Nikonghong

Home » Politic » Popular Vote Le Electoral Vote

Popular Vote Le Electoral Vote

US ngam ii President kitealna a vawt uh ciang a kidemte 2 in popular vote bangza le electoral vote bangza tek nga ci in thuthak (news) sung kison, kiza tawntung hi. Kitel thiang ngawl ahihang, ih tel mama thu khat sia popular vote koibangpo  ahizong, electoral vote a tamzaw nga sia a zo in kiciamte ci thu hi. Tuale popular vote sia bang hi aa, banghang koi se ziam? 

A tatak cileang, popular vote ciciang, mimal khat sim ii piak mee cina hi. Leitung ah ngam a tamzaw ii vawt dan hi le, mimal khat sim ii piak, popular vote tam bel nga pa/nu in ngual zawna nga sak hi. Ahihang, US president kitealna ah ngual zawna sia popular vote taw la ngawl aa, Electoral vote taw pai zaw hi. USA in election taw kisai constitution a vawt uh lai a ngaisut uh thu pawl khat om aa, tuasia hang Electoral vote system hong piang hi.

State teng ii Electoral vote nei za lakna ngamlim

1. A tam zaw ii zawthawk thu taw a ngamtat thei ngawl natu.
American ngam phutciilte ii ngaisutna ah, thuson thiam mama khat in politic ahizong, pilna sang ahizong pii cing ngawl mihing tam mama sia thuson thiam mamana taw nga thathong thei tu ci in mu hi. Tua bek dom ngawl mipi ii security zong a ngaisut sakna hi. Kawl ngam ah Pha-sa-pa-lah le Tii-myae party 2 kidem hun lai, Tii-myae party sang a pia n uam Irrawaddy delta sung khuano pawl khat bang, Pha-sa-pa-lah party te a support ngaalkap te in a khua ching bubup in thatlum sia, mon siat ngei hi. Kitealna pan dictator khat in ngual zawna hong nga thathong ngawl natu, a pil, a thu tel, khua a ngaisun thei sa delegate teal masa leang ii te, tua delegatete in President hong teal tatak pheang le ci ngaisutna hi.

2. State khat le khat thu neina a kikimna tu
Mimal khat sim ii mee tang taw President kiteal tu hi le, US President sia state 3 ziam 4 ziam mihing tam bel nei teng ii teal hong suak tu hi. California, New York, Florida, Geogia, Michigan le Taxes state bang mihing tam mama om tana president tute in mee zolna a vawt uh ciang tuak teng bekma hong vawt tu aa, tua sung state teng bekma a tu zong na hong seam pai tu aa, US ngam bup ii President sia tua state teng ii teal hong suak tu hi. Tua ahikom state theampo thu neina kikim siat natu ngaisutna in Electoral college system a kivawt hi.

3. Federal System tatak in kal suan thei natu
America sia, ih heaksa tek bangma a sang bel power sia Parliament sung ah a koi, Parliament democracy ngam hi ngawl aa, State tatuam teng le Federal kumpi kilaklaw power hawm in kal a suan Federal Democracy ngam hi. Tua ahikom, US President tu sia, State theampo ii thu neina le khensatna taw kiteal hamtang tu hi ci ngaisutna hu in Electoral College system hong pianna thu khat hi. Federal taw state kilaklaw power a hawm, a khen zazanna thu dang khat sia dictatorship khat president hong suak tha le, ama dei babang a ngamtat thei ngawl natu kidal, kingin kholna hi.

Atung aa bang in president kitealna system zangh ih hi hu in America sia Representative Democracy ngam ci in kina si hi. Electoral College system sia fair a sa ngawl, dik a sa ngawl zong tam mama om vave hi.

Popular Vote a tam zaw a nga hang lel thei
Electoral vote a zo in president suak thei tatak pheang hi. Ahihang, popular vote tam zaw nga ahihang electoral vote pan lel ahikom, President a nga ngawl zong om thei hi.

Sontena, mimalsim (population) tam California, Florida le New York State 3 pan popular vote sia Democrat in vote tang khat tek taw lel ci tawng ei. Republican in vote tang 1 tek bek taw zo ahihang ngual zawna nga ahikom, tuak state 3 theampo ii electoral vote sia Republican na la siat hi. California na electoral vote 55 nei aa, Florida na 27, New York na 31 nei hi. Tu teng theampo Republican na la siat hi. Ahihang popular vote pan Democrat te in vote tang 3 taw lel bek hi. Tua ahikom ngam bup ii popular vote sim siat le, mimal khat sim ii piak popular vote pan Democrat in zo thei tha tu, ahihang electoral vote tam zaw nei ahikom, Republican in zo zaw electoral vote pan zo hamtang tu hi.

Popular vote pan bangza ta zo kale electoral vote a zo pa/nu sia president kitealna ah ngual zawna nga in kila hi. Popular vote pan zo napi, electoral vote pan a lel hu in kitealna ah a lel 3 vei om ngei hi. 1824, 1876, 1888 le 2000 kum kitealna te hi. 2000 election lai Republican pan George W. Bush le Democrat pan Al Gore kidem hi. Al Gore na popular vote 50,999,897 nga aa, Bush na 50,456,002 nga bek hi. Mimal khat sim ii piak popular vote pan Al Gore na mee tang 543,895 a tam zaw nga hi. Ahihang electoral vote pan Al Gore na mee tang 266 nga bek aa, George Bush na 271 nga ahikom tua kum kitealna ah Bush in zo hi.

Electoral College system a dei ngawl tam vaial
Republican party memberte in Electoral College system sia dei zaw tawntung hi. Ahihang Gallup poll te ii son bang hile, tu nai pan kipan Republican te zong in a dei ngawlna khang vaial hi.

Electoral College taw kisai Gallup poll te ii muna bang hile, US mimalsim ii se thum sua se ni na popular vote taw president kiteal le dei zaw ci hi. US mimalsim ii zakhen 62% na Electoral college taw kisai constitution pua le dei ci hi. 2011 October tha sung a kivawt poll ah US mimalsim ii zakhen 35% bekma na Electoral College system sia zak sasuak tu in thukim hi. Party zui in et ciang, Democrat ii zakhen 75% na Electoral College system sia hoi sa aa, Republican ii zakhen 41% bekna hoi sa hi.

TN

Dopha: Internet site tatuam le, Wikepedia

Advertisements

2 Comments

  1. Tualpipa says:

    Thawngno,
    Thupi peuma/Ki tel pai sinsen ze-Good Job! puthawng

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html