Nikonghong

Home » Pilna » Khangkizom Khantona

Khangkizom Khantona

1. Na talent he masa in (Nangma le nangma kitel in)
Eima le eima pha tatak ih kitel tu sia thupi mama, tuabang phatak ih kitel ciang bekma mailam ah bangbangh in kalsuan tu ci sia phatak kingeal thei pheang hi. Eima le eima kitel ci ciang a pha a sia heaknate ih kitel bangma heak ngawlnate zongh pha tatak ih kitel mama tu kisamh hi.

khangkizom 3Miciim ih cite sia ama le ama pha tatak a kitel bangma midangte zongh pha tatak in tel ahikom ngual sungah a kihel ciangin midangte taw nuam takin kithua thei paih hi. Mipil a kici theampo miciim hi siat paih ngawl a miciim te sia pilna saangpi a nei bua zong ngual sungah ta mama hi.

Pathian hong piak pianpui pilna thiamna ciimna cite pha tatak in ih tel tu kisamh mama hi. Mihing khat sim in a tawmbel uukna khat kinei hamtang hi. Ih thiam thei saap nasep cite zongh kinei hi. Tuate in Pathian hong ngealsak ama ngam le a minthan natu ih sep natu talent te ahi hi. Leitung tawmvei ih nuntakna sungah ih thiam ih uuk nasep seamin nungta hi leang nuntak nuam mama tu ahi hi. Tuabangin eima talent tek phatak telin a nuntakpui paih te sia a sepna po a maapai a sep khial kisii kikna cite om ngawl a, a kiim a paam te zongh in nuntakna pha in nuntakpui paih tu uh hi.

Eima le eima kitel tu ih ci ciang ih thaa nuntakna zongh koisung dinmun ah om hi ziam, koisung tawntung nuntakna ah pai tu hi ziam cite zongh ih kitel sinsen tu kisamh hi. Pathian hesuakna taw Topa Jesu hangin upna le saanna taw ngupkhiatna ngana kitelna a nei takpi ma hiziam ci zongh kisittel tu kisamh hi. Ngupkhiatna ih nga, ih nei le zong kician tak tel tu hi a, a nei bualai lezong ih nga ngawl, ih nei ngawl hunlam ih kitel tu thupi mama hi. Tawntung nuntakna ci zongh mun nii om a, a nuamna ah tawntung nuntak theina le a haksa mama na ah nuntak tawntungna ahi hi. A koisia zaw tawntung nuntakna munah theng tu hi ziam ci sia ih kitel sinsen tu kisamh hi. Tuabangin pumpi ngaisutna le ih thaa dinmun pha tatak ih kitelcian zawkciang lampi maan tungah ih kalsuan thei tu a, tua lampi in khang kizom khantona ah hong mualsuak sak tu hi.

2. Mungtupna pha akician nei in
Eima talent tek ih heak zawkciang tua talent sia bangbang in tangtung sak tu ci sia pha tatak in ngeal tu hong kisamh hi. Tua Pathian hong piak na talent sia tu laitak na kiim na paam ah a minthang mite ii sep le uuk zongh hi ngawl tha tu hi. Na thiambel sep theina na nei sia zongh na nuntakna an neakna zongh na hi ngawl tha tu hi. Bangbangpo ahizong Pathian ii hong piak tua na nga pilna le na uukna te sia a manh nei ngawl tu in Pathian in ngeal ngawl het tu ahikom in tua talent te thupisak tu kisamh hi.

Na talent a phat thei natu in ngiimna lian nei masa in. Tua na ngiimna na taangtut thei natu in ngealna kician na nei kul hi. Tua ngealnate khatsim ah sep tu vawt tu tam mama hong om tu hi. Tua sep tu te a hun a hun in datham ngawlin sep kipan paih in. Haksatna zongh tam mama phul tha tu ni hi. Thinkiam ngawlin Pathian tung ko in phul veve in. Ngualzawna ci sia ol vazeang in hong piang ngawl tu a, tuabang haksa pi ma taw na nga tua ngualzawna in olno tak in bo kik tuan ngawl tu hi.

Na mungtupna sia Pathian hong piak na talent na zak thei natu ahi tu thupi a, nangma nuntakna le na uukbel teng zongh na sep natu ahi tu kisamh hi. Tua na mungtupna in Pathian ii dei bang nuntakna taw Pathian ii hong sawl itna taw tatkhiatna thupha (the great gospel) taangko in ama ngam le a minthan natu ahi tu zongh kisamh hi.

Tuabang in Pathian deina taw a kisi mungtupna pha a lian mama na nei zawkciang a nobel pan maa panin lampi maan tungah na kalsuan to ciang khang kizom khantona hong piang tu hi.

3. Nangma le nangma hanciam masa in
Pathian in nang bang atu hong dei ziam ci sia na kitelthiang zawkciang tua na talent ahi thiamna uukna khat sia hong phat thei natu in nangma hi thei babangin kipan a hanciam in. Mihing khat ngualzawna a nga natu a thupi masabel sia ama mama ahi hi. Ngual dang khat ii hong hanciam sakna taw eima ngualzawna piang thei ngawl hi. Haksatna ih ci sia mun theampo ah a na om hi lel a hangsan takin ih phul tu ahi hi.

Na talent ahi Pathian hong piak aituam pilna, thiamna in nangma khan sung na mungtup hong suak le na sep na vawt po nuam na sa tu a, haksatnate zongh na kantan zo tu hi. Mihing ih ci sia a thupi ahibuazong eima uuk le kin khat seam leang nuam kisa mama a, toi le kiphawk ngawl eima tumtak nuam a kisa thei mama nuntakna neite ih hi hi. Tua na uuk na thiamnate sia Pathian hong piak talent te ahi hi.

Tua talent na nei sa sia hong kilangh thei natu in ngealna pha tatak nei tu kisamh hi. Mungtupna (goal) a lian mama na nei tu kisamh a, tua goal ah na thet thei natu in na tot tu lampite kician tak nei in na tot tu dan ngealna kitel takin na nei tu kisamh hi. Tua lampi ah na kalsuan ciang bang hunin bang seam tu bangbang in ngamta tu bang hun ciang bang ciaciang theng tu a, kum bangza sung bang suak tu cisia a kician sinsen in roadmap na nei tu kisamh hi. A lian mama ngealna nei in a, mapat in a nobel pan kipan seamto ciuteu paih in (Think Global Act Local). Na ngealnate a taangtut thei natu in nangma in na patphot ngawlin kuama in hong patsak thei ngawl a, zongh hong hu thei ngawl tuhi.

Na hun nai khat simin bangbang zangh tu ci sia ngealna nei in. Na lian mama khat na vawt thei natu a kisamh na no mama te panin kipat kul a, thinkiam ngawlin khat zawkciang khat seamto ciuteu in.

Tuabang in tupna lian na neina le na hanciamnate in khang kizom khantona piangsak a, Pathian in hong lungkimpui ahikom koithong ngawlin hong hu tu mite hong ngealsak tu hi.

khangkizom 24. Hong kipanpuinate lungdam takin saang in
Leitung mi in ih pian zawkciang eima nguak deina bangin kikalsuan thei ngawl hi. Mihingte nganhingte sia social being te ih hi hi. Society sung khat le khat ih kipanpui vadiam tu kisamh a, thaneamnate ahizong thahatnate ahizong ih thuak khop tu ahi hi.

Khat le khat kipanpui ci sia a tawmbel lametna khat tek kinei a, tua lametna in khat papo ii phattuam noptuam natu ahi hi. Ih nasepna in phattuamna a piangsak buale kuama in hong panpui ngawl tu hi. Kiim le paam in thinbot in hong panpui le na nasep na vawtnate hong lungkimpui hi a, tuabang in hong kipanpui ciang ih lungdam mama tu le lungkim takin hong kipanpui nate ih saan tu ahi hi. Hong panpuite in lametna lian mama nei ahi bangma nasia takin ih hanciam tu ahi hi.

Hanciam ih ci ciang pumpi, thin (ngaisutna) le thaa bukim in hanciam tu ahi hi. Pathian taw ih kizopnate zongh a kipzaw a khozaw tu kisamh a, pumpi taksa mama zongh ciidam tu discipline pha nei tu cite zongh a kisamh mamate hi a, ih kidop tu le kipua tute zongh ahi uh hi. Ih ngaisutna sung mama zongh ah ih talent ih goal sia mu tan, phawk tan, ih ngaisut tan tu kisamh hi. Thin sung panin ih nasep tute ih taangtut ciang bangbang in zeak tu nuntakpui tu cite ngeal kholin sunmang in mat tawntung tu kisamh hi.

Tuabangin eima hanciamnate kiim le paam te ii tha hong piak, hong panpuina le Pathian Thaa Thiangtho ii lam hong laknate phawk tawntungin, thinkiam ngawlin thungen a, haksat nate ih kantan ciang khang kizom khantona hong piang tu hi.

5. Midangte panpui in
Hi leitung ah eima nguak ih nuntak tu piang thei ngawl a, khat le khat itna deisakna taw in ih kipanpui tu kisamh hi. Nangma ngualzawna na nga natu in Pathian tungah midangte in thu hong ngetsak ahi hi. Tua bangma in ei zongh midangte atu thu ih ngetsak tu kisamh hi. Thu le la taw ih hu thei tute thu le la taw ih panpui tu hi a, sum le paai taw ih panpui zawk tute deisakna le itna taw in ih panpui tu ahi hi.

Panpui ci ciang bangbang in kalsuan tu ci pan kipan ngaisut piakna ahizong, a thinkiam ni ciang tha piak tu le a ngualzaw ni ciang lungdam pui tu kisamh hi. Na theampo ah khatvei panpuina taw ngualzawna nga thei paih ngawl a, panpui kikik tu kisamh hi. Ih panpuite haksatna a thuak ciang ih thuak pui tu kisamh a, thinkiam ngawl natu in tha piak tu zongh kisamh hi.

Midangte ih panpui ciang eima deina bang hong hi siat thei ngawl tu a, khat le khat kitelthiam tu kisamh mama hi. Asia a pha kupkhop tu thupi a, ngual lelna khat hong om le zong, a hang pha tak kan tu a, maaban tu kikumin ngeal tu zongh kisamh hi. Khat le khat kikaal kitel khialna a om ngawl natu ih kizop nate a thiang takin a kitel tu thupi hi.

Tuabangin khat le khat khang khat pan khang khat thupha taw kipanpui a, maa ih pan khop tak ciang Pathian in etlawm sa in phasa ahikom supna patauna ze-etna taw a kithua ngawl, vantung pan hong pai ama thupha taw hong tuamin a bothei nawn ngawl khang kizom khantona hong ngasak tu hi.

Midangte khanto natu a seam kik te bekma mi khangto takpite hi uh a miman nei le mi thupite ahi uh hi.

Pumsuanhang Suantak

Heaktu: SCC Magazine 2012 sungpan a kilakik hi.

my logo

Ngual Inn Na
Haw Ciang

arlu 2

Arlu Tui le
Cidamna

thuam

Chriatian Pilna
Nung le Maa Thu

oil_prices

Datsu Manh Taw
Kisai Thu Pawl Khat

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,424 hits

A Lui Te

Live Trific

google-site-verification: googled172884ff34d55c0.html