Nikonghong

Home » Leitung » Israel – Iran ngaal Piang le

Israel – Iran ngaal Piang le

Obama le Natanyahu White House ah kimu

Tu ni (March 5, 2012) white house ah President Obama le Israel Prime Minister Netanyahu kimu in thu kikupna nei hi. Obama in ahitheiza ngaal sim pai ngawl natu hanthawn hi. Israel in Iran ngam hong sim vat le US te atu koibang thu teng hong piang tu ziam? White House counterterrorism official seam ngei Richard Clarke in US ii thuak thei tu teng a ngaisutna hi bang in son hi. Ngaal om le nipi khat sung ih thuak pai tu haksatnate sia datsi man khang tu, US khuapi mun tatuamah terroristte in atatuam in hong sim tu, cyberwar (internet ngaal) piang tu, teambaw tatuam taw khualhaw US ngammi le US navy ngaalkapte hong kisim sak tu, a tawpna in ngaal (war) ih sim kul tu ci in Clarke in son hi.

Datsi man
Leitung bup teambaw taw akipuak kakoai namngim theampo ii zakhen 20% bangsia Persian Gulf tawn in kinawn hi ci in US kumpi in tuat hi. Hi Persian gulf sia Iran, Iraq, Kuwait, Saudi Arabia ngam teng sungah om hi. Israel in Iran sim le, Iran ngam in persian gulf sung a tawn namngim pua teambaw papo hong sim tu hi. Tuabek dom ngawl Persian gulf sung a puaktham thei tuinuai mine tam mama hong khia tu aa, namngim pua teambaw tam mama in tawn ngam nawn ngawl tu hi. A tawn lai te zong patrol boat no tatuam taw hong sim tu hi. US sungah datsi man a se 2 ciang bang hong khangto pai tu hi.

US in SPR (Strategic Petroleum Reserve) in a khol datsi hong zangh tu hi. Ahihang US ii datsi zak dan taw SPR ih nei teng sia nipi 4 sung bang bo pai lel tu ahikom, Persian gulf control tu in hong hanciam tu hi. Persian gulf control tu sia nipi khat sung piang thei ngawl ta a tha bang haito lai tu hi.

Terrorist Ngaal
US a tu a lau huai dang khat sia, leitung mun tatuamah US minam, US embassy, US neisa vanh tatuam te sim tu in terrorist tam mama Iran in hong tha tu hi. Iran ngam sung bomb taw sim in hi leang, Iran te zong in US ngam sung terroristte hong pai sak in a tatuam in hong sim tu hi ci in Clarke in um hi. Iran ii lawm ahi, Lebanon ngam sung om Hezbollah te in zong Israel rocket taw kap citak kapsuk cip tu hi. Hezbollah te ii rocket vawt te sia nidang pha le ngawl ahihang, tu hoi vaial zo hi. 1990 kiim Argentina le leitung mun tatuamah Hezbollah te in Jews te sim ngei ahiciang, tu zong ngaal om le tubangma sim nanak tu hi.

US sung om Israel embassy, consulor zum le Jewish biak buk theampo kingingsa in a om top hong kul tu hi.

Cyberwar (internet ngaal) hong piang tu
Tu hun sia computer hun, internet hun hi aa, naa theampo computer in control siat hi. Iran te ii Nuclear program pan kipan Air defense system theampo le, ngaal vanh ngaal hiam theampo zong computer taw control siat hi. Iran te ii computer network system sung Israel le US te in tum ku tu in hong hanciam tu aa, a ngaal hiam, ngaal vanh theampo a deibang a zak thei ngawl natu nawngkai sak tu in hong hanciam tu hi. Iran te ii coputer system sung a khuala pan ngall sim tu hi. Mikang pau in Cyberwar ci hi. US in ngam khat papo ii computer network sung tum ku in a nawngkai sak thei computer pilna thiam mihing tam mama nei hi ci in Clarke in son hi. Iran zong nanang tuan tuak ngawl aa, computer sang mipil nei tuak vave hi. US le Israel mipilte le, Iran mipilte ii net sung pilna kidem in kisimna hong piang tu hi.

Persian gulf sung US Navy ngalkapte nuntakna piak kul tu
Israel le Iran hong kisim le US zong ngaal sung ih tum ngawl hong phamaw tu aa, persian gulf sung US ii navy ngaalkapte ii nuntakna zong atam le atawm ih piak kul tu hi. US navy za in tha hat ngawl a hi tei zong, tu ni Iran navy sungah boat no a tul a tul in nei aa, cruise missiles, anti ship cruise missiles khawng zong nei hi. 1980 kiim Iran-Iraq ngaal lai US Navy teambaw lian mama 2 hong kisimh sak aa, navy ngaalkap 40 dektak a thi ngei sia ih mangil bua tu hi.

Ngaal sung ih tum kul tu
Israel in Iran nuclear facility hong bomb thong le, Iran in Israel hong sim tu aa, Israel ii lawm pha bel ahi US zong ngal sung ih tum hong kul tu hi. Prime Minister Netanyahu ii advisorte in Iran ih bomb le, Iran le Hezbollah te in hong sim kik tu hi, ci in advice nanak tu hi. Hezbollah te in a vawt tawm uh rocket a tulsim in nei hi. Israel hong sim cip thong le, Israel in US tung ma hu ngen in hong tai phit tu hi. US tung ah hu hong ngen thong le, a kua a kuapo president sep lai tak ahizong, Israel sang pan sim pui tu in kipan nanak tu hi ci in Clarke in son hi. A tatuan tu laitak president kiteal kik hun nai mama ahikom, Israel sang pan a din pui ngawl president sia kitealna ah zo ngei ngawl tu hi ci in Clarke in a mu kholna te son hi.

Dopha: ABC News

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,411 hits

A Lui Te

Live Trific

google-site-verification: googled172884ff34d55c0.html