Nikonghong

Home » Thutatuam » Thin Sung Ngaisutna In Pumpi Uk

Thin Sung Ngaisutna In Pumpi Uk

Mihingte ih nuntakna hun tom mama a, ih thinsung khuangaisutna in ih pumpi uk hi. Mihing nuntak hun sia kum (70) kiim bek hi a, khansau a nga mihing khat atu in, patang hun [childhood] ngaknu tangval hun [adolescent] le khanghaam hun [adult] ci in hun thum kantan kul hi. Ih nuntak hun tomno sungah mihing theampo in, nopna daana, nuina le thitui luanna, zawnna hauna, thin uukna le nasakna, lungkim ngawlna [resentment] eenna, hazaatna le dungawkna [envy], khat le khat kingaimawkna thu tatuamte taw, kipeal thei ngawl thong hi. [Our lives were full of recentment and envy]. We hated others and they hated us (Titus 3:3).  Ih thi tu sia, mikim phial in kiitakbel in kinei hi. Thu-um mi tatakte in leitung pumpi thina sia thupha ngana in na saangzaw hi. [Death is an exit from pain and sorrow; an entrance into a home. Death is a blessing for the faithful] ci uh hi.

Khang haamte in khang moite khuangaihuai sa a, khang moite in khang haamte hawm thawkhuai sa hi. Mi thumaante in mi thumaan ngawlte ngaimaw a, mi thumaan ngawlte in mi thumaante ensan hi. Atatakin ci leang, mihing pumpi etsat ngaimawk tu hi ngawlzaw a, ih siat pilnate kingaimawk sak tu hizaw hi (လူပုဂၢိဳလ္ကို ဘယ္ေတာ့မွ မမုန္းရ၊ လုပ္ရပ္ဆိုးမ်ားကိုသာမုန္းရမည္) mipilte in ci hi. Ih leitung pumpi a thi zawkciang, leitung ah kicia kik thei nawn ngawl ahiciang, ih nuntak hun sungin, thuhoi khat beak seam zo thong leang a, sum tungah thumaanna nei zo leang Topa Pathian lungkim mama tu ve.

Mihing thinsung puakzia nam thumte, tel ngawl phamaw sa ing.

  1. Leangna khual ngawl, midangte siatna bebek sason, thuhoi thupha sep nopna thinsung vom ngawl, sum nga natu bek a bulphu mihingte [Hotel Mentallity]
  2. Sal (innteang) thinsung vom, tungsia maivil, nuaisia nengcip, puatham kamneal, maimua kinuamsak, nuiza pepeu ngawl kinuisak vahee thei, a tung thamthual teng san kikkel a, a sungsang lungno a dim, theiteak min taw a kibang thinsung neite [slave mentality] le
  3. Innteak thinsung nei a, ama atu, a seppui a lawm a ngualte atu le mihonte phattuam natu sep nopna thinsung nei a, ngimna le haksatna a thuak kenkon te [Host mentallity] ci in nam (3) om hi.

Midangte siatna ih musak tu sia [fault finding] ol mama kasap, eima phat ngawlna, ih siatnate, ei le ei ih kimu tu sia, haksa mama luilam hi. Mihing theampo in siatna phatna nginatna nginat ngawlna kineikim ci sia, tel masak huai bel hi. (No man is perfect; Rom 7:18-20) Eima kisapna tel masa tu a, midangte kisapnate tel thiam sak thei leang, nuntak thaakaai, nuntak thaman om pheang tu hi. Kam tam pau leang khialna tam thei hi. Mipilte thutepteena ah “Naam taw liamna sia, zatui noai leang, damkik pal mama kasap kam sia kampha ngawl ih pau thakna in, a thuakte atu, damkik hak mama” ci uh hi. Hong kipok le zong lungdam vahup papai tu zongh, hi tuak ngawl hi. Pua tham taw hong sial pok zongh, mihing pawl khat om thei hi, kiitak huai mama hi ေျမႇာက္ပင့္ျခင္းသည္ မူးယစ္ေဆး၀ါးႏွင့္တူ၏ mipilte in ci hi.

Ngaisutna (advice) hong pia theampo, up vaduam papai zongh, ih mawmawtna lian mama khat na hi khinkhian thei hi. Banghangziam cile ngaisut piakna nam nii om hi. (Two advices) Khatna sia thupha deisakna taw ngaisutpiakna (အျပဳသေဘာေဆာင္ေသာ အႀကံျပဳခ်က္) le niina sia thusia thupha ngawl sangah hong lalsak nopna taw ngaisut piakna (မသမာမႈ၏ ဆြဲေဆာင္မႈပါေသာ အႀကံျပဳခ်က္) om a, ngaisut masak huai mama hi. (Hong kipokna kammal theampo ih um papai le kikhial thei hi.) Ngaisun masa in. Maisang atu, khual a ih et masak ngawl manin, ko khang-haam sate in ka thuakna uh tam mama hi. Milpilte paunaak (မ်က္စိတစ္ေထာက္မၾကည့္ရ၊ မ်က္စိတစ္ဆံုးၾကည့္ရမည္) a ci sia maan mama hi.

Thu son, kampau a thiam mamate in, mihing thinsung la zo mama hi napi kam le muuk a thiam mamate sia, a kiitak huaibel ngal ciphate na hikuu nginge hunlam sia, ko khanghaamte in, ka thuakna uh tam mama hi. Kawl paunaak khat ah: “Thumaan thutak na tel nuam uh le lutang (3) neite (kaang sung lu phuumte) khang haamte thu dongh vun,” ci hi.

Ngimna vawtsiatna a thuak zazan sate in thu hong hilna pawlkhat, “Leitung mihingte nuntakna sia khang vazek kiam vazek [ups and downs] hi tan lel ve; vawtsiatna le nencipna ih thuak thaak ciang bek, ih masuan kitaangtun thei zaw hi, thinkiam ngei heak vun,” hong ci hi. (“Pha takin ngamta le te nang hong nawngkai sak zo tu bangma om ngawl tu hi; na tai hangin na puktha batu hi. Paunak 4:12”) hong ci hi.

Haksatna thinngimna a thuak ngei ngawl leitung mihing khat zong om ngawl hi. Eima nguak bek in ih pum thuak le thin amh in kimawmawt taimang tu hi. Ih innkuanpui, ih lawm ih ngual, ih pawlpi mite taw thuakkhawm leang ih vanh zaang zo bek hi.

Lampui (leader)  ih ci zongh nam thum bang om thong hi.

  1. “Kei thu bek” a ci lampui pawlkhat
  2. “Kikum vadiam tek tawng” a ci lampui pawlkhat le
  3. “A suak nuam po suak hen awlmawk bong” ci thin sung ngina ngawl a neite ahi hi. Nuntak nuam, a manpha (ထိုက္တန္တဲ့ဘ၀) ih nga tek thei natu in, a kidophuai nam lite
  • Leitung pilna nei ngawl le thin sung phatngawlna a thuate kidophuai hi.
  • Leitung pilna le thinsung pha ngawl (thinsia) a vomte kiitak huai bel a, pial theiza in pial huai hi.
  • Leitung pilna a nei ngawl het hangin, thinsung ciimna (tui bang ciim) a neite in nang tungah siatna hong vawt ngei ngawl tu hi.
  • Ciimna le pilna a thuate in ih nuntakna hong laamsang zo mama tu ahikom bel taak, pawlpui taak mama, maivil taak mama hi ci in mipil miciimte in hong hil hi.

Leitung mipil miciimte thu tepteena ah, kham le ngun sangin a manpha zaw le a manphabel bang hi a, a votbel, a thiangthobel le a mealphabel bangziam ci in dongh leang:-

  1. Amanphabel sia; HUN (Time)
  2. Avot bel sia, KI-IT NA(Love)
  3. A thiangtho bel sia; CIIMNA (Wisdom) hi a
  4. A meal phabelte sia vantung ah zan ciang a taang siilsial aksite le kuama hong sawl kul ngawl a, septuak, na hoi na phate sepnopna thinsung pilvaangna [အသိစိတ္] hi

ci in hong son ziau lel hi. (Ei ngaisutna taw a ki leebulziam?)

Suatakna (Freedom) sia, a dei ngawl leitung mihing khat zongh ki om ngawl hi. Ahihang zangh khial leang “tui buasa kiluak kik thei ngawl” natna thina haksatna namcin kithuak hamtang hi. Sonteena: American ngalkapte in Korea ngal kisimna, a man zawkciang, mualsuang (Khansuang) tungah (Freedom is not Free) ci in at luilam hi. (1959-1975) dong kum (15) sung teng Vietnam ngal sim a, a ciimawk ciangin, America (USA) ngam ah ciakik siat hi. A nungkiin (withdraw) hi ngawl a, ngal lel a, a cimaw ngal tai [surrender] hizaw hi. “US” ngalkap tul sawmluk (60,000) bang thi ahikom, ngalkapte kiphumna “thaan” a haw ciang “Vietnam ngal a lel hi thong hing” ci in thu nung phawkik thei pheang hi.

Mipilte in “Suatakna nam nii (Two Freedoms) om a:

  1. Uuk babang pheangtat suatakna in haksatna luam thuuk sungah hong tumpui thei a
  2. A kilawm bang a ngamtat suatakna in mihingte nuntakna hong laamto thei hi”

ci in hong hil hi.

Leitung ah lasa thiam a aw hoi mihing tam mama kale, amate sanga a thiamzaw, aw hoi, aw zaaknophuai zaw “Aw” nam khat om, kici hi. Tua a zaak nop huai bel sia, a dang hi bo. Ih thin uuk ciang kamsia, kam ngaldo, kipau khial hamtang hi. Ahihang, “Kei khial ing (I’m sorry), Kei khuangai ing (I’m sad), Hong maaisak ka ven (please forgive me)” ci leang leitung lasa thiambelte [အဆိုေတာ္] aw sangin, zaaknop huaizaw kici hi.

Ciimna (wisdom) ih ci sia, mihing mawmawte atu saanglei a, mihing ciimte phat vawt leang hoi seseam a, mihing pha ngawlte phat vawt leang sia seseam thei hi. Hong it mama ih pianna ih nute ih lungdamsak zo buahet zong, ih thasiatsak thaak ngawl tu thupibel hi. Banghangziam cile, ih nute in, ei tung pan kham le ngun, sum le paai ih piak tu lamen masa ngawl a, a tate, bangza a hong it ziam? ih telsak tu hong lamen masa nginge thong hi.

Ih thinsung ngaisutna in ih pumpi uk hi!

_________________________

Heaktu: SCC Annual Magazine sungpan akilakik hi.

Advertisements

1 Comment

  1. thangcinnang says:

    hoi sa ing. han ciam lai ta vun maw

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,038 hits

A Lui Te

Live Trific

google-site-verification: googled172884ff34d55c0.html