Nikonghong

Home » Politic » America le Socialism

America le Socialism

Yunte Huang sia Harvard le Cornell University-te ah English professor seam ngei aa, tu laitak Unversity of Santa Barbara ah English professor hi. ‘Charlie Chan’ ci laibu khat taw minthang aa, tua laibu taw pahtoaina tel (award) nga hi. Socialist ngam khat a hi, Sen ngam ah a suak, Sente hi. US ngam mite in Obama ii sepnate a langpan nop sim, Socialist vai ci in a tai papai uh thu taw kisai ama muna ‘The Week’ sungah lai at hi.

Republicante in Obama ii nasepna papo socialist vai, ci in tai tawntung hi. Ahihang US ngam sungah socialism nasia tatak in a zangh tawntung zaw sia GOP (republican) te veu hi zaw nginge hi.

Yunte Huang in a lai atna sung ah, Texas sung motor hawl in ka vaakna khat ah Obama a taina biilbord (sign board) lian mama khat ka mu ngei aa, tua tungah ‘Socialist by Conduct’ (Socialist te paizia) ci in ki-at hi. Sen ngam ah ka khangto aa, Sen ngam ah Socialist hong kici le, Mother Teresa bang mihing pha, thupha vawt mihing, ngual a tu a deisak ngaisutna neipa hong kicina hi. Tua ahikom, dik a sak ngawl mihing khat mihing pha, thu dikpa ci in a ci sia lamdang ka sa mama hi ci in at hi.

Obama president hong suak ni pan kipan “a socialist from Kenya” ci in kitai hi. Mi hausate neisa, a zawng a cimawte tung a then nuampa ci in kitai hi. Obama sia Newt Gingrich in “the food stamp president” ci aa, Rick Santorum na “Obama in USA ngam sia Pathian ii daan piak Europe ngamte bang in a zawngcip Socialist ngam sua tu hi” ci hi. ObamaCare sia Socialist vai ci in nasia tatak in tai uh hi. Tu sung zong ObamaCare sia Supreme Court ah kinial uh aa, hai ngawl in result hong suak tu hi. A tatak cileang, hite theampo sia Republican-te tung pan hong kipan ngaisutna idea vo hi zaw nginge hi.

Yunte Huang in a lai atna sungah bang ci lai ziam ci le, US ngam ka om zawk a ngei mama zawk ciang ka heak thu khat in US ngam mite in socialist ci sia doi mangpa za in a ngaisut uh, a kiitaak, zaak nop huai a sak ngawl het thu khat ahi hi. Taangthu khel kik leang 1900 kiim le 1950 kiim sung thatang suang naseam mi (workers) te ii lungkim ngawlna taw a piang thu buai tam mama pan kipan socialism a dei ngawlna hong kipan ci leang kikhial ngawl tu hi. Tu ni, Wisconsin, Ohio le Indiana sung thatang suang naseam, workers-te ii movement theampo Republicante in a sukcip valeapna thu sia Socialisim idea hong khanto ngawl natu, Socialist-te a dona ahi hi. Ahihang tua thatang suang naseam worker-te om ngawl in ngam khat ii, setzung le nasepna munte sia nungta zo ngawl hi.

Socialism ii a phat ngawlna in, mihing khat sim ii privacy bo sak (invasion of privacy) aa, a phatna in kumpi ii nasepna mihing theampo in noplaw (nuap tuamna nga) hi.

Tu ni US sungah, Socialism ii phat ngawlna lam pan ih mu lei ciang kilau, kipatau tha hi. Ahihang, a thupi mama thu pawl khat sia kumpi in hong let ciangma (socialism) senpi pheang hi. Tasiase, socialist idea ma hi nginge zo hi. Sontena, defense, infrastructure, health care, social security, education…etc. Socialism hoi bo bangzata ih ci zong defence (Army) sia private in ih seam sak thei tu ziam? Socialism hoi bo ci in lau peuma ih hite, Social Security system theampo private a uk po, company a uk po in let sak tu suak thei ngawl hi. Tu ni US ngam sung ah socialist ii khiakna le pai zia tel tatak ngawl in socialism hoi bo ci in aw nging tatak in a au mihing tam mama hi. Socialism dei ngawlte uk babang in ngam khat run tu hi leang, Army zong private in a sep kul tu hi. Social Security, Health Care, le infrastructure theampo le, immigration, education …. hiteng theampo private company-te ih piak siat kul tu hi. Tua hi le 100% democracy ngam, socialism a zangh vet ngawl ngam suak pheang tu hi. Socialism ii khiakna ih he takpi na ziam?

Abosa kum 20 sung bang en kik in hi leang, USA ngam ah kumpi in public taangmi a tu phat tuam, nop tuamna pia zo ngawl, seam thei ngawl vaial hi. Private in hauna a zong, mihingte companyte a tu na a seam organization pui khat taw hong kibang vaial hi. Public mihonpi a tu na a sep saang private sum zong mihaute a tu na seam zaw vaial hi. “The government has instead turned into a vehicle for private profiteering.

University of California zong state in run zo ngawl haksa sa ahikom tu ni private university sua aa, state kumpi in UC pan tax khon vakek bek hi. Ngaisut pak in dik ziao tubang ahihang, UC private khut sung hong thet hu in saang saap (tuition fee) tam mama khangto pai hi. Leitung ah university hoi bel pawl sung akihel UC saang ka man sia, Harvard le Standford University sang hong tam zaw hi. Saang ka man hong ham mama ciang a thuak bel sia ngam mi tengma hi. Khangno pilna sin tengma hi. Saanginn le University theampo private khut sung theng siat le zong pha tuan ngawl hi. Ahihang, tu ni saanginn le university theampo Federal kumpi ahibuale zong State kumpi in len tu hi le US ngam mi a tamzaw in Socialist vai ci in lungkim ngawl laleao hi.

Tu ni USA ah a kiphel ngaisutna (liberal idea) a nei theampo socialist hi ci in a awksan papai ngeinalui ngaisutna (Conservative) a nei politiciante sia en tatak leang socialist a ciik mama hi zaw ngi nge hi. Arizona state ah naseam numei khat in birth control a zangh le a nasepna pute (employer) tungah hesak hamtang tu hi ci in tu nai Conservative-te in upadi vawt hi. Tua bek dom ngawl Virginia ah, numeite taw kisai insurance vai tatuam conservative-te in limit vawt tu in hanciam hi. Conservative-te ii hibang a hanciamna, a ngaisutna-te sia Socialist kumpi khat a tu zong, a ciik mama ngaisutna ideate hi nginge hi. Democracy ngaisutna tatak nei hi le, hi thute theampo banghang kumpi in lensuk lento lai tu ziam? Private, individual amate le amate ngaisun in khensat sak lel ngawl ziam?

Gay rights le abortion zong a dei ngawl bel in pang teng sia conservative teng ma hi. Gay rights le abortion dei ngawl ahikom kumpi in lencip le awi hi. Zawthawk vai taw vawt suk ngawp le awi hi. Tu sia zong sia socialism ciik mama ngaisutna hi. Gay rights le abortion sia hoi ngawl ma hi. Ahihang conservative-te in socialism ngaisutna bangza in nei aa, ngamta ziam ci sia sonna hi. Gay rights hoi hi abortion hoi hi ci in son nopna hi ngawl hi. Socialism kalsuanzia ka dei bua, democracy le suatakna (freedom) bek dei khu hi a ci uh le, banghang gay, lesbian le abortion tung ah zawthawk vai zangh nuam aa, suatakna (freedom), pia nuam ngawl, piak zawk sawm ngawl ziam? Banghang ziam ci le socialism kal suan zia zong zak tu hong kisapna mun a om hang hi. Zak tu kisam ih sakna munah zak sawm ih hi le, socialism-te ci in midangte ih kawk papai le, eima le eima a kilang, a kikawk ngaisutna nei ngawlte taw ih kibang tu hi.

Tu ni US conservative politician-te sia amate ukna khat hipole, socialist dan taw kal a suan uh hang hoi kisa aa, amate langpat nop khat ii ngamtatna hipole, socialist vai ci in a awksan vazak papai theite ahi hi. Amate le amate socialist ciik belte ahi uh hunlam kihe ngawl in ngual a kawk theite ahi uh hi.

TN

____________________

Heaktu: “The Week” sungah Yunte Huang ii at “In defense of socialism ” ka doppha hi.

__________
Infrastructure = Ngam khat a tu a kisam bulpi teng, stn. transpotation, electric…cte. (အေျခခံအေဆာက္အဦ)
Libral = A hun le achi-ani zui in kal suan nopna ngaisutna neite (လြတ္လပ္စြာ ေတြးေခၚ လႈပ္ရွားတတ္သူ)
Conservative = Ngeina lui zui tinten nopna ngaisutna neite (ေရွးရိုး၀ါဒီ)
Gay rights = Pasal le pasal suakta tatak in kiteng thei tu hi ci ngaisutna.
Lesbian = Numei le numei nupa bang in a om khawmte.
Abortion = Nau ngil dei ngawl in tol sakna

Note: Republican theampo zong conservative hi siat tuan ngawl, Democratic theampo zong Libral hi siat tuan ngawl hi. Ahihang Republican a tam zaw sia conservative ngaisutna pom zaw hiat.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html