Nikonghong

Home » Politic » Obama Ii A Thiamna Thu Nga le A Thiam Ngawlna Thu Nga

Obama Ii A Thiamna Thu Nga le A Thiam Ngawlna Thu Nga

American president kiteal kik tu hun hong nai vaial aa, Obama a demtu Republicante zong primary election state 3 ah man zo hi. Mit Romney, Newt Gingrich le, Santorum state khat tek ah haat bel hi. State lian khat in aki ciamte Florida sungah tu nipi sung kidem tu uh hi. Mit Romney sia US Sizangte in Sahlungte ih nak Spanishte tatak hi ngawl ahihang, a pa sia Mexico ngam Cancun khua ah a piang khat hi aa, kum 5 kiim a phaak lai US ah hong kikhiin ahikom, a taangpu Mexicante ahibawle, Sahlungte in me a pia nuam tuam katawm maw ci zong ngaisut huai hi. State lian mama a hi Florida, Texas, California khawngah Sahlungte tam mama thong ahiciang, ngaisut nop huai sa ing. 

Republican sang pan a zo tu kihe ngawl lai ahiciang, Democrat sang pan a kidem tu Obama thu taw zomh to pai zaw tawng. President a sep zawk kum 4 cing tu hi zo aa, mun theampo ah a kicing mihing kuama om ngawl ahibangma, Obama ii a kicin zaw hiatna le a kisapna teng en kaak tawng.

A thiamna thu nga

1. Iraq ngaal mansak
2. America ii lim, leitung in a hoi zaw in musak
3. A kamciamsa healthcare reform
4. Osama Bin Laden taw kisai
5. America depression nga natu pan suataak zo.

A thiam ngawlna thu nga

1. Healthcare Reform sungah awkcip lai
2. Iran te daal zo ngawl
3. Kumpi deficit problem puapha zo ngawl
4. Housing market pua zo ngawl
5. Sipuazii taw kisai kamciam nasia piak pal lei.

A thiamna thu nga teng:
1. Iraq ngaal mansak
Politician khat in a piaksa kamciam bang sepna in a min ngana hoi mama thu ahi hi. Iraq ngaal ka man sak tu ci in 2008 me zol in a a-au lai a kamciam a taangtut dong seam ci in historian taangthu atte in ni khat ni ciang at tu hi zo hi. Iraq ngaal simna ah American ngaalkap 4,484 thi aa, 32,200 liam hi. US $ billion 806 vaal kizangh hi. Veterante (sit-muh-htaan haung) te kibawl natu le zatui zaha manh sia 2050 kum thet dong US 1 trillion ($ 100,000,000) kisamh tu hi ci in Brown University in son hi.) Iraq ngaal sia tha 105 (month) sung hai aa, Saddam Hussein taak sak nopna huvau vingveng in a tung a sum le pai, mihing nuntakna teng akizangh suak hi. 2011 sung thu piang Arab Spring (Egypt, Libya, Tunisia….etc) sung a piang, thu te en leang, sum le nuntakna tam mama zak kul vet ngawl in middle east dictator khat zawk ciang khat (Mubarak, Kadafi …etc) hong taak thei lel ci thu tepte huai mama hi. Obama in 2002 pekpan kipan ngaal sim tu langpan in a-au aa, 2008 me zolna zong ah a son bel thu ahibangma, hi thu tung taang ngual zawna nga ci in kiciamte hi.

2. America ii lim, leitung in a hoi zaw in musak
September 11 thubuaina omma in America sia leitung ngamte in thupha vawt ngam, a cingh, a thu thiam ngam khat in hong mu hi. September 11 zawk tawm vei ciang ngaal pawl khat hong sim aa, leitung buaina tatuam sungah kal suan in nung le kik thei nawn ngawl hi. Tua hun pan kipan a thu thiam, a cingh America ii lim sia hong thim vaial bek dom ngawl Americante ii ngamtatna leitung in lamdang sa in kii huai hong sa hi.

American ngaalkap khat in thong taak khat a vawt siatna

Iraq ngaal huvau leitung in America ii secret in a nei ku ngaal le sa kepna thong (prison) te thu (Guatanamo Bay) le a matsa uh ngaal te a avawt siatna thu (torture, waterboarding), 2004 sung thu piang Abu Ghraib thong sung ah thong taak te akilawm ngawl in a vawt siatna thu (torture, rape, sexual abuse, homicide) te in kawl ngaalkap te ii ngaal simna ah a uk uh bangpo a ngamtat bangma America ii lim sia sia cip sak hi. 2008 hun lai in America ii lim sia patang seksol haat mama khat in a no zawte a zawthawk taw kibang in, America ii lawm pha bel ngam te ngangawn in kii huai hong sa hi. Ngam tatuam pan poll te en kik leang, America ii ngamtatna dik sa in hong thauk-khaan sia, England ngam pan zakhen 53%, Australia pan zakhen 46% le Germany pan zakhen 31% bek om lai hi. Obama hun sung ah tua poll te hong hoi kik aa, leitung in America sia a hoi, a cingh, a dik ngam khat in hong mu kik hi. Tua poll laakna ah, muslim ngamte ah taak suk kik bilbel hi. Obama kaa zawk, America ii ngamtatna sia Egypt ah zaken 20%, Pakistan ah zakhen 12%, Jordan ngam ah zakhen 13% bekin Obama le America ii ngamtana diksa, thaukkhaan aa, Bush lai a saang niam zaw siat hi.

3. A kamciamsa healthcare reform vawt zo
“I will sign a universal health-care bill into law by the end of my first term as president,” ci in 2008 lai kamciam a piak bangma nasia tak in a hanciam zawk ciang health-care bill sia tu ni Republicante in nasia tatak langpan hikale, zo hi. Ahihang, Health care reform hoi takpi ziam, hoitakpi ngawl ziam, zak taak ziam zak taak ngawl ziam ci sia 2014 ciang in kitel pheang tu hi. Obama-care ci in Republicante ii ci vadai hi reform ii a tam zaw sia 2014 ciang effect tatak pheang tu hi. Ciang Obama-care sung akihel ahi, American ngam mi theampo in health insurance nei nanaak kul hi ci thu tungtaang Supreme Court ah 2012 khaal tumma kinialna (debate) om lai tu aa, tua kinialna tung tawn in khensatna sia June tha khawng ciang om thei pheang tu hi.

4. Osama Bin Laden taw kisai
John F. Kennedy in “Zawna in Pa tam mama nei aa, lelna in ta-nga khat ahi hi” na ci ngei hi. Bin Laden that tu in a kuan uh lai, a zezen in senpyi ngawl hi thong le, a kuama po in Obama kawk niknek tu hi. Obama ii mawna vingveng suak tu hi. Banghang ziam ci le, hi Osama Bin Laden operation ii lampuipipa, leader sia Obama ahikom hi. Hi operation in a patna pan kipan a tawp dong Obama ii thupiakna (under command) taw kal suan hi. Obama ii lampui thiamna (leadership) bangza hoi ziam ci sia kimu thei hi.

President Ronald Reagan pan kipan President 8 bang ii khut nuai ah naa a seam ngei defense Secretary Robert Gates in “one of the most courageous calls… that I think I’ve ever seen a president make.” ci in Obama sia na pok hi.

Vice president lui hi aa, terrorist te tungtaang Obama a hawm thaw cip khat ahi Dick Cheney in “You’ve got to give him a lot of credit for making the decision, It’s no question that was his responsibility and I think he handled it well.” ci hi.

5. America depression nga natu pan suataak zo.

American ii 1947 GDP sang 2008 GDP niam zaw (click on graph to read full story)

Republican khat ahi Cantor in Obama hun sung nasep nei ngawl tam vaial hi ci hi. Man mama hi. 2009, Obama kaa sawng lai unemployment rate sia zakhen 7.8% hi kasap, kum 3 zawk ciang zakhen 8.5% bang thengto hi. 2010 sung zakhen 10% dong zong theng ngei hi. Cantor ii ci bangma Republican Bush hun lai unemployment rate sia zakhen 4.7 dong niam suk ngei hi. Siipuazi khantona (Economic growth) zong Obama hun sung taak hi ci in Republicante in mawsiat aa, tasia zong man vave hi. Ahihang, Republicante ii son ngawl thu khat son tu hi leang, Bush ii tuak hun, 2008 kum, Obama ii president kaa hun lai America ii GDP (Gross Domestic Product) sia 1947 zawk a niam bel kum hi. Second world war man sawng USA ii GDP sang in 2008 Republican Bush ii khut nuai GDP niam zaw hi.

GDP le Depression thu tawm son tu hi leang:
GDP khiakna sia Britannica Encyclopedia te in “Total market value of the goods and services produced by a nation’s economy during a specific period of time” ci hi. “Ngam khat ii a vawt vanh le naa theampo ii a amnh” ci leang a ol bel in kitel tu um ing.

Depression khiakna sia “A period of drastic decline in a national or international economy, characterized by decreasing business activity, falling prices, and unemployment”. A ol bel le a tom bel in phen tu hi leang, “Ngambup siipua zii, kialpi tung” ci leang kitel tu um ing.

1920 kiim lai in leitung bup depression (siipuazii kialpi) tung aa, haksatna nasia tatak in piang ngei hi. Second world war man sawng zong, ngaal huvau in nasep om ngawl, sum zonna haksa in, tubangma haksatna tam mama piang hi. Tua hun lai GDP saang in Republican Bush tuak hun lai, GDP niam zaw hi. Depression a ki nga dektak na hi nginge hi. Tua ahikom Obama president suak bua ii, Republican khat president hong seam le zong, unemployment rate le, siipuazi khatona (Economic growth) sia tubangma hi lel tha tu aa, sia zaw zong hi thei lai hi.

Bangbangpo ahizong, Obama in American ngam bup depression dong thet thei natu pan in hong suatak zo ci thu sia kuama nial thei ngawl thu khat ahi hi.

Mihing in piang kuama piicing (perfect) om ngawl ci in patna ah ih kipat bangma, Obama ii thiam ngawlna, khialna zong na om vave hi. A kik ciang Obama ii a thiam ngawlna nam 5 thu kikum tawng..

Zom lai tu…..

TN

Source: www.theweek.com, Wikipedia, Britannica Encyclopedia

Advertisements

3 Comments

  1. Ngocinthawng says:

    Thawngno,
    Lai dang tataum sim kul ngawl a,tuh hi bang nong phen/hop thei lungdam mama hi.Zom tatao lai taw–Mee piak tuh zong hi sia tung depend tuh na po hi awng…Laitui te pau le ka piak ngawl tuh he dedek zo khi.

  2. thawngno says:

    Lungdam ei, Pu Thawng….

  3. kamcin says:

    kei zongh kin mama ka hi hang athuson uh te sia azul bekvo telbek aa tubangh acing tak aa nong suasak sia dik sa mama ing.lungdam.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html