Nikonghong

Home » Politic » Banghang Romney Na Lel Ziam?

Banghang Romney Na Lel Ziam?

2012 kitealna sung apat pan kipan en kik leang, Obama sia tha neam mama in ki mu phot hi. Kum 4 president a sep zawk ciang unemployment rate zakhen 8% bang om aa, US ii deficit tam mama, sipuazii zong upmawk bang in khangto vahuut ngawl, 2008 pan kipan Obamacare taw abuai sia 2012 theng aa, a term man kazu, zangh thei, kipan thei mama ngawl lai hi.

Mitt Romney ii din mun en leang tha lawp huai mama hi. Business man thiam mama khat hi aa, Republican ahihang blue state ci in aki ciamte Democrat state ahi Massachusetts pan hong ka to hitana democrat te zong taw ki tuiton thei tu ci in ki ngaisun phot hi. Ahihang US president suak nuam in kum 6 sung, 2 vei ahanciam zawk ciang zo ngawl hi, bang hang hi tu ziam? Jackie Kucinich le Paul Singer ii ngaisutna USA TODAY sung a at sia en tawng.

Ngam ii Sipuazi: Obama ii president a sep masak kum 3 le lang sung siipuazi kiam liang ngawl ahihang khangto vahuut ngawl hi. Ahihang, kum 4 cin nai ciang tawtawm hong khangto kik hi. Tua ahikom, Obama na asep mong zomh to le, khangto tu akipan sipuazi zong hoi zaw thei tu ci in ngam mi tam mama na um hi. Romney sia businessman thiam mama khat ahihang, khang tu akipan, Obama sepsa teng tawlnga siat in lampi thak in hong tawt pui le, koibang tatak suak tu ci sia ki son khol thei vaset ngawl ci in ngaisun uh hi.

State 50 om sung pan atam zaw sia blue state ahibuale, red state hi siat hi. Blue state ah Republican te bangzata ahanciam uh hang democrat te zo zo ngawl aa, tasia bangma red state ah Democrat te bangzata ahanciam uh hang Republican te zo zo ngawl hi. Red state le hi ngawl blue state le hi ngawl state pawl khat om hi. Tua state te sia swing state ki ci aa, swing state te sia state lian vavan hi ngawl ahihang, aki laklaw din mun ah ding uh ahikom swing state teng ii patpui tu sia thupi mama hi.

Swing state tam mama ii siipuazi le unemployment rate en kik in hi leang ngambup taw ettena hoi mama hi. ngambup siipuazii khang ngawl in unemployment tam mama ahihang swing state teng, atatuan in Colorado, Ohio, Virginia, Iowa ci te ah siipuazi hoi mama lel aa, unemployment rate zong zakhen 7% nuai hi siat hi. Tua ahikom swing state 8 bang a om sung pan a tam zaw na Obama hong teal aa, Mitt Romney ii lelna a piang sak thu khat hi. Tua swing state te ah Obama ii siipuazii taw kisai policy hoi ngawl hi ci a a-au hang tua state sung om mi te in a thuson te blind sa mama lel hi tuak hi.

Ohio state governor John Kasich na unemployment level Ohio sung zakhen 7% nuai a kiam suk sia Obama ii hanciamna hang zong hi tuan ngawl aa, state level sung nasepna hi lel hi ci hi. Ahihang Romney na Ohio mi te sung ah Obama hang in nasep nei ngawl tam mama hi, sipuazii hoi ngawl hi ci nasia tak a au vazak bek taw swing state Ohio ii mee nga zo ngawl hi. Ohio mi te in siipuazi le unemployment rate sang thu dang tuatuam kin zaw hi.

Romney ii hauna: President kidem ngei theampo sung ah Romney sia ahau bel hi ngawl hi. 2004 lai Democrat pan adding John Kerry, Massachusetts panma, bang Romney sang hau zaw lai hi, ahihang Bush a lel natu thu sung ah ama hauna ki son ngawl hi. Ahau hunlam zong ki he meal ngawl, ki son ngawl hi.

Ahihang Romney ii hauna sia mihing te in son pi in nei aa, news te zong in son vazak tawntung hi. Mihing hau mama ci in ki son mun lei ahikom middle class le, mizawng te in amate akin tu, amate atu a vei tu khat hi ci in mu ngawl zaw aa, lauku, kitaku aa, mainaap thei tatak ngawl hi. Tasia bek dom ngawl primary election sung Florida ah CNN taw interview vawt lai, “A zawng mama te atu thin toi bong, amate atu atatang om lel zam, pua tu aki sapna a om le pua tu khi zam” (I am not concerned about the very poor. We have a safety net there. If it needs repair, I’ll fix it.) ci liile hi.

Tuabek dom ngawl mihing nautaang ci in a mu te tung ah a ngaisutna taw kisai video aki zai ku “Mitt Romney and the 47%” zong na middle class le mizawng te tam mama Obama sang then zo hi.

Sum taw kisai mihing te ii muna ah a thiangtho thei ngawl thu dang khat sia a tax return hi. Obama pan kipan president seam ngei theampo in kum khat tax bangza pia ci sia suak sak siat hi. Ahihang Mitt Romney in 2010 le 2011 kum 2 bekma suak sak aa, tua ngawl kum dang aa khat zong ki he ngawl hi. Man zong man keak ngawl tha tu ahihang, mihing te ngaisutna ah president kidem sawm ahikom 2010 le 2011 tax hoitak pia hi lel tu ci in ngaisun hi. 2011 tax zong Obama na zakhen 20% pia ahihang Mitt Romney na zakhen 14% pia bek hi. Normal US citizen khat na zakhen 25% pan 35% ciang bang pia hi.

Tua ahikom, Democrat te in middle class le, a zawng te muna ah Romney sia “Out of touch rich guy” aki phasak, aki paupui thei ngawl mihaupa ci in musak zo hi.

Numei te: Numei te ii mee nga natu nasia tatak in hanciam hikale, numei te ii mee atam zaw Obama in nga vave hi. Numei theampo ii zakhen 55% Obama na nga aa, Romney na zakhen 43% bek nga hi.

Numei te ii mee atam zaw a nga ngawl sia Romney ii khialna bek hi le hi saam ngawl hi. Tunung hiat, Missouri state pan Republican senate tu akidem Todd Akin in numei te aki vawtsiat (rape), ciang naungil nga ngawl natu amate le amate ki vawt thei hi, ci thu taw kisai a thu sonna hang in, numei te tam mama na Republican party en san in tel khial hi. Tua zawk ciang Indiana state Senate akidem ahi, Republican pan Richard Mourdock na abortion taw kisai hibang in thu son laleo hi. “Vawtsiat (rape) hu in naungil a nga uh zong naungil vawt khuan (lalsak khuan) piak tu hi ngawl hi, banghangziam cile, tua naungil sia Pathian deina hi” (He said he opposed abortion even in cases of rape because God intended those pregnancies.) Hi te hu in numei tam mama ii me Republican te in a taisua suak hi. Pathian na numei te aki vawtsiat (rape) tu awi hi, numei te aki rape sia Pathian deina hi a ci nuam ni ziam ci in numei te tam mama thin uk uh hi.

Romney in hite 2 (Todd Akin le Richard Mourdock) ahitheiza neak ngawl in pial tawntung hi. Ahihang Republican te in numei te awlmawk ngawl hi, numei te zawngsak, thu don ngawl hi ci in Democrat te na nasia tatak son aa, numei tam mama in Romney le Republican sang pang ngam ngawl hi.

Hispanics khangno te le mi namdang te: Bene te, ahibuale Sahlone te ih nak Hispanics (Latinos) te zong in Romney sang pang ngawl hi. Hispanic mee theampo ii zakhen 69% Obama na nga aa, Romney in zakhen 29% bekma nga hi. Tuma kum 4 lai John McCain ii ngaza sang zong suuk zaw lai hi. Hi thu zong Republican te in ngaisutna khat a nei kik bua uh le, mikang zawk ciang atam kik bel Hispanic te taw atawntung akilem ngawl suak tu lau huai mama hi.

America sia minam tam mama om khopna ngam hi aa, mikang tam bel hi. Ahihang, Romney in mikang sung bekma nasia tatak seam, diang ci in minamdang te in ngaisun hi. A campainge photo te en leang zong minamdang om vet ngawl phial takpi aa, mikang te bek ki mu hi. Official language zong English le Spanish hi kasap, Romney na “I will make English the official language” ci vaset thong tana, Spanish kam pau te in Romney ii zaw tu lau mama aa, Florida sung a zaw ngawl zong Hispanic te hang hi tu ki um hi. Republican te ii fundraiser ahi Ana Navarro na hi bang ci hi. “Latinos were disillusioned with Barack Obama, but they are absolutely terrified by the idea of Mitt Romney,”

Romney in khangno te ii mee zong atam zaw tai sua hi. Khangno te in, Obama le Democrat idea taw ki uitui zaw aa, Republican te ii idea le ngaisutna te sia kawl te pau le khit-hmii sa ngawl hi.

Adang thu tuatuam zong om tu ahihang, hiteng sia Romney ii lelna a piangsak bul lian bel teng hi.

Thawngno

Doppha: USA Today

Advertisements

1 Comment

  1. singpu says:

    Hoih mah mah ei….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,411 hits

A Lui Te

Live Trific

google-site-verification: googled172884ff34d55c0.html