Nikonghong

Home » Pilna » Lampuidan & Nasep Ngealzia

Lampuidan & Nasep Ngealzia

leadershipLampui ih ci sia, mihing pawlkhat taw maapang khawm a, nasepnate maa tun tu in, dinmun a late ahi hi. Na a sep pui tu mi nei a, tua mite ii nasep theidan (a kivakna) le, a kivaknate telpui in, a zak thiam thei tu sia, a vaipuak ahi hi.

Lampui ih ci sia, Manager zongh kici thei a, Management (စီမံခန္႔ခြဲမႈ) ih ci sia, midangte zanghin nasepna ahi hi. Nasep thupi khat peuma kuama in ama nguak seam ngei ngawl hi. Vantung thu zongh eima nguak kiseam thei ngawl hi. Mihing tam thethei ii maapan thei natu ngaisun a, sepkhop tek tu hanciamna in, lampui kician khat ii dinmun ahi hi.

Hi bang a, (စီမံခန္႔ခြဲမႈ) ngeal thiamna sia kuama a thiamsa in piang ngawl hi. Sin kawmin ngeal thathua tu ahi hi. Laibu sung ih sim bek taw a thiamzo kuama om ngawl hi. Ngealthiamna ih ci sia a thupi mama hi a, nasep a lang a zo sa taw kibang hi, ci liang uh hi. Mi pawlkhat in ngeal tengtong kul bo, Thaa Thiangtho lamlakna babang ci uh hi. Hi thu taw kisai, sin tu thu nam (4) om a, anuai a teng hi.

I. Planningx (စီမံကိန္း)
II. Leading (ေခါင္းေဆာင္မႈ)
III. Oragnizing (စည္းရံုးမႈ)
IV. Controlling (ႀကီးၾကပ္ကြပ္ကဲမႈ)

PlanningI. PLANNING:
Na ih sep tu khat sia, bangbang in pan tu a, bangbang zom tu, le bangbang in maa tun thei tu, ci thute ngaisut kholna ahi hi. Ngaisun khol sese ngawlin maisuak po sep ngawp tu hi ngawl hi. Maisuak po ih sep ngawp thathong ciang nasepna maaban om thei ngawl a, dathamna piangsak hi. Ngealkholna phatak in a neite ahile, sepzom tu om a, sepdan tu zongh kitel tato in, naseamte atu in hong thanuam sak hi.

(a) Kinginkholna: Hong pai tu hun sungah thupiang thei tu te, (Haksatna & Buaina) ngaisun khol a, ngaisutna pha hong pia thei tute thu dongh in, nasep tuzia kingin kholna ahi hi. A kisamh tu thu le late kaikhawm khol tu a, kingin kholna nei tu hi.

(b) Tupna le pualaakna: Ih nasep nop sia bang hi a, bang ciang dong seam tu, bangciang haksatna om thei tu, ci thute sonkhol tu hi. Ngiimna le phutuunna bangma om ngawlin, thaukap thong leang, bangma ih kha buatu hi. Stn. Nehemiah in Jerusalem luphung a cian kik nopnathu, pualaaksiat hi.

(c) Programme Ngealna: Ih ngealna sateng a tangtutthei natu in, bangbang seam tu a, bang hunciang kipan tu, a bang teng seam masa phit tu, cite ngualsuk diudeu siat tu hi.

(d) Vanh kisamh teng kaikhopna: Vanh bang teng kisamh tu a, sum bangza ciang bang kul tu le mihing bangza bang kisamh tu cite, kaikhawm in kinging khol tu hi.

II. LEADING:
leading(a) Thukhensatna neipui na: Lampui khat in a mite taw a kisamh bangin meeting vawt tu a, thu khensatna nei pui tawntung tu kisamh hi. Thu khensat tu ci ciang, khensat paih leang phazaw maw, diazii lai leang phazaw maw, cite zongh ngaisut thiam tu kisamh hi. Thu khat papo ih khensat tu ciang phazaw tu maw, sia zaw tu, cite khaitee thiam tu kisamh hi.

(b) Kitel thiamna: Lampui khat in a mite tungah thu le la omdan a kipan ih ngaisutnate, ih telsak vazek tu kisamh hi. Kitelthiamna (နားလည္မႈ) a omkhawm buale, nasep khop tu haksa hi. Hi kitelthiamna tungtawn in, mipite in thangana le thanopna nga thei pheang hi.

(c) Thalawpsakna: Lampuite in sep tu le vawt tu in ih khensat sate, thanuam takin pan paih tu a, ih mite thalawp sua tu hi. Midangte thalawp suana in lampui pha hina kilakna ahi hi. Thalawpna in zawna hi a, dathamna in lelna ahi hi.

(d) Ami lea nasep: Ih mite ii kivakna telsak tu a, a nasep mun tu pia tu hi. ( လူမွန္ေနရာမွန္ ) A mihing le a nasep a maan in koi thei ngawlna in, supna lianbel hi. Ama kivakna le a panmun a kisi bua tha le zong a mun laih sak tu hi. A lawcing thei natu in lampi zonsak tu hi.

Work flow process people cycle recycle arrowsIII. ORGANIZING:
Naseam thei tu mihing kaikhopna in, lampuite nasep hi a, amate kivakna taw kizui in sepsakna in, kipawlna ii khantona ahi hi. Ama zongh in innteak thin nei paih a, nasepna ah zongh nuamsa paih hi.

(a) Sepkhop tuzia ngual masa: Nasep tu ngealna om bangin, ngualsuk khol tu a, nasep tu zia zongh, ngualsuk kholsa in koi tu hi. Mite tungah son in pualaak tu a, sep tu zia a telthiang mateng thinsau takin, sonkik hilh kiktu hi.

(b) Nasep kihop sawnna: Nasep tu te khen in, kihop sawnna in a thupibel maa tutna ahi hi. Mun khat ah sepkhopna sia, ih tha kisuun ahikom nasep kingaih thei ngawl a, supna piangsak hi. Hi mun ah thu nam thum sin tu om hi.

i. Vaipuakki aapna.
ii. Thuneinate kipiakna.
iii. Ih piak vaipuakte vilkikna.

(c) Kitelthiam khopna: Lampui sia le a mite a kitelthiam tawntung tu kisamh mama hi. Kitelkhialna a om ciang ih thin kiheen ahikom nasepna maa vang thei ngawl a, supna piangsak hi. Ki telkhialna a om tha le zong, kiphisian papaih tu a, kimaisak papaih tu kisamh hi.

ManagementIV. CONTROLLING:
Lampui sia in, a naseppuite ii nasepnate et pui tawntung tu a, ama thunei na nuai ah a koi tawntung tu kisamh hi. Et pui ciciang encik/a khial natu encik hi ngawl a, a khial tha le, lamlak tu, hilh tu, a maan sia paipui tu, ci nopna hi.

(a) A nasep tuteng lakin, hilh tu: Nasep kipat maa in, nasep nopna teng pualaak tu a, bangbang dan kipan tu, bangbang dan seam tu, cite sonkhol hilh khol tu hi.

(b) A maabante etsak tu: Vaipuak ih piak siat zawkciang nusia cip ngawl tu a, a hun en in, vik kik vazek tu hi. Ih piak nasepnate man ziam, man ngawl ziam, zo maw, lei cite vil kikiktu hi.

(c) Vaipuakpiakkikna: Amate sep thei dan taw kizui in, ih piak vaipuak, nasepte a zaw ciang, pok in, thapiakna nei tu a, a dang nasepnate pia thua kik tu hi. Nasepnate tentan hun zongh omsak tu a, patoai tu a omle zong, patoaina hun zongh omsak vazek tu hi.

(d) Anasepnate puaphakik: A nasepna munah a sepkhial (or) a kisamh bangteng omziam ci in, sittel tu a, a khial tha le a khialna teng puapha sakkik tu hi. Awngam aw talok zangh ngawlin, a khialnate pualaak thiam thei leang, phabel hi. A phazaw tu hilh tu a, eima ih hilh thei buale, a hilh thei tute thacial tu hi. A kisamh a omle zong thua in belap kiktu hi.

Thukhupna:
Hi a tung a thu 4 teng sia, (PLOC) a kikhaikim in zak tu ahi hi. A kikhaikim in, ih zangh thei bua ahile nasepnate ah lawcing thei ngawl tu hi. Pawlkhat in thuneina mun khawng bek ah seam nuam uh a, power zak theina santak khawng bek ah thahat sak in, a dangte thaneam ahikom tua kipawlkhop nasepna sia, suplaw hi.

Ih naseppui ih mite a thanop thei tu thupi mama hi. A thanop thei natu in, tawlngak hun, thapiak hun, patoai hun, ci bang vawtpui thei leang phabel hi. Lampui thiamkhat na suak nuam le,

i. Tatsat ngawlin Topa taw kizom in.
ii. Na thin sausak in. (Na thin-uukna kitel sak heak in.)
iii. Kiniamkhiak tawntung in.
iv. Ngual mawna maisak tawntung in.

Tua hile Topa zak thei lampui kician khat nasuak tu a, na innkuan a kipan, na Pawlpi, na minam le, ngam le lei khantona hong piang tu hi.

parabook

Ngual piak Min le Eima Min

YSBC

YSBC Pianna Teptena thu

literature

Sizang Lai Kum 120 Cing

Liannu2

Zaangsi Liannu

Heaktu: Khuavak SRBA Annual magazine No. 8 sungpan a kilakik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,048 hits

A Lui Te

Live Trific

google-site-verification: googled172884ff34d55c0.html