Nikonghong

Home » Sizang » Et Kik Huai Nungsang Thu Pawl Khat

Et Kik Huai Nungsang Thu Pawl Khat

Rev. D. Kip Thian Pau (USA)

(1) Ei Sizang mite sia 1904 khawng lai mihing tul (10) phazo hi ci Mangkangte tepteena om zo kasap 2005 ciang Sizang kampau/Sizang misimna a kivawt ciang tul (10) ma kipha bek thong hi. (Hi research file teng sia US ka pai tu ciang Rev. Vum ka aap a, YSBC minister room sungah taw kal in kikoi hi. )

(2) Sizangte sia minam khat hi ci veu in ih kingaisun hi. Sya Thawng Khua Hau te, Bo Khup Za Thang te ii ih khang simna laibute sung ih et ciang ih minam sia “Zo” pan veu in kipan hi. Tua ahiciang ih minam min sia-“Zo” vei hizaw bana ziam? Sizang sia minam min hi ngawl a, Ciimnuai ah ih teen lai “Si” tui ii a zaang ah ih teen hu in ih nga min hizaw veitam. Tua hun laitak Si tui ii a zaang ah a teang teng sia Sizang kam pau ngawl pawl khat zongh kihel ci bang hi. Tua ahi ciang sia “Zo” minam kihi a, ih pu min sia Thuan Tak (a) Suan Tak hizaw bang hi.

(3) Tedim ngam ah “ZO” minam ka hi a cite pawlkhat ii lai at te ih sim ciang “Zomi” sia Tedim ngam sung om Tedim kampau teng bek veu huam bang hi ka sa a ngaisuthuai pawl khat om ka sa hi. “Zo” ih ci thong sia a saangna a votna cina hi a, minam min ahi takpi tu ziam? Ih pu ih pa mite en leang min khat bek om ngei ngawl a, min nii hi hamtang zaw. Tua ahiciang “Zo” sia ih pu selawnte min ih heak nawn ngawlte “Zo” po ci thathong ih hi bana him. “Chin” sia koisung pan tatak kipan ci ih heak vakek ngawl hang Kawlte Mangte theampo, leitung theampo ii hong tepteena ahi ciang ih minam min sia “Chin” ma bulzaw thong bang hi sa ing.

(4) Leitung mipilte ii minam a khen ciang, vun meal (skin colour) taw kikhen a, nam thum bek om sak hi. Tuate sia a vom, a kaang le a san hi lel hi. Tua ngawl sam om dan mul om dan taw zong kikhen thei si lungu om dan taw zong kikhen thei si ci khawngte zongh ih za ngei hi. Ei Asia mi peuma sia Mongoloid a kicite sung ah kihel siat hi hing .

(5) Chin or Zomi a kici te theampo te ii ih kimat theina khat sia ih kam hi bel hi ci in ka mu hi. Tua in ih paubul bel ahi PU, PI, NU, PA, U, NAU, VOK, AR or AK . . . . ci bang ih kampau bul teng kibang hi. Tua kampau bul a kibang teng sia tu lai tak Kawlngam sungah Tonzang pan kipan Paletwa dong, Asho Chin te Yaw le Tasungtate (Thi Lin sang ah om) te theampo le Lusei, Kuki, Paihte theampo sia “Zomi” or “Chin” ki hi siat hi.

A tungah ka at bangma 2005 kumYSBC le SRBA Evangelist Department taw ka vawt khop uh Sizang kampau mihing tul (10) kiim bek ih phak thong ciang khua ngaisut huai tam peuma ka sa hi. Tasia sung pan Sizang mi hi napi Sizang kam a pau thei nawn ngawl (Kam amh) sia 400 bang kipha zo hi. Kawlngam thengsate ii a tate sia eima kam a pau tu sangin Kawl kam a pau tu nuamsa zaw zo hi. Sizangte sia a ngamleak te ih hi bangma “Zomi” or Chin minam sung pan Kawl a suak a tambel pawl hi tu ka um hi.

2009 kum SCC Annual Magazine sungah Thawng Lam Mung ii “Vantung te Eakkha thai ee” lai nguicing page 11 na ah, a at bangma in ih tawm kawm pan leitung ngam theampo ah ih kithethaang lalai hi. Tu laitak a Sizang ngam sung pan a khangte ii lampuina ahi lai YSBC ngangawn ah ih Sizang kampau maan nawn ngawl tu kithoai zo hi. Teengat na phone taw ngual ih pau pui tu ciang “Kua paupui nuam ni ziam? ih ci tu hi kasap ” Akua taw pau tu ni?” ci a Kawl te pau zakdan sia kizui tha paih zo hi. Hi lai ka at mahiat suapui Ngo Cin Thawng (US) ii kampau ih thupisak tu le Sizang mi ih hina koibang ciamtee, he thei tu ci sia le keima zongh in ka tate Sizang kam ka pausak zo nawn bua a ci thu mail sung pan ka sim tha hi. Tasia bangma kei zongh ka tate a khan laitak ka omna ahile a nu kam (Mother tongue) ahi a nu kam na hong zo zaw paih hi. Tua zawk Yangon ka thet uh ciang ka tapa a no zaw sia YSBC Sizang kam sinna khal hun sia paisak lei kasap a ngualtam Sizang patangte na Sizang kam sin kul bo ngamdang paina kizangh thei bo ci a, na khalkho sua lalai hi. (Keima ka kihe nepna pan Sizang kam sang Chin mi a tam zaw ii zak kam Falam kam pau thei lei zam ka ki ci hi)

Tu ciang ka tu pa Pau Thian Mung sia kum li pha ngawl lai kasap a nu kam Falam kam sangin Maangkam pau tu bebek uuk zaw paih leleau hi. Sang zongh kaa thei ngawl lai kaleisap Maangkam nuamsa tuak zaw paih thong hi. Tua hile ka tuu selawn atu ka ngaisut ciang Sizang kam ci thada Chin kam khat papo sia pau thei nawn ngawl thei tu hi ci sia ka phawk hi. Tasia ni ciang ih tute ngual pawl in Chin ih hi le Sizang ahi bangbang ciamtee sak (identity ) neisak thei tu hi ziam ci sia tu hun laitak ih ngaisut mama tu thupi ka sa hi.

Kawl ngam a suak ih hi ciang Kawlngam sung nuntak nuamzawna po ih tai, ih peam tu ma hi. Ih ngam ki ukna pha ngawl, nuntakna haksa ahiciang ngamdang ih tai, ih peam nop tu ma hi. Kuama khaam thei om bo. Tua ahiciang tu zo kum (100) ciang Sizang kampau tul (10) ih pha zo lai katawm.

IH KAMPAU A BO NGAWL NATU
Tu laitak a Sizang kam a pau thei laite ii tu le tate, ih lai kepna, kam sinna laibu ih vawt memeang tu kisamh hi. Ka sua pui nu Ngiak Za Neam zongh US a tapa kung a thet ciang Sizang kam a thupi hunlam hong phawk a, YSBC hong ko ciang YSBC Culture and Publication Committee te in vaipuak in kinei a, kam sin natu in Sizang, Kawl, Mang a ki thua Bo Sing Za Nang in kivawt sak a, bu 300 ki print hi. Tasia taw Sizang kam sin nuamte sin kik thei tu deina ahi hi. Tasia a masabel ahi ciang kicing ngawl tu ahikom a kicing zaw puato lai tu a, ih tate ih sinsak tek kul tu hi.

Email sung ka mu pawlkhatte sungah, ei mi zaw hiatte in ih tate eima kam pausak zo ngawl ih hi hang ih suapui, Falam, Tedim le Halkhate in amate kam veu pausak zo thei ahi ciang ei zongh ih tate Sizang kam a pau thei natu sia nu le pate in vaipuak thupibel in nei leang pha ngawl tu ziam?

SIZANG IDENTITY BO NGAWL NATU
A tungah ka at nungsang thu  a niina en kik leang ih pupi sia Thuan ‘Tak hi a, ahihang pawlkhatte in Suantak in kiciamtee hi. Tedim ngam sung bek hi ngawlin India ngam sung dong ah Sizang sangin Suantak a zangh a, Sizang mi taangin a kiciamtee ih Identity khat a na hi nginge hi. Suantak sia ih identity in zangh thei thong leang ih Sizang mi bup zongh huam zawtu bang khat hi ka sa hi.

Tua ahi ciang ih minam bo ngawl natu sia Family name ah Suantak or Thuantak zangh tek leang pha ngawl tu ziam? Mangkangte ii thupi sak ngawpna hi buana ve ahitazong ih minam tepteena last name a Suantak or Thuantak sia zangh tek leang a pha ka tawm maw ci sia kong Introduce nuam hi.

SIZANG LAI
Sizang lai sia 1891 kumin Captain Rundal in hong pat sak hi ci in tepteena te ih mu thei hi. Halkha lai sia 1894 kum in Major Newland in na pat sak a, tua zawkciang Tedim le Falam sia America misionary te ii a na pat ahi hi. Khamtung ngam theampo pan a masa phitbel lai a kinei sia eima Sizang lai na hi nginge hi. Tuate tu ni dong ciang tetti in ih mu thei tu in Capt Rundal ii hong vawt sak Sizang lai simbu sia 1891 kum, Chin Hymn book sia 1914, Matthew lai thiang tho bu 1916 kum le Sya Suang Khua Kam ii Sizang laisin bu 1924 kum te zong tu ni dong ciang kimu thei lai kinei tek lai hi. Ci nopna panin Mangkang kumpi ngalkap te le Sangmangte in Sizang lai sia advance mama in hong patsakna thu ih mu thei hi. Banghangziam cile ei Sizangte sia lai he nuam a kivak vealvul hi tana Mangkangte, Sangmangte zongh in eima lai sia hong favour masa hi tuak hi. Ahihang eima in kizom zo ngawl ahikom ih lai sia hong thimthu pian a, ih Lai Thiangtho bu zongh 2005 khawng ciang kinei zo pheang hi.

Ahitazong tu ni a SRBA lampui te hanciamna le eima tek hanciamna hangin Khuavak Magazine, SCC Magazine, Siyin Green Group te ii lai hawmte, The Siyin Baptist, Nisim thaa an, Thupha Daitui ci le a dang tatuam laihawm laibu hong khang tato a, ih lai zongh tam ma khangto ci sia kimu thei hi.

SIZANG KAM HOLY BIBLE ET KIKNA TUNGTAWN
SRBA vaihawmna taw Siyin Bible Revision Committee sungah Chairman vaipuak taw 2010 July tha khawng ka kipat uh sia US ka pai ma dong New testament le Proverb, Psalm teng a hampi ka na man thei uh a, tu laitak sia et ciankikna nei saan laitak ahi hi. Tua Lai Thiang tho et kikna pan ka mu le ka phaw thu in:

(1) Ih Lai Thiangtho bu sia ih vawt maksak lai proof et cian kikna phatak kivawt man ngawl lai ahikom ih etkik hamtang tu a kul tatak a hina

(2) Ih Lai Thiangtho bu sia ih kam thuk, ih taangh kam dong ah ih lai kepna ahi hunlam

(3) Ih lai atdan ih lai ngualdan a phabel a sua thei natu Lai Thiangtho en kik teng in mu singseng ahikom amate teng lampui a ih laisim bu le ih lai taw kisai Gramer laibu khawng hong vawt suak vet natu vaipuak pia leang pha tu

(4) Ih lai ih upgrade thei natu hi Lai Thiangtho en Commiitee le lai atdan hong pua tu Committee te sia a kilawm bang sum le paai thungetna taw a dang teng in ih panpui tek tu pha tu in ka um hi.

THU KHUPNA
Hi lai nguicing ka atna sia Sizang mite ngual kawm ah tangciak a ih bo ngawl natu, ih tuu ih tate Sizang mi a hina teptee thei tawntung natu eima tek individual in. khangto bek ngawl a, minam bup a ih thukhat thei natu ngaisutna taw ka at ahi hi. Tua hi a, hi lai a sim theampo in Topa ompuina le tel thiamna taw nong simsak thei tek tu uh in hesuak kong ngen hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html