Nikonghong

Home » Lai & Kampau » Siyin Bible Revision Committee Meeting pan thu pawl khat

Siyin Bible Revision Committee Meeting pan thu pawl khat

Sizang lai ih at ciang standard tatak om ngawl ahikom, khat vavei ih lungman vangau ni om thei hi. Pawl khat in aki tel vaseng tu at vaziau in khen mang lel leang phabel ci ngaisun aa, pawl khat in vanh min le sim khat ahi peuma ngawm leang hoi ci in ngai sun hi. Son ciang ol tubang ahihang, at tatak leang ahaksatna mun tam mama om hi.

Ih lai thupi bel ahi, Sizang Lai Thiangtho standard in koi leang hoi bel vak ci in ka ngaisun hi. Ahihang, ih Lai Thiangtho sung ngawngawn mun khat le mun khat hong ki bang ngawl mun hong om lalai ciang, ih lung mang seseam hi. Pawl khat sia ngaisutna ki bang ngawl, idea ki bang ngawl ahikkom, lungman hun zong om thei hi. Sontena: –

Lai Thiangtho le Laithiangtho
Tha Thiangtho le Thathiangtho koi sia dik zaw ziam?

Mihing atamzaw ii ngaisutna ah, English kam in Holy Bible ci hitana ei kam zong Lai Thiangtho ci in khen in at tu ci hi. Ahihang, ngaisun tatak leang Holy ii akhiakna sia bang ziam? English te ii Holy ci kammal sia ei nei takpi naa hi ziam? Holy sia English dictionary sung en leang “Belonging to, derived from or associated with a divine power” ci hi. Ci nopna in, Holy ci kammal sia Pathian tung bek ah aki zangh thei kammal hi. Ei kam in Pathian tung bek ah aki zangh thei kam mal ih nei ziam? Thiangtho ih ci ciang, English kam taw “clean, neat, tidy..etc” hi ziu hi. Tua hitana Lai Thiangtho ih ci ciang “A clean book” cina suak aa, Holy Bible ii a thupina bo sak hi. A khiakna dai sak hi ci in ngaisun khi hi. Laithiangtho ci in mal khat in at liuleu leang ahoi zaw katawm ci in ngaisun ing.

“ah” ci kam mal zong keima muna ah, “preposition” khat hi. Omna lakna kam mal ci in ngai sun ing. Tua ahikom, “ah” peuma sia khen in at leang hoi sa zaw laleao khi hi. Sontena,

Yangon ah = in Rangoon
Tua mun ah = At that place

Bangbangpo ahizong, Sizang lai at daan taw kisai ka ngaisutna pawl khat ka at hi aa, Sya Kip Thian Pau kung pan Siyin Bible Revision Committee ii meeting minutes khat ka nga sia sung ah, Sizang lai at daan pawl khat om ahikom hong hawm sawn nuam ing. Yangon YSBC Silver Jubilee Hall ah September 12, 2010 ni aki vawt meeting hi. Meeting ah aki hel teng sia anuai abang hi.

  1. Rev. Cin Za Dal. General Secretary, SRBA…… Patron
  2. Rev.Dr.Vung Lian…… Co-odinator
  3. Rev.D.Kip Thian Pau…… Chairman
  4. Upa Son Cope…… Secretary
  5. Rev.Vum Khat Pau…… Joint Secretary
  6. Rev. Dr. Lam Cin Thang…… Member
  7. Upa Dr. Mang Cin Pau …… Member
  8. Upa Dr. En Cin Pau…… Member
  9. Upa Vum Kho Cin…… Member
  10. Upa Dr. Thang Za Lian…… Member
  11. Upa Suak Za Nang…… Member
  12. Upa Dr. Vai Pau…… Member
  13. Upa Thang Cin Tual…… Member
  14. Rev. W. Khai Tual (Theizang Senior Pastor)…..Guest
  15. Rev. Do Cin Pau (Khuasak Senior Pastor ) …..Guest
  16. Rev. Suang Cin Pau (Siyin Ywa Senior Pastor ) …..Guest
  17. Pastor Khai Dou Pau …..Guest
  18. U Tun Kyin…..Guest

Meeting sung ki kup thute sung pan Sizang lai at daan taw ki sai teng en kik in hi leang anuai abang hi.

Taangkam leh laimal phenkhia tu a haksa te zaktu dan kikup na:-

  1. A nuai aa kammal te le ih zak vazit ngawl kammal te mihon in zong teal kim tek zo ahiman taang kam kepcingna in ih zak tu in kithukim hi. Dual, Khaikhin, Khelki. Kisuangtak, Luphung, Mannung, Ngawlnguak, Phalak, Sisuak, Thildang a vaal lai,
  2. Baptize kammal sia anuai abang in zak tu in kithukim hi.
    • Thaa sung ah kiphum ciang “Baptize” ci kammal zang tu aa,
    • Tui sung ah kiphum ciang “Tuiphum” ci kammal zang tu hi
  3. Synogogue ci kammal sia ei kam in ih phen ciang in cingtaak thei ngawl ahiman in “Synogogue” ma ci-in zak tu in kithukim hi.
  4. Kalauh (ကုလားအုပ္) ci-in a ki at kammal sia a thiang tak in ki sim vaset thei ngawl ahikom, “Kalaoh” ci-in at tu in ki thukim hi.
  5. Laimal haksa te tel cianna “foot note” a hibuale “bracket” tawh in at thei natu Bible society te tawh ki kum phot tu pha ki sa hi.

Kammal ngawm at dan tu te a nuai a bang hi tu hi.

  1. A ki bang a laimal kop te:-
    • sese, veve, pipi, cici, ciacia, mama, sasa, mawmaw, sawsaw, lawlaw (A kibang linlian in a kop te amasa sia awlang taw lo tu hi. Hi sung ah mamaw ci in na at le khialna (အျပစ္) ci-in ki ciamte tu a, mawmaw ci-in na at le thin-am (အရူး) ci-in ki ciamte tu hi
  2. A ki bang ngawl hiat a laimal kopte :-
    • pai-papai, taam-tataam, lak – lalak, vak – vavak, lang – lalang….
    • nawl – nawnawl, tawn – tawtawn, sawm – sawsawm
    • tei – tetei, vei – vevei, len – lelen, met – memet, leng – leleng (Heak tu – tatei, vavei, lalen, mamet, laleng ci bang in at ngawl tu hi.)
    • seam – seseam, meang – memeang, kheal – khekheal (Heak tu – “ea” ii awsua sia “e” na zozaw ahikom, saseam, mameang, khakheal, ci bangin at ngawl tu hi.)
    • cip – cicip, lit – lilit, sin – sisin, khim – khikhim (Heak tu – tacip, lalit, sasin, khakhim, ci bangin at ngawl tu hi)
    • bia-biabia, cia-ciacia, ciang – ciaciang, phiat – phiaphiat, pial – piapial, piang – piapiang, (Heak tu – “ia” awsua sia “e” taw kinai kik a,”piaheak” ci-in ih at ciang in “peheak ” ci-in kisim ahi kom, babia, papia, phaphiat, papial, papiang, ci bangin at ngawl tu hi.)
    • hoi – hawhoi, loai – lawloai, po – pawpo, phong – phawphong, tong – tawtong (Heak tu – hahoi, lalom, papo, phaphong, tatong, … ci bangin at ngawl tu hi.)
    • koai – kawkoai, loai – lawloai, noai – nawnoai, poai – pawpoai, (Heak tu – kakoai, laloai, nanoai,papoai, … ci-in at ngawl tu hi)
    • khui – khukhui, lum-lulum, nui-nunui, sung – susung,… (Heak tu – khakhui, lalum, nanui, sasung,… ci bangin at ngawl tu hi)
    • lua – lualua, luai – lualuai, (Heak tu – lalua, laluai, …. ci bangin at ngawl tu hi.)
    • kuan – kuakuan, phuang – phuaphuang, suang – suasuang, tual – tuatual, (Heak tu – kakuan, phaphuang, sasuang, tatual ci bangin at ngawl tu hi)
  3. o” leh “aw” zakna khentel natu:-
    • tawntung, ngawlin, zawkciang, (Heak tu – tontung, ngolin, zokciang ci bangin at ngawl tu hi)
  4. ih” leh “ii” zak natu mun khentel natu.-
    • Ih pa ii pa sia pu kici hi.
    • Ih ngam ih lei= Eima ii ngam eima ii lei
  5. a” “aa” “ah” zak natu dan:-
    • Ama doituam sung tum a, sabuai tungah aom laibu asan sia ama ii laibu ahikom la in, a khut ziatsang taw toai in doipua ah pusua pui hi.
    • a peang, a khut, a sam, a inn
    • apeang, asan, avom, akhatna, aniina, ahi hi. (Heak tu – Mun theampo ah ahi thei bua zong tu bangdan in khen phot leang. Ahithei ngawlna muntepan:- a at hi, a awlmaw bua hi, sa a ai hi,…. ci bangte hi)

Atung ateng sia Siyin Bible Revision Committee meeting pan Sizang lai at daan taw ki sai a khensat uh thu pawl khat hi. Sizang literature taw ki sai atuam in lam hong pui tu kipawlna (organization) ki nei tuan ngawl ahiciang, mai lam sang ah Siyin Bible Revision te ii khensatna teng ma hong thupi tu ci in ngai sun ing.

Siyin Bible Revision Committee te ii khensatna sung a khaak bel ahi “a” taw ki sai sia Ni Kong Hong sung ah ka buai pui tawntung khat hi aa, anuai abang in zangh/at leang ahoi katawm maw ci in ngaisun ing.

  1. a+ nuounahile, khen in at leang: Sontena: –
    • A khut = Ama ii khut (his/her hand)
    • A omna = Ama ii omna (his/her living place)
    • A peang = ama ii peang (his/her leg)
  2. a+verbahile, khen in at leang: Sontena: –
    • A at hi = Ama in at hi (He/she writes)
    • A pet hi = Ama in pet hi (He/she bites)
    • A nui ciang hoi mama hi = When he/she smile…
  3. a+adjective le adang teng sia zom in at leang: Sontena: –
    • Apeang = twin
    • Atung = over
    • Asan = Red color
    • Adang = others
    • Asanna = heights

Keima ngaisutna hi, lai at daan kin ih om le ngaisutna tuatuam nong zaaksak natu hong son nuam ing.

Zom tatou lai tawng….

Nikonghong

Advertisements

2 Comments

  1. […] Siyin Bible Revision Committee Meeting pan thu pawl khat. […]

  2. Win Hein says:

    Reblogged this on Sizangkam and commented:
    This dicusses a lot of issues about the Sizang orthography and word/morpheme relationships. More on this later…
    ဒီဆောင်းပါးထဲမှာ စီး​ယင်း​စာလုံးပေါင်း​သတ်ပုံ နဲ့ စကား​လုံ/morpheme အဆက်​အသွယ်​တွေ​ကို ပြော​ပါ​တယ်။ ကျနော်​လည်း ဒါ​နဲ့​ပတ်​သတ်​ပြီး နောက်မှ ဆွေးနွေး​ပါ​မယ်။

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 91,022 hits

A Lui Te

Live Trific

google-site-verification: googled172884ff34d55c0.html