Nikonghong

Home » Sizang » Citakna Taw Keamcing Tawng

Citakna Taw Keamcing Tawng

CITAKNATAW KEAMCING TAWNG ci kammal sia 2011 kum sung Yangon Sizang Tuiphum Pawlpi te ii kammal let ahi hi. Hi kammal in biakna nasepna ah hikale, leitung nasepna ah hikale ih zui tu, ih let tu kammal pha mama khat ahi hi. Biakna sungah Laithiangtho kammal bangin kinungta a, leitung nuntak sungah leitung ki ukna upadi te ci bangin, kizui in, kinungta hi. Ih nuntak sung ih ngamtatna tungtawn in ih citak le ih citak ngawl sia ih kiim ih paamte in hong tel mama hi. 

Kawlngam sungah kumpinu naseam in kum 20 val ka om zawk ciangin Hakha khua ah Chin State Livestock Breeding and Veterinary Department Head tu in 1996 in ka theng hi. Nilai nitak in Sizang mi teng kikhawm in thungetna veu ka nei uh hi. Tua ka kikhopna ah nupi nii veu in “Sizangte kiphasak mama tana Pathian in dan hong pia a, ulian tu peuma ki om nawn ngawl hi. Tua ahiciang Pathian tungah mawmaina ih nget tu kisamh hi, ci veu in thu hong sung hi. Sizangmi akua bang teng kiphasak ci sia ka ngaisut ciang ka he zo bua a, numei thuson po ci in ka koi lel hi. Tua nupite ii ci nop sia a bosa hunsung a, kumpi naseam ulian pawl khat kiphasak sa hi tu in ka um hi. Hi sung ah ka sontel nopna pan kumpi naseam ulian khat in a khutnuaite tung nasepna taw kisai in a hil a paute sia kiphatsakna hi ngawl ci sia heak tu pha ka sa hi. Kumpinu nasep panin pension ka laak ciangin Yangon ah teangin Yangon Siyin Baptist Church ah ka tum hi. YSBC ah ka tum zawk a ngei ngawlin pasal khat in pulpit tung pan in “Ei Sizangte sia a kiphasak minam te kihi a ci in hong son ciang lamdang ka sa mama hi. Tua bek dom ngawlin Church Council meeting ah pasal khat in “Ei Sizangte sia a thumaan ngawl, a leilot thei, a ngina ngawl, a muan thamman ngawl minam kihi hi” hong ci leleau hi. Tua zawkciangin Tedim suapui sangngam thuhil syate YSBC ah thu hong hil ciangin no Sizangte na kiphasak uh hong ci thong hial hi. Ngual in, kiphasak hong ci a, eima mama zongh in ih kiphatsakna ih heak liang ciangin maizumhuai mama ka sa hi. Ih pu ih pa te in: “A kiphasak te sia a mawmawte hi” na ci hi. Sizang minamte ih kiphasak le, a mawmaw minamte ih hi nginge hi, ci sia ih phaw tu ka dei hi.

Sizang mite sia a thinpha, a kiniamkhiak, ngual a hu nuam, ngual atu deisak, a kiphasak ngawl, mi citak minam ci in ka kingaisun hi. Ahihang 1996 kum Hakha ka thet ciangin tua ka ngaisutnate bosiat hi. Tua zawk 2007 kum Yangon ka thet ciangin Sizang mite sia a kiphasak, thumaan ngawl, ngual theam thei, muan thamman ngawl hong ci ciangin Sizang mite ih nuntak dan, ih om dan, ih luheak dan, ih pau dan ih sittel kik tu pha ka sa mama hi. Tedim suapui sangngamte in “No Sizangte zu kakham pastorte zongh reverend pia hi ngawl nu ziam ci bangin hong nunau thei ci in ka zaak ciang, nidang a ka ngaisut Sizangte citakna sia koisung theng thong ziam? Tua hi a, nidangin ih pu ih pate in a thinpha, thukhual, thumaan, ngual atu deisak, a ciim, a kiphasak ngawl, a citak minam in na minthang hi. Pawl khat in (eima le eima ih kicina po a hina le he bua hing!) Zomi Israel te hong ci thong sawn hi. Hi bangte sia ih citakna hong lak hi nginge hi. Ih pu ih pate bangbangin nungta a, bangbang zia in luheak ziam? ci sia keima muna bang a nuai a bangin tawmno khat kong at hi.

Pupate ii nuntakzia:-
Taanglai ih Sizang mite sia mi nuamsa, thawsa, e sa khamin, hauin, ih ngampui mite in antawkna in hong nei hi. Tua hi a, ih Tedim minampuite sia Zinte ih ci sia tuak sung panin hong pai ahi hi. Ih zin in hong pai tawntung ahikom Zinte (Guest/ဧည့္သည္) a kici ahi hi. Zawnsakna kammal hi ngawl het hi. Ahihang tuhun ciangin Sizang minam sung pan mi ngina ngawl, miseksol pawlkhat in zawnsakna kammal bangin zangh hi. Hi bangin ih pau ih haam ciangin ih pu ih pate ii lungput dan, a citakna dan taw kileebul mama hi. Ih pu ih pate bangin citakna ih lak kik tu ih hanciam tek tu hi.

Pupate ii ngual taw a kipeeawzia:-
Ih pu ih pate sia sumzuak sumlei in khual a hawhaw hi tuak hi. Mihing tawm hikale Tedim ngam sung bek dom ngawlin Falam ngam, Hakha ngam, Mizo ngam, India ngam, Bengladesh ngam dongin pai hi ci in ih vanh zakte tungtawn in kimu thei hi. Ih pu ih pate sia minam khat in na ding a, ngual ii thupi a sak minam khat kihi nginge hi.

Pupate ii lampuizia:-
Ka no lai in ka Pa Mang Lam Khaw Mang sia Ukpi hi si (a ukpithasum sia 1958 အိမ္ေစာင့္အစိုးရ in a lomin pia a, tuak panin ukpi za bosak hi) Khua hausa zongh mee taw kitealin seam thei si, Circle Chairman khawng hikale na seam khawm thei a, Thuklai hausa Upate kikhopna ah hikale, Sizang hausa Upate kikhopna ah hikale thu ngai in ka om thei tawntung hi. Tua sungah a kampau thei tawntung khat sia “Sizang Pasal thu kikum ci buang matun ngawlin om tu hi ziam?” ci kammalte hikale, “Lianzawta thu kikum buang” ci kammalte hikale, ka za tawntung hi. A kikup thute thin khona tak taw a matut dong a seam valeng tu in a kinging tek ahi sia ka mu thei peuma hi. Ih pu ih pate sia a taktai, a thinkho, a thumaan, ngual a hu nuamte ahi hi. Atepteehuai mama thute sung pan

  1. Thuklai sia khuapi hi ngawl kale khuapi dangte ahi Tedim, Falam, Hakha te taw kibangin 1947 in High School nga theina: (Hite sia ih pu ih pate ii vaihawm thiamna ahi hi. Khamtung ngam ah kuama in private in tan (10) sang phuan ngawl hikale Thuklai ah private tan (10) sang na phuan thei a, tua tungtawn in Dr. Vum Ko Hau in High School sang na ngen ngam hi.)
  2. Japan ngal zawk phet a Thaang le Thuklai motor lampi zikna le Sizang kual khua khat le khua khat motor lamzikna te: (Tua hun laitak in khamtung ngam mundang ah kuama in motor lam private in ziik ngawl hi.)
  3. Khamtung mundang ah Japan ngal zawk phet a, a om ngawl, Sizang sung bek ah a om Telephone: Hi bangte sia ih pu ih pate ii lampuizia le mihon ii citakna a kilaakna ahi hi.

Mikaang Kumpite in thupi hongsakminam:-
Mikaang kumpi in 1885 kumin Mandalay hong la in Kawlngam sia Mikaangte khut nuai suak hi. Ei Khamtung Zo ngam sia tasia hun lai in Kawlte ukna ngam hi ngawl lai hi. 1888 kumin Mikaang ngalkapte Kawlpi khua hong thet a, Khamtung Zo ngam hong laak nop ciang, 1889 kumin ih pu ih pate in Mikaangte Kawlpi ah tuaksukin nasia takin na do hi. Ih zak ngalhiam a kiban ngawl hangin kilel hi. Hong zaw ciangin hong vawtsia thathong ngawlin ih ukpite taw ma in kilemna vawt hi. (Thuklai ukpi Pu Kam Lam taw kilemna a vawt tepteena suang a phu sia tu dong ma in kikeam lai hi. Pu Kam Lam ii tupa Pa Lam Za Pum te inn ah om hi. Tua suang sia phu cipo a kiphut hi ngawlin Mikaangte taw a kiciamna laipi sia tungah sathin, salung, sachi taw phuisam in a kiphut ahi hi.) Sizang khua 5 pha a, tuak sung pan Voklak hausa a seam Pu Lian Kam (Taitan kisimna ah thi) sim ngawl khua uk (hausa) a sep ngei bangma in khua uk za ma na seamsak hi. Hi sia in bang hong lak ziam? ci le ih pu ih pate ii omdan a thupina hong lak ahi hi. Mikaang kumpi in tasia lai in thupi hong sa buale khua hausa in hong koi ngawl het tu hi. Mikaang kumpite in mi thupi in hong saang a, Khua uk hausa ih sep bangbang ma in hong koi hi. Mikaang kumpi in hausa (Headman) na ci ngawl in Ukpi (Chief) ci in zaa na pia hi. (THE CHIN HILLS by Bertram S. CAREY C. I. E. and H. N. Tuck Volume II Part III. – Gazetteer of Villages) Pu Lian Kam a thi zawk ciangin Voklaak hausa sia khua dangte khut nuai in na koi ngawl het in Voklaak khua mi ma ahi Pu Pau Khai ma hausa zaa na pia hi. Hi sia in bang lak ziam? ci le citakna hong lak ahi hi. Tua hun lai takin ih Sizang mite na citak hi buale Kamhau, Sukte uk sung a kitheng lel tu ahi hi. (Tua hun lai in Sizang khua 5 sia amate ukpi le amate ki uk a, Tedim ngam le Tonzang ngam sia Kam Hau, Sukte ukpi khutnuai ah om siat hi. Mikaangte hong thet laitak Sizang khua 5 ukpi teng

1. Pu Kam Lam-Thuklai.
2. Pu Khup Pau- Khuasak.
3. Pu Mang Lun-Limkhai.
4. Pu Khup Lian-Lophei.
5. Pu Lian Kam-Voklaak.

Hi Chief teng sung panin Pu Lian Kam sia 1889 kum Taitan kisimna ah thi a, Pu Kam Lam le Pu Khup Pau sia 1893 kum myo-uk suam vai in Kantat thong ah thong taak hi. Pu Kam Lam sia Kantat thong ah leitung nusia hi.)

Ih pu ih pate sia thuman thutang a deite hi:-
Ih pu ih pate sia thumaan thutang a deite hi a, thumaan a sakte tungah a thi ngamte ahi hi. Tuabang a, Mikaang kumpite taw ngal kilemna vawt hikale banghangin myo-uk suam ziam? ci thu sia dokhuai mama a, ih heak tu zong kilawm mama hi.

Thuklai ukpi a khakbel a seam Pu Lam Khaw Mang (U Mang Khan Pum pa) tepteena sungah Mikangte taw ngaal kilemna thukimna sungah “Thau (Gun) kimat sak ngawl tu a, a nei ngei a kep ngei bangin keam thei tu hi” ci thu om hikale myo-uk Tun Win hong thet ciangin ih thau (gun) teng hong matsak ahikom myo-uk kisuam hi ci in na ciamtee hi. Hi bang a, myo-uk ih suam sia bang lak ziam? ci le lungkimna om sa, thukhensatna om sa khat sia thupisak a, a kholet nuam minam ih hina le, tua tungtawn in a nial ngam, a do ngam, a thi ngamte ih hina hong lak hi.

Thukhupna:-
Hi a tunga Mikaangte taw kido nate ahizong, Myo-uk suamnate ahizong, State High School nganate ahizong, Thaang le Thuklai motor lamziknate ahizong, 1950 kumin Sizang kual Telephone neinate ahizong, ih et ciangin ih pu ih pate sia a thumaan, thumaan a sakna ah a pau ngam, a son ngam, a seam ngam, a vawt ngam, a thi ngamte na hi hi. Thu kikupsa, lungkimna omsate tungah mi khat po ii maitang zatakna taw in, a kheal memeang, a lumlet papai, a meikhup vadunte na hi ngawl hi. Ngual atu deisak in ngual a hu nuamte na hi a, mihing citak mama te na hi uh hi. Hi bang a, citaknate, ei a khangkikte in keamcing tawng.

____________________

Heaktu: SCC Annual Magazine sung pan akila kik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,038 hits

A Lui Te

Live Trific

google-site-verification: googled172884ff34d55c0.html