ta le tun le ka zua sim lai ngu ling bang do e Tun awng ma bang na pat sa thil dawn no taw, zang saa se sum neal bang hau na lawm sang nge. (A khiak na: Nu leh pa ih nong nu siat pal lei uh sia ka thin sung a na sa tontung khi hi. Nu awng nang ma nong kipat (niang te vawt na sia) ngual theam po hau na nei ih, ta sia lung dam huai ka sa hi.)
  7. Nam ci pian zui na, zua mang awng, zua mang awng nge, von in dawn ngia bang zom nge Khua mual lum suang, kong phuu luang ze, khua mun thei bang kong law na (A khiak na: Pa awng nang ma pat sa taangthu na na zon na, na zom to ing ngi Ka lai bu at sia Khua mual a lum suang (khan) ka vawt luang hi ka ci na hi.)
  8. Mim bang pian na sen pu von te phai za sim khua zing bang ze Mangtui lun ta, thiam thil sin pui ka zaa om lo ze (A khiak na: Ka lai sim pui mang kang te sia, Lai hi leh dem lak om ngol hi, a hi zong in I pu I pa te ih pil na thiam na na niam lei thong ta tana ngual ki pha la veve thong hi ci na hi.)
  9. Se sen ang kawi kang tui ta toh, ngual toh lem a zawng ing nge Ngual lai len pui in nei ing nge, tanh bang kim pui te bang ze (A khiak na: Ngam dang mi mikang te toh ki thol khawm ing ngi, ngual mi nam zi in nei hi veang, a hi hang ih vun bek ki lam danga ih khua ngai sut na te sia ei ma bang hi zam.)
  10. Se sial ing nge, ngam kuam thuk pan, chim zin zang khuang bang hang nge Zangsi ta sen ang kawi hi leng, phung toh lemh a, zawng tu ze (A khiak na: Ka ngai su sut ciang , ngam khua la ka om na pan, ka zi sia ei ma Sizang mi hi leh ih mi pui ih nam pui toh lem khawm in thu ki son thei zaw tu in ka ngai sun ka ci na hi)
  11. Pai va naw na khua min thuk e, kha no sum neak in nei nge Vang kua lai a mim phung te toh, ho lung kum na lai kuang um ngai na veang nge (A khiakna: Ka om na ih ngam pan khua la lawm ve ii, ngual sum le pai neak na in nei hi veang ngi, a hi zong ih mi te toh thu ki kum in, an kuang um thei tu ma ngai bel ing.)
  12. Phei tui mim phung zua ngeal hawm tel pu von al bang hong ta cia Thei sen ni nu ngeal cing te le, sung neak hawm tel hong khen cia (A khiak na: Ka pa no, ka pa pui te leh ka ni te ih a neak pa po hong hop sia ma ka nun tak sung in a nuam bel in ngai sun ing. Ta sia mama ma ngil thei bong.)
  13. Sim lei kuam zai, khaih mu bang leang kang tui ta’n mang bang bawm me Mang tui ta’n mang bang bawm e, tong dot zua pa in nei e (A khiak na: Sim lei ngam a pai ka kawi ing ngi mi dang te toh vai hawm ka kawi ing. Ngual na thu doh in hong nei hi.)

A naw :
Khup ing nge e, khup ing nge e, tang ka tam ngual khup ing nge
Tang ka tam ngual khup ing nge e, tang tui von tawi khup ing nge

A khiak na: Hi sia se ka ki phat sak na ka phua hi. Ngual bang ma in nah ngual pha zo ing. Ngual sang zong ka thu pi zawk na om ci nuam ka hi hi.

A thip na

Hei na tum dang , ngam kuam thuk, zo ngam zang bang
Mim bang pian na, ih vang khua na ngai veang nge
Mim bang pian na ih vang khua na ngai veang nge
Lai kuang um pui, u leh nau na ngai veang nge

Al bang mangh vaak nong ci ziam, u le nau awng
Ka thin thu sia, kheap tang bang zau thei nuam veang nge
Ka thin thu leh kheap tang bang zau thei nuam veang nge,
Sim lei thin thu tai nga se pui thei nuam veang nge

A khiak na:
Ngam tat na lam dang, ngam khua la pan in, ih Zo ngam nuam, ka pian na ih khua ma ngai ing. An kuang um pui u le nau ma ngai ing.

Ak bang mang vaak nong ci u ziam u le nau awng, ka thin sung a om thu se taang vai ih kheap ciang a a taang tang hong ki lang bang hong son thei nuam ing. Leitung thu nga tang hong se pui nuam la lawm ing.

TN


3 Comments

  1. Awn Za Pau says:

    Hoih sa peuhmah ing ei. La dawng 8,000 val nei khin ing in, mimal zui aa laphuakte lak pan Sihzang sungah Pu Tun Thawng a bek kihel in, tun zong Pu Vum Son Late zong na hel nuam ing. Nong phal ding uh hiam? A late thupi in hoih sa ngiat ing.

    • thawngno says:

      @Pu Pau Awn Za Pau, lungdam mama ei. Pu Vum Son la sia lai sung a ki at bangma, 2000 kiim khawng in Pu Son ii group email sungah hong thak hi. Ama om nawn ngawl ahihang, na Zo La collection sungah hel sak le te a lungdam mama tu um ing. Pu Son taw a kinai bel, Pu Ngocinthawng Suantak (tualpipa@gmail.com) le a tanu te 2 zong lungdam tu um ing.

    • Ngocinthawng says:

      Dear Pu Awn Za Pau,
      Ka Uu Vumson la te nong helsak nop pen ko lungdam zaw ungh.
      A dang na deih beh lai le Dr.Pau Za Nang bawl Labu khat zong om hi ven-

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html