Nikonghong

Home » Pilna » A Hunlap Tu Thupi Hi

A Hunlap Tu Thupi Hi

Thupatna
” Kano lai ka pa ii thuhilnate sung pan ka makngil thei ngawlhet kammal khat sia “A hun lap tu thupi hi” ci kammal ahi hi. Sanginn ah a hunlap in theng bualeang ih thin nuam ngawl, ngualtam sung kimaimawl, syate in hong teih, hong sat thei lai si tu hi. Motor car gate, meileang, tuileang khawlmun. Vanleang tualpi ci bangte ah ih kingin khol ma hi kasap (ih kingin kholna kicing ngawl zaw ziam?) a hunlap in ih thet ngawl ciang kibuai thei peuma hi. Pawlkhat bang sum le paai te sumh thua niknek lalai, a pai tu a ni khangkhan tokik lai a, buaithei peuma hi. Tua bek domngawl a zaizaw ngaisun leang a hunlap tu ciciang pilna sinna sang pan maw, biakna sang pan maw, nei le lamh zonna sang pan maw, zi neina, pasal neina le tapa, tanu neina sang pan maw…etc, maw… maw… dokna sia tam mama tu keak hi. Tua hi a, a vekpi ma in “A hun lap tu thupi hi” ci tu ahi hi.

PILNA SINNA
Ih tanote a no pan kipan ahun ahun in sangkaa kipatsak thei tu thupi hi. A no pan kipan inn panin Nu le Pa in thin sauna, thin-uaina, deisakna taw lai hil thei hamtang leang phabel hi. Ahitazong Pa le Nu in deisak leilam sia a lai dei bang hong hi ngawl ciang saat, vua, kam pha ngawl pau tha, … ci bang a om ngawl natu kidop tu thupi ka sa hi. (Ka lawm nupa khat te bang a zi sia sangsya hi kasap a tate atu Tuition sya ngualdangte hil sak zaw thong hi.) Ngaisut tu phasa ing.

A no panma lai hong haat le hong kin le pilto sasuak tu hi. Na sep na vawt khat papo ah ngualzawna na nga nuam le tua na sep na vawt khat papo tungah kinna le lungkimna, nopsakna na nei phit tu kul hi. Tua hi a, ih tanote zongh lai sungah kinna le lungkimna, nopsakna nei phot pole a lai tante kealleih tung kaa bang kumkhat pan kumkhat a tante kaa tato tu hi. Zolai sang pan kipan tan 10 le saangpi pan laitante kumsim ih zaw tu thupi peuma hi. Kumkhat lai taak vadul leang tua kum sung sum bonate, hunte le ih tha, ih ngalte kisumh bek domngawl, ih lai man ciang Kumpi, Company le nasep khat papo ih sep ciang thasum nisum ih saan tu kum khat atu sumtum (Income) kisumh susuk lai hi thong hi. Tua hi a, pilna sinna ah a hun lap tu thupi peuma hi.

Ahun laptu thupi 3BIAKNA
Biakna sang pan a hun lap tu thupi seseam hi. Leitung khankhat hun tomno sungah a hunlap in Ngumpa Pathian saangin Ama sungah thinmuanna, lungnopna ih nei tu thupi mama hi. Ih tanote a no pan kipan Nipi sang (Sunday school), kaa sak tu, khangno hunte ah kiheisak tu hi. Ahizong a khangno hun sungah leitung pilna sinnate a thaneam thak ngawl tu zongh thupi veve hi. Pathian muang leilam khat sia a lai mal khat zongh nga ngawl lai, he ngawl lai kasap Pathian in hong ongsak tu zam ci khawng ih hi thak ngawl tu kisamh tu hi. Laithiangtho Matthew sung a om bangma ih biak Pathian in “Ngen vun, zong vun, kingh vun” hong ci sia naseam vun, hanciam vun, na lai en vun hong cina ci sia phawk kisamh ka sa hi. Pathian thu sung a kidia khat sia leitung pilna zongh ah ih biak Pathian in lam lak tu hi. A thupi sia,Pathian tung muanna nei in, upna taw thungen in ahun ahun in ngaisutna taw sep theina hi. A hunlap in ama san ama san tek ah sep thei vawt thei tu kisamh tu hi. Stn. Laivuan tu nai mama zo kasap khangno hun lasin tu ih pai nuam le a hun lapin lai nga sa ih hi tu thupi hi.

A hunlap tu thupi hi ih ci tazong Pathian thu sung ih sepna ah Ama hun hong ngeal kholsaksa hunnuam, hunpha sungah ka om a, ka diang ka ngamta a, ka vawt hun zongh om veve hi ka ci nuam hi. Stn. Ama hong ngeal kholsaksa Intakaw khua (Yangon nai) ngalkap sung ka sep lai (kum 15 sung battalion khat bebek om) hun sung Pathian in biakiin 2 sakna ah a lampui tu in hong zangh ngei hi. Ka battalion sung keima le a lianbel hi ngawl kasap Biakinn sak natu in ngalkap motor a no a lian ka uuk bang ka zangh vapeak hi. Ka ngalkapte tha mama zongh ka zangh lai hi. Tungsia zumpi ah lai taw hong kikhia ci thada ka seppui tungsia, nuaisia te ii diksak ngawlna kammal khat zongh ka za ngei bua luilam hi. Tua hun lai ci leang Christian te hong kingaimawk mama laitak hun hi luilam lai hi. Thangsang Zomi puite khat in “Ko Kam kidawm in, ngalkap sungsia kammal thu piakna (ႏႈတ္မိန္႔) taw zong ngamngi sang khawng ah hong kikhinsak thei lei tu hi” hong ci ngei liang hi. Biakinn 2 sak zawk le kum 15 cin zawkciang tungsia zumpi panin ngalkap battalion khat ah kum 5 le a tungsia peuma kikhinsak tu hi ci thu koma Engineer ngalkap sung teng ah thu hong piang hi tana ka kikhin hi. Intakaw ah kum 15 om tong i, biakinn 2 sakna Pathian in “lampui in hong zangh tu ahiciang a hunlap in ka sep tu thupi hi ci ka ngaisun ngei bua hi. Tua hi a, ih biak Pathian in Ama hun hong ngeal kholsaksa kum 15 hunnuam sungah ka om a, ka ngamta a, ka diang hi ka ci nuam hi. Ngalkap sung ka sep kumte sung pan a tamzaw hun kum 20 kiim sia Yangon nai (Mingaladon, Intakaw) ah ka om luilam si hi. Keima le uliante maipha nga natu ka sep ka vawt vavan zongh ka he bua hi. Intakaw ka omna mun zongh hong dungawk, hong tuu nuam om tu ahihang kum 15 bang hong omsak hi. Sizang ngalkap ulian khat in ngalkap sung ka om sung Yangon nai mama ka om ngei bua hong ci sia ka ngaisut ciang kei atu Pathian thupha hi ka cici po hi. (Ama sungah eite ih teang a, ngamta in ih nungta hi. Sawltak 17: 28 )

Tua bek dom ngawlin kum 2006 sia Khamtung ngambup Pawlpi masabel pianzawk kum 100 cin kum hi a, Khuasak khua Tuiphum Pawlpi ahi hi. Tua biakinn lui sia a thakin kisa kik a, thikkaang theampo a pia tu in a hunlap in Pathian in kei hong zangh leleau hi. Cinopna in ka kitaangtun (ka cithei lai). hun Lianin Khuasak biakinn sia a thakin kisa kik luilam hi. Tua hi tana a hunlap in a kihel thei ka suak hi. (Tu hun khawng’ hile pension kila zo a, haksa tu hi.) Tua hun sung mama ah Biakinn Kum 100 cin Poaipi a lingh tuam natu in Siyin Marathon tai kidemna Pahian in a hunlap ma in vawt theina hunpha zongh hong pia leleau hi. Sizang ngam sungah kum. 100 cin poaipi hong theng peumale Siyin Marathon tai kidemna zongh kivawt hamtang a, poai zongh lingh tuamsak si, khangnote le mipite zongh lawp tuam sak si hi. Ka khan sungah a hunlap in Kum 2006 hong tun ciang kum 100 cing Khamtung ngam bup ah amasa bel Khuasak Tuiphum Pawlpi biakinn a thak a kisak kik ciang thikkaang teng si tong i, Siyin Marathon zongh taisak tong ci ka ngaisun ngei bua hi. Ka cinopna ah Pathian in Ama hun hong ngeal kholsaksa hunnuam sung ka om a, ka ngamta a, ka diang hi ka ci nuam hi.

Zongam sung ih ngam ih lei atu hunbit in a seam tatak sia biakna sang seam syate hi ka ci nuam hi. Amate in leitung thu tatuam pan kipan biakna dong khanto natu a zawng zong haksatna a om zong ih mipite taw a naibei naseam lampuite ahi hi. Tua hi a, amate le amate pilna thiamna tatuamte pan kipan biakna dong a hanciam kenkonte hi ka ci nuam hi. Pilna nei a tamzaw kumpi naseamte in ngualngam ngual lei ah om in naseam hi. Apilna a thuakte ngualngam ngual lei ah luang thathong hi. Zongam atu seam thei ngawl hi. Ahitazong a tamzaw in a ngam a lei, a mipuite le a biakna enkik in ahi theiza in hu in panpui hi.

Nei le lamh, Zi le Pasal. tanu / tapa
“Zi neipal lamh samh” kici luilam hi. Ahitazong zinei hun, ih nei tu kisamh ka sa hi’. Kei kum 30 in zi ka nei zongh nei hak ka kisa zo hi. Tua le kum bangza hunin zi nei tu ziam hong ki cile, a hai bel kum 25 le 30 sung teng ka ci nuam hi. Inn sang om pawlkhatte neipal thei mama hi. Tua ahibale ih tate no mama lai, eima kihuai nuam zo cite pawl kisuak thei tu hi. Tanote lapsaang natu hunte zongh ngaisut khol tu kisamh tu hi. Ka kicin ciang cici a, ih kum tam tato sia kimangil thei hi. Tuasia lauhuai hi. Zi nei zawkciang nei le lamh zongh kitawm thei zaw, kitawm nuam zawhiat hi. Kawlte bang na tate pasal/zi neisak tu sia Nu le Pa ii vaipuak hi na ci thong leleau hi. Pawlkhat na ka khan sung ka it maksakbel, ka itbel taw ka kiteen ngawl nungsang ka ngaisun nawn bua ci thong liang hi. First love, True love sia ci nuam ahi mangh tu maw.

Zo la ka teptee khat –

          “Meal hoih niangtui bang kidawn thei io,
Lungsim thiangtho va bang pil;
kei a ding phazo lawm aw ee –“

a ci bangma ei hong it tatak tu, innkuanpui nuntakna (family life) thin thiangtho a nei tu ma thupibel sa ing. “Tu zan ka mang ka leal ngam lo, ka seen ngaih in silpuan hong zawn ee” cite pawl sia khangno hun atu bek hi a, hunsau atu hi ngawl ci nuam ing. Zomi tangval le ngaknute Malaysia a thet uh ciang hong ki it a, kiteang vanang thong sia uhaamte pawlkhat bang lungdam himhum tek peuma ci kiza napo zei. Parcel ci ma omsak lai napo zei. Ngual ngam ngual lei ih thet ciang eima le eima ci a, ki itna khang seseam hi tu um ing. Yangon bang a kiteang thei tu om timtum kasap na bang kisamh ziam maw a kiteang kitawm mama thong hi. A kiteang om in ta hong nei le minam a malin kikhangto pheang tu hi. Mopoai a om peuma le minam khantona khat hi ih ci thei tu kisamh sa ing. Ngalkap sung ka tum sawng (1981 kiim ) Major Son Ko Lian (Chairman, Chin Usi ) taw YSBC (Lewis Street.) ah kimu in thu ka sonkhawm uh a, “Zi na nei uh ciang eimi ma nei tavun, Zomi numei pilna nei tam mama zo hi. Ko hun lai ahile tam ngawl lai hi. Zu zongh na du tha uhle lampi hui khawng ah ne papai heak vun, colour nei zu ma ne (dawn) hamtang tavun. Kei tu bang ka hina sia zu a ci po ka neak papai hang hi” ci in a khut langkhat a zaw sia a ngawng ah khau taw kua kawmin hong ci, hong hil luilam a, ka mangil thei bua hi.

Kiteen zawkciang pawlkhat in ta dei paih ngawl a, khak thei hi. Tua hi ngawl a, a hunlap in ta nei paih tu a, deiza ih nei zawkciang (Ngalkap sung bang ta 5 aneizawkciang bek ta khak thei pheang hi.) khak kik tu hizaw sa ing. Banghang ziam ci leang ta dei ngawl a, khak phot kasap a dei tatak ciang nei kik thei paih ngawl ci bang om thei hi. Ei hile nuntakna hamsa ci a, khat khawng ih nei zawkciang a khak papaih khawng ki om hi. Tua hang a, minam mama zongh kitawm hi tu hi. Sente ahile mihing tam mama tana nupa kop khat in ta khat bek (one couple one child policy) nei hi.

Nei le lamh atu ahile sep theipo seam kenkon tu hi. Nisum thasum saang ih hile zong ih nasep kakawm a dang sum mu natu 2 le 3 bang seam thua zo leang phabel tu hi. Khut thiamna khat peuma nei tu thupi hi. Pension keak ih la zong an kingawl ngawl leei tu hi. Kawlte in “Osa minsa” (Huai teak ciang ih neak ih dawn tu) ci a ih kingin khol thei tu thupi hi. Kumpi sang ih seam le a lampui sang suato natu ngaisun in hanciam tu thupi hi. A lampui sang ih hi ciang sum le paai zakna hong tamzaw tu hi. Zangh khial leang ei mawna hi tu a, ih zangh thei le ei atu zongh om tu hi. Mipii pawlkhat in “Khan khat sung hamphat neina (Chance ) sia 2 vei hong pai ngawl hi” ci tana tua Chance sia ih taisua ngawl tu, a hunlap in ih mat thei tu, ih pom thei tu thupi hi.

CIDAMNA
“Lunglai khau bang ka hualhual ciang taang bang dam ding sial bang lian pen ee” na ci tana cidamna sia a thupi belma hi. Cidam buathong leang a dang thu tatuamte sonlo hi thong paih tu hi. Tua hi tana ahi theiza in cidam natu ih kidawm khol, ih kidal khol tu a tuakawm sung pan dam ngawlna hong piang zezen tha le a hunlap in zato le syavuan, syama te kung ih thet thei tu, ih pai thei tu thupi hi. Medical doctor khat in “Tuuk nguazuk hun, khaal nisat hun le phalbi daidam khuasik hun sung te ah a kilalawm, a kiphuphu kidawm in om thei po leang doctor kisamh ngol hi” ci hi. Hi thei le kum khat a tawmbel khat vei bang cidamna etsakna (medical checked-up) vawtzo leang pha hi.

Ahun laptu thupi 4Khua khat ah pasal khat sia ngilna in kilep vadel in om a, khuapuite in a naibel zato ah peang lam in pua in paipui uh ahihang hunlap ngawl tana lamkal ah hong nusia hi. Angil natna sia ngilpeang natna hi ci hi. Ngilpeang at sia, Doctor te in a ol ki atna (minor operation) na ci a, a olziau khawng na hi tuak hi. A kiphum ni ciang Pawlpi keam syapa in a thi kum tung tana thi hi a ci sia khangno pawlkhat in saang thei ngawl ci hi. A thi kum tun hang hi ngawl, zato, syavuan ih nei ngawl hangin thi hi ci hi. Koisia maanzaw ziam maw ngaisut tek tu hivak maw.

SRBA meeting a om ciang (Kum khat, khat vei bang ) cidamna (First Aid) thu kison, kikum, kihil vazek leang pha tu hi. Stn. Nguul in hong tu le bangba hi tu, bangba kibawl masa tu ci bang, ngamsung pai laitak liamtha leang a, chi luang le a masa bel bangba ki ou tu ci bang, ngamsate taw ih kisik ciang bangbangh teng seam phot, bangbangh dan om tu ci bang,… etc. A hunlap in bangbangh seam thei, vawt thei tu ci bang tatuamte kikum vazek thei tu thupi hi.

Thu khupna
Tu hun sia pilna, thiamna hun hi a, leitung mun khat pan thupiang khat sia a dang mun khat ah tu mama in a kiza thei, a kimu thei hi zo ta hi. Tua hi a, leitung buppi a lian mama, a zai mama sia khuano cilik khat bang bek kingaisun zo a, khuano khat sungah a ki om tek, khuapui, tuipui khat tek kihi hi ci hi. Hi bang a, a khangto mama zo leitung ah mihing ih pian sia a hampha( ih hi hi. Hi bang hun nuam sungah a kuama po in sepna vawtna tatuam tek pan a hunlap in seam thei in a hunlap in khangto in, a hunlap in ih om thei natu ih hanciam tek tu hi. Atawpna ka sonnop, khangnote tung hanthotna ka piaknop khat sia keima pianna ka pu Pu Tua Kam [Pawlkhat in ka pu ma Pu Tual Kam (Japan Bo, ka nu suapui pa) taw khial thei hi.] ii kammal (or) paunak khat ahi hi. “Seam vamiat le Ne vamiat, Seam vaneal le Ne vaneal” ( Work laboriously and devour voraciously. Work lazily and munch scanty morsels.)” ci hi. Sizang sung khanghaamte le Sizang tangthu a kinte in za ngei tu hi.

Heaktu: Khuavak Magazine No. (9) sungpan a kilakik hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html