Nikonghong

Home » Business » Cash Ahibale Credit le Debit Card Ih Zak Ciang

Cash Ahibale Credit le Debit Card Ih Zak Ciang

Tuhun a tatuan in a khangto nasa ngamah vanh lei ciang sumtang (cash) in kipia thei aa, debit card (bank card) ahibale, credit card taw zong kipia thei hi. Cash taw ahizong, debit card ahizong, credit card ahizong, ih zak ciang a phatna le a phat ngawlna tatuam om hi.

Sumtang Cash
Sumtang taw ih lei ciang, khat vavei vanh manh ol zaw thei hi. Sontena, datsi sai ah datsi ih lei tu ciang debit le credit card taw na lei saang sumtang taw lei leang datsi manh ol zaw hi. Ahang sia datsi sai te na card company te commission manh piak kul ngawl ahikom hi. Cash zakna ii phatna dang khat sia, ih sum neiza taw bek kilei thei ahikom, a kisam tatak ngawl kilei ngawl pai aa, eima le eima ki-control thei suak hi. Sai theampo ah card taw kilei thei himakale, sumtang (cash) in lei lete, sai zuakte na card company taw vai nei nawn ngawl tu ahikom dik sa zaw hi. Hitana, sumtang taw vanh na lei sawm le vanh manh kisit, kikhiam sak thei ci thu mangil batawng.

Cash taw vanh lei ciang a dik ngawl khat sia hong kilo kik sum neen tam mama ih kep kul aa, pya khat, pya sawm tang tam mama hong kicim to hi. A dik ngawlna dang khat sia ih sum bawm ih bosua le ih sum neisa theampo abo suak pai hi.

Credit Card
Cradit card le debit card sia en khawm leang kibang liinlian ahihang a nasep dan kibang vet ngawl hi. Debit card taw sia bank ATM set pan sum kithuk thei ahikom, ATM card zong kina hi. Credit card le Debit card ii kilamdan belna sia, a sum koisung pan pusuak ci thu ahi hi. Debit card taw ih lei ciang bank ah ih neisa sum sung pan pusuak aa, na bank sung sum a om hamtang tu kisam hi. Credit card taw na lei ciang leiba taw a kilei suak aa, Credit card company tungtawn leiba a kilo kik suak hi.

credit-cardCredit card taw lei ciang sum nei pai zong kisam ngawl aa, letmat thu le te kilei thei pai ahikom ol mama hi. Ahihang, ol leiliang ahikom, le-lei thaleang ih lo kik tu hun ciang ol ngawl bek dom ngawl, a meet tam mama ih piak kul ci thu ih phawk nginge kul hi. Credit card taw vanh na lei ciang, vanh khat a lei ci in na kingaisut saang Credit card company tung pan sum puuk nga ci in kituat lele hoi zaw hi.

Credit card taw ih lei ciang, a meet a tam tule a tawm tu sia nangma tungah kinga hi. Na muan kiteptena (credit score) a hoi le hoi ngawl tung kinga hi. Credit score ciciang, mihing khat bangza muanhuai ziam ci tena ahi hi. Sontena mihing khat ii credit score sia 800 kiim bang ahile, muan huai mama hi ci in hong kiciamte hi. Credit Score 600 bang bek a nei mihing khat sia muan huai tatak ngawl cina hipai hi. Tua hitana, Credit score 800 bang a nei mihing khat na credit card taw vanh a lei ciang a meet zakhen 5% bang pia bek tha tu ahihang, credit score 600 bang bekma a nei mihing khat na a meet zakhen 10% pan zakhen 25% dong bang a piak kul tha tu hi.

Credit card taw ih lei zawk ni 30 ciang sum puuk lo natu ngetna bill hong theng hi. A vekpi tha khat thu lo pai leang a meet bangma piak kul ngawl hi. Ahihang a tam zaw na kilo khawng pai zo ngawl ahikom, a meet hong om pai aa, USA ah mihing tam mama sia credit card meet piakna taw a khan tawntung buai top hi.

Credit card taw ih lei ciang sum lo kik natu tha khat a tawm bel bangza ci in bill hong theng hi. Tua bill manman lo valeng leang, muan kiteptena credit score hong khang tato hi. Muan kiteptena credit score hong khan, hong tam ciang vanh manh ham a hi motor, inn lei natu sum hong kipuuk ngam pheang hi. Muan kiteptena credit score 750 vaal 800 bang a nei khat inn a lei nuam le, credit company na sum muang tak in puuk pai ngam hi. Muan kiteptena credit score 650, 700 bang bek a nei mihing khat sia credit company na sum puuk ngam vaziang ngawl ahikom, a lei nuam vangaat le, credit score pha a nei khat ii huna kisam sak hi. Tua huna sia co-sign kici hi. Khat na co-sign po le lei thei hi. A co-sign pa/nu na tavuan a laak kul pai aa, leiba lo zawk ngawlna khat nei zazen le tua co-sign pa/nu na a lo tu kul ahikom, ahitheiza co-sign in kihu ngam vazeang ngawl hi.

Credit card hong kinguuk sak ii khat papo na hong zak ku sak le, credit company te in tavuan la in leao siat hi. Ahihang na innkuanpui ahibale, inn khat sung om khawm khat na hong zak sak ku le nangma tavuan hi aa, credit company na leao sak ngawl ci thu zong tel tu kisam hi.

woman-with-credit-cardDebit Card
Debit card taw kisai heak tu kilawm thu pawl khat sia, na bank sungah sum om po le, credit card zak theina mun theampo ah kizangh thei vave aa, a meet piak kul ngawl ci thu hi. Ahihang protection sia, credit card za hoi ngawl hi. Credit card taw vanh lei ciang sign thu kul aa, Debit card taw lei ciang na bank PIN nambat na met kul hi. Sai pawl khatte ah Debit card ih zangh tu le, Cent 50 piak thua kul thei ci thu zong heak tu kilawm thu khat hi. Datsi sai le zu sai pawl khat te ah debit taw lei lete cent 50 hong ngen thua hi. Debit card taw ih lei ciang, na bank sungah sum om kul ahihang ni 2 pan ni 3 zawk ciang ih vanh leina sai tena dawk pheang hi. Tua ahikom, na lei laitak hun na bank sung sum a om bua zong, ni 1 ni 2 sung sum tuan man po le te kinga lai hi. A zazen ni 1 ni 2 zawk sai te na sum a dawk tu hun in na bank sung sum a cing a om buale, na bank te na NSF ci in daan hong pia aa, $ 35 – $ 45 bang hong leao sak hi.

Debit card hong kinguuk sak zazen ii khat na hong zak sak le, na bank te tung phone a manlaang thathei sam in aa, na card khaak sak in. Credit card bang hi ngawl in ngual hong zak ku sak sum na bank te na tavuan la ngawl ahikom, kidop mama kul hi. Tua ahikom internet pan vanh na lei tu le debit taw na lei saang credit taw lei lete dik zaw hi. Internet pan online vanh na lei le ahitheiza debit zangh heak in.

Debit card taw vanh na leisa khat na lung a kim bua ii, theak kik nuam ate na leina saite na theak kik tu a awi buale, na bank te tungah za sak lete charge back hong hi sak thei hi. Na bank te na sum hong piak kik tu hi. Ahihang vanh na lei zawk ni 60 sung bekma charge back kivawt thei hi. Ni 60 zawk ciang na bank te tung na pai pheangle sum hong kipia kik ngawl tu hi. Debit card ii phatna dang khat sia cash back system hi. Vanh khat na lei sim sum tawm hong pia kik hong khol sak kik cina hi.

Credit ahizon, Debit ahizong, Cash ahizong, a hoina, a hoi ngawlna phatak tel cian ii, pil vaang tak in zangh leang phat tuamna tam mama om ci thu ih heak tek tu thupi mama hi.

TN

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,038 hits

A Lui Te

Twitter Updates

Error: Twitter did not respond. Please wait a few minutes and refresh this page.

Live Trific

google-site-verification: googled172884ff34d55c0.html