Nikonghong

Home » Biakna » North Koreate Biakna Juche

North Koreate Biakna Juche

Juche khan suang North Korea khuapi Pyeongyang

Tunung hiat North Koreate lutang, ngam lampuipi Kim Jong Il thi aa, atapa kum 19 khawng pha pheang khat in a zaa lua in ngam lutang suak ci thu a tam zaw in ih he hi. Ngam khat papo ahizong minam khat papo ahizong ih khanto natu in a thupi tam mama om aa, tua thute sungah biakna zong khat a kihel ci in ngaisun ing. Sontena Buddhist ngam vave sungpan Therawada Buddhist ngamte ahi, Japan, South Korea, Taiwan, Singapore ci khawngte ii khantona sia, Maharana Buddhist ngamte ahi Kawl ngam, Thailand, Siri Lanka, Cambodia, Lao ngamte in banghang ban tatak zo ngawl ziam ci thu ngaisut huaai ka sa hi. A bosa kum 100 sungbang Christian upna taw kal a suan Europe, America, Canada, Australia ngamte in khangto mama aa, Muslim ngam atamzaw in banghang in a thin uh ngam valuap aa, khat le khat kithaa tu kisim tu bebek teng taw nitum uh ziam? Upna le biakna in tute theampo control siat liang ngawl ahihang zakhen (parcentage) tam mama sia ih up, ih zui biakna in control vave ci in ka ngaisun hi. Leitung ngam tam mama, a tatuan in Europe le ni tumna sang om ngam tam mama taw a kilem ngawl North Koreate in bang biakna, bang upna nei hi tu ziam?

Pilna neite in biakna ciciang Pathian vateal upna hi tuan ngawl aa, ih ngaisutna a tawtawng sung, a thuk belna munah koi in, thupi ih sakna taw ih kalsuanna sia ih biakna hi ci hi. Lai Thiangtho in, na ngaisutna omna munah  na lungtang a om hi ci hi.

North Korea ngam sungah Juche (“Chu-che” ci in kisim) upna le kal suanna taw a kal suan zawk uh sia ngaalpi 2na man zawk 1950 kum pan kipan hi. Juche upna a um mihing 19 million pan 22 million bang om aa, leitungah upna lian bel a 9na hi.

Taangthu a tom
1950 kum, North Korea President Kim Il Sung in Russia, China le ngam tatuamte ii a deap tu (influance) a lau man in Juche upna phuaktawm hi. Korea ngam sungah ngam mite in ngam le minam, ngeinate a it natu le, leitung ngam tatuamte in Koreate ii meal le omzia (image) hi bang dan khu hi, kuama taw kibang ngawl khu hi, ci in ciantelna a om natu ngaisutna taw hi upna kal suanna kiphuaktawm ahi hi.

Juche upna Korea taang mite sungah zung tha in a kip natu kum tam mama hun la aa, tu ni North Korea ngam sungah hi upna taw kal a suan 95% zakhen sang tam zaw aa, upna dangte sia up ku, sep ku khialna nei upna a neite ahi hi.

Ngaalpi 2na man zawk ciang North Korea sungah Russia le Sente nung zui, a paakta pilna nei, ngam lampui tam mama om hi. Hite theampo sia Juche upna zung a kip natu ngal lian bel ci ngaisun uh ahikom, tuate theampo khat zawk ciang khat man in, nasep le za neina pan kitawlnga sak hi. Hi hun sung panma kipan North Korea ii supuazii sia thakhatthu taksuk pai hi. Communist ngam khat ahihang Constitution sia communist ngaisutna bulpi a hi Marx le Lenin kal suan zia taw kibang ngawl in at aa, amate le amate vawt tawm dan in at hi.

Basic Juche upna
Korea kam taw Juche ci ciang “eima le eima kiupna, kimuanna” (self-dependence မိမိကိုယ္ကိုအားကိုးျခင္း) a cina hi. Koma le koma ka vawt tawm uh hi ci ahi uh hang Marx, Lenin le Mao Si Tone te ii upna policy pan hong piang kal suandan hi. North Koreate ngaisutna pan en tu hi leang, “leitung kuama peuma ii khut nuai kihi ngawl aa, eima le eima eima dan taw kal suan in ih ngam kumpi, ih ngam lutang sia ih ngaisutna theampo taw ih zaatak tu ih pathian hi” ci thu ahi hi.

Tu ni Juche upna taw kisai heak tu kilawm thu pawl khat khwam tua tu hi leang:

    • Pathian om ngawl hi ci, communist upna bulphu in hong piang upna kal suanna hi.
    • Juche founder ahi Kim Il Sung le Kim Jong Il sia Juche upna pawlpi ii lungtang le a tawntung (eternal) lampui lutang hi.
    • Kim Il Sung ii pu sia Christian Pastor khat hi aa, a nu le pa zong Christian hi.
    • Mihingte sia thina zawk ciang bangma om nawn ngawl, a kibo hi lel hi. Hell le om bo, Paradise le om bo ci in um hi.
    • Pathian kungpan hong pai Laithiangtho ci bang om ngawl, Juche upna laibupi sia a thiangtho bel le a zaatak huaai bel laibu manpha bel hi ci in um hi.
    • Biakna dangte bang in biakpiak kikhop hun ci khawng nei sase ngawl hi.
    • Ngamdang aaku ngawl in kal suan tu a ci hang, tu ni ngamdang huna ngawl taw a piang thei ngawl ngam suak hi.
    • North Korea ngam mi theampo in Juche upna nungzui, member hi siat ci vakak ahihang a um ngawl tam mama om vave hi
    • Juche upna nungzui member khat in upna dang biakna dang sung tum khuan nei vet ngawl hi.

Juche upa sung ni thupi ci in a tepte uh nite

  • Kumthak : January 1
  • Kim Il Sung suani: April 15
  • Kim Jung Il suani: February 16
  • North Korea ngam kipat ni: September 9

____________________

Heaktu: Len Woods ii at “Handbook of World Religions (A bible-based review of 50 World faiths)” ka doppha hi.

Juche taw kisai a cing zaw in a sim nuampo a nuai a linkte pan kisim thei hi.

JUCHE Religion
http://en.wikipedia.org/wiki/Juche
http://www.religion-info.com/juche.html

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html