Nikonghong

Home » Sizang » Etlawm Ngamkuam Zaangsi Ngam Nuam

Etlawm Ngamkuam Zaangsi Ngam Nuam

Dr. Vum Ko Hau in leitung mun theampo ka pai siat a, eima teenna Sizang sung khuahun sangin a nuamzaw leitung ah mu bong ci hi. Khallai in lumleih saleih ngawl a, phalbi ciangin zongh vot leih ngawl hi. Tuk hun ciangin ngua zuk zawk po ciang van thiang sitset paih a, meeikai neamnuum ci bang om ngeingawl hi.

Tua hi a, March tha hong det ciang vantung ah meikhu hong zaam in Tan 10 laivuan tu hong phawksak hi. Lei niamna theampo ah the hong khuang a, ngei mama a lum nuamte kilumthei nawn ngawlin hong phawng hi. Zankhua peangpelep khuangin anciin thei natu lo hoai khol vun hong ci hi. Mun niamna te pan baaksaipakok hong haam a, zanhun a mut suak ngawlte cimh hong phawng hi. Lono sungah simbu a lian a no hong ham valiat a, ih ngamkhin hong nuamtuam sak hi. Thuangthi le paangpaak omna theampo ah vangeak ngamlum mama a, lothaw toi vangau ciangin toi hong thaisak tuam hi. Nitak nitum kuan ciangin ngalvahoi hong ham a, vangia ngai nuamte hong to thongsak nawn ngawl hi. Lui kawm luam kawm theampo vaau hong paak niikneak a, lono na te ah ngaingaw hong paak niikneak ciang, ih pu ih pa ngam itna hong khangsak a, ih thin hong nuamsak hi. Longam sungah sanleih, tei, suangkua hong paakin namtui peuma ahikom in ih ngilkial hong nuamtuam sak hi. Ciang, lei niamnate ah simh paak hong paak a, namtui mama in khuaitui nam vahiau tana ih thin hong nuamsak hi. Khua lum hun hi tana lothaw kipan ngawl lai ih hikom in savai uukte sa kivai a, ngasa vai uukte ngasa kivai a, ih long hong thaksak ngawl hi. Topa Jesus thawkik poai vawt natu sa kivai hamtang a, tangvalte le pasal khanglai te nop tung mama hi. Ngamkaang vazak kimu bul a, tuabang ciangin ngamhal te pawl Topa in a ngamhal bangin Hell thengsak thong le ci in thabo te hong laina sak hi.

Ankhum meangte, tei, sanleih meangte hong puitungin ngua hong zu a, thai kitu kheukho in, anno kisuan kheukho in, kidiang siasua hi. June tha hong bo kuan a, lo theampo anno in lei hong tuam tak ciang ih thinsung hong no suak hi. Ngua hong zuzuk ciangin annote hong puitung vaial a, ngamsung teng ah huhee hong kuul valiat in khutuun khuthek te hong haam siasua ciangin’ antun tu kaal hong ngakla sak hi. Kiite ngittate hong haam a, hong leen siasua ciangin, losung bekma ih thin hong om a, inn zongh hong ciasak nuam ngawl liang hi. Vaimim hong ngau in tangmaai hong nga ciangin lohung ngaknute kung ih thin sungah hong ngaisunsak vadal hi. Tu hun ciangin bokbawn lo in meekha kilo a, bokbawn manh le meekha manh bebek in hong buaisak zo liang hi. Ih thawsa thingnga antee zuakin Kawl kipai kheukho a, Thaangmual lamkaa le khua kilaklaw mawtaw kito hi tana lamkhom teakin thu um mama bang phetin thungen ki hat peuma tek a, lam khat pan Pathian phawna hi bilbel hi. Vaimim, taangziik tun luangin meenga, meetee kitungin kizuak a, zo an ne kuama om nawn ngawl hi. Sepdan kilamdang neakdan kilamdang ta hi. Vaimim le taangziik ciin hun lai sia zawng hung, kii hungin kibuai hi, tu hun ciangin tuate om nawn ngawl hi. Duisung vak leang akno paak, tapin paak, ngualtamh paakte paak niuniau in namtui peuma a, ngam itna hong khangsak mama hi. Etna theampo hing silsial a, ngua zuzu si taw hong cimhsak mama ngawl hi. Sakhite zongh ngamkhing kisa in hong hawk vaduak a, ngam uite zongh mut Ian khawng hong au keak ciangin khat vevei ih khuasik mul po hong suak thei hi. Losung khawngah talawk hong tau vangeau a, zingsang khawng va-ak po hong ham vaduak ciang thi tu po hong patau sak thei hi.

Nguatui hong tawm vaial in khua hong sik vahiau leleau ciangin lo sung sia ngamkhing a, vaphit taw a kibang vacim no khat veu haam valiai lai bek hi. Losung kinusia a, lungzuan huai ngeungo hi. Mual dawn tengah heisok hong paak niuniau in lei niamnate ah phuitong hong paak niuniau ciang in khuasik taw kipawlin, ih thin sung ih khuangaisutna hong thak suaksak peuma hi. Phuitong paak bawm vacim namcinte in hong vawtpa Pathian hong pawpawk sak nuam hi. Lei saangna mun taam sung tengah thingtung paak hong paak a, khangno theampo paak zong tu in nguai an pua in hong kuan kheukho ciangin Pathian hong piak thupha a tatuam ih ngam sungah hong omsak hu in ama tungah lungdamko nopna hong khangsak hi. Thingtungpaak zuakin TV, Motor Cycle lei in khua sung lam theampo ah Cycle thum kiza, inn sim T.V nging ih zaak tak ciangin Pathian thupha hong piakte hong sim kik sasak nuam hi. Khangnote zan hong vak a, Jesus suana la hong sak ciangin vantung ngam nuam hong lungngulh sak tuam hi.

Tua hi a, Tuan a Pupa mim bang ih pianna Zaangsi ih ngam sia, Leilu Leitaw ka theng a, ka om zongh in mangilh thei tu ki um bong Ngualngam ngual lei ah inn nuam taw ka teang a, mawtaw tung to in ka vak vakiau zongh in ih Zaangsi sau nuam le ih pethik mawtaw tuanglam mangilh ngei tu ki um bong Israel mite Pathian in a ngam uh tawlngakna pia in Babylon, Syria, Egypt ngamte ah a teensak phot bangin ngam tatuam ah ih kithethaang phot hangin nikhat ni ciang ih ngam ih lei ma hong zuan nuam tek tu in hong lamen ing. Bangza ta a it huai Topa hong piak ih ngam hi thong ziam.

Heaktu: SCC magazine No. 5 sungpan a kila kik hi

taingen

Taingen Laisin
Saanginn thu

hill

A Visit to Muannuam

amish2

Amish Te Omna Pennsylvania

ankam

Ngam Ankam

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,179 hits

A Lui Te

Live Trific

google-site-verification: googled172884ff34d55c0.html