Nikonghong

Home » Politic » President Kiteal Dan Le Congress Thu

President Kiteal Dan Le Congress Thu

President kiteal dan
American ngammi mimal khat sim in US president sia mee pia in teal ci in kingaisun tha tawntung hi. Ahihang, President sia ngammi mimal khat sim ii mee taw akiteal hi ngawl aa, ngammi mimal khat sim ii teal sia Electoral College ci in ih heak, president a teal tu elector (ကိုယ္စားလွယ္) te a kiteal hi zaw nginge hi. Ngammi mimal khat sim ii me taw a kiteal Electoral College te in president a teal hi pheang hi.

Electoral College system sia USA ngam thak phuu tu a kipan sawng panma constitution sung a omsa hi. Tua hun lai in mipi khenkhat in president sia congress in teal le uk hi. Himakale, adang khenkhat te ii ngaisutna pan, congress sung kihel teng bek in teal le, democracy paizia hi ngawl ci in nial uh hi. A khaak bel ciang hi ngaisutna te 2 ngawm tua aa, Electoral College system hong piang hi. Hi Electoral College system paizia bang hile, mipi in eima state tek ah president a teal tu elector (ကိုယ္စားလွယ္) teal tu aa, tua elector (ကိုယ္စားလွယ္) te in president teal tu hi.

State sim in Congress sung ah Senator (အထက္လြတ္ေတာ္အမတ္) le Representative (ေအာက္လြတ္ေတာ္အမတ္) a nei za taw kikim in Electoral College elector (ကိုယ္စားလွယ္) tu teal thei hi. Sontena, Maryland state bang in Congress sungah Senator 2 le, Representative 8 nei ahikom, Maryland state sungpan president a teal tu elector 10 teal thei hi. Tua Maryland pan Elector 10 le, State theampo pan a kiteal Elector teng a kingawm 538 in president a teal tatak hi pheang hi.

Tuahu in US citizen khat in mee pia tu a pai ciang a mee tang tung ah, President kiteal tute ii min ki-at ngawl aa, Electoral College elector tute ii min le a party min veu ki-at hi. Hitana, Republican pan a kidem Romney bang mee ih pia nuam le, Electoral College list om sung pan Republican elector sia teal ta, mee piak kul hi. USA ngam buppi pan a kiteal Electoral College elector teng in President mee pia tu aa, tua Electoral mee zo pa/nu President suak hi.

Electoral College elector teng ii mee a piak zawk ciang mee simdan zong state vekpi kibang siat ngawl hi. State a tam zaw ii simdan sia a zo zaw pawpo in mee lasiat hi. Sontena, Maryland state in Electoral vote tang 10 nei aa, Democrat in mee 7 nga aa, Republican in mee 3 nga ci tawng. Tua hi le, Democrat in avekpi lasiat aa, Maryland state ah a zo Democrat hi pai hi. Maryland state pan Democrat in Electoral vote tang 10 nga siat pai hi.

Congress Meeting

Ahihang, Maine le Nebraska state 2 ah system a tuam khat in pai hi. Hi state 2 in Electoral vote a nei theampo sung pan tang khat sia district no tam mama in khen kik hi. Tua Electoral mee tang khat sia district no a khen teng sung ah kidem sak aa, a zo zaw pawpo in tua state ah a zo pa/nu suak hi. State ii nei a taang lai Electoral vote sung pan tua zawna a nga pa/nu sia mee tang 2 pia thua hi. Sontena, Maine state in Electoral vote 4 nei hi. Tua 4 sung pan 1 sia district nonote ah khen in kidem hi. Electoral vote 3 teng sia koi phot hi. District no teng ah a khen tua Electoral mee tang 1 sia hong kidem aa, Republican in zo ci tawng. Tuahile, Republican in tua state ah a zo pa/nu suak aa, state ii neisa, a taang lai Electoral mee tang 3 sung pan tang 2 sia Republican in nga thua lai aa, avekpi tang 3 nga suak hi. Democrat in Electoral mee tang 1 Maine state pan nga suak hi.

US ngam bup pan Electoral College elector 538 pha hi. Tua 538 sung pan mee tang 270 vaal a nga masa sia US president kitealna ah ngual zawna nga hi.

December tha ii Nipi 2na ii Nipi khuavak ni ah, Electoral College sung a kiteal teng in amate state tek ii khuapi tek ah President teal tu in mee pia hi. A kiteal theampo in amate tek party atu in mee piak tu in a kiciam tingteng hi siat hi. Thu mann ngawl in party dang mee a pia nuam zong piak theina thu nei hi. Ahihang, tuabang mihingte sia thu mann ngawl ci in kiciamte aa, state pawl khat in thu kisua theina dong in law vawt hi. Tua kitealna ah Electoral college elector sim in mee tang 2 tek nga uh aa, tang khat ii tung ah president a kidem tute 2 om hi. Adang khat sia tung ah Vice President kidem tute 2 om hi. State tek pan mee tang theampo a kisim tek zawk ciang Mee tang theampo Congress kipuak hi. January tha sung Congress sung ah tua Electoral vote theampo ngawm in sim aa, a zo pa/nu khensat hi. Azazen in mee tang omza ii alang 270 kuama in a nga buale, Congress pan Representative (ေအာက္လြတ္ေတာ္အမတ္) te in President teal theina thu nei hi.

A heak nop huai thu dang khat sia, President zong, Vice President zong state akibang khat pan ahile, tua state ii Electoral College in khat bek mee pia thei hi. Sontena President zong Vice President zong New York state pan ahile, New York state Electoral College te in President ahibuale, Vice President a dei zawk khat bekma mee pia thei aa, a khat zaw atu mee pia thei ngawl ahikom New York state ii Electoral mee tang khat a sum suak hi. Tua ahikom Vice President a teal uh ciang state dang pan veu la hamtang hi.

US Congress
US te ii Congress sung ah Senator le Representative ci in khen 2 om hi. Kawl lai in (အထက္လြတ္ေတာ္) le (ေအာက္လြတ္ေတာ္) ci in a phen ziu zong telna ol bilbel hi. State khat sim pan Senator 2 tek hong kiteal aa, state 50 om ahikom Congress sung ah Senator (အထက္လြတ္ေတာ္အမတ္) 100 om hi. Representative (ေအာက္လြတ္ေတာ္အမတ္) ciang state tek ii mihingsim (population) zui in kiteal hi. Mihingsim a tam state te in Representative tam zaw nei aa, a tawm zaw state in Representative a tawm zaw nei hi. Congress sung ah Representative (ေအာက္လြတ္ေတာ္အမတ္) 435 om hi.

Senator khat ii nasepkum (term) sia kum 6 hi aa, Representative khat ii nasepkum sia kum 2 bek hi. Senator khat in a no bel kum 30 phasa hi tu aa, US citizen a sua zawk a tawm bel kum 9 a phasa hi tu hi. Representative khat in a no bel kum 25 phasa hi tu aa, US citizen a sua zawk a tawm bel kum 7 a phasa ahi kul hi.

House of Representative te ii Seal

Law (Upadi) a suak tatak ngawl lai, law a suak tu in a kisung thu khat sia bill kina aa, Senator le Representative teng in tua bill te at/vawt hi. Tua ahikom law maker zong kina hi. Senator le Representative te in bill thak vawt tu thu sung thei ahihang, Senator te in tax bills le kumpi sum tum khanto thei natu bill vawt theina thu nei ngawl hi, ahihang, tua bill te kankuat (reject) thei, pua theina thu nei hi. Representative ii thu neina khat sia, azazen in Electoral College in president kician tak in hong teal zo buale, teal theina thu nei hi. Representative ii thu neina dang khat om lai hi. President pan kipan kuamapo Impeachment vawt thei hi. Impeachment ciciang, ngamtatna, nasepna taw kisai nginaat ngawlna, thumann ngawlna a mu le thu sua thei hi. Electoral College in President kitealna ah kician tak in hong teal zo bua le Vice President tu sia Senator te in teal tu aa, impeachment a kivawt kumpi ulian khat ii case sia tavuan la in seam suak tu hi.

____________________

Doppha: Internet site tatuam

Advertisements

1 Comment

  1. Tualpipa says:

    Dear Thawngno,
    US Kumpi ki teal daan kuama po tel thei tuh eima kam nong aat keima aituam lungdam/thupi sa mama ingh. Nong aat ta vet Popular Vote thu zong nong belaap vet lai tuh hesuak na tawh!–tppa

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html