Nikonghong

Home » Biakna » Kawlngam Sung Tapidaw Hong Thet Phitna Thu

Kawlngam Sung Tapidaw Hong Thet Phitna Thu

By Bo Paupi

Tapidaw biakna Kawlngam sung hong thet phitna tangthu ih kat ciang, Rev. Judson hong thet hun pan kipan sia, a thucing zawhiat ma kihe, ih etkak tu zongh laibu tam ma om hi nave, Judson hong thet masia a, Tapidaw hong thetna thu sia kiheakpui lei nawn ngawl hi. Taangh, hun khat lai thupiang ngei tatak ma hi-napi, Kawl maangte zongh na za nuam lei ngawl ziam maw, thu tepteena zong om nawn keak ngawl a, ih sim tu laibu beak zongh tawm vangau seseam thong hi.

Rev. Judson ii nasepna ih sonte, American Baptist Mission ii nasepna ma hibel hi. William Carry ii tapa Felix Carry bang zongh, Judson mapek a Kawlngam hong theng a, Kawl lai Kawl ngeina ci theampo zongh nasia tak kan bek dom ngawl a, Lai Thiangtho thuciam thak ngangawn Kawl lai taw at zo hi. Judson Kawl ngam hong thet ciang zong ama taw kimu a, ama kung tung a, ama mapat sa teng panma a zom suak hi nave, Felix Carry sia Mangkaang ngam Baptist Mission pan hong pai hi a, American Mission hi ngawl tana, ama min bang a za ngei kitawm mama thong hi.

Baptist, Methodist cite pawl hong pian maa tawng, Protestant te pian maa tawng, leitung bup Tapidaw theampo nam khat bekma a om hun pek a, Kawlngam sung Tapidaw biakna hong theng ngeizo bekdom ngawl, thu um mi le pawlpi taw, biakinn taw, pawlpi naseam te taw a na om dimdem ngeisa hi nginge hi. Tua hun sangin a taangh hun seseam zaw a kikat tato ciang, Kawlte ii Kawlngam ci a, minam khat ngam khat hong pian tatak sia, Anawratha(1044- 1000) kumpipa hun ciang hi pheang ci leang, Kawlngam a pian zawk kum (200) bang a phak poma, Kawl kumpite omna Pagan khua ah Tapidaw biakna hong theng paih zo hi.

1287 kumin Sen (China) ngam kumpi Kublaikhan ii Tartar-Sen ngalkapte in Kawlngam Pagan khua hong sim hi. Pagan khua a om Kyansitta-gu ii a pang tungah Sen ngalkapte in thinglamte lim le Greek laimal nam 4, thinglamte lim taw a kithua in a zak theite, tam ma a kisuai kimu hi. Tua limte sia Rome khua Tapidawte kiphuumna thaan, suang hawng lei hawngte ii pang tungah a limsuai theite taw kibang lian hi. Tua hun lai in Kublaikhan ii ngalkapte sungah, Turkistan ngam pan Nestorian Christian te tam ma om hi tana, tua Tapidawte ii limsuai hi tu ki um hi. Tu a sia sia a thu papo in Kawlngam sung Tapidaw hong thet phitna hi ci in kiciamtee hi.

1496 kumin Italy ngam pan khualhaw sum vawt Hieronimo di Santo Stephano in Pegu kumpipa kung haw hi. Sum zuak in a om kakawm sung ma, a mihingte khat hong thi luilam in na, kuama ii zak nawn ngawl Tapidaw biakinn lui khat sungah ka mithi uh ka phuum uh ci lai taw na ciamtee hi. Tua biakinn sia tua hun lai in India khawng, Thailand khawng, East Indies sang khawng sia Armenian te in colony mun tam ma nei zo ahiciang, Amenian te biakinn ahibuale Syria te biakinn hi tu in kimuangmaw hi. Akua po aa ahi hial zong, tua hun maa in Kawlngam ah Tapidaw om zo, pawlpi om ngei zo, biakinn zongh a kho takma in na nei zo ahi hunlam kimu thei hi.

1498 kum ciangin Portugue mi Vasco da Gama in Europe pan nisuana sang hong pai a, Africa ngam Cape of Good Hope kantan in tuipi pan hong pai hi. 1510 kumin Goa mu hi. Tua mun panin Portuguete sum zuakin Kawlngam hong theng vanung hi. Pathein, Thanlyin, Mutama, Pegu khawng hong pai bek dom ngawl, Kawlngam sungsang Magway dong hong thengto hi. Teambaw tawlngak theina mun theampo ma theng kakoai hon a, sum zuak kakawm, innmun lo ngam khawng zongh a kilei thei le lei, a kisuan thei le suan, a thetna theampo uh zongh Pathian thu then papain, amate hantang ma ahi thei babangin a biakna uh zel papaih, cidanin a ngamtat hun hi. Ngamdang mi khualhaw le sumzuak in a vak tam ma Kawlngam hong theng a, a lai atna uh ah Kawlngam sung mun tatuam ah Tapidaw tam ma a mu uh hunlam na ciamtee tek hi. Pathian naseam zongh tam ma mu kakoai a, a min uh taw tatak ma na ciamtee tek hi.

1555 kum ciang Piancit ngam Paris University pan pilna saang Doctor nga sate tam ma om a, a lai atna uh sungah, Kawlngam sung mun tam ma ah Kawl mi Tapidaw tam ma ka mu uh, thinglamte tepteena (the sign of the cross) veu zangh hon hi ci in na ciamtee hon hi.

—>page 2

Advertisements

Pages: 1 2 3


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html