Nikonghong

Home » Sizang (USA) » Niagara

Niagara

Click on image to enlarge

Maryland state Laurel khua pan Canada ngam ngi, New York state ah om Niagara tuiteou (falls) en tu in, August 31 ni, 2012 nitak nai 8:00 PM kiim khawng innkuan in ka pai uh hi. Laurel pan tai 420 kiim khawng khuala aa, Yangon le Mandalay khualatna taw kikim hi. Mihing 9 pha ka hi uhkom, van motor khat kawm vet aa, sun nasep hun man zawk ciang ki thoai in zan khuateak pai ung.

GPS (global positioning system) ii lak bang hi le, tai 420 kiim khuala aa, nai 7 hai tu ci in ki lak hi. Ahihang, lam kaal khat vavei ki tawlnga vazek, motor hawl zong ki lai vazek bua le mut suak thei mama ahikom nai 9 phial ma hai aa, zing sang nai 5:00 saat ciang Niagara tuiteou omna khua, Buffalo ka theng uh hi. Zan khuateak motor ki to aa, ki ngim mama ahikom, tawm vei tawlngah natu hotel aman ol thathei tu GPS tawma zong in hotel khat ah, toi tang in tawm vei ka mu phot uh hi. Sun nai 11:00 AM khawng saat ciang hotel pan Canada ngamngi Niagara tuiteou omna zuan in ka pai uh aa, minutes 15 sung bang zawk ciang ka theng uh hi.

Motor parking haksa mama ahikom parking ki zong phot aa, khaakbek ciang dawl 6 sang parking inn lian mama khat tung a dawl 4na ah ka nga uh hi. Parking lot pan tuiteou dong piang in ka pai uh aa, minutes 5 sung khawgma ki pai hi. Upmawk ngawl Sya Thuam Cin Khai le a saangpatangte taw, Canada pusuana gate kiim ah kaki mu uh hi.

Maid of Mist ci in tuiteou nuai tatak dong teambaw taw ki pai thei ahikom, ticket lei in teambaw taw tuiteou nuai vacinh dong ka pai uh hi. Tourist tam mama aa, mun theampo ki phul valua in papai a kul hi. Tuitoeu nuai pan atung ka kaa kik uh zawk ciang thing nuai alim nuamna mun khat ah, tawm vei to in ka om uh laitak, ka tona uh pan pi 30 khawng khualana mun, tuiteou tung lian mun khat ah mo poai khat a om hi. Mikangte mopoai hi aa, molia le, mo pasal adin pui taw, pastor taw, vekpi hisitsetma ki thoai in biakinn sung vawt daan ma a vawt uh ka mu uh hi.

Toi thai zaw hiat ciang, ngil kial kik ahikom an sai omna sang ka zuan uh aa, an neak man zawk ciang Maryland cia kik tu in kaki pan uh hi. Buffalo khua pan nitak nai 3:30 kiim kaki pat kik uh sia, Maryland zaan 12:00 saama hiat ka theng kik uh hi.

Niagara tuiteou taw kisai aheaknop huai thu pawl khat

  • 1969 kum mihingte in tuiluan khaak tan ngei

    Canada le America ngam ngi lian ah om aa, tuiteou 3 om hi. 1. American falls 2. Bridal Veil falls 3. Horseshoe falls ahibuale Canadian falls hi aa, athum aki ngawm in Niagara falls ki na hi.

  • Tuili lian mama 4 ahi Lake Superior, Lake Michigan, Lake Huron le Lake Erie pan Lake Ontario sung aluan tu ciang asanna kikim ngawl ahikom Niagara tuiteou piang hi. Tua tuili 5 sung om tuithum (fresh water ေရခ်ဳိ) sia leitung bup tuithum theampo ii zakhen 20% pha hi. Tuili 5 teng ii letna sia anuai abang hi.
    • Lake Superior = 82,100 sq km
    • Lake Huron = 59,600 sq km
    • Lake Michidan = 57,800 sq km
    • Lake Erie = 25,700 sq km
    • Lake Ontario = 18,960 sq km
    • Kachin State = 89,041sq km (ette kaak thei natu)
    • Chin State = 36,019 sq km (ette kaak thei natu)
  • Leitung ah tuiteou lianbel a nina hi. akhatna sia Victoria falls, Africa hi. Tuiteou ii saanna sia inn dawl 20 sang khat taw kikim ki ci hi.
  • Mipil te in Niagara falls apian zawk kum 12,000 pha zo ci hi.
  • Tui luan nasia mama ahikom tuiluan tawlnga ngei ngawl himakale, 1948 kum March 29 ni, khuasik hu in tuikhal nasia lei ahikom nai tam mama sung tuiluan tawlnga ngei hi.
  • 1948 kum March tha tuikhal huvau tuiluan tawlngah lai

    1969 kum sung tuiteou nuai aa om suangtum pui te khiin in pua leang tuiluan dan hoi mama tu ci ngaisutna taw mihingte in tuiluan khaaktan ngei aa, tha tam mama sung tuiluan tawlnga ngei hi. Ahihang sum bo nasia lei tu ki ci kik aa, project bo kik hi.

  • 1615 kum ciang Piantit mi Gabriel Lalement akicipa in Iroquois Indian kam zui in “Onguiaahra” ci in min na pia hi. Iroquois ci ciang tuak kiim ah a om Indian minam khat ii min hi. Ahihang English kam pau minamte hong tha haat ciang Onguiaahra ci thei ngawl ahikom Niagara suak hi.
  • 1820 kum pan kipan Niagara tuiteou en nuam in tourist tam mama pai aa, tu ni dong leitung ah tourist tam mama a zolzo mun khat in ki ciamte hi. Kum khat sung tourist million 12 bang a en tu pai hi.
  • Phalbi hun sung pi 50 sung bang tui khal bikbek ahikom tourist te tuikhal tung ah kipai sak thei himakale, 1912 kum February 4 ni tuikhal kitam in tourist 3 thi aa, tua ni pan kipan tuikhal tung ki paisak nawn ngawl hi.
  • Second khat sung ataak tui sia ton 3,160 ngit hi.
  • Niagara tuiteou pan tuimei (hydro) ki vawt aa, 4 million kilowatts suak hi.
  • Lake Erie pan tuiteou dong Niagara ngun kici aa, Sturgeon akici ngasa namkhat ii pianna mun hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html