Nikonghong

Home » Politic » Kua Na Teal Zaw Tu Le?

Kua Na Teal Zaw Tu Le?

Tusung, ABC te ii interview vawtna ah Obama in gay marriage taw ki sai a support-na son aa, America ngamp bup pi le leitung buppi linglawng sak hi. Atuan in Christian thu um mi sung ah linglawng kakan hi. America ah political party lian 2 om aa, democrat te ii ngaisut zia sia, mi cimaw, mi nautaang te atu vei zaw tawntung aa, Republican te ahile, mihing haute atu sep sak tawntung hi. Sontena democrat te in mihing haute tung pan pheangse (tax) a khan nuam aa, republican te inn minhing haute tung pan pheangse (tax) khiam nuam hi. Ahihang, democrat te in mihing thuneina (human rights) thupi sak peuma aa, a vaal a leet in ngaisutnate hong nei laleo ciang, ih saan zawk ngawl thu pawl khat hong om laleo hi. Tua sung pan gay marriage sia khat ahi hi. 

Gay marriage tungtaang, pamei (gay) te zong thuneina (rights) nei hi, ci in thu hong sun uh ciang, Christian thu um mi te atu, haksa ki sa mama hi. Pamei (gay) vai taw ki sai a phulbel, a hatbel te en leang, atamzaw sia mikangte veu hizaw aa, atatuan in Hollywood ah mithing, film star teng veu hi thei lai hi. Obama in gay marriage a support-na thu a son zawk azing ciang, Hollywood pai aa, fund raising vawt pai hi. Film star George Clooney inn ah vawt aa,  15 million nga hi. Presidential fund raising vawtna ah record thak hi tuak hi. Acing zaw in a sim nuampo Christian Science Monitor website ah ki sim thei hi.

American Politic sia nidang bang hi ngawl niin vaial hi. Ngual zawna nga tu hi po le Pathian deina taw ki si ziam ki si ngawl ziam ci zong awlmawk nawn ngawl hi zo thong hi.

Obama ii gay marriage a support-na thu dang khat om lai hi. Gay marriage legal sak tu pha sa ziam pha sa ngawl ziam ci in Gallup’s poll te in kum sim American ngammi te tung ah dokna vawt tawntung aa, result sia anuai abang ahi hi. English in a sim nuam po Gallup poll ah ki sim thei hi.


1996 kum lai gay marriage a dei ngawl zakhen 68% bang om aa, a dei zakhen 27% om bek hi. Ahihang 2012 kum in a dei ngawl zakhen 48% bekma om lai aa, a dei zakhen 50% theng to hi. Hi thu a et ciang dei zong dei bua zong gay marriage support leang fund zong tam mama nga tu aa, vote zong nga tu ci in ngaisun hi tu ka um hi.

Tua ahile, Obama a dem tu republican pan Mit Romney thu biakna mit taw en laleao tawng. Mitt Romney ii biakna sia Mormon te hi aa, US sung om te in he tha tu ih hi hang US ngam pua om, atamzaw in he ngawl tha tu in um ing.

Joseph le vantung lalaang Moroni

Mormon biakna a phut phitbelpa sia Joseph Smith (1805 – 1844) hi aa, 1830 kum in New York state Palmyra khua pan ki pan hi. The Church of Jesus Christ of Latter-Day Saints zong ki ci aa, pawlpi mi million 11 pan million 12 bang om tu ki um hi.

1820 kum, Joseph Smith in biakna pawlpi tam mama a om sung pan kua maanbel aa, kua pawlpi ah tum tu khi ziam ci in a lungmang ahikom,Ephesus 4:5 siisan in, a lobuk sung thu ngen hi. Tuasia ciang, Topa Jesu mu aa, kuama maan ngawl hi, nungzui 12 te thi zawk nungsang pawlpi maan tatak om nawn ngawl hi ci in Topa Jesu in son hi ci hi.

Joseph in 1823 kum laleo ciang, Mormon ii tapa “Moroni” aki ci vantung lalaang khat taw ka ki mu aa, kham taw aki at lei sung ah aki phum, kham laidal pawl khat omna hong hil ci hi. Tua kham laidalte tung ah a tawntung atu aki cing lungdamna taangthu (The fullness of the everlasting Gospel) ki at hi ci hi. Tua kham laidalte sia lim taw aki bang, taang lai nam khat taw ki at aa, “Reform Egyptian” ci in tua lai at daan sia min pia hi.

Tua “Reform Egyptian” taang lai ka sim thei natu in “Urim” le “Thummim” aki ci suang pheak nam 2 tung pan ka sin ci in Joseph in son hi. “Urim” le “Thummin” suangpheakte zangh in kham laidal a phen ciang Mormon biakna le Mormon laibu “The book of Mormon” hong piang aa, 1830 kum ahi hi. Joseph in 1830 le 1840 kilaklaw mang mu thua aa, tua a mu theampo a a-at le, “Momon Holy book” le “Doctrines and Covenants” ci Mormon te ii lai thiangtho hong piang khia aa, tu ni dong zangh uh hi.

Pasal khat in zi tam mama nei thei hi ci upna nei ahikom tua hun lai mormon te ki ngaimaw mama aa, ki vawtsia mama hi. Cowboy hun lai ahibangma, 1844 kum ciang Illinois state Nauvoo khua aa a ngaal te in man aa, thau ki kaapna sung ah thi hi. Bringham Young in Jeseph zaa lai aa, Salt Lake City khua ah head quarter khiin hi. Tu ni dong head quarter Salt Lake City ah om hi.

Mormon te upna koibang tatak ziam?

  1. Ngupna nga natu in tui ki phumna ki samh hi. A thi sa te ngangawn a taangthu kan kik in Mormon upna um tatak aa, ngual a hu valeng thin pha nei khat ahi na le, a thi zawk ciang zong, ngupna a nga natu tui phumna pia kik thei hi. “Proxy Baptism” na hi.
  2. Orthodox pawlpi te sia pawlpi ngina ngawl, a muat pawlpi ci in mu hi.
  3. Ei Christian te ii “Gosple” ih ci sia Mormon te in “Great Apostasy” ci aa, ki cing ngawl ci hi. Joseph ii mang mu zawk ciang “The Gosple” ahibuale, “Great Apostosy” sia ki cing tatak pheang hi ci hi.
  4. Mormon biakna sung ah thasum taw na a seam, Sya ci bang om ngawl aa, pawlpi mi theampo in pawlpi naseamte hi siat hi.
  5. Numei te thiampi suak thei ngawl hi.
  6. Joseph Smith thi zawk ciang a zaa ki lai tato aa, tu ni dong prophet 14 phazo hi.
  7. Hi prophet te nuai ah, “contemporary apostles” aki ci nungzuite taw pawlpi ki phut aa, pawlpi kal suan hi.
  8. Pathian sia “Heavenly Father” na aa, Pathian zong khat vei lai in eima bangma mihing hi ci hi. (Heavenly Father, also known as Elohim was once a man). Hi theory sia, Mormon te in “Theois” ci aa, eima zong ni khat ni ciang Pathian ki suak thei ci in um hi. Tua ahikom Mormon upna sia Pathian khat bek upna (Monotheistic) hi ngawl aa, Pathian tam mama om ci (Polytheistic) upna ki ci thei hi.
  9. Joseph Smith ii “Gospel doctrine” sung ah Pathian sia mihing te bangma thi le sa taw aki vawt hi aa, zi zong nei hi ci hi.
  10. Thum ngawm Pathian um ngawl aa, Pa, Tapa le Thaathiangtho sia Pathian khat tek hi ci in um hi.
  11. Thaathiangtho sia “Holy Ghost” na aa, mihing pha theampo holy ghost nga thei hi, ahihing, mormon sung tui ki phum te bekma, a khan tawntung holy ghost ii lam lakna nga thei bek hi ci in um hi.
  12. Thi zawk ciang thaw kikna om ci in um aa, thu khenna zong om tu ci in um hi.
  13. Tua thu khenna zawk ciang Pathian le Mormon thu um tatak te sia “Celestial Kingdom” ci a saangbelna mun theng tu hi. Tua munh ah leitung a nuntak lai aa, mormon sung zaa (level) a neina bang in za (level) nei tu ci hi (Doctrine and Covenants 130:2). Mormon lai thiangtho a saang ngawl Christian te in a 2na ahi “Telestial Kingdom” theng tu hi. Mihing pha ngawl, a ngilo, a taktai ngawl teng sia a 3na ahi “Outer Darkness” sung theng tu hi ci in um hi.
  14. Israel minam a bocip nam 2 te sia BC 600 kiim lai US leitangh tung hong theng ahikom Israel ngam ah bo aki sa hi ci hi.
  15. Topa Jesu le Satan sia nidang unau laipe hi aa, Topa Pathian ii tapate hi. Pathian in Jesu sia leitung tan tu in a teal ciang Satan sia a thin uk aa, Jesu ii ngaal suak hi ci hi.
  16. Mormon pawlpi mi theampo pawlpi ii full time mission ah na seam ngei siat aa, tha 18 pan tha 24 sung bang aki pia hi siat hi. A tamzaw, teenage veu hi aa, “door to door evangelism” system zangh hi. Se sawm sua se khat man valeng hi. Zu le za tawp vet ngawl aa, kaphein aki hel coffee ci te zong nasia tak khaam hi.
  17. Nipi ni sim aki khopna munh sia Church ci ngawl aa, “Ward” ahibuale, “Branch” ci aa, USA sung khua theampo phial ah om hi. Kikhop hun sia nai 1 le lang bang veu hai aa, “worship service” ci ngawl in “Sacrament meeting” ci hi.
  18. Biakinn daan in aki sa, Temple lian mama zong nei aa, leitung buppi ah Mormon Temple 100 kiim bang om hi. Mormon Temple sia Nipi ni kikhop natu mun in a zak hi ngawl aa, “Mormon Doctrine” ki hilna, “mo poai” vawtna, anungta lai te tui kiphumna le a thi sa te tui kiphumna (Proxy Baptism) vawtna in zangh hi.
  19. Sawltak Laithiangtho sung aki at Pawlpi maan tatak sia mormon pawlpi hi ci in um hi.
  20. Mihing theampo ih nu ngil sung pan ih suama, thaa (spirit) in aki omsa hi siat hi. Tua thaa theampo sia Pa Pathian “Heaven Father” le Nu Pathian “Heavenly Mother” nupa om khopna pan a suak veu hi siat hi ci in um hi. Mormon lai at thiam “James Tamadge” in a laibu “A Study of the Articles of Faith” sung ah Pa Pathian sia nidang tawng lai in mihing khat hi aa, ei zong ni khat ni ciang Pathian ki suak thei hi ci in at hi.
  21. Thaathiangtho in Mary ngil sung ah nau ngil nei sak ci thu sia um ngawl aa, Elohim aki ci Pa Pathian (Father God, Elohim) le Mary nupa in om khopna pan, nau ngil nei hi ci in um hi. Tua ahikom Jesu sia mihing theampo ii U lianbel “elder brother” hi ci hi.
  22. Salvation, ngupna nga natu Pathian na seam lingleng tu aa, Mormon ngeina taw tui kiphumna a nei sa ahi nanak kul hi ci in um hi.

Click on image to read contents

Atung aa, thu (22) bang sia Mormon le Christian te ii ki lamdanna hi. Adang theampo sang zong, ngupna nga daan sia Christian te taw ki lebul sitset hi. Atung aa, thu teng sia Len woods ii lai at “Handbook of World Religions (A bible-based review of 50 World faiths)” sung pan ka lak hi aa, a original in a sim nuampo sim thei tu in anuai ah attachment taw kakoi hi.

2008 US president kitealna vawt lai in Obama sia Muslim hi ci in mihing tam mama in mawsiat hi. Christian khi hi aki ci ma sia Christian teng ma na saang nuam ngawl aa, muslim hi ci vangaat hi. Atatuan in Christian ka hi aki ci ka piang thak aki ci teng suuk zaw hi. Christian a pii cing khat president hong suak le dei tek ahikom khial ki ci thei tuan bo. Tu ni ciang dong Obama muslim ahina bangma lak thei ngawm himakale, muslim ma ci vangaat lai uh hi. 2012 kitealna ciang, Christian thu upna taw aki le bul sinsen upna a pom, Mit Romney hong ki dem tu hi. Christian ka hi aki ci te, Christian upna pom takpi ma ziam? Naing-ngaan-zii kin aa, Obama le democrat party a dado hi zaw ziam tu tung ciang hong ki khen thei sitset tu hi, ci nuam ing.

US politician te sia niin thei mama aa, a thiangtho khat zong om ngawl hi. A piangthak takpi, Pathian dei bang tatak kal a suan Christian tatak (true Christian) khat atu democrat le Republican kibang bikbek siat aa, teal tu om tuan ngawl hi. Pathian mit pan avekpi kibang siat lel hi. Ahihang politic mit le, politic lungtang taw en leang hong kibang ngawl tha tu hi.

Nang ee, kua na teal tu le?

TN

______________________________

Note: Mormon te thu acing in na sim thua nuam le anuai aa website te ah ki sim thei hi.

http://en.wikipedia.org/wiki/Mormonism
http://en.wikipedia.org/wiki/Joseph_Smith,_Jr.
http://mormon.org/joseph-smith/

Mormonism in the “HAND BOOK OF WORLD RELIGION” by Len Woods

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,424 hits

A Lui Te

Live Trific

google-site-verification: googled172884ff34d55c0.html