Nikonghong

Home » Sizang » Amish Te Omna Pennsylvania

Amish Te Omna Pennsylvania

May 19, 2012 ni Amish te om daan le nuntak zia en tu in Pennsylvania State sung, Lancaster khua kiim ah inn kuan in ka pai uh hi. Maryland, Laurel khua pan motor 3 taw ka pai uh aa, nai 2 vaal ki hawl hi. Amish te thu sia America ka thet zawk ciang ka heak pheang minam khat hi aa, set vanh, motor le electric cibang tuhun vanh peuma zangh nuam ngawl ci in ka tel ngiim hi. Bang hang zangh nuam ngawl si sia ka tel bua hi. Motor taw nai 2 vaal hiat ka hawl zawk uh ciang Pennsylvania state sung Lancaster khua ka theng uh hi. An sai khat ah Amish te omna ka kat uh le, Route (30) tung Target sai mawk ah, Amish farm sung a pai tourist bus om ci thu ka he uh hi.

Bus omna mun ka thet uh ciang, bus ka dok uh ciang, tua zawk nai khat bang ciang bus om kik pheang tu hong ki ci aa, nai 3 sung hong vaa pui kakoai tu hi ci in hong ki son hi. Maryland cia kik tu hun le bus kipat hun ka tuat uh ciang le, patang nau sen 2 zong ki hel kahi uhkom, bus zui ngawl in koma le koma ahithei babang pai tu in ka khensat uh hi.

Amish lo (farm) sung ka thet uh ciang, Amish te sia, puan sil lamsang a simple thathei sil aa, pasal te in a kha mul huaei uh hi. Set vanh, motor cite zanhg ngawl aa, siphu leang le cycle namkhat zangh hi. Lo ngangawn siphu taw tho thong sawn hi. Minam in son tu hi leang mikang (white) te hi.

Leitung ah hizata pilna sang khanto hun in Amish te in banghang hibang teang uh ahikatawm ci, tel ngawl pi-pi ma le ngaisun ngeo-ngou in Maryland ka cia kik uh aa, nitaak nai 6:00 saat vaal zawk ciang Laurel ka theng kik uh hi.

Amish sia akuate ziam?
Christian pawlpi khat hi aa, pawlpi phutpa sia Jacob Amman (1656-1730) hi. Ama min Amman ahikom, anung zui theampo Amish ki na hi. Mennonite pawlpi pan in aki khen pawlpi khat hi. Kumzalom 17 lai hi aa, pawlpi thak Amish te ki vawtsia ahikom, Europe pan hong tai uh aa, America hong theng uh hi. Canada, US mid-west le, Pennsylvania sung teng ah teang uh aa, mihingsim 50.000 bang pha tu in ki um hi.

Motor zangh ngawl, siphu leang bek zangh aa, puan a simple thathei sil hi. Middle age hun lai Europe mihing te ki thuai daan in ki thuai aa, tuhun vanh atamzaw a zak ngawl na in, amate upna tung ah bangza ta in ding in kip lingleng ziam ci thu ki lang hi.

Lo thaw sia Amish te ii nasep thupibel hi aa, numeite in a pasalte bangkua papi tatak in koi aa, zakta mama hi. Christian pawlpi khat ahi uh bangma, ih Laithiangtho zak kibang hi. German kam taw akibang kampau namkhat zangh uh aa, Pennsylvania Dutch kam ki ci hi. Amish te in amate kam sia Deitsch kam ci hi.

Amish te ii nisim nuntakna ah a thupi mama thu 2 om hi. Hi thu 2 tung ah kip lingleng in ding aa, zui ahikom, tu nidong taang lai bang a nuntak zia aki kheal ngawlna thu ahi hi. Hi thu 2 in, “Demut” le “Hochmut” hi.

“Demut” ciciang Amish kam (Deitsch language) hi aa, Pathian tung ah ki niamkhiat in ki appna a cina hi. Hi bang in Pathian tung ah ki niamkhiatna taw ki app thei natu meal heak sung, beta khat, eima le eima uanau khat pata khat ki it lingleng tu, ki fellowship tawntung tu ki hu vadiam tu hi ci in ngaisun uh hi. Thu nitna zong Amish te atu a thupi mama nuntak zia khat hi.

“Hochmut” ci ciang, ki phatsakna le eima ai atubek ngaisutna pan pusuana hi. Tuhun vanh le set tatuamte in khat le khat ki demna le ki dik sak ngawlna piang sak hi ci in um uh hi. Datpung ngangawn ki zai nuam ngawl uh aa, datpung zai zong thuak nuam ngawl uh hi. Tuhun technology taw aki vawt motor, electric le set vanh tatuam te in mihing te kilaklaw kidemna piang sak hi ci hi. Tua bek dom ngawl hi vanh tatuam te hu in kiphatsakna, kihisakna le midangte no muna piang sak hi ci in um hi.

Pilna taw ki sai, taan 8 dong bek sin kul ci in ngaisun uh hi. Taan 8 tungsia a sin peuma amate le amate bekma thupi kisakna thin piang sak hi ci hi. Tua ahikom Amish te in pilna taan 8 dong bekma sin uh hi.

Christian pawlpi khat le khat ih doctrice aki ban ngawl bangma Amish sung zong doctrice ki bang ngawl om kakoai hi. Amish pawl khat in electric zangh uh aa, pawl khat in set vanh tatuam a zangh zong om vave hi. “Beachy Amish” te in aki pua, aki ngel zelzal ngawl motor zangh thei hi. Color le lim tatuam taw aki ngel bembom le hawl nuam ngawl hi tuak hi.

Amish pawlpi theampo aki banna khat sia ngaalkap sung tum vet ngawl aa, zum na taw ki sai seam vet ngawl hi. U lian sua zawk ciang tui kiphum uh aa, tui kiphum tu sia amate le amate khensatna taw kiphum sak hi. Tui phumna nei zawk ciang, “rumspringa” ci, Amish community ii apua sang vaak khuan nga hi. “Rumspringa” hun sung ah tuhun khangnote bangma a puansil uh hong zangh aa, Amish community pua sang khangnote vawt theampo, a uk uh babang vawt khuan nga hi. Hi “Rumspringa” hun a zak zawk uh ciang, a uk uh le a pua sang ah om suak thei hi. Ahihang zakhen 80% pan zakhen 90% bang sia Amish community sungma cia kik hi.

Amish community sia ei a pua sang om te ii nuntak zia taw kibang ngawl het aa, amte letbel Laithiangtho khat sia, “Thu um ngawlte taw kipawl tu sia suak thei ngawl ahikom amate taw kikim in na na seam khawm heak vun. A maan le a maan ngawl sia bangbangin kipawl khawm thei tu a, khuavak le khuazing sia bangbangin teang khawm thei tu ziam?” (II Corinthians 6:14 ) hi.

Advertisements

6 Comments

  1. Lun tek says:

    Mr TN, sim nop huai lai saa ing, lung dam….

    Lun tek

  2. thawngno says:

    @ Lun tek…Maryland pan motor datsi manh ($ 20) manh kiim le sai an na ne le na neak babang hi vak. Sum tam mang zong bo bo.

    • Dr.Kamcindal. says:

      Luntek awng BE electric Electic thiamte kisam ngawlh hi.Na pai leh an ngaawl tu ni hi.Spo mah-ah om nial poh in awng..Kong ciamnui suahna hi. Na pu Dal.Kamcindal

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 91,022 hits

A Lui Te

Live Trific

google-site-verification: googled172884ff34d55c0.html