Nikonghong

Home » Biakna » Pathian Mizak John Wesley

Pathian Mizak John Wesley

John wesley le Methodist logo

By Ngin Khua Pau, Muipi Khua

John Wesley ii pa sia Rev. Samuel Wesley hi a, a nu sia Susana Ammesley ahi hi Unau numei le pa 25 pha hi A pa sia Edward khua Pawlpi sya seam hi. Ni khat a nupa thungen khawm a, Kumpipa William atu a thunget sia a zi in Amen na ci nuam ngawl ahikom a nupa kikhen hi. Kumpi William hong thi ciangin a nupa kingawm kik hi. Tua zawk 8 June 1703 ni in John Wesley piang hi.

A nu Susana sia tano 25 teng nasia takin uk hi. Atate ngeaktang sak ngawl, an neak ciang zong pau ngawl tu bangma a nging omsak ngawl tu ci hi. Nisim a tate teng theampo a baban in thugnetsak a, nipi zawk ni Ii ni veu in John Wesley atu a nu ii thungetsak ni ahi hi. A no pan kipan mawna a ci sia sawk ngawl hi. Jeremy Taylor ii Holy Living a ci laibu a sim a kipan Thiangtho nuntak tu hanciam cip hi. Kum 14 sung a sia khat zongh vawt ngawl napi thiangtho zo kisa tuan ngawl hi. 1725 kumin Oxford sang ah Hu sya seam a, 1726 kumin Lincoln College ah Syapi seamin, 1728 kumin England Pawlpi pan Phongyi ki pia hi. Ama le a sep puite sia Tapidaw a thiangtho nuntakna thupisak a, hanciam tana min tatuam neisak a, a khakbel ciangin mite in Methodists te ci hi. Ahihang Methodist pawl khi hi ci ngei ngawl hi. Asuapui pa Charle Wesley taw a unau in lungdamna thu son a, paikhia tu ci sia a lawpbel uh ahi hi. Mizawngte hu in thongtaakte ve in thu son pui tawntung hi.

1735 kum America ah pai in Lungdamna thu son tu a kithoai laitak a pa in thisan hi. A unau in khuangai mama a, tawp kik tu a ci uh le a nu in “Tapa 20 kong nei teng lungdamna thu sonin pai le uh te a, ka thi dong ka tate hong mu nawn ngawl tu ka hi hial zong phamaw sa bong. Pai po tavun” a ci ciangin pai kik hi. Teambaw taw pai a, lampi ah vuipi in a teambaw mutcip in a thi tu lau mama hi. Tasia laitak teambaw tungah a to numei pasal pawlkhat maitai in lasa in khutbeangin a om mu hi. John Wesley te unau in lamdang sa a, “No na thi tu uh lau ngawl nu ziam? Hi za ta a lauhuai sungah banghangin lasa in khutbeang thei nu ziam?” ci dongh hi. Tuate in “Ko thi tu lau ngawl khu hi. Jesu nei zo khu hi” ci in zo hi.

Tuasia ciang John Wesley in “Hite ii a nei thaa muanna a ci sia nei ngawl thong khi hi ci thu phawk hi. Tua ahikom amate lampuipa Spangenberg taw kimu in thu dongh hi. Tua syapa in “Wesley awng, Pathian ta na hi hunlam Thaa Thiangtho in hong telsak zo ziam? Jesu sia na Honpa le na Topa in na saang tatak ziam? Jesus na he tatak nam?” ci in dongh hi. John Wesley in a zo natu he ngawlin na sa peuma hi.

John Wesley thuhilna

Tua hun laitakin a it mama numei khatin vawtsia zazan ahikom thinkiam in England ah cia hi. Kum nii sung mission a sep sia ii a nga mu ngawl hi. ahihang kitelna khat nei hi. I who went to America to convert other, was never myself converted to God. Ngualdang kikheal natu thuson a paipa keima a kikheal ngawl hi thong ngawl khi ziam ci tel hi. Kum 14 tawntung thiangtho nuntakna hanciam a, mission seampa tu in bangma ahi ngawl hunlam phawk hi. Ni khat ni in Sya Peter Bohler a ci pa taw kimu a, tua pa in “Wesley awng na upna lui vawk in. Ngupna Thaamuanna sia Upna bek taw kinga a, Thiangto nuntak natu hanciamna taw kinga ngawl hi” ci sonpui hi. Tuasia ciang a thin kikheal a, hesuakna lampi tawn ngawl a, Thukham lampi a tawn hi thong ngawl khi ziam ci hi. Pathian thu son tu zongh a maizum hang hi. Ahizong Peter Bohler in “Wesley awng, na thu son tawlnga heak in, Upna hangin Midik hong kisuaksak hi ci in thu hil tan” ci hi (Kep on preach in the Protestant Doctrine of Justification by Faith. Preach Faith till you have it. And this because you have it, you will preach faith ). Hi kammal teng Peter Bohler tung pan 24 May 1738 ni zan nai 10 in za a, a upna kikheal ahikom kikhopna pan cia vingveng sia a suapuipa Charle Wesley tungah son hi. “Ka nau awng, kei piangthak zo vahai thong khi hi” ci hi. A suapui pa Charles Wesley sia 21 May 1738 ni in na piangthak zo hi.

Tapidaw nuntakna ahi Thiangtho nuntakna a hanciam Mipha Wesley te unau hong pianthak thong ciang, om thong thei nawn ngawl a, mun theampo ah Lungdamna thu sonin mi tam mama piangthak hi. Khatvei John Wesley in Sawltak 4 sung thu son a, a thunget laitak mi pawlkhat liingin pukvawk a, a kam pan Topa pok top hi. A thu hilna ah tuabang om tawntung a, Wesley zongh in Doai nasepna sa phot hikale a khaak sang ciang Thaa Thiangtho nasepna ahi hunlam phawk kik hi.

Mun theampo ah langpanna, thusitna, nalhna, nunauna, vawtsiatna thuak bul hi. Ahizong thin uai na taw, kuama thuk ngawlin seam suak hi. Wesley te sia Methodist pawl kici hi. Mite ii nahna pawl min hi bek a, John Wesley nuntak sung Methodist Pawlpi kiphuan ngawl hi. Church of England pan taikhia in pawlpi tuam phuan ngawl hi. John Wesley kum 88 nungta a, 1791 kumin thi hi. A thi dong England Pawlpi pan pusuakin Pawlpi thak phuan ngawl hi. Tua ahikom Church of England Pawlpi keam Phongyi pa zongh in samin Biakinn sung ma ah thuson sak hi. John Wesley in a pawlte tungah Pawlpi thak phut tu hong kisawl ngawl hi ci tawntung hi. Leitung mun theampo Lungdamna thu sonna sungah a kihelte in 1795 kum ciangin nasia tak kikupna nei in Methodist Pawlpi piangsak hi.

John Wesley in Lungdamna thuson bekma thupisak ahikom a ki it pui mama ngaknu tam ma taw kikhen a, a khaakbel ciang Mrs. Vazeille a kici meingong khat taw kiteang hi. Zi nei ahihang Lungdamna thu son in khualhaw tawntung a, a zi taw om ngei ngawl ahikom a khaak sang ciang a zi in a paina po ah zui hi. Zui zo tawntung ngawl ahikom ta zongh nei ngawlin a nupa kikhen a, 1781 kumin a zi thi ci sia a khualhawna pan za-lai bek hi. Leitung nopsakna malkhat zongh nga ngawlin Lungdamna thu sonin paisuak a, thasum zongh kum khat Pound 27 bek la in a dang teng sia mizawngte huna le Lungdamna thu laibu vawtna in zangh siat hi. John Wesley sia Pathian in hi za in banghang zangh thei ziam ci ih et ciang

  1. Tapidaw nuntakna thiangtho taw a nuntak tu, Pathian a zatak tu a nu ii thungetsak, a pattak hang hi ci kimu hi.
  2. Ama mama in thiangtho nuntakna taw nungta, luheak muuktuk theampo dong a kidawm Pathian a zakta khat a hina hang ci kimu hi.
  3. A nuntak hun sung peuma Church of England Pawlpi pan pusuak ngawl a, Pawlpi tung thumaanna a nei hang hi ci kimu hi.
  4. Pawlpi thak phot tu sangin Lungdamna thu son tu liansak zaw a, mi tampi thaa a suataksak nop
    hang hi ci kimu hi.
  5. Inn pha lo pha sungah zi le ta taw tawm vei om tu sangin Pathian sawlpi na (The Great Commission) a thupisak zawk hang hi ci kimu hi.
  6. Pawlpi lampuite ii thusitna, mingilote vawtsiatna, ngensiat sonsiatnate thin uaina taw thuak a, thinkiam ngawlin Lungdamna thu a son suak hang hi ci kimu hi.

Ekkak laibu:
1 Methodist by E Davirs
2 John Wesley by John Polecock

____________________

Heaktu: The Siyin Baptist December pan akila kik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html