Nikonghong

Home » Leitung » Ukraine

Ukraine

Tulai leitung thuthak (news) sim leang Ukraine ngam buaina nisim in kimu hi, pawl khatna leitung ngaalpi 3na dong piang thei tu ci dongtak son hi. Ukraine sia koisung om aa, koibang ngam ziam, a taangthu tawm a tom thathei in en tek tawng.

Taangthu teptena kician vacin omma hun
TOPA Jesu pianma kum 700 kiim hun lai Scythian a kici minamte tuni Ukraine ci in ih heak ngam sungah teang hi. Tua zawk ciang Greek minamte saksang black-sea tuipi vaal dung to teang tu in hong theng hi. TOPA Jesu pian zawk AD kumzalom 5 le 6 kum thet ciang Slavs minam te theng hi. Kumzalom 9 kum ciang Europe saksang Sweden Viking te saksang pan ngun dung zui in theng suk aa, Ukraine ah teang suak hi. Sweden Viking te Oleg a kici mihing khat lampuina taw 882 kum in Ukraine te khuapi Kiev sim in la hi. Vladimir kumpi hun 988 kum ciang Christian ngam suak hi.

Ngamlim

Ngamlim

Kum zalom 11 le 12 thet ciang abekabek in kikhentham laleo hi. 1240 kum ciang Asia pan Mongolia ngaalhang Genghis Khan ii tupa Batu na sim aa, Ukraine ii thang sang le nisuana sang la hi. Sak sang le nitumna sang sia kumzalom 14 thet dong kuama khut nuai om ngawl in suakta hi. Ahihang kumzalom 14 sung Poles (Poland) le Lithuanians te na sim in uk hi. Tua zawk ciang, Asia mi Mongolia te le Tartars (Turky) te lesim kik aa dadam in hawl khia kik hi. Ahihang Tartars te khut sung pan Crimea tuikul sut kik zo ngawl ahikom Crimea sia kumzalom 15 thet dong Tartars te ii Turkish Empire sung kihel lai hi.

Kumzalom 15 le 16 thet ciang Poles (Poland) tote khut nuai pan sal pawl khat taikhia, suakta in mual tung duisung ah teang uh hi. Amate le amate Kozaky (Cossacks) te kina hi. Cossacks te in kiukna community khat pan aa, hetman anak lampui khat ii nuai ah, amate kiuk dan system tuam tatak khat taw kalsuan uh hi. Kumzalom 17 thet ciang Poland na Ukraine ii nitumna sang bup sim in la aa, Russia na nisuana sangbup la hi. Kumzalom 18 thet ciang Russia kumpinu Catherine the Great na Ukraine nisuana sang teng Russia ngam suak sak hi. Cossack te ii kiukna (politic) system sia 1764 kum ciang kiphiat aa bosuak hi. Poland te hong zawm vaial ahikom, 1772 pan 1795 sung Russia le Austria te in nitumna sang hong tutum hi. Nitumna sang bel ngamhuam no khat ngawl po Russia te khut nuai theng hi. 1783 kum ciang Criamea tuikul zong Russia khut nuai theng hi. Russia kumpinu Catherine the Great na tu ni Ukraine ngam ii khuapi lian bel a 3na ahi Odessa khua saat hi.

Taanthu teptena kician vaset om zawk
Kumzalom 19 sung buppi Russia khut nuai ah Russia ngam in om hi. Ahihang kumzalom 19 lang khawng ciang minamvai (nationalism / lu-myo-yay) hong khang tato aa, ngambup ah dadam hong kizel hi. 1918 kum sung Russia ngam sung tual ngaal (Civil war) om ahikom, Ukraine te in chance la thei aa, suatakna nga hi. Ahihang 1921 kum ciang Russia na sim kik in la leo aa, Soviet Union khut nuai ah theng hi.

Communist kumpi Stalin hun sung Ukraine lo theampo kumpi neisa sua hi. Lo nei theampo sia kumpi in a lo laaksak aa, kumpi lo sung naseam, kumpi lotho suak siat hi. Thasum kipia aa, lo

Holodomor mihing vawttawm kialpi

Holodomor mihing vawttawm kialpi

pan piang theampo kumpi na la siat hi. Lo nei te lungkim vet ngawl ahikom tam mama na a neisa lo sung nganno te kumpi neisa a suasaang that lum zaw hi. Stalin na lotho te ananam in daan pia in sim ahikom 1932 le 33 kum sung an neak tu om ngawl kial tung aa, million tam mama thi hi. Hi kialpi sia khuahun huvau (Natural disaster) a piang kial hi ngawl in mihing vawt tawm kialpi (Man-made disaster) hi aa, million 10 bang thi tu in taangthu thiam te na um hi (Wikipedia). Taangthu at te in hi kialpi sia “Holodomor” ci in min vaw hi.

Communist Stalin khut nuai Ukraine ii thuakna sia bo ngawl in om tato lai hi. 1937-39 sung Communis kumpi langpan hi tu a up mihing tam mama security pulap in thatlum aa, mihing 600,000 vaal thi laleo hi. Ngaalpi 2na hong kipan aa, 1941 ciang Germany na Ukraine la hi. Germany ngaalkap te ii thaalup hu mihing millions vaal thi hi. 1943 ciang Germany te ngaal lel aa, Russia Red Army na Ukraine khuapi Kiev sia November 6, 1943 ni la kik hi. Stalin na Ukraine a lak kik zawk ciang Germany taw kipawl hi tu a muanmawk mihing tam mama thatlum lalai hi. Crimea tuikul tung om Tartars (Turkish) theampo hawl keak siat hi.

1986 kum ciang Ukraine ngam sung a kivawt Russia te ii Chernobyl nuclear mei piakna setzung accident in puaktham hi. Hi Chernobyl setzung puakthamna pan redio active dat hui sung theng aa, mihing million tam mama ngim nga hi. Hi radio active dat huvau mihing tam mama thi bek dom ngawl, Ukraine le kiim le paam ngam teng ah kum 10 sung cancer nasia tatak piang hi. WHO te tuatna pan mihing 4000, Union of Concerned Scientist te tuatna pan mihing 27,000 kiim bang cancer natna nga in thi law hi. Greenpeace te ii sonbang ahile, 1990 pan 2004 dong hi Chernobyl nuclear reactor hu in mihing 10,000 bang 20,000 bang cancer natna nga tu hi ci hi. Cancer bek hi ngawl mihing tam mama mit nei ngawl, nangawng, khut le piang nei ngawl cibang tam mama suak hi. (Wikipedia)

Orange langdona (Orange revolution)
Ukraine ngam mite in Russia te ii ukna thuak zo mama nawn ngawl ahikom 1989 kum ciang RUKH (Ukranian People’s Movement for Restructuring) phuan aa, 1990 kum pan kipan lungphona (san-dah pyiah) vawt tato hi. 1991 kum ciang Soviet Union puuk ahikom Ukraine te zong chance la thei aa, Russia khut nuai pan suakta hi. Russia na Socialist zia in kum tam mama kal suanpui ahikom capitalist a suak ciang haksatna tam mama a phul tato kul hi. 2004 kum kitealna ah Viktor Yanukovych na ngualzo ahihang meetang theam hi tu kium ahikom ni 10 sung lungphona (san-dah-piah) kivawt aa, kitealna kivawt kik hi. A kivawt kik ciang Yushchenko na ngualzo hi. Orange Revolution kina hi. 2008-2009 sung siipuazi nasia tatak kiam suk ahihang dadam hong khang kikik hi.

Tulaitak Ukraine
2010 kum election vawt kik aa, Viktor Yanukovych na ngual zo hi. President Viktor Yanukovych na EU saang, Russia kumpi taw khut kilen in naseam nuam zaw ahikom, ngammi te lungkim

Kiev Khuapi

Kiev Khuapi

ngawl in 2013 le 2014 sung nasia tatak lungphona (san-dah-piah) vawt hi. Lungphona vawtte thau taw kaap ahikom, mihing 100 vaal thi hi (USA Today). Parliament na president Yanukovych ii lungpho mite tung a tatzia hoi sa ngawl ahikom ngatang se in me taw khensatna vawt aa president pa a nasep tawp sak (impeach) hi. Mihing thi teng huvau in thusit thuak tu lau ahikom, Russia ngam ah tai hi. Ngambup mihingsim (population) ii zakhen 17% Russia minam ahikom, tuateng in Russia khutnuai om nuam zaw aa, a buai thathei natu vaihawm hi. Russia zong tua buaina te chance la in Crimea tuikul la laleo hi. Crimea Russia khutnuai thengkik bek dom ngawl, Ukraine sung om Russia minamte in tudong buaina tatuam vawvawt ahikom, Russia na Ukraine ngambup sim in lakik nuam tana, a buai thathei natu hol hi tu hi ci in American le Europe ngam te na ummaw hi.

Mihingsim (population) 44.6 million pha aa, Ukrainian zakhen77.8%, Russian zakhen 17% le Belarusians, Tartars le Romanians te teang hi. Official kampau sia Ukraine kam hi aa, Russia kam zong kinasia zak mama hi. Ukraine ngam taw kisai a tepte huai thu 2 sia siphu pianna mun (domestication of horse) le Europe ngam tam mama ii kampau hong piankhiatna mun (origin of the Indo-European language family) ci thu te a hi hi.

TN

Doppha: localhistories.org, Wikipedia, USA today, Yahoo

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,571 other followers

Blog Stats

  • 92,424 hits

A Lui Te

Live Trific

google-site-verification: googled172884ff34d55c0.html