Nikonghong

Home » Sport » Zo Ngam (Chin State) Tennis

Zo Ngam (Chin State) Tennis

By Mang Pau
Hornbill Tennis club (Yangon)

Kawl ngam ah Federation anei kimaina (sports) nam (30) val om a, tua kimaina nam theampo akhanto thei natu in, kumpite in kumsim in Inter state and Division tournament hong vawtsak nginge hi. Hi tournament akimaite sung pan in parami anei athiam tuak khangnote youth selected in teal khia a, camp lutsak in, Burma seclected asuanatu in, sports Academy ah akimaisak ahihi. Kumsim in sports nam (30) val kidemna omkale ei Zongam (Chin State) in kimaina nam (2) bek pungman in ih kimai hi. Tua nam (2) se, Tennis le Bawlung ahihi.

Zomite Favorite Tennis
Zomite ih favourate game se, Tennis ahihi. 1949 kum Rangoon University Zomi sangpatangte ih tennis tournament ah akizaina photo khat kamu ngei aa, akimai khangno (50) bang napha hi. tuahitana, tua hun 1949-50 kum pek in Zomite in tennis kimai nuamsa (favouriate) cise, ihmu thei hi. Ka university kaa hun (1970-80) kum sung (khah-sah-zak) lampuina tawh, Zominam ni kivawt tawntung a, sports tatuam le tennis tournament se, akihel tawntung hi. Kacinopna in tua hun 1980 kum zong in tennis se, Zomite ih diksak bel kimaina ma ahihi.

Sizangmite Zong kimai
Inter states and divisions tennis tournament se, 1963 kum pan kipan akivawt se, (46) veina hi zo a, ei Chin state zong kumsimma in ih kuan nithi hi. Tua Chin tennis team sung ah kumsim phial in Sizangmite ih kihel hi. 1963-70 kum sung in Tuang Za Khai (Thuklai) Thuam Ko Zam (Thuklai) 1970-80 kum sung in Tun Za Dal (Thuklai), Ngo Cin Mang (ThukLai), 1980-90 kum sung in Pome Ko Khai (Thuklai),Lam Cin Khai (Thuklai), 1990- 00 kum sung in Man Pau (Thuklai), Hau Do Cin (Pumva), 2000-09 kum sung in Thang Khat Pum (Pumva), Ngo Dal (Thuklai), Thang Dal Mung (Dolluang) cibang in akhang akhang in ih kimai tato hi. Zomite in kumsim in ih kimai to bangma in Zomi tennis thiam zong ahun-ahun in naom to dildel hi.

Myanmar Tennis Federation ih record
Kawlngam ah asangbel tennis tournament nam (3) om a-

  1.  National Championship Tennis Tournament
  2.  Burma Open Tennis Tournament
  3.  Inter States & Divisions Tennis Tournamentte ahihi.

Hi tournament nam (3) kimaina ah, Gold, Silver, Bronze medal le minphatna tatuam angate ih amin, anga medal akimai kum le angam ih thu atom in MTF in record kumsim in ananei hi. 1963 kumpan kipan kumsim in final kaate, best playerte le, Burma selectedte ih min se MTF zum sung blackbord ah kiat in akuamapo ih sim thei heak theitu in akitaak hi. Hi MTF record sung ah akihel tel (award) anga Zomite le Zongam tennis teamte ih thu atom in kong at hi.

(1) Chin State Tennis Team (Men)
1963 kumpan in akipan Inter States & Divisions tennis tournament se 2009 kum in (46) vei semifinal ih kaa hi. 2004 kum in final kikaa suak a, final ah Irrawaddy division taw kisii a, match 3-1-2 taw kilel ahiman anina kinga hi. 2008 kum in final kikaa laleau a, final ah Yangon division tawh kisii in match 3-2 tawma in kilel ahiman aninama kinga laleau in Pyi-thaung-suk cup se, kinga zo ngawl lai hong suak hi. Pyi-thaung-suk cup nga zo ngawl lai hikaleang, final (2) vei bang ki kaa a, kimaina sports taw kisai Zongam vaang apia kimaina se tennis nam khat bek om ahiman in, akimaite ih ahanciamna le athiamnate hang in zawna anganate lungdampui in ih paktawi hi.

2004 kum Chin tennis team

  1.  Thang Khat Pum (Pumva)
  2.  Ngo Dal (Thuklai)
  3.  Mang Han Sing (Teddim)
  4.  Biak Uk (Falam)
  5.  Uk Te (Haka)

2008 kum Chin tennis team

  1.  Thang Khat Pum (Pumva)
  2.  Thawng Za Lian (Thantlang)
  3.  Biak Uk (Falam)
  4.  ?
  5.  ?

(2) Chin State Tennis Team (Women)
Women tennis tournament, Inter States & Divisions se, 1992 kum, first National sports festival pan kipan akivawt hi a, 2009 kum in (18) vei kidemna ahi zo hi. Ei Zongam Chin state women team zong 2001 kumpan 2009 kumdong (8) vei ih kihel zo hi. 2002 kum le 2003 kum in semi final ki kaa in bronze medal nga kasap, tua zawk semi final zong ih kaa zo nawn bua hi. Bangbang hikale, Chin women team zong in Chin state atu in bronze medal (2) vei nga zo ahiman, azawnate lungdam pui in ih ciamte hi.

2001, 2004 Chin Women tennis team

  1.  Cing Man Vung (Thuklai)
  2.  Dim Suan Huai (Thuklai)
  3.  Chit Te (Thantlang)
  4.  Mi Mi (Thantlang)
  5.  Chin Chin (Falam)
  6.  Ku Ku (Haka)

(3) Mun tatuampan tennis kimaite.
Zomi tennis thiam pawl khat se, thu tatuamte hang in mun tatuam kitheng ahiman in Chin state pan in kimai khuan anei bua hi. Banghang ziam cile, ih kimaina ngam ah pungsan(10) (family form-10) taw in atawmbel tha (6) teangte bek kimai theitu ci in upadi ana koi hang ahihi. tua ahiman ih omna mun le ngam tekpan in ih kimaitek a, mun tatuam pan akimai Zomite ih kihelna ngam le min phatna le tel (award) anganate anuai abang ahihi.

Click on image to enlarge

Zomite Kimaina dinmun
1998 kum marchtha in akivawt 8th students sport festival pawi siim in kapai hi. Tua kimaina pawi ah kimaina nam (15) kimai a, championship shield (24) apiakna sung ah Chin state in championship shield (13) takma ih nga hi. Hi thu ta-den-sa sung ah namu ciang in Zomite kimaina nam cinh thiam mama, khangto mama ta-aa, ci-in nangaisun thatu hi. Ahizong, Zomi sinsen kimai in akinga championship shield se, (1) bekma om a, tennis kimaina pan akinga ahihi. Adang championship shield (12) se, kawl ngam mun tatuam pan in kimaina thiamte in Chin state min taw in hong kimaisak man in akinga ahihi. Hi thu en leang, Zomite ih kimaina dinmun se, niam mama cise, ih mu thei hi. Tua ahiman, Zomi khangnote (new generation) in sports nam tatuamte ah, eima ma kimai in, eima ma chin state team pan kimai in, Inter states and divisions tournamentte ah championship shield a la zo, kimaina thiam Zomi ih sua natu hanciam tektawng, ci-in kong hanthawn nuam hi.

Hamsatnate
Zomite ii, kimaina akhanto zawk ngawlna ahang tam mamatu hikale, athupibel nam (2) in (1) sum (sports fund) kicinh ngawlna (2) kimainatu amun, leen, courtte hamsatnate ahihi. Sports fund kicinh ngawlhu in, Yangon tournament kipai ngawl ahiman, athiamte kimaile mu ngawl, tournament experiance kinei thei ngawl in, ih thiamna zong akhangto thei bua hi.

Kachin, Shan, Mandalay, Sagaingte in lam saap, 5000/- taw Yangon pai in kimai thei ahihang, Zomite in Yangon thet natu 30000/- bang kul tana, ih team bup Yangon pai natu sum se, kumpi fund pan hong piaktu ol ngawl hi. Tua taw kisai in 1977 kum in fund kinei ngawl ahiman tennis team &angon pai ngawltuhi ci in Haka pan thu kizasak hi. Tua hun in Chin State semi final kaa hun hi aa, final kaatu ci lam en in, Saya Langh Kho Pau, Neng Hau Mung, Cin Lian Suum (Tiddim) te in amate sum taw in Yangon pai in nakimai zen hi. Hibang a, ih ngam ih minam atu dei sakna, sporting spirit aneinate ih paktawi hi.

Kawlngam ah Sport nam (30) val om a, Zongam ah ih kimai thei vetngawllai kimaina nam tam mama om hi. Tuate kimai thei natu amun, leen, courtte kisam ahihang, ih lamhtu se, haksa mamatu hi. Sontena, tuma kum (30) lai in khamtung khua liante ah tennis court naom ngawllai aa, tua hun tennis kin U Lian pawl khat in amate sum taw, nalamh ahiman, tu in khua theampo ah court om siatzo a, tua courtte tung ah kimai in Chin state in tennis kimaina ah zawna angate ih suk hi. Lam mangpi Ngo Nang (Lim Khai) in Falam tennis court, lambu Mang Za Cin (Thuklai) in Thantlang tennis court le Pa Tun Kam (Tiddim) in Mindat tennis courtte amate sum taw, nalamh ahiman, amate ii, ih ngam, ih lei, ih minamte hong itna, tennis kimaina hong khanto natu, hong sepnate ih lungdamna ih ko hi. Tuahina, tulai khangnote (new generation) in in neisa courtte pua in, tua tung ah kimai in, Zongam Zomite luang in ih kimai tu aa, Yangon ah championship shield alazo, tennis thiamte sua natu in hanciam tek tawng, ci in kong hanthawn hi.

Lungdam kona
Chin state tennis team in 1999 kum pan 2009 kum dong kum (10) kipe in semi final ki kaa a, 2004 kum le 2009 kum in final ih thetto se, Myanmar tennis federation record sung ah akiciamte chin state ih zawna lianbel thu khat ahihi. Hibang zawna ih ngana in akimaite ii, hanciamna le thiamnatebek hi-ngawl in, akimaitu, chin tennis team atu akisamh vanht tatuam le sum le paai hong piakhia tawntung ngamdang (USA, Japan, Australia…etc) om U le nau, tennis hong kinpui U le nau, ngam sung om tennis hong kinpui U le nau, church tatuam (YSBC, LBC…etc) cite ii hong itna hong uapnate hang hi ci in kana ciamte uh a, hong pia khiate (sazian taw kiciamte) tung ah, kalungdamna thu, hi US pan akihawm magazine pan in kong ko uh hi.

2008 kum final ih kaa ciang in, president of tennis federation of Myanmar U Zaw Zaw in sum Lakh khat (100,000) taw hong paktawi a, ei chin state ii final ih kaa hong lungdampui ahikom, ih lungdamna thu hi US pan akihawm magazine panma in ih ko hi.

Bangza in hamsatna om hikale, Chin tennis team in new generation sportmante piangsak in hong paitu kumte ah, Pyi-thaung-suk cup ih nga nanaak dong hanciamtu cise, kalungtup uh ahihi. Tua ahiman in ih ngam ii, kimaina akhanto vaial natu in ngamdang ngamsung om, nu le pa, U le nau akuamapo in ih ngam ih lei ih minam atu bulphu in, kilomkhat in hanciam tek tawng ci in kong hanthawn hi.

Mang Pau

Advertisements

2 Comments

  1. lompa says:

    International
    Tennis-ceu lian -open singles champion (2001 guam)
    Khai pi -4.0 singles champion (1994/95 maryland)
    Tennis-ceulian -4.0 singles champion (2002 indiana)

    Burma first level tennis players
    Lian pau
    Julia biak cin
    Mang lian sing
    Sen mung

    Myanmar state&region level the best tennis players
    Biak cin -1965
    Thang khat pum -1997
    Thawng za lian -2011

    all time chin sport men leader
    tennis-ceu lian

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html