Nikonghong

Home » Leitung » Christian Medical College & Hospital (CMCH) Vellore

Christian Medical College & Hospital (CMCH) Vellore

Dr. Ida Sophia Scudder (December 9, 1870 – May 24, 1960)

By Esther Cingh Niang (Siyin)

CMCH sia Vellore, Tamil Nadu, S. India ah om hi. A phuankhia sia Dr. Ida Sophia Scudder hi a, 1870 kumin piang hi. Dr. Ida ii pa sia zato siavuan hi a, ei Zongam atu in Dr. Rast taw kibang hi. A pa sia zato siavuan ahihang Missionary in Tamil Nadu ngam Vellore S. India ah 1888 kum in pai a, a tanu Dr. Ida in zongh zui hi. A pa sia cina bawl kawmin cinate Pathian thu son pui tu sia a niimna ahi hi. Zan khat Tamil Nadu te nausuak tu nupi thum a inn ah hong theng a, a pasalte in a zi naungil Dr. Ida aap hi. Taciang Dr. Ida in zongh kei zato sang thiamna bangma nei ngawl khi hi, ahizong ka pa na suaksak thei tu hi a ci le, na pa ii a suaksak sangin ka zi a thi zong phamaw bo ci hi. Dr. Ida zongh lamdang sa mama hi. Mivomte ngeina ah numei le pa kikhoi tu ci sia suaksak thei ngawl hi. Missionary pa in a zi nausuaksak a tham a bawl sangin thisak nuam zaw hi. Tasia ni zan Dr. Ida zan mu thei ngawl hi. Tamil Nadu te ii ngeina a ngaisut ciang mutmaw law hi. Zan a thungaisut na tungtawn a thukhensatna ah ka ngam ah cia vingveng in zato sang pilna sinin hi mun ah ka pa bangin Pathian na seam tong ci fn khensat hi. A zing ciang nausuak tu nupi thumte sung pan nii suak thei a khat thi ci thu a zaakciang a thin na seseam hi. A ngam pan MBBS a man zawk ciang a pa nasepna ah pai kik a, a pa bangma Pathian na numeite taw sep khop tu kipan hi. Apa omna quater pan lupna khat taw kipan to a, Topa in thupha pia mama hi.

Christian Medical College and Hospital, Vellore (CMC Vellore)

Tu in CMCH sia leitung bup ah Top ten sung a kihel khat ahi ban ah lupna(bed) 2333 om a, Deaprtments/Unit121 om hi. Zato lum sia 2000 kiim le zato kaa 5000 bang veu om hi. Doctor 700 vai le Nurse 900 vai om a, Pathian min taw a kiphuan zato ahi bangma Pastor 70 om hi. Pastor te sia minam kim hi. 1890 kumin Dr. Ida in CMCH a kipat lai lupna khat taw a kipan hikale tu in Pathian thupha taw hi ciang a theng to suak hi.

Christian Medical College a suana
Dr. Ida ii a ngaisutna ah kei hong huu tu ka numei pui pawlkhat ka panta bale ci in 1909 kum ciang Nursing training kipan hi. 1916 ciang Nursing College suak hi, 1918 ciang Nursing pan MBBS level hong theng to hi. CMC ah a tatuam nam 91 training programme kikaa thei hi. CMC ii a bulphu (Motto) sia “Not to be ministered unto but to minister” Dr. Ida in Training a kaate mun ah
a thubulphu taw thato tan hi.

List of administrative officers
1. Director – Dr. Suranjan Bhattachariji(M. S-Ortho)
2. Associate Dirctor
– Dr. Ashok Chacko (MD, DM, MNAMS-Gastro)
– Dr. Ravi Korula(MS-ortho)
– Dr. Deva Prasanna Rajan (MSC, PHD-Micro)
– Dr. A. K Jana(MD-Pead-DCH)
3. Principal – Dr.Anand Job DLO, MS
4. Medical Superintendent – Dr. Lionel Gnanaraj, MS
5. Treasurer – Mr. Denzil Ranjit Singh (M. Com, FICWA)
6. General Superintendent – Dr. R Selvakumar. MSC, PHD
7. Dean College of Nursing – Mrs Bharathi Jacob, M. Sc. N
8. Nursing Superintendent – Mrs Sundari Edwin (M. Sc. N)

CMCH Chapel (Biakpiakna)
CMCH sia Tapidaw ngeina taw maapang ahi bangma zato sung tumsuk leang thet phitbelna khan(Room) sia biakpiak vawtna chaphel hi. Pastor 70 a om bangma Pastor te ward kihawmin nisim cinate atu thunget sak in ve kakoai hi. Nipi nisim chapel kom hun nei ngei ngawl a, a hun kilaih in biakpiakna vawt hi. Sonteena

7:00-8:00 – Mangkam
8:00-9:00 – Tamil Nadu
9:00-10:00 – Naga
10:00-11:00 – Mizo ci bangin minam

khat nai khat sung veu hun nga a, a minam a kikoi Pastor te in lampui hi. Pastor 70 teng sia sun 12:00 Noon hunin chapel ah kimu a biakpiak khopna le thungetna nei tawntung hi. Minam zui in kikhop hun a vawt sia cina a damzaw hiat te le cina keamte atu a ngaisutna hi. Pastor te sia Pathian ii mizak ahi bangma a thuson zongh thiam thei mama hi. Kei zong mivomte an ne zo ngawl hi tana Bread le butter ka neak le ka BP 220/140 theng a, khuaphawk ngawlin zan khat le sun khat CMCH zato ah ka lum ngei a Pastor te ii thu hong ngetsak ciang kidam paih ci ngaisutna kinei hi. CMCH sia ei mi Dr. Stephen Do Khaw Thawng ii MBBS a sinna mun hi.

Christian Counselling Center (CCC) thu
2007-2008 laisin kumin Clark Theological College ah M. A final ka sin a, sang panin tha nii sung CCC, Vellore ah Pastor Counselling training kaa tu in hong pai sak a, hampha ka kisa mama hi. Vellore ah ka om sung nipi khat sung 3 vei CMCH ah cina ve in, thuson pui tu in CCC pan hong paisak hi. Keima vena ward sung cinate sia SingapSre, Malaysia, Bhutan, Pakistan kiim le paam ngam pan a zato lum tu in hong pai te ahi hi. Lamdang ka sa mama a cina keamte munah bang hangin hi mun ah kibawl tu in hong pai nu ziam ka cile cina keam a tamzaw hong zo kikna ah hi zato sia leitung ah a minthang zato khat ahi ban ah sum theena taw tuat leang tam bo tuan ngawl khu hi ci hi. CCC sang patangte in zato lumte thuson pui tawntung bek ngawl a syavuan te nasepna zongh ih heaknopte kidongh thei, ih et nopte ih et theina hampha kisa ing. Sum le paai kicing a, a hun pia zo te in CCC ah training kaa zo leang midang te ih hawm zo bua zong ei atu hamphatna lian mama hi ci kong son nuam hi. CCC pan Certificate hong pia hi. CMCH a phuankhia sia numei hi lei hi. CMC (Christian Medical College), CMCH (Christian Medical College &Hospital), CCC (Christian Counselling Center) ci teng thum sia a kikhen thei ngawl unau khat bang a, a ding khawm hi. A sim mimal tungah Dr. Ida bangin Topa in ih ngam le ih minam atu hong zangh tahen.    Amen

____________________

Heaktu: SCC magazine pan akila kik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,038 hits

A Lui Te

Live Trific

google-site-verification: googled172884ff34d55c0.html