Nikonghong

Home » Pilna » Sizang Diaspora le Diaspora Sizang

Sizang Diaspora le Diaspora Sizang

I. Thukonghong
Tu hun kumzalom 21 kipat hun sia sangmang mittang missiological view pan etna ah leitung Diaspora Mission hunin a kingaisun ahi hi Diaspora ci ciang in minam khat a teenna ngam pan paikhia in mundang ngamdang ah kithethaang siasua ci nopna hi ci leang kikhial buale kilawm hi. Exodus taw kibang tu bang khat ahihang, kibang tatak thei ngawl hi. Exodus in minam khat ngamdang mun khat ah pusuak khia in khualhaw siasua ci nopna hi a, diaspora ci ciangin, ngam puasang mun tuatuam ah kizel siasua ci nopna hi.

diaspora 2Tuni in simlei mun tuatuam ah Sizang u le nau ih kithethaang zeizoina thu in banghang tatak hibel tu ziam? Pathian deina bang om hi tu ziam? Ahibuale ngilpi khapkhat atu khualna le nuntakna nuamzaw ih zonna bekma ahi tu ziam? Tuni in leitung mun tuatuam ah ih diaspora-na sia leitungah lungdamna thu taangko tu in Pathian in hong puak hi ih ci thei natu ziam? Tubang ih ci thei le lungdamna thu taangko tu in Sizang mimal le community kipawlnate in tu ni in ih kinging tek zo ziam?

II. Diaspora Kipatna Koisung Pan Ziam?
Diaspora ci ciangin Jews mite taw kisai zawhiat in ih ngaisun hi. Egypt pan Jewish Exodus tungtawn in Canaan ngam ah Judaism hong piankhiat bangma, Canaan pan Jewish Diaspora ma taw leitungbup ah Christianity hong khangkhia ahi hi. Leitung Christianity pianzia ih et kik ciangin Christian mission paizia movement bulpi origin in Diaspora ii huzap atmosphere tungah kinga ci thu kimu thei hi.

Diaspora sia thu lamdangpi zongh ahi bua hi. Sizang mite in tu hun ciangin leitung mun tuatuam ah ih diaspora pheang kihi nave, leitung ngam tuatuam pan minamte diaspora zawk sia kum ngei zo zaw hi. Tua ahile minam tuatuamte diaspora sia Pathian ii deina om hi tu ziam? Minamte diaspora sungah Pathian in a ngam zaina tu naseam thei ziam, ci ngaisutna om ahi hi. A tungah ih sonsa bangma missiological muna sangmang mittang panin tu hun sia ‘Diaspora Christian Mission’ in kingaisun hi. Tua ahile Diaspora Sizang mite in ngamdang ah sangmang naseam a pai in ih kingaisun thei tu ziam? Tu laitak Sizang mite leitung mun tuatuam Malaysia, US, UK, Canada, Germany, Norway, Sweden, Denmark, Australia, New Zealand, Korea, Japan, etc., ci bang ngam teng ah ih diaspora laitak ahi hi. Sizang Diaspora sia bang hun tatak in kipan ahi tu ziam?

III. Sizang Diaspora Kipatna: Ngalkap Tumna
A taktak in ci leang, Sizang mite tu hun ciangin diaspora pheang ih hi bua hi. Nidang pekin ‘Mimbang pianna nunnuam Zaangsi Vangkhua’ nusia in Kawlngam, Vaingam ah diaspora zo ih hi nginge hi. Atatak in Sizang Diaspora sia ih teenna khamtung Sizang Ngam ‘Siyin Country’ hong kicina mun pan colonial hun lai Chin Hills Battalion sungah ngalkap tumna pan kipan zo ci leang kikhial ngawl tu hi. A masabel in Mikaangte khutnuai ah ih om zawk 1890s pan kipan ngalkap ih tum a, Mikaang ngalkap Chin Rifles min taw kumpinu’ naseam in ih om hi. [Queen Victory uk hun sung ahikom in kumpinu’ naseam kici hi]. Chin Hills Battalions ci in ngalhang in ih minthang vavang mama hi. Tua Chin Hills Battalions sungah Christianity sia Diaspora Sizang mite ii identity khat na hi zo hi. Chin Hills buppi sung pan Christian suak masabel minam ih hi bangma ngalkap sung zonghah dadam in Christian suak ngawl laite zongh hong convert tam mama hi. Tua hi a, ngalkap tumna taw Sizang Diaspora kipan bek hi ngawl, Christianity sungah ih khantona pi khat zongh hi nginge hi.

Chin Hills Battalions sungah Zomite biakna kikhat ngawl [Tapidaw, Lawki, Laipian, Bealtungmut] hikale, a nung ciangin Christian hi ngawlte in zongh a lawmte biakna hong zui uh a, Christian hong suak uh hi. Tua bangin Chin Hills Battalions ii identity sia Christianity na hi zo ci thei ahi hi. Battalion sungah thiampi chaplain nei zo ngawl lai bek uh a, [ngen le uh vei nei thei ma tu uh ve] khat le khat kilampui in biakna vawt uh a, khanlawna bang om ngei zo ahi hi. Sonteena. Ngalpi II zawk Shwebo bang ah khanlawna nasia tak piang ngei a, Topa Jesu hong pai kik tu hi zo ci thu om ahikom, naseam nawn ngawl uh a, duty tum nuam nawn ngawl thong uh a, court-martial taw hong cia bang zongh om ngei hi.

Colonial hun British uksung pan kipan colonial hun zawk Kawlngam le Vaingam suatakna nga hun sungte ah Zomi tangval cidam theampo phial ngalkap tum sia fashion pui khat ahi hi. Sizang sung zongh ah tapano theampo phial sia a tangval hun ciang ngalkap tum tu in kingaisun a, nuntakna nasep professional hoibel in kituat lian hi.

IV. Kawlkampau Diaspora Sizang Ngalkap Innkuante
Kawlngam suatak nga zawk post colonial hun ciangin zongh khamtung Sizang Ngam khua le tuitek pan Kawlngam ah Kawl ngalkap ih tum a, Kawlkam pau in tu ni dong Kawl ngalkap ngilo ‘Myanmar military juntas’ a kici te sungah a thu le a min in UN le leitung ngam tuatuamte munaah mingilo sazian sung kihel ih hi hi. Tua hun lai Kawlngam Diaspora Sizang ngalkap innkuan peuma in Zo kam pau thei nawn ngawlin Kawlkam bekma thiam vazal thong uh hi. Tusia zongh hunkhat lai Kawlngam ngalkap Diaspora Sizang mite ii identity khat ci thei phial tu ahi hi. Banghangin Zo kam pau thei nawn ngawl ziam cile, ngual sungah maizum huai sa hi lel tak hi. Kawlmi le Kawlkam bekma thupi sa in thupi mu lei uh hi. Ama ii minam, a kampau le a ngeina nomu zo ta hi. Tuni leitung ngam tuatuam ah Diaspora Sizang mite in na tate uh taw Zokam nong pau thiam tek lai na uh ziam? Ngual sungah maizumhuai po ih sa ziam?

Diaspora Sizang mi Kawl ngalkap tangval khat khuan [leave] hong cia ciangin, khua sang ngaknute sia na kilamen mama tek uh hi. Tuza in Diaspora Sizang ngalkap tangvalte popular uh hi. Ngalkap khuancia khat taw a kiteang tha ngaknu khat sia hampha kisa mama a, khuapui ngaknute in eang in haza mama uh hi. Tua Diaspora Sizang nupa thakte in Kawlngam ngalkap  NEXT PAGE —>

Paradigm

Paradigm

Pilna Laingil

Pilna laingil

thuam

Khristian pilna
Nung le Maa thu

education

Va bang pi ding
hanlungciam

Advertisements

Pages: 1 2 3


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html