Nikonghong

Home » Sizang » Pi Kham Ciang, Tapidaw Suak Masabel Zaangsi Lianu

Pi Kham Ciang, Tapidaw Suak Masabel Zaangsi Lianu

PI KHAM CIANG (70/20)
Innkuan thu:
Khuasak khua, Nge Ngu khang, That Lang suanh, Kun Tong tuu Khan Vum bawng pan Pu Zong Tuang le Vang Lok khang, Thuklai suanh, Suum Niang tuu, Suum Seal bawng pan Pi Ngiak Mang (127/20) te ii sung pan 1879 kum in Khuasak khua ah piang hi. Ama ii suapui laizom teng sia a nuai a bangh ahi hi.

1. Suang Lian
2. Khan Lian
3. Kham Ciang
4. Khup Niang
5. Lian Kim
6. Vum Kip
7. Neam Mang

Pi Kham Ciang sia a nolai pan kipan maitai in, ngaihbaang mama ahikom a it a ngai tam mama om hikale ama thinsung tawng pan in a suapuipa Pu Pau Suan (74/20) bekma it lingleng hi. Tasia hun lai in Sizang kual sung bupah mealheak khat sonngawl in khuapui khat ngangawn bangzapo kiit kale kiten tu ngeina om ngawl ahikom kuama kiteang ngam ngawl hi. Khuapui khat, mealheak khat nu le pa khialna vawt tha in naungil a om le zong a sua pociang a hingtangin kivawk a, tua mun sia tudong ‘Nauthanliang’ ci in kiciamte lai hi. Pu Thuan Tak khang pan simsuk khang 12 dong khuasung khat, bee khat phungkhat sung a kiteang ngam kuama om ngei ngawl lai a, khang 13 na vave ahi, Pi Kham Ciang le Pu Pau Suan ii kiitna sia kuama khenzawk tu hi nawn ngawl ahikom amate lawmta thu kumkhawm tawntung in, Pu le pa ii pat ngeingawl “Phungkhawm” pat tu hong ngaisun khawm bul uh a, a lawmpa Pu Pau Suan in a nuai a bangh in la khat na phuak hi.

-Ka tung ciang a, Khaimu laam vadial awng ee,
Phung taw tua khua na mu le hong hil in,
– Phung taw tua tu ngilthang va al saan leang a,
Kil lam zawl a, sawmsial sai bangh banleang ee.

kiteang tu hikale zong Khuasung thiampite khat zongh phuisam tu in nga zo ngawl a, a om ngei ngawl lai phungsung khat kiteen tu sia palsat in naseam ngam kuama om ngawl hi. A lawmpa Pu Pau Suan in ei le ei sep kultu ci sia mukhol ahikom duisungah pai in, Sanhkhia taw vacim a sia leh vakhu nupa le huhee nupa a kop vave in nga a, innah cia pui in phatak an vaak hi.

1st October, 1900 ni in a it mama a lawmpa Pu Pau Suan taw kiteang in, Sizang sungah a om ngei ngawl lai “Phungkhawm” hong pan khia hi. A kiteen ni in phuisam tu thiampi nga zo ngawl ahikom a lawmpa in vakhu nupa le huhee nupa te la in, a bitha nuai ah paipui in zu a phii zawk ciang a nuai aa bangh in phuisam in taam phuat hi.

“Vakhu awng, Huhee awng, no zongh unau kiteang a, simthing tung, taak thing tungah tanu toai, tapa toai thei a, ciidam thei, mulmaam thei nahi uh ciang, vakhu awng, huhee awng ko in no nung hong zuitu khu hi. No zongh ciidam mulmaam in simthing, zothing, taakthing tungah tapa tanu na toai kik tavun, na hin thiam tavun, na toai thiam tavun..” ci in phuisam in, a taamphuat zawkciang duisung ah a leang kik tu in, vacimte a inn pan tha hi.

Ama te nupa phungkhawm hong patna hangin a u a nau, khuapui tuipui theampo in ngaimaw mama a, thalup sawm in a thithei a bo thei natu bebek hanciam uh hi. Tasia ciang a pasal Pu Pau Suan in Tedim ah pai in Mangkang kumpi na tuu hi. Kumpite in thumaan thutak sangah a dinpui ciang kuama in susia ngam nawn ngawl hi. Pi Kham Ciang le Pu Pau Suante in tanu tapa 5 na nei hi.

1. Rev. Lian Zam
2. Thang Khua Kam
3. Vung Khua Cing
4. Tuang Khua Hau
5. Vai Khua Thang

A tapate Rev. Lian Zam leh Pa Vai Khua Thang te unau sia 23 November, 1926 ni in zi nei khawmsak a, a tate atu in nu vaipuak a zo mama ih pi ahi hi.

Tapidaw a suana
Pi Kham Ciang te nupa sia pu le pa pat ngei ngawl phungkhawm a patna hangin, kingaimaw tek mama a, khuapui tuipui te ii khutzung kaw na, cilphii phutsatna thuak bul uh hi. Tua ahikom a mate nupa in ih Sizang ngeina sia a phabel hi ngawl a, ki-itna om ngawl hi. Ki-itna taw a kikop Pathian dei ngeina om tu hi. Tua ngeina sung bangbangh theng thei tu ziam? Bangbangh in hi Sizang ngeina sia a maan, a pha suak thei tu ziam? ci in ngaisun bul uh hi. Tua hun laitak in Khuasak khua ah Saang sya seam kawm le lungdamna thuson thua khawm tu in, April 1904 hunsung teng Thra Shwe Zan hong theng hi. Thra Shwe Zan ii lungdamna thu a sonna tungtawn in Pi Kham Ciang te nupa in nasaang thei a, ngual theampo ii a ngaimawk laitak in a mate a it Pathian a om laina thu, Pathian in a mate maw nate a maisakna thu tel in a lung-uh dam mama a, 10 July, 1904 ni in Tapidaw nasuak uh hi. Tapidaw a sua a kipan ahi thei tawp in maa pang tawntung a, hun khat ciang Pu Pau Suan ii biakna sya a sep hunciang zong a panpui thei za in thalawptak in maa pang khawm tawntung hi. Haksatna namkim thuak in thinkiamna tu a nanam om kale thitawp dong Pathian atu le minam atu hangsan takin a dingtang ih pi ahi hi. 20 June, 1934 ni a ma piankum 60 a phak ciang tawntung pa kung hong zuat san hi. Ama hong nusiat ciang a pasal in a nuai a banghin la naphua hi.

– Maa bang patpui seen ka ngualkoai thalbang khomla thong ing nge
– Von min lawpui koaimang awng nge, tuumbang huaipui nuam ing nge

Vawtsiat a thuakna.
Pi Kham Ciangte nupa sia Phungkhawm a pat hangbek domngawl Tapidaw suak thua lai ahikom khuasung tuisung, mealheak ulenau in ngaimaw seseam huatsa seseam uh hi. Miphaak, mikiihuai in ngaisun uh a, khuasung ah teangsak nuam ngawl in Khuakhuan ah kiteang sak hi. Lawki ngeina sungah tualbawl hunciang khuapi sung sang teng daal taw a ki-umm hunciang Khuakhuan hawng sia daal ii puasia (Tualpua) khuapi puasia suak a, khuapi sungsangte taw ankuang zongh uumkhawm nawn ngawl uh hi. Tua hun in lawki ngeina sung omte doaiseam in daikai a om laitak a daikaina huang sungah. Tapidaw te ii nganno tum thale liau sak bekdomngawl suangpim, thingthelno khat a sungah lawntha le zong a doaisepna a bo theampo kheet nei ngawl in kiliau sak kik hi. Tasia bek dom ngawl in Tapidaw suak masate a vekpi in a thi natu, a bo natu veu in a kuama po in tomlaw in haamsiat nithi hi. Lo ante zongh kisuksiat sak in ngimnga thei mama hi. Ahizong a mate in “Topa awng a mate in nang hong he ngawl ahikom khial a hile tang ahi uh zongh he ngawl ahi uh ciang a mawna maisak in. Ni khat ni ciang nangma hong saangthei thu um mite hong sua natu na hong seam tan” ci in thungetna nei bul uh hi. 9th March, 1925 ni in Pi Kham Ciangte inn kihalsak a, kaangtum hi. A inn le lo dong ciang kisuksiat sak kale Pathian in thuakzawkna pia ahikom Tapidaw bokik ngawl in tuciang ih buppi in Tapidaw ih hisiat zo hi.

Belapnop thu
Pi Kham Ciang sia Tapidaw suak masabel bek domngawl in “Phungkhawm” a pan masabel lianu zongh hi. Tu hunciang mealheak, beekhat phungkhat, u nau… cibangh ki-it poleang ih kiteen thei vazingh nasia hunkhat lai ih haksatna theampo luangkhaam in a thuak masa ih Pi hang na hi nginge a, အခ်စ္သူရဲေကာင္း ka ci nuam hi. Amate ii ki-itna thukhat hangbek hi ngawl in, nausen tam mama kithatte khuangai huai a sakna uh le ih ngeina te a pha zaw a suak thei natu ngaisutna taw hangsantak in kal a suan-ngam Zaangsi lianu hi.

Heaktu: Pr. Lydia Cing Khawm Dim at “Thianmaang Toaisaang Zaangsi Lianu” laibu sung pan a kikaikhawm kik hi.

khaikam

Ngaal Lampui
Pu Khaikam

Carson and wife

The First Converts
In Chin Hill

Za Khup

Biography of
Pu Vum Ko Hau

Sizang taangthu

Carey le Tuck
ii hong son
Sizang taangthu

Advertisements

2 Comments

  1. KT William Dal says:

    It’s incredibly awesome story of our Siyin lady,Pi Kham Ciang and all credits to the author …

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html