Nikonghong

Home » Leitung » Boston Bom taw kisai a heaknop huai thu pawl khat

Boston Bom taw kisai a heaknop huai thu pawl khat

April 15, 2013 ni Boston khuapi Maraton tai kidemna ah bom puak aa, mihing 4 thi, 170 vaal bang liam ci thu ih za tek siat zo hi. Bom a puak sak te 2 sung pan khat sia nipi khat sungma kaipui ten a kaplum in thi aa, adang khat ahi, a naupa zong ki man zo hi. Russia ngam pan Chechnya (Chenhen) minam te hi aa, a thi a Upa sia kum 26 pha hi. Aki man a nau zaw sia kum 19 pha aa, USA ngammi (citizen) hi.

Chechnya ngam le Chechen te taangthu atom
Chechnya sia Russia ngam huam, Russia kumpi sung om, ngam khat hi aa, minam min Chechen kina hi. Russia ngam ii thang sangbel hi aa, khamtung bangma mual tam mama ngammun hi. Georgia ngam taw ki ngamngi hi. Russia khut nuai om nuam ngawl ahikom, Russia taw kilem ngawl in kum tam mama aki sisim minam hi. 1824 le 1859 kum, Russia te taw ngaal nasia mama 2 vei kisim uh aa, ngaal lel ahikom, Russia empire khutnuai theng hi. 1917 kum, Russia ngam Bolshevik langdona (revolution) hong om ciang Chechnya le Ingushetia ngawm in Soviet Union ii ngam khat hong suak aa, Chechen-Ingushetia Soviet Socialist Republic ngam hong suak hi. Chechen te in, Soviet Russia khut nuai pan suakta tatak ngam khat in ding nuam ahikom, Russia kumpi te langpan in do thapai tawntung ahikom, Russia president Stalin hun, 1930 kiim lai Chechen te tul tam mama ki thatlum in, thong ah ki man hi. Ngaalpi 2 lai, Chechen te in Germany taw pawl in Russia do le, suatakna ki nga zo thatu ci in ngaisun ahikom, Germany te taw kipawl in Russia te sim uh hi. Tua ahikom 1944 kum February 22 nipan kipan, Stalin na Chechen minam te alom alom, ahon ahon in akhuala mama na mun ahi, Kazakhstan, Kyrgyzstan le Siberia ah arna zangh in nawn, pai sak hi. Chechen mihingsim ii zakhen 40% bang Chechnya ngam pan pusuak in mundang theng hi. Stalin ii, ngiimna pi sia, Chenchen minam te a identity bosak nuam hi. Chechen khua tam mama bo aa, ngamlim sung zong ah om sak nawn ngawl hi. 1956 kum Russia president Khrushchev hong ka kik ciang, kum 13 sung mun tatuam atheng te sung pan a thi ngawl, a nungta lai te dadam in Chechnya ngam ah hong cia kikik aa, Chechnya ngam ah a inn a lo uh zuan kik uh hi. Kum 13 sung bang a ngam a lei uh nusia zo ahikom, naa theampo athak suak kik aa, Russia ngam sung mun dang theampo sang zawng zaw in, haksatna tam mama thuak uh hi.

chechen

1991 kum ciang Soviet Union sung aki hel Republic ngam no 15 teng Russia khut nuai pan pusuak in kikhen tham aa, Soviet Union bo hi. Chechen te zong Dzhokhar Dudaev president in teal in Chechen Republic of Ichkeria ngam ding hi. (Note; Boston bom puak anaupa ii min Dzhokhar Tsamaev hi aa, first name kibang hi) Russia te in ngam no (Republic) 15 teng amate le amate a din tu a kal suan tua awi lel ahihang, Chechen president pa ii kal suan zia sia nasia sa lei aa, letkhan zo ngawl ahikom, 1994 kum ciang, Russia president Borris Yelsin na Chechnya ngam thak sitset sia sim hi. Kum 3 amate le amate a din zawk ciang Russia taw ki sim in First Chechen war ci in taangthu at te in ciamte hi. Russia ngaalkap te in Chechnya khuapi Grozny vanleang taw sim cip aa, leitung ah khuapi lian khat a nasiabel in kisimna hi ci in taangthu at te in ciamte hi. Chechen te atul atul kiim le paam ngam teng ah ngambeal tu in tai hi. Tam mama sia Europe ngam le USA ah refugees tu in theng hi. Chechen ngaalkap te in mualtung dui sung zuan in Russia te le do kik aa, tudong, tapung (rebel) suak uh hi. Chechen te in nasia tatak in sim kik ahikom Russia ngaalkap upmawk ngawl tam mama hong thi ciang, 1995 kum ciang kilemna (cease fire) vawt uh hi. A thu in ngaal man ahihang, thukimna tatak nga thei

Grozny Khuapi First Chechen War (1994-96)

Grozny Khuapi First Chechen War (1994-96)

ngawl ahikom, ki nasia sim ngawl bek aa, ki kaap vakek tawntung hi. Russia te ii missile taw Chechnya president pa hong thi aa, ki lem zo mama ngawl ahikom 1996 ciang kilemna (cease fire) thak khat vawt kik hi. A 2 vei cease fire pan Russia ngaalkap te Chechnya pan pusuak tu ki thukim uh hi. Chechen te in amate le amate ki uk thei tu hong kipan laleo hi. 1999 kum August tha ciang a ngampaam ngam no khat ahi, Dagestan te sim in laak hong sawm pai hi. Chechen te sia Muslim hi aa, a kiim a paam ngam no theampo la in Muslim ngam sua siat nuam ci thu hong ki cian vaial hi. Hong haat vaial le, Russia a nawngkai sak zo mama tu Muslim ngam khat suak tato tu ci mu khol ahikom, 1999 kum, October tha ciang, Russia president Boris Yeltsin le, prime minister Vladimir Putin lampuina taw Chechnya sim cip laleo hi. The second Chechen war ci in taangthu at te in ciamte hi. Second Chechen ngaal ah Chechen te 400,000 vaal ngamdang ah ngambeal seau tu in tai khia laleo uh hi. Ngaalkap tam mama thi zawk ciang 2000 kum ciang Chechen khuapi Grozny Russia te in nga in ngal zo hi.

2001 kum 9/11 hong pian ciang, Muslim terrorist te sim tu in USA le, Russia te nidang sang hong ki pawl thei zaw hi. 2002 kum Moscow khuapi ah Chechen terrorist te na, poai lakna Theatre lian mama khat la aa, poai en mihing 800 vaal dasakhan in man hi. Russia ngaalkap te na sim kik aa, terrorist 41 thi aa, poai en mihing 129 zong thi hi. Kum 2 zawk ciang, Christian khua khat ahi Beslan khua ah Chechen terrorist te na saangpatan te dasakhan in man laleo hi. Russia special ngaalkap te in sim aa, terrorist te avekpi thi siat hi. Mihing 385 thi aa, atam zaw saangpatang no te hi. mihing 1000 vaal liam hi. Russia ngam taangthu sung ah a khuangai mama ni khat in ki ciamte hi. Chechen terrorist te ii a khaakbel simna sia 2011 sung hi aa, Domodedovo international vanleang leen ah bom puak sak hi. Mihing 37 thi hi.

Boston bom vawt te unau taw kisai
KatherineApril 15, 2013 ni Boston Maraton tai kidemna ah bom puak aa, mihing 3 thi aa, tam mama liam hi. Kaipui te khat a zawk ciang bomb puak te unau taw kikap in thi ahikom, a thi avekpi 4 pha hi. Bom puak sak te 2 sia unau hi aa, Tamerlan Tsarnaev kum (26) le Dzhokhar Tsarnaev kum (19) hi. Russia Chechen minam te hi aa, a pa te sia America ah refugees in hong theng te hi. Tu laitak a pa sia Russia ngam ah om hi. A nau zaw Dzhokhar Tsarnaev sia USA citizen hi. A U zaw Tamerlan Tsarnaev sia kaipui te taw aki simna ah kaipui te na kaplum hi. Zi nei aa, American mikang te hi. A min sia Katherine Russell hi aa, a meal zong ahoi mama artist khat hi. A pa le a nu Christian thu um mama te hi aa, a pa sia Siavuan (doctor) hi.

Abosa khatvei lai in Katherine Rusell inn pan pusuak in Boston khua ah saang ka tu in pai hi. Kum tawm vei zawk ciang saang ka hong tawlnga aa, Muslim hong suak hi. A min zong Katherine Tsarnaeva ci in lai hi. Ama sia kum 24 pha aa, tu laitak a pa le a nu omna Rhode Island ah om hi. Muslim numei te bangma a lu puan vom taw siin tawntung hi. Ama a he a lawm a ngual te in Muslim biakna um mama hi ci in son hi. Ning kum a pasal Russia ngam cia aa, tha 6 sung taam hi. Tua hun sung, a pasal ii a ni taw thu son thei mama aa, Katherine Russell na Muslim biakna taw kisai thu hil kik zaw pumsai hi tuak hi. A nau zaw sia kaipui te na man aa, liam niknek ahikom, zoto ah ki koi hi. A liamna pan hong dam le, zum ah thu ki sit tu aa, thina dan dong ki pia thei tu in ki son hi.

TN

Dopha: ABC,   Geo Currents

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html