Nikonghong

Home » Leitung » Thuthak Pawl Khat, April 11

Thuthak Pawl Khat, April 11

Zo Ngam Ah Huipi Suangval Va
Zo ngam ah huipi suangval nasia mama in vaa aa, inn 140 sang a tam zaw Thantlang le Tedim myone sung lal ci in kiza hi.

Zei ni (April 10) Thantlang myone sung Khuahrang khua ah inn 33, Thangaw khua ah inn 20, fanthen khua ah inn 33, Hriangpi A khua sung ah inn 5 le Roman Catholic neisa inn khat, Hriangpi B khua ah a kisa saan Baptist biakinn khat le inn 2, le Tisen khua ah Baptist biakinn khat le inn 7 lal ci in kiza hi.

Nung nipi zawk ninga ni Tedim myone sung khua 6 ah huipi suangval nasia tatak in vaa aa, Tuicinlui khua ah inn 8, Lailui khua ah inn 2, Ngennung khua ah sanginn 2, Buan khua ah saanginn khat, Cingpikot khua ah saanginn 3, Tuithang khua ah inn 25 bang lal hi ci in Chin Worl Media te in son hi.

Communication haksat hu in information a cing in kiza ngawl lai hi.

Source: Chinland Guardian

Khin Nyunt

Thuthak Sunna (press conference)ah thuson Col. Win Naing Tun le Major Win Maung Maung

Bangkok post thuthak sung Daw Aung San Sukyi Depeyin buaina sungpan ka suataak ku ci in Khin Nyunt ii son thu sia man ngawl hi ci in, Thuthak sunna ( Press Conference ) khat Yangong khuapi ah vawt in kawl kumpi in nial kik hi. Tua thuthak sunna ah Police department pan Col. Win Naing Tun le, Khin Nyunt ii mihing lui Major Win Maung Maung in thu son hi.

Khin Nyunt ii thusonna hang in ngalkap ulian lui te sung liinglawng ngawp aa, Khin Nyunt zong kiman kik thei tu cidong tak kison hi. Pawl khat na a lum dide Sahang pui (Ge. Than Shwe) ii mei a kai kik, a phong kik taw kibang ci in son hi. Bangkok post thuthak te tungah phone taw a dok uh ciang, Khin Nyunt in hong son takpima hi ci in son hi. NLD U Tin Oo kung a dok uh le, Kyin Nyunt ii son sia man tu um bong, Kyin Nyunt in Aung San Sukyi hun takpi hile, banghang thong ah puak tu ziam, a inn ah puak ngawl tu ziam ci in son hi.

Source: Irrawaddy

Aung San Sukyi
Tutung kitealna ah ngualzawna a nga, Aung San Sukyi le President Thein Sein Naypitaw ah kimu in thusonkhopna nipi zawk nithum ni (April 11) nei hi. Kikupna man zawk ciang Thein Sein le a zi taw sun an ne khawm hi. Bang thu tatak teng son ci sia kihe ngawl hi.

Source: Irrawaddy

Kawl Ngam Ngamdang Sum Theakna
Kawl ngam ah April ni khat ni pan kipan ngamdang sum man a kip in koi nawn ngawl aa, sum man khan le kiam zui in a khang thei a kiam thei tu in, a nungta in koi hi. Ahihang tudong ma sum theakna senpi thei tatak ngawl lai hi tuak hi.

Eastern Bank, Inwa Bank, Myawaddy bank, Co-opperation bank, Kanbawza bank le Myanmar Industrial development bank te pan in ngamdang sum uk bangpo kilei thei, kizuak thei ci ahihang, Mihing pawl khat in ngamdang sum tawm a man zaw hiatna bank pan lei in tam zaw hiat taw a lei kik bank te ah zuak kik ahikom, bank a tam zaw in tawm vei zawk ciang ngamdang sum lei nuam nawn ngawl aa, khaak kik ci in son hi. Zingsang tawm vei bekma lei hituak hi.

Source: Mizzima

NLD Na Zo Tana, Tuikhuk Khaak
Naypitaw sung myone pawl khat ah, NLD na a zaw hu, khua hausa pawl khat in a tui khuuk uh pan khua mite ii tui zak tu awi nawn ngawl ci in kiza hi. Tuikhuuk neipa sia Pyi Khaing Phyu party pan hi aa, Pyi Khaing Phyu party na a zaw ngawl ciang a thin uk aa, khua mite tui zangh sak nawn ngawl ci in kison hi.

Yangon pan Kyaw Thu ii Dongtawk huna group te pai tu in khuamite tui neak nga natu Awisih tui khuuk taw sak tu kipan ci in kiza hi.

Source: Mizzima

Indonesia Ngamah Zin Liing

Aceh khua, mihingte liinglawng in tai siasua

Indonesia ngamah nipizawk nithum ni (April 11) zin liing aa, 8.6 magnitude pha hi. Banda Aceh khua pan tai 431 khualana pan kipan aa, Indian Ocean sung tsunami piang tu ki-um ahikom, Thailand, India, Indonesia, Kenya, Malaysia, Reunion Island, Sri Lanka le Kawl ngam te ah, liinglawng in nasia tatak kinging uh hi.

2004 lai zong 9.1 magnitude a pha zin khat nasia tak in liing aa, tusnami tuihual hu in mihing 220.000 val bang thi aa, Aceh khua kiim babek ah a thi 170,000 pha hi. Tutung a sia tu ciangdong a thi a lal kiza ngawl lai hi.

Source: Yahoo News

North Korea Ngam Na Rocket Tha Sawm

N Korea ngaalkap khat na rocket salam a piak laitak

Leitung bup in dik sangawl hikale, North Korea ngam in April 15 (Kim Il Sung suakni) ah Rocket khat space sung tha sawm hi. North Korea kumpi in a sum nei theampo a tam zaw ngal vanh lamsang vawtna in zangh ahikom, ngam mite neak tu nei ngawl in a pukthi tam mama hi. Tua ahikom, US in neak le dawn taw kisai huna piak tu in kam laam aa, North Korea in Nuclear ngaal vanh vawt tawl ngah tu in nung tha sung ma thu kimna vawt hi. Thu kimna a vawt zawk tha khat bek hi pheang aa, North Korea in space sung rocket ka tha tu uh ci pai laleao hi.

North Korea kumpi in space sung satelite ka tha tu uh aa, ngal vanh vawtna hi ngawl hi ci himakale, leitung bup in USA leitang dong a kap thei tu rocket vawt aa, tusia sinna (test) vawt nuam ci in muangmaw hi.

North Korea in Nuclear bomb 6 pan 8 dong bang atu Plutonium a kicing in nei zo hi tu in kimuanmaw hi. 2006 lai zong missile sinna (test) khat vawt ngei aa, tua sinna a vawt zawk tha thum sung Atomic bomb khat sinna in puaktham sak ngei hi. Tu zong Atomic bomg test khat leinuai mun khat ah vawt ku hi tu in US ii satelite photo te pan kimuangmaw hi.

Source: Yahoo News

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html