Nikonghong

Home » Leitung » Israel Le Iran Kilem Ngawl

Israel Le Iran Kilem Ngawl

Irante ii ngam lutang le, biakna sang lampuipipa ahi Ayatollah Ali Khamenei ii Israel le Jew minamte tung taang a (နည္းဗ်ဴဟာ) strategy, ngaisutna sia Farsi kam (Iran kam) in a ki at web site Alef. Reports sungah kisuak sak hi. Alireza Forghani ii at lai hi aa, a thulu sia “Iran in Allah (pathian) min suang in, 2014 ciang Israel ih sim nanak kul hi (In the name of Allah, Iran must attack Israel by 2014)” hi. 

iranLai at pa in Iran kumpi ii ngaisutna hi ngawl aa, keima aituam ngaisutna hi ci ahihang Ayatollah Aki Khamenei taw aki uitui mama khat hi ci in ki um hi.

Tua Farsi kam taw a kiat web site sungah, Forghani in Jew ngam (Israel) sia Middle East ii cancer natna hi. Middle East sung buaina, ngimna piang theampo sia Israelte hang hi ci in at hi. Muslim mimal khatsim in Israel ngam langpan tu in vaipuak (tavuan) nei hi. Israel ngam ih sim mameang buale, nidang ciang kisim zo nawn ngawl tu hi ci in at lai hi. Israel ngam ih simna sia Allah pathian a tu in ih ki piak khiatna (Jihad) ngaal thiangtho (Holy war) ahibuale, Islam biakna hong susia nuamte dona ngaal hi ci in tua lai sungah at hi. A cing zaw in sim nuam ih om le The Jerusalem Post ah kisim thei hi.

Bin Laden thi zawk ciang, US le western ngam teng ii ngaal pha bel sia Al Qaeda te hi nawn ngawl aa, Iran ngam hi ki ci hi. Tu laitak Iran president Ahmadinejad hong ka sawng lai Israel ngam sia leitung ngamlim tung pan ka bo sak tu ci in son ngei hi. Ning kum 2011 September tha sung Iran kumpi in American Iran khat sum taw cial in Washington DC khua sungah Saudi Arabia te embassadorpa that in sawl ngei hi. A Iranpa kiman in Saudi embassadorpa suakta hi. Tu tha (Feb/2012) sung Irante ii ngamtatna pawl khat en lai leang, India ngam New Delhi khuaah Israel embassy pan mortor khat bomb puak sak, Bangkok ah inn khat bomb puak sak hi. Georgia ngam zongah Israel embassy naseam khat ii motor sungah bomb kimu aa, Irante ii sia ci in kimawsiat hi.

Middle East pan a piang namngim theampo Hormuz strait kantan ngawl in a pua theng thei ngawl

Nuclear ngaal hiam vawt tu in hong hanciam mama si aa, tu in tam mama theng zo si hi. Nuclear bomb hong nei thong le, Israel le western ngam teng bek hi ngawl, leitungbup a tu buaina lian mama hong piang thei tu hi. Tua ahikom, Iran in a nuclear bomb vawt nop sia a tawl ngah thathei natu ci in American le Europe ngam teng in business sanction (စီးပြါးေရးပိတ္ဆို႔မႈ) vawt tu in UN ah hanciam hi. Iran in sanction nong vawt uh le, hormuz strait (ေဟာ္မုစ္ ေရလက္ၾကား) ka khaak cip tu ci laleao hi. Leitung namngim piang theampo ii zakhen 50% phial sia hi Hormuz strait kaan in teambaw taw kinawn ahikom, hi buainate hang in leitungbup namngim (datsi) manh hong khang to laleao hi.

Israel te atu in ngaal pha mama khat hong suak ahikom Israelte in Iran ii Nuclear vawtna mun ka sim tu uh ci hi. 1981 kum lai Iraqte ii Osiraq Nuclear reactor le 2007 kum Syriate ii Nuclear vawtna mun te sim ngei ahikom, Irante ii Nuclear vawtna munh zong Israelte in sim ngam kita ngawl tu ci in mi theampo in um maw hi. Ahihang Irante zong taangthu na en in na pil vang mama hi. A nuclear program sia Iraq le Syria te bang in mun khat bek ah vawt ngawl aa, mun tatuam ah khen kakoai in vawt ahikom, sim tu ahi le zong Iraq le Syria te nuclear vawtna mun te a sim bang in ol ngawl tu hi tuak hi.

Haksatna dang khat zong sia, Iran dong a thet natu fighter jet te datsi khat vei lam kaal ah thun kik kul tu ahikom, bang ngam in hu thei tu ziam ci thu hi. Ngaal thiamte ii mu khol bang ahile, Iraq ngam sung tawn ku le, Iraq sia tu laitak a ngam a pua kik uh hun hi aa, air defense taw kisai vanh hoi nei ngawl ahiciang Iraqte in phawk man ngawl tha tu ci khawng zong kison vasup hi.

Bangbangpo ahizong, hi bang thute ih et ciang Iran le Israel kilaklaw thubuai sia hong lian vaial thei tu a, ni khat ni ciang leitung bup buaina khat hong suak ngawl tu kici thei ngawl hi ci in ki mu hi.

TN

____________________

Source: The Jerusalem Post, AFP le Yahoo news

Advertisements

2 Comments

  1. Chin K Khai says:

    Dear sia Thawngno
    Zaknop mahmah ei. Leitung galpi pen leisung sathau ki tuh aa piangding in LST siam ten gen aa, tulai tak Israel gam ah US company nih in LST prophesy om bang in sathau zong in to uh aa khat mu khin in khat a zonzon lai tak hi. Tua sathau te mu le uh Arab gam aa sathau hon pi khat kang cip ding ci mawk hi. Nai mahmah ta le ki lawm ei mate. Nang bang na ci muh aa?
    ckk

    • thawngno says:

      Bin Laden ong sih teh leitung nuam zaw ding ci in leitung ngaihsutna taw ki ngaihsun khapah hi ven, Pasian in belh a hun ding pen gelsa in ana koaihsa hi mawk ei, cin’ ngaihsun ing. Lungdam ei Sia Khai……

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 91,022 hits

A Lui Te

Live Trific

google-site-verification: googled172884ff34d55c0.html