Nikonghong

Home » Sizang (Khamtung) » A Visit To Mualnuam

A Visit To Mualnuam

By Dr. Pau Za Nang (MBBS)
SRBA-Vice President II

Khamtung ngam Tonzang township sungah om Mualnuam khua sia hi ngawlin Zozang khua Kalay Valley pan tai 4 paam bang kaatona nidang lai Sizang mite khuasa Mualnuam khua sia ii thu hizaw hi. 11-4-2008 pan 16-4-2008 dong Myanmar Compassion Project (MCP) pan Professor Dr. Kam Cin Dal (Retired) lampui in Mualnuam khua, Thaangsan, Dolluang, Suangdaw te ah motor 3 taw ki pai tek uh hi. Dolluang khua ka thet uh ciang Sya Thang Ngin Jubilee na vawtin sial ngo in biakpiakna nasia takin a kivawt sungah ka na kihel thei tek uh hi. Ka thet to uh ciang choir taw hong muakin zaknophuai ciliaphuai mama khat in hong muak tek hi. Cina ka bawl ngawl hun sung Sya Thang Ngin a phuumna thikang inn a sak sitsetna zongh ka na en kakoai uh hi.

Mualnuam Khua (Pleasant Hill)
Mualnuam khua sia keima paito lai ka muna “A Burma Frontier Man“, By Dr. Vum Ko Hau laibu le Chin Hills Gazette laibu sung a ki atte tungtawnin hi article hong kiat suak hi. Mualnuam khua sia tuipi pan a saanna 4960 feet paam hi. Tua hunin inn 17 paam na teangin Keizang suan, Khuano suan vive hi. ZBCM biakinn a no mama khat na om thilthial hi. Leitamna (Kalay Valley) Zozang khua pan tai li khualana ah a khua om hi. Mualtung khua khat hi a, a kiim a paam ka et ciang thei kuung bang lian thei peuma tana lei ci pha mamana mun ahi kitel thei hi. A khua pan saksang furlong khatna khawngah lam zang pan khaal lai takpi tui, peangpi cia (Let mat khat) bang a lian tu tui luang vahe lel hi. Tua munah ni dang lai ih Pute ii teenna inn mun, a an huanna lungthute zongh mun khakhat ah kimu thei lai om lai hi. Nidang in Thuklai Chief Pu Ngo Khua Thang ii ukna ngam hi. Eima Sizang mite thukimna tungtawnin ih kiim ih paam pan in hong tai hong teang tek hi. Ni dang lai ih Pu ih Pite ii teenna (khua satna) hi ta a, ci in ngaisun in ih lung hong zuangsak peuma hi.

A khua bodan:
Mualnuam khua sia Sizang mite ii a na saat khua hi. Muitung, Beallei Chief Pu Lun Kam in Hang Vung (Kuntong) Zong Tuang tanu teenpui hi. Khuasat pite sung Muitung (Thuklai), Kun Tong (Khuasak) te, Buanman pan Thuk Khup, Thuk Son te teng ma na hi pai hi. Khuasak khua bo ciang Muitung ah kibeal tekin ngal kido khawm hi. Tason Ukpi Lian Bawi a thalup hun zongh tuak ah a teen khop hun lai hi tuak hi.

Lun Kam (Beallei-Mui tung) in ngam zaizaw ngam phazawna zong a, Thuk Kham nusia hi. Kalay Valley taw a kinaina Mualnuam khua hong sat hi. Tua hunin Kawlpi ngam sia Yawte mang in uk hi tuak hi. Yawte taw kilem in haksatna a nei ciang kihu tu in thukim tek hi tuak hi. Tua hikasap a khui a loai nguksak tan ahikom a thin uuk in hong ngal vawt hi.

Taanglai Mualnuam khua sia inn 40 paam bang pha-hi tuak hi. Yawte in letsong kong pia tu uh ci in Mualnuam khua pasalte sam hi. Mualnuam khua pasal tangzang tingtengh 37 that hi. Pasal 37 bang a thalup  zawkciang Mualnuam khua zongh sim to hi. Falam sangte taw kipawl in simcip hi tuak hi. A khua bosak sitset hi tuak hi. 1867 Pu Ngo Mang sia surrender ngawlin tai hi. (Pu Ngo Mang sia Khuasak Ngalphuakte hi.) Kawlpi ah pasal 37 a thalup lai in Lun Kam ii kep a suapui Thuam Son suakta hi. Tua kimotna a om zawk ciang Pu Ngo Mang ii ta Pu Khup Pau in Kawlpi ngam sia simsuk tawntung hi. A phonggyi te ngangawn matsak lai hi.

Sizang minam (Sizang kampau) sia kicii tawm mama ahikom ih bocip tu lau manin Kawlzang tam ah Sizang Tuiphum Pawlpi a kiphut hong suak hi. Kawlpi ah, Leipui ah, Tahan ah, Thingunau thum, Khaikam khua ah ih minam bulphu in Pathian thu a kihanciam hi. Ih Pu ih Pate hun hi bang teng a thiam ngawl hu in khua bo kik ci sia ngaisut kik thei tu kuul hi. Kawlzaang tam ah Sizang Tuiphum Pawlpi ih phu sia Sizang khua thak a sasat taw kibang hi. Tuiphum Pawlpii sungah Sizang minam 80% bang kipawlna hi. Tuiphum sung pan Topa Jesu ngupkhiatna kinga thei ngawl hi ci Lai Thiangtho nong lak thei uh le kei zongh taisan pai tu khi hi. Topa Jesu zong a koisung pawlpi dang ih zot sawm lai ziam? Ngual a kikhen le a kikhen tham tu pha hi. Ei ih tanga sia son kul ngawl ih heaksa tek hi. A bosa hun sung ih ngim nganasate en in, mailam sangah ih paikhial ngawl natu deina in nung sang thu tawm kong at kik hi.

Heaktu: SCC Annual Magazine sungpan a kila kik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,038 hits

A Lui Te

Twitter Updates

Error: Twitter did not respond. Please wait a few minutes and refresh this page.

Live Trific

google-site-verification: googled172884ff34d55c0.html