Nikonghong

Home » Lai & Kampau » Thum Kingawm SCC Poaipi

Thum Kingawm SCC Poaipi

Thum ngawm SCC Poaipi ci ciang a lamdang khat bang hi kisa tha tu hi A 4 veina Sizang La Kikupna, A 3 veina Sizang Lasak Poai le Sizang Lai nei zawk Kum 120 cinh Khansuang phuna nam thum kingawm cina hi a, 17-20 Nov 2011 hun sung Kawl Sizang khua (Thingunau) ah, “A ki it minam” 1 Tim. 5:8 ci thu bulphu in nasia tak kivawt thei hi.

Sizang Lai Kikupna:
Sizang Lai kikupna sia 17-18 Nov 2011 hun sung Kawl Sizang khua SDA saanginn Libraryah Lai at dan, kammal zak pawlkhat le Sizang Paunakte kikupna kinei thei hi.

Sizang Lasak Poai:
18 Nov 2011 nitak in Lasak Poai kipan thei a, lasakna bek hi ngawlin, Kid model le National Fashion laknate zongh kinei thei hi.

A nitak nii na 19 Nov 2011 ni in lasakna ban ah, Fashion Show le Seino lap laknate kinei a, kilawp thei peuma hi

Hi Lasak Poai sungah Rev. Tuan Khan Mung (ZBCM), Rev. David TK Thang, Pr. D Suan Za Khai le Pr. James Khai Tual (ZBC) te in la mat hong laaksak a, la sa thiambel le top 10 ahizong, la phuak thiambel ahizong hong teal sak hi.

Khansuang honna:
Sizang Lai nei zawk kum 120 cin tepteena le Lungdam kona khansuang, 20 Nov 2011 ni zingsang 10:00 AM in Kawl Sizang khua Siyin Baptist Chuch ah kiphut a, tua hun sungah Pr. Esther Cingh Niang in hun uk seam hi. Hun uk nu in Lai Thiang Tho Ps. 118:23-24, 1 Sam. 7:12 hong sim zawkciang kipat natu Pr. Pau Khan Dal in thungetna kineisak a, tua zawkciang “Hong pai in thupha namcin naak” ci la kisa hi.

Tua zawkciang Former SCC Executive Secretary Rev. Vum Khat Pau in a nuai a bangin thusona hong nei hi.

“A masa in hun pha hun nuam hong pia Topa tungah lungdam ka ko a, hun hong pia SCC lampuite tungah zongh ka lungdam hi Tuni Sizang lai nei zawk kum 120 cinna khansuang phuna ah hong pai nu le pa, u le nau suapuite theampo tungah zongh zaataakna kong pia hi Topa in minthanna ngatahen Amen.

Pu Khai Mang Za Khai na Sizang lai pian kum ci ngawl tu hi, banghangziam cile Sizang theampo Laipian suak sak tu ahikom, “Sizang lai nei zawk kum” ci tu hi a ci baangma in kampau zongh phatak kidop kul tu um khi hi.

Tu nung hun khat lai in Zomite Zongam ah nganhing bang phialin kiom hikale tu in ngual bangma ih om thei natu Mikaangte zangh in Topa Pathian in thupha hong pia hi Sizang mite zongh minam khat in hong vawt a, ngeina nei, kampau nei le lai nei tu in ahizong, ama thu zui thei tu ahizong thupha hong piaknate hangin Topa tungah lungdam ih ko hi Topa na minthanna nga tawntung tahen.

Tu nung hunin Khamtung Zomi bup lai a vawtsak sia J H Cope hi kici a, ahi ma kisa hi. Sizang lai zongh Cope hong bitphua sak kisa hi. Banghangziam cile ih laisim le ih thu kanh tawm ahikom a kison papo kisaang tha a, a tatak sia kihe tek paiih ngawl hi Ahizong tu ciang ih heakna kibelap a, Sizang Lai hong bitphua sak sia Capt F M Rundal hi ci in kihe a, 1891 kumin ama ii laibu vawtsia zongh ih mu thei hi. Tua laibu National Archives Department pan photo copy hong nga sak Phd. (History) sin Zam Dongh tungah zongh lungdam ka ko nuam hi.

Tua lai hong vawtsak hun ih et kik ciang Laipian Pau Cin Hau lai a pian kum 1902 hi a, tuasia sangin kum 11 masa zaw, Hakha lai a kivawt kum 1894 hi a, tuasia sangin kum 3 masa zaw, Dr. J H Cope hong thet kum 1910 hi a, tua sangin kum 19 kum 20 bang masa zaw hi. Pu Hau Vum Ko Hau laibu vawt sungah Capt. FM Rundall in 1889 kumin Sizang lai vawt tu kipan ci in at hi. Tua hunin a kipatsia 1891 ciang laibu in suak ci kihe thei hi. Hi Capt. Rundall ii hong vawtsak Sizang lai sia Sizang ukpi ngate ii ukna sung teng ah kizangh a, tu in kum 120 a cing suak bek dom ngawl, a 4 veina Sizang Lai kikupna le a thum veina Sizang Lasak Poai taw thua in tepteena, lungdamna Khansuang, Poai ih vawtna mun Kawl Sizang khua ah tuni 2011 kum November tha ni (20) ni in a kiphut thei ahi hi.

Khansuang honna ah zongh a khiakna nei in kihong hi Khaupi (Ribon) attan tu sungah Sizang ukpi nga phawna in Khuasak pan Rev. L Do Cin Pau, Thuklai mi Rev. J Thang Za Pau, Buanman pan Rev. Pau Za Cing, Lophei mi Syapi Lam Za Tinh le Limkhai pan Pa Pum Lian te in ki atsak tu a, Siyin Christian Community (SCC) min taw ahikom Tuiphum, AG, RC, SDA, ci bang denomination sim a kihel tu in kingeal hi leitungah gender thupisak hun ahikom numei zongh ih kihelsak a, mikaangte in hong deisakna ahi bangma Mikaangte zongh kihel ci leang kikhial ngawl tu hi. Kilomkhatna lakna ahikom manpha kasa mama hi. Hi bang ih vawt theina in ei phat hang, ei pil hang hi ngawlin Topa Pathian ii hong ngealsak hi ci in phawk tek tawng.

Hi khansuang a kip a kho in a po bangma Sizang kampau, Sizang lai a zangh Sizang mite a pung tu, a khang tu in Topa Pathian in thupha taw hong uap tawntung tahen ci in tuza hong son hi phot tong. Topa na minthanna tang tawntung tahen Amen. “

Hi bang thusonna teng man ciang khansuang honna khaupi (Ribon) attan a, tepteena landial Capt. FM Rundall ii hong vawtsak laibu sia ii tuamna a kikhen sia mutpuak lompui in van ah kileenpui to sak hi A kizom in zam 120 vei tumna Sizang Upa 12 in 10 vei tek kinei sak hi.

Tua zawkciang lai nei theina a kipan kum 120 cinna dong Topa tung lungdam kona le lai kikup, la sak poai nei theina dong lungdamkona le a huam thungetna Rev. Eloi Thawng Khan Khai (Tahan) in kinei sak hi.

Thunget man ciang innteak Siyin Baptist Church pan choir sakna kinei sak a, tua zawkciang hun zaw lungdam kona a kisee Rev. Ngo Khua Nang om thei ngawl ahikom Rev. Kam Khen Pau (LSBC) in kinei sak hi. Thunget man ciang pokna (Doxology) sakna kinei a, khutlap thupha pia tu a kisee Rev. Son Cin Pau om thei ngawl ahikom Rev. P Suangh Cin Pau in khutlap thupha piakna nei in Khansuang phuna hun a kiman ahi hi.

Biakpiak Hunpi:
Khansuang hon hun manzawk po ciang Biakpiak hunpi kipan a, tua sungah Rev. Tual Khan Nang (Thuklai AG) in hun uk seam a, Rev. Job Nang Khaw Thawng in hanthotna nei hi Pastor Ngiak Khan Cing in hun aap thungetna, sumpi aap Rev. Suak Khua Hau, Thungetpi Rev. D Cin Za Dal, lai taw kisai thunget Rev. Lian Khua Hau te in zangh hi.

Thu sonna Rev. Suang Cin Pau, Pa Mang Cin Nang, Rev. K Suan Za Nang, Rev. Vum Khat Pau, Pa Ngo Cin Mang, Rev. Hang Khan Nang te in nei a, thuzaksakna sia a hun zui Rev. J Nang Khai in nei hi.

Thusonna le thungetna te ban ah Pa K Dal Za Thawng ii phua Choir “Thian hawmtel ih ngamlei hi” ci sia kidemna kinei a, a kihel thei teng sia Limkhai, Voklaak, Thuklai, KSBC (Kalay) Khuasak, TSBC, SBC (Thingunau) ci teng ahi hi.

Hi biakpiakna sungah Pawlpi tatuam pan Sizang mi ahi thei za kikhawm a, nuam kisa tek, thu hil pa ii thu son zongh tha kinga tek mama thupha piakna taw hunte kiman hi.

Sing Song Service le tel piakna
20 Nov 2011 Nipi nitak sia Sing song Service in kizangh a, tua hun sungah Concert hun sung tel piak tu theampo piakna kinei hi.

  • Choir kidemna ah a khat na, KSBC-Kalay, a niina Limkhai, a thumna SBC-Siyin ahi hi.
  • Laphuak thiambel sia Theizang pan Pa Nang Khan Pum (s/o Rev Ngo Khan Thang) in nga hi.
  • Lasa thiambel sia Dolluang pan Lia Neam San Huai (d/o Rev. Thang Khan Pau) in nga hi.
  • A phabel Kid Model sia Khuasak pan Tg. Khai Thian Khawm Pau (s/o Rev. L Do Cin Pau) le Lia Neam Suan Cing (d/o Pr. Hang Do Pau) te in nga hi.
  • A phabel Sizang ngeina Fashion sia Yangon taangin a kihel Tg. Piang Mun Mang (s/o Huai Ngo Cing) le Lia Zam Khan Vung (d/o Pa Thang Hen Thawng) te in nga hi.
  • A phabel Zo ngeina Fashion LSBC pan Tg. Cin Suan (s/o Pa Lam Khua Pau) le Lia Kyi Kyi Muang (d/o Pa Vum Cin Khai) in nga hi.
  • A phabel Siyin Design sia SBC, Kawl Sizang khua pan Tg. Mung Khan Pum (s/o Rev. Suang Cin Pau) le Lia Ngin Suan Neam (d/o Pa Kam Khan Hau) te in nga hi.
  • A phabel Modern Design sia SBC, Kawl Sizang khua pan Tg. Cin Pum Khai (s/o Pa Thang Khan Mung) le Lia Huai San Nuam (d/o Pa Ngo Khan Pum) te in nga hi.

Hi bang thiamtelte piak thei natu in a nuai a teng in hong sik hi.

  • Choir 1 st Prize sia vanleang beal khap 12 khat kipai a, Pa Zozam Cin Pau (Chin State MP) in hong sik hi.
  • Choir 2nd Prize sia vanleang beal khap sawm khat kipia a, Pa Vungh Cin Pau (LSBC) in hong sik hi.
  • Choir 3rd Prize sia vanleang beal, khap 9 khat kipia a Kawl Sizang khua pan Capt. Sawm Hang (Rtd) in hong sik hi.
  • Kidemna Choir hong phua sak Pa K Dal Za Thawng sia vanleang beal khap 8 khat kipia a, Pa Vungh Cin Pau, LSBC in hong sik hi.
  • Laphuak thiambel tel nga Pa Nang Khan Pum sia vanleang beal khap 6 khat kipia a, Kawl Sizang
    khua pan Capt. Sawm Hang (Rtd) in hong sik hi.
  • Tua ngawl thiamtel kipia a dang teng atu le Trophy, Certificate teng theampo sia Rev. Lian Cin Nang (SBC, Kawl Sizang khua) in hong sik hi.

Lungdam kona
Hi Sizang lai kikup, lasak poai le lai nei zawk kum 120 cin Poaipi atu vaihawmte, sum le pai nei le lamh taw a kihel te, Fashion le la kidemna ah thukhenmang seamte, lasa te, laphuakte, tumnging tumte le a kisamh bangin a seam a diang theampo tungah lungdamna lianpi kineihi A (4) veina Siyin Concert ah kimu kik tawng.

_____

Heaktu: The Siyin Baptist Volume 55, December 2011 pan aki la kik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html