Nikonghong

Home » Politic » Romney le Zakhen 47%

Romney le Zakhen 47%

President kitealna November tha sung vawt tu ahikom hong nai mama zo aa, thuthak le media theampo zong na at bel, son bel in nei hi. Tu laitak aki son bel, a popular mama thu khat sia Republican party pan Obama adem tu Mitt Romney ii “Zakhen 47% “ thu ahi hi. Zomi khat na hi thu a zaak peuma ciang bangma tel ngawl sia mivom te na mama seam nuam ngawl daathaam mama po ve ci thathong hi. Ahihang en tatak leang ei Zomi theampo pheal sia Mitt Romney ii zakhen 47% sung ki hel siat ih hi hunlam zong aki he ngawl te ki hi nginge hi. 

2012 May tha sung Florida state sung fund raising vawtna ah a pau kam hi aa, video ki zaiku aa, September tha ciang Mother Jone website sung ah ki tha hi. Video a ngai nuam te Mother Jone website sung ah ki en thei hi. Tua fund raising vawtna sia mihau te bek pai zawkna mun hi. Tua fund raising vawtna ticket khat ii manh sia US $ 50,000 (tul sawm-nga) manh hi. Mi hau te bek ii pai zawkna munh ah mihau te tung ah a paukhiat kam mal ahi hi.

Ama pau kammal teng anai huai bel in phen kik tu hi leang.

Koibang po ahizong, President (Obama) vote a pia tu mihing zakhen 47% om hi. Man hi, zakhen 47% in ama (Obama) sang pang hi, hi mihingte sia kumpi tung aki nga, ading, kumpi huna taw anungta mihingte hi aa, amate le amate dongtawk ci in aki ngaisun teng hi. Kumpi in amate nuntakna tu vaipuak nei hi ci in ngaisun hi. Health care ahizong, neak le dawn ahizong, omna tu inn taw kisai ahizong ahaksatna theampo kumpi in amate tung ah vaipuak nei ci in ki ngaisun aa, kumpi in amate a hu ngawl phamaw ci in ngaisutna nei te hi. Hi mihing te in income tax pia ngawl uh hi. American mihingsim ii zakhen 47% na income tax pia ngawl hi. Tubang hitana, kei ii vaipuak le nasep sia hi mihingte (zakhen 47%) atu hi ngawl hi, kei zakhen 47% teng atu bangma veina nei ngawl khihi. Amate sia amate le amate nasep a hanciam valeng in amate le amate anuntak thei natu vawt tu khi hi. Kei ii thupi kasak sia, tua dongtawk akisa mihing te in hong ngaimaw katei zong, zakhen 5% pan zakhen 10% bang ahi mihing te (mihau teng) sia amate le amate na seam in nungta hi (dependent), amate sia mihing taktai te hi ci thu hi.

Mitt Romney ii zakhen 47% kammal tung taang ngaisutna tam mama omtek himakale factcheck.org te sia Democrat sang ahizong GOP (Republican) sang ahizong lang pang ngawl ahikom Fact Check te ii son en tawng.

Romney sia hi thu tung taang tawm khit-mii ngawl (out of date) hi. Ama son sia 2009 kum lai ahile man hi. Ahihang tu laitak sia economy hoi kik pian zo ahikom man nawn ngawl hi.

Lang pang ngawl Tax Policy Center te ii July 2011 sung asuasak bang hile, USA mihingsim ii zakhen 46.4% ahibuale 76 million na 2011 sung federal income tax pia ngawl ci hi. Tu kum bo le zakhen 46% ciang taak suk tu aa, 2013 ciang zakhen 44% dong theng suk tu hi ci in TPC na son hi.

Romney ii son income tax sia state tax le, vanh ih lei ciang ih piak tax tatuamte hi ngawl aa, federal kumpi tung ah (state kumpi hi ngawl) ih piak federal tax bekma acina ci thu ih tel masak tu ka dei hi. Cinopna in TPC na zakhen 46.4% na income tax pia ngawl aci ciang state tax le, tax tuatuamte pia ahihang federal tax pia ngawl acina hi. Tua zakhen 46.4% te in tax tuatuam, a nanam pia nginge kinken hi.

Tuale zakhen 46.4% teng sia kuabang teng ziam en suk tawng. Zakhen 46.4% ii alang bang sia thasum nga ahihang a Federal tax piak tham tu in a thasum akicing ngawlte hi. Standard income tax provisions ci in tha sim bangza sang atamzaw nga le federal tax piak kul hi ci upadi om hi. Tua standard sang a tawmzaw sum tha law te hi cina hi. Keima heak bang hi le ka khial buana le, kum khat $27,000 sang atawmzaw na nga bek le nang zong Romney ii zakhen 47% sung ki hel ni hi. Ahihang na paycheck en kik le te tax ananam hong ki kaat susuk hi ngawl ziam? Romeny ii son income tax pia ngawl na hihang Social Security tax, Medicare tax, state tax, county tax le tax ananam pia nginge kinken ni hi. Romney na tua na piak dang teng om ahihang naseam nuam ngawl, mihing taktai ngawl, kumpi tung bek ah aki nga sazian sung hong ciamte hi. Zakhen 46.4% ii alang sia tubang teng hi

Zakhen 46.4% ii alang teng kua teng hi tu ziam?

  1. Zakhen 46.4% ii zakhen 22 teng sia khangham hu in tax piak kul ngawl. Aki maap teng hi. Senior citizen te in income tax piak kul ngawl hi. Romney in hiteng zong mihing taktai ngawl sazian sung ah koi hi.
  2. Zakhen 46.4% ii zakhen 15.2% sia patangno te le a zawng mama te atu aki vawt upadi ahi “Child tax credit and earned income tax credit” sung aki hel teng hi. Hi upadi (law) sia Bill Clinton hun lai Democrat te ii vawt hi aa, Republican George W. Bush hun sung hi upadi zang in noptuam (benefit) a nga a se 2 khangto hi. President Ronald Reagan na hi upadi sia “one of the best antipoverty programs this country’s ever seen.” ci in pok ngei hi. Kumsum $40,000 pan $50,000 nga family pawl khat zong Child tax credit law zangh in income tax pia ngawl thei ci hi.
  3. Tua ngawl zakhen 46.4% ii a cianlai teng sia education credits, itemized deductions le business seam te ii a meetna, ayiin le ayiin tung pan a nga a meet (capital gains and dividends) a nga za lak ngawl in leilot thu sonna pan hi. Mitt Romney ama mama zong capital gains and dividends tung tawn in income tax pia ngawl hi tu ki um hi. A income tax kum khat bekma lak aa, tuama kum theampo lak nuam ngawl hi.

Tua ahikom, Romney in zakhen 47% sia taktai ngawl aa, kumpi tung ki nga aci sia man ngawl hi. 2011 sung income tax pia ngawl zakhen 47% ahi mihing 76 million sung ah kumsum $10,000 pan $50,000 dong a nga mihing, innkuan ananam om hi. Ama sum taw a support mihau khut lom khat ii maitang a etnop hu in, income tax pia ngawl mihing million 76 a sonsiat dikdek sia ngaisut huai vave ka sa hi.

The Salt lake Tribune sung ah Romney ii son zakhen 47% taw kisai hi bang hi ci in ki at hi.

Atam zaw nasep nei
Zakhen 47% ii zakhen 62% sia nasep nei tingteng hi. Tua zakhen 62% sung ah zakhen 10% sia part time nasep seam hi. Khen 4 sua khen khat sia pension ne senior citizen te hi. Zakhen 47% ii zakhen 5% bekma nasep nei ngawl hi ci hi. (Most are employed, Sixty-two percent of the Obama voters work, including the 10 percent working only part time. A fourth are retired. Five percent say they’re temporarily unemployed)

Atam zaw in thasum average sang atam zaw nga
Zakhen 47% ii zakhen 56% na kumsum $ 50,000 nga aa, zakhen 16% na kumsum $ 30,000 nga hi. zakhen 20% na kumsum $ 100,000 vaal nga hi.

Khanghaam khangmoi ki hel siat
Zakhen 47% ii zakhen 20% sia khanghaam ( senior citizen) hi aa, zakhen 12% sia kum 30 nuai hi.

Pilna saang nei zaw hi
Zakhen 47% ii zakhen 43% sia college degree nei aa, zakhen 21% in high school diploma nei hi.
(The Salt Lake Tribune)

Republican lampui pawl khat ii feedback
Vice president tu in a teal Paul Ryan pan kipan Republican lampui tam mama na Mitt Romney ii zakhen 47% thu sia panpui kenkon ahihang, dik a sa ngawl zong pawl khat om hi. ABC News website sung ah anuai abang in ki at hi.

Senator Scott Brown, Massachusetts na email khat at aa “Kei taw ka muna kibang ngawl hi. Haksatna tam mama sung pan a khang khat atu kumpi huna babek taw a nuntak tawntung tu uk tuan tu um bong. Nasep nga zawk ngawl hu in tu ni mihing tam mama kumpi huna taw a kal suan ngawl phamaw vatun hi”

Senator Dean Heller, Nevada na Politico taw thu sonna ah “Mitt Romney taw ka mu daan ki bang bo. Mitt Romney ii hong heakpui tu ka dei thu sia, kei unau 5 nei khi hi. Ka pa sia Machanic hi aa, ka nu sia saang inn khat ah an huan seam hi. Tubang innkuan sung pan a khangkhia kahikom ama taw (Mitt Romney) ka mu dan kibang ngawl hi. Nevada sung ah kitealna om ciang me (vote) theampo kisim siat hi. American ii Senator khat ka hi bangma ka state sung me (vote) a pia theampo ii kusasle (represent) khi hi. Kei me hong pia zong hong pia bua zong amate theampo ii kusale ka hi aa, amate theampo atu na ka seam tu hi. Kei mu daan sia tubang hi thong hi”

Governor Martinez, New Mexico in hibang son hi. “New Mexico state sung ah mihing tam mama sia a zawng sazian (poverty level) sung om hi. Ahihang tua mi zawngte zong mihing theampo taw akibang in thu nei hi.”

Representative Allen West, Florida in Fox news ah hibang in son hi. “Mitt Romney sia tawm thu nei vazul ngawl hi. Bang aci nopna tatak ziam phatak son kik le pha tu hi.” “Mitt Romney probably could have better explained himself,I think he was a little clumsy in doing this.”
(ABC News)

Mitt Romney ii thu sonna video a zaiku sia ki he ngawl ahihang internet tung ah a then, a vaihawmpi sia President lui Jimmy Carter ii tupa James Earl Carter ci in ki za hi. Mitt Romney in mezolna (campaign) ah Jimmy Carter President sep sung a thiam ngawlna, a sep khialna teng bebek taw Obama teengat ahikkom a lungkim ngawl aa, a pu atu phulam ci in kison vasup hi.

Mitt Romney ii zakhen 47% buaina na in November kitealna ah thu khen zo takpi tu ziam ci sia hi le November tha zawk ciang ki he sitset pheang vak.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,411 hits

A Lui Te

Live Trific

google-site-verification: googled172884ff34d55c0.html