Nikonghong

Home » Sizang » Carey le Tuck ii hong son Sizang taangthu

Carey le Tuck ii hong son Sizang taangthu

British te in Khamtung hong lak zawk ciang, Bertram S. Carey (Assistant Commissioner, Burma, and Political Officer, Chin Hills) le H. N Tuck (Extra Assistant Commissioner, Burma, and Political Officer, Chin Hills) in Zo Mi te thu tataum le taangthu kan kakoai in “The Chin Hills” ci laibu 1896 ah at hi. Hi laibu sungah Sizang te ii taangthu zong tam mama na at hi. Amate 2 ii at Sizang taangthu sia man siat, dik siat, khialna om ngawl ki ci thei tuan ngawl ahihang, 1900 kum ma Sizang minam te taw kisai, taangthu a kiat laibu tam ngawl ahikom, tu hun khangkik Sizang te in ih heak tu kilawm vave ka sa hi.

Hi Sizang taangthu sia keima heak bang, ka tepte teng ka at hi ngawl aa, Carey le Tuck ii at, amate 2 ii at bang hi ci thu ih tel tek tu in kong hesak nuam hi.. Ka phuatawm hi ngawl aa, ka upmawk thu zong hi ngawl hi. Carey le Tuck ii at hi. A man ngawl, a dik ngawl a om le zong Carey le Tuck ii at babang hi. Khang taangthu taw kisai a at te tuhun, ei heak dan taw kibang kasak ngawl zong tam mama hi. Bangbangpo ahizong Carey le Tuck ii Sizang taangthu koibang na ciamte ci thu sim tek tawng. Ka at khial, ka phen khial a om le zong, original a sim ngeite in nong heaksak natu zong hesuak hong ngen nuam ing.

Min te laimal ngawm dan sia tuhun ih ngawm dan taw kibang ngawl ahikom, ka heak teng tuhun eima ngawm dan in ka lai hi.
Sontena: Twantak = Thuantak, Toklaing = Thuklai, No Man = Ngo Mang.

Min ka heak ngei ngawl pawl khat, lai at masa te 2 ii at babang ka lai bua hi.
Sontena: Kochim, Kuppow

Pawlkhat ka upmawk te bracket le ?? taw ka belap hi.
Sontena: Hangswum (Hang Sum??) Maunglyin (Mawng Liang??) “Biale” (Bial lei??) bracket sung sia keima upmawk hi.

Ka sonnop dang khat in, ih Sizang lai sia English taw tengatna laimal zawngkhaal mama lai ahikom, Carey le Tuck at bang lian phen kik tu sia haksa mama, piang thei tatak ngawl hi. Hitana, original khiakna a bo ngawl tu in ahithei babang ka at hi bek aa, translation (batapian) article tatak zong hi tuan ngawl hi.

Sizang pianna
Sizang te ii taangthu bang a son susuk thu in, Sizang pianna pu le pi sia vantung pan hong taak suk ci hi. Amate 2 sia Chin Adam le Eve hi aa, amate 2 ii Adam huan sia Ciim Nuai khua1 hi. Hi taangthu sia Sizang te atu a lamdang thuthak khat hi ngawl aa, Northern Chin Hills ah a teang minam theampo zong ii, son le upmawk thu khat hi.

Sukte pu le pi te in Ciim Nuai amasabel nusia in thang sang hong zuan, hong peamsuk hi. Tua ahikom thangsang azuan sukte a kici napan, Sukte min aki vaw hi. Sizang te zong Ciim Nuai nusia in pusuak aa, “Ci” ciktui luanna, sauna mun khat ii a zaang hong theng aa, tuak mun ah teang ahi-uh-kom, “Sizang” te ci in min ki vaw hi. Zaang ngam Kawl te in Sizang ci vaset thei ngawl ahikom, Siyin na hi. Sizang te sia “Thaute” ki ci aa, Lusei le Thang sang teang minam te in “Thaukte” na hi. “Thau” ii khiakna sia a haat valiap te, ngim a thuakzo mama te cina hi.

Sizang Ukpi masaphit
Neyan sia Ciim Nuai pan hi aa, Sizang minamte ii Pupi hi. Ama na abosa khang 13 hun lai a nungta hi aa, tapa 3 nei hi. Ne Nu (Nge Ngu), Vamlok (Vanglok) le Daitong hi. Hi unau 3 teng sia nisuana sang tai 12 bang a khuala na mun ah khua 2 saat aa, Limkhai le Thuantak khua hi.

Vanglok sia Limkhai, Thuklai le Buanman khuami teng ii pu hi aa, Ngengu sia, Sizang ih nak te ii pu ahi hi. Hitana Ngengu ii suan le paal te sia Thuantak te ci leang dikbel tha tu hi.

Vanglok na tapa 3 nei aa, Hansok, Thuklai le Limkhai hi. Hangsok na Tavak khua saat aa, Thuklai na Vumzaang khua saat hi. Limkhai in a om ngeina mun (Limkhai khua) ah om suak hi.

Ngengu in Lamhtam a kici tapa khat nei a, Ngengu le Daitong ii khua saatna ahi, Thuantak khua ah teang hi. Lamhtam ii tapa nobel, “Neyal” sia Thuantak khua pan peam aa, Khuasak khua saat hi. Khang 9 bang zawk ciang 1889 kum, Mikang te General Faunce khamtung la tu hong thet ciang, Thuantak khua sia Sizang te in nusia hi. Tuma khang 4 hun lai Khuasak te in Thangnuai khua saat hi.

Tuma khang 3 khawng hun lai, Khuasak khuami te, Kale Sawbua ii awina taw, Thaang mual ii nisuana sang ah hong teang aa, Mualnuam kin a hi. Ahihang, Buanman te in sim ahikom, Khuasak cia kik uh hi. 1884 kum Kuppow (Khup Pau) hun thet ciang, Khuasak Hangswum (Hang Sum??) na Thaang mual dung mun khat khua khat saat aa, Maunglyin (Mawng Liang??) ki na hi. Tua hun sung ma Vumtang na Pimpi le Laihan khua saat hi. Thuklai ii tupa Sumsel Ukpi hong sua ciang, muitom ah khua hong saat aa, tu ni Thuklai khua mun santak ahi hi. 1882 kum ciang “Biale” (Bial lei??) ci na mun ah khua ki saat hi.

Thuklai ii tapa Kimlai, Vumzang pan hong peam aa, Bunman khua saat hi. Bunman pan dadam min hong kilai aa, Buanman khua suak hi. 1885 kum, sunphuk natna hang, Do Lian sia Buanman pan Tartan ah peam aa, Tartan khua saat hi.

Limkhai te sia Vanglok ii khua saat masabelna mun ah, tu laitak Ukpi seampa ii a pu Lanmang (Lam Mang??) khang dong teang uh hi. Limkhai le, Buanman te lo ngi ki tuna pan, Limkhai te in a khua hong nusia aa, tu ni Limkhai khua omna mun, Ngatan lui ii thang sang ah hong peam uh aa, khua thak saat uh hi.

Tua khua sia, Limkhai ahibale Sakhi Liang kin a hi. General Faunce le Major Raikes in Northern Chin Hills la tu a tum hun lai, Sizang ngam sung ah a nuai aa khua 4 teng om hi.

1. Khuasak khua, Thuantak suan le innkuan
2. Thuklai, Thuklai suan le innkuan
3. Sakhi liang, Limkhai innkuan
4. Buanman, Kimlai innkuan

Atung aa khua 4 sim ngawl, No. 3 Stockade hui ah, Tuizang khua lui a om hi. Tuizang khua sia nidang hun in, Vaipe (Vaiphei) te tenna khua hi aa, a khua a lal ciang, taang lai Sizang le Sukte ngam pan sak sang zuan in a peam te omna zuito uh in peam uh hi.—>Next Page

Advertisements

Pages: 1 2 3 4


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html