Nikonghong

Home » Biakna » American Saangmangte Thupha puak tu khamtung hong pai zia

American Saangmangte Thupha puak tu khamtung hong pai zia

Kamphenkik : E. Pau Za Kam

Tu hun ciang in ei bek hi ngawl in, Kawlngam buppi sung zong ah, Mangkam in a ki at laite sim theam napi a tel ngawl het sia a dim a haa in om kakoai ih hi ciang, lam khat pan in en leang, ki tonkim vaniau a, lungkim huai kik bilbel hi. Ahizong ih heak tu a kilawm a ki at laibu zong om kakoai napi in tel ngawl in ih om ciang, supna lianpi khat a kithuak suak a, “ciim ngengu a zawn, na a sa mama ” Theizang Tuang Khaw Mang bang vive kisuak siat thong hi. Ei Tedim ngam ah teang Tapidaw te in ih Saangmang te min ih law ciang, “Cope Topa” le khangno zaw hiat te in “Nelson” topa ci veu he bek a, Sizangte Tui hong phuum, Sizang ngam ah Khamtung ngam buppi Tapidaw Pawlpi a Piang Sak Masa bel ahi “Dr East” sia kuama in a ,min a law tu uh ci thada amate mama in a min zong za ngeingawl uh ahi ciang, – Saangmangte Rev Jonhon (Haka missionary) ih at le Dr East ama mama ih at a lai uh te anuai a bang in kam kong phen kik hi.

Khamtung Ngam Tapidaw Pawlpite (The Church in the Chin Hills)
shwezanArthur Carson le a zi Laura Haka khua a thet na thu:

Khalkha (Haka) ngamsung ukpi haat bel sia omna bi-inn 300 vaal aphaa Khalkha (Haka) khuapi ah, lo ki haal te ii khuu meikaai bang in a uap hun, March tha 15 ni 1899 kum in dui sung lo sung mei kuang kawm pan, American mihing nupa kop khat Khalkha khua hong theng litlut uh hi.

Auther Carson sia saang a zeen ama khut taw inn a dei bangpo a sa thei khut thiamna nei khat hi a, a zii Laura sia a thatang lian, a saa buang, maitui a ciamui uuk, nu taktaai mama khat hi a, a ithuai ngawl het te zong a it thei mama nupi khat hi. Amate nupa in Topa Jesu ih damsakna le suatak piakna mihing 250,000 te tung ah a puak tu in hong theng ahi uh hi. Zaangngam Zomi (Asho Chin) te mun ah kum tamma asep uh laitak in Khamtung ah acimaw tampi huuk tu om ci azak uhciang, ngimna, toina, liinna, patauna, tam ma thuak tu in Thayetmyo pan hong theng to uh hi.

Mualmong , mualpeang pan mual laingil sang neak vaial in hong pai uh ciang, a thin uh kiam mama hi. Banghang – Zo mite a mu uh ciang, bang thupha (gospel) in mihing hi bangte hu zo thong tu ziam? – puansil niikteen memeal nei ngawl hizata a nuntakna niambel lai te, bang peuma in huu zo thong tu ziam? ci uh hi. Ahizong amate ngeal ma kihanthawn a, Khalkha khua theng phot leang alamet huai zaw mi tumdang zong hong om tha tu zam ei, ci in ki thanuam sak uh hi. March tha ni 15 ni Khalkha khua a thet uh ciang, Mangkang ngalkap te 3 in vai muak a, nipi kaal tawm vei sung a omna tu in suangpheak cian buukno khat sung ah a om sak uh hi Hilai a om zawk uh ciang Khalkha te a ukpipa pan kipan a om theampo kibang siat in kidalna nei ngawl nguaktang in a om siat te a mu uh hi. Tua nitak in lupna zuan tu a kithoai uh ciang in, toi le toi si, thin le kiam mama si, Laura sia a kapsa in lupna zuan tu in a pai kawm in,” Bangbang peuma ka khan tawntung tu te taw om khawm thei peuma thong tu khi ziam? ci vangak hi. A pasal Arthur in “Tabang in pau heak aw- Khuazin hang bek zam, zingsang ciang khua hong vaak le a thanop huai, a lawp huai in ih kiim ih paam hong ki mu tu zam”, ci in ki heneam hi. “Laura- phawk pak aw – ih muitup. Kei thahatna hong pia Christ hu in naa theampo ka vawt siat thei hi.'” Tusia a thin sung uh ah kip tak in len lingleng in, a nuntakna uh piak tu in thin sung kiciamna taw lup mun a zuan uh hi. Christ atu Zo mite ka nuntakna ka luang-aisan in ka nga dong ka seam tu, ci in a thak in kiciam hi.

Tua hong thet khuavak ni zingsang, Carson Mangpa te nupa le Hupa Sya San Win, (kaziante) ii sep tu a pat uh sia India ngam le Kawlngam kilaklaw adal Mualpum ki thung suk sia adung avai te leang square tai 13,000 bang a zai sia sung a teang Zo mihing te ii Tapidaw ah a kiheak thei natu thu ahi hi. Tua Zomi te sia a bee te saksang Naga te banga mihing lutang vai in a nungta te ahi bua uh hi. Zong, ci zat nei ngawl mi ngoltol namte zong ahi bua uh hi.

Hi Zomi te sia laithiam pilna a nei ngawl, dangka zakna a he ngawl, a duu a dei uh te kilawm a sak uh bang in a kithelete hi a, a kampha zawhiat khakhat po in taang thau (flintlock gun) nei a, a dangte in thaltang le saili zangh in a nuntakna uh ki hung uh hi. Ei simleitung buppi “thiik zak hun – iron age” ci napi, Zomi te atu thiik sia, naam, tuman, hei ci teng hi bek. Zomi teenna Mual sia ngamdang taw kizopna lam om ngawl het hi tana, tu in Kum 1900 zawk kum 60 bang pha zo kazu Zo te zaagngam a khual haw uh ciang Kawl “Burma” ah ka pai tu uh ci ci lai a, tuak sia amate ngam hi ci in tuat ngawl hi.

Tapidaw Saangmangte ih sepna tangthu son tu ci leang, hun 4 kidoi thei hi.

  1. Tapidaw Pawlpi sungtum thak hun; hi hun sia Saangmante a theng phit te Carson te nupa te hun le Joseph Herbert Cope saangmangpa hong thet hun (1899-1908)
  2. Pawlpi adawn hong lawt te hun; Carson saangmang pa thi pan kipan 1924 kum ciang dong khawng (Pawlpi khanthin zawhiat te in amate tek ki khuangkho in ding)
  3. Pawlpite Tapidaw Nuntak le Kalsuan zia ki hil hun; Kum 1924 pan 1941 dong (Hi hun khakbel ciang Ngaalpi II na in saangmangte nasep bot tan (Hi hun sung ah Tapidaw Pawlpi sia Khamtung bup ah kizel kakoai tu in kipan).
  4. A thahat pawlpi veu suak; Kum 1942 pan kipan 1966 dong (tu ni dong) Hi hun sung in pawlpi sim pan in Pathian naseam tu in Khamtung ngam khuazingna mun teng ah thupha puak tu pai sak kakoai uh hi. Pawlpi ii tavuan lak tu a puicing in seam. Tasia za ma in Tapidaw biakna sang ah mihing tampi takma tum kakoai. Hi hun sung ma ah Zomi saangmang nasep tavuan a la thei tu zong kicing mama ahi bangma Ngamdang pan a kipuak Saangmang te tung pan a khut uh dawn uh hi.

Hi a tung ah hun 4 a lak te sung pan hun masabel No (1) na ah sia, Saangmang Rev. A. E. Carson le azii Laura ih lam a ziik kipatna hi a, Tapidaw ih sua phitna taw akizom teng kong khum bek tu hi. Ei Sizang te taw a kisai bel sia Rev. Dr. H E. East hi a, tasia zong ama ih Khuasak khua a 1906 Kum ah Pawlpi hong phuu sak dong ciang ih ngatu hi. (—–>page 2)

Pages: 1 2 3 4 5 6 7 8 9


1 Comment

  1. kt william dal says:

    pu thuam hang tapidaw sua kum , a ni a tha a he khat na nong he suak na taw hong za sak leu te maw.

    Lundam,
    KT William Dal
    USA ( 9209807304)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,411 hits

A Lui Te

Live Trific

google-site-verification: googled172884ff34d55c0.html