Nikonghong

Home » Pilna » A sin le a sin ngawl (Professional vs. amateur)

A sin le a sin ngawl (Professional vs. amateur)

By Pr. D Suan Za Khai

Thukong honna

“Sinna” (Learning) ii a mungtup bulpi sia ei le ei limit kiheakna tu ahi hi, ci in mipilte in pualaak uh hi. Sinna tungtawn bekin ei le ei limit kihe thei pheang tu ahile, ih sin ngawl thute ah ih limit tawm mama tu ahi hunlam sia ih kiheak tu ol ngawl het tu ci sia ngaisuthuai sa ing. Tu hun khangthakte dinmun pan en leang hile, kum (40) valsung bang ngam ki ukna paizia hoi ngawl sungah a kikhang ahiciang, “Heak ngawl nei ngawl, tel vacin om ngawl” ci sia a leitung paidan hi pian zo thong a, a ngeina tuma kisa zo ahiciang “Sinna le Sin ngawlna” ii kilamdanna sia a lamdangpi hong hi nawn ngawl phial hi. Ahizong tuabang ngeinase dinmun, ngaisut puakzia (Concept) panin bangzata a lauhuai kiamsuhna piang a, bangzata in a lauhuai supna piang ziam, ci in ngaisuthuai sa ka hikom “A sin le A sin ngawl” (Professional vs Amateur) ci thu lu taw ngaisutzia pawlkhat, huamno khat (Scope) kong pualaak nuam hi.

amatuer-professional 2Hi Scope (huam) sungah thiamna nei, a sin vateakte sonnopna in Professional ci kammal le a sin ngawlte ii sin ngawlna huam ih sonnopna in Amateur ahibale tua kammal ii a bat ngawl hiat Laymen ci kammalte ih zangh tu hi. (Phaw tu khat pan; Laymen ahizong Amateur ahizong ih zakna ah a pil ngawl, a nangh, a mol, a mawmaw cinopna hi zezen ngawl a, ih sin ngawl thute ah ih tel ngawl thu om a hina thu a son nuam ih hi hi.) Sonteena; Sangsya Laihil (Pedagogy – teaching method) a sin khat sia Laihilna ah professional mama, thiam mama ahihang, Sumvawtna (Business) lam ah (Economics) major in sinna na nei ngawl ahikom Business taw kisai in ama sia Laymen (or) Amateur na hi nginge hi. Mundang khat ah, thudang khat papo ah thiam mama professional ahihang ama ii sin ngawlna mun, sin ngawl thu ah Laymen ahina thu a son nuam ih hi hi. Mun tatuam ah thiam kakoai in professional double keak ih hi phial zong, mun theampo ah professional kihi thei ngawl hi. Mithiam, mipil tampite zongh mun theampo ah professional hi thei ngawl hi. Tua ahikom kei koisung munte, bang thute sungah professional khi ziam? Koisung mun, bang thute ah laymen khi ziam ci sia mipil khat in a heak hamtang kul hi. Mipil khat in sinna nei ahikom ama ii limit a heak hamtang kul hi. Tua ahikom a nuai a bangin scope nocilik pawlkhat en pak leang.

Biakna huam

Zongam (A tuanin Sizang sung) ah “Laymen” ci kammal a kizangh tambel sia Pastor te tung pan le biakna lampui te tung pan ci leang kikhial tu um bong. A hi tu ma hi. Medical sang pan zong zangh kakawm thei hi. Bangpo ahizong Laymen ci kammal zaak po ciang bilsung thawl zo mama ngawl zongh om thei vak. Lamkhat pan en leang Lai Thiangtho sungah “Thu um mi theampo Thiampi”, tua ahiciang Pastor le thu um mite kikim, laymen om tuan bo ci ngaisutna zongh om thei vak. Lai Thiangtho kammal ahiciang kua na nial ngam hehuu tu ziam? Ahizong Lai Thiangtho kammal sia Theology School ah a tawmbel kum 4 a sin vateak uh ciang Degree no ciuciau khat nga a, tua zawkciang Pathian nasepna sungah kipia pheang uh hi. Tuabang a Theology taw kisai a sin vateakte zongh khat vevei ciang ih ngaisut bang hi ngawl a, kihawmthaw lai ci leang, a sin ngawlte “thu um mi theampo thiampi za nga” ci kammal sisan in biakna huam ah Laymen ih hi nop ngawlna sia ih limit ih kiheak ngawl na ahi tu zongh lauhuai sa pian ing.

amatuer-professional 4Zongam biakna huamsung ah tawm en lai leang, Secular Degree saang pipi nga hihee, sum le paai hawmthawk om ngawl, ahihang theology sin ngei ngawl, Church Leadership beak sin ngeingawl, Church Administration taw kisai sin ngei ngawl bul a, Biakna sung hong professional keei uh ciang, a nei ngawl ngiimngeam, a zawng valeam, theological educated minister te sia meikhup vaneal a, tuabang dinmun taw in Pawlpi cidam, khangtotu sangin, pawlpi kiam in biakinn a hawm tu manlang zaw thei hi. Bangza in lauhuai ziam? Sinna nei ngawl pi a, Lai Thiangtho bubup ih lot nga zongh sia bo. Sinna tungtawn in ngaisun dildel aa, tuatsuk tuatto zawk ciang a khiakna, a cinopna, a background he ngawl pipi in eima deina sang ah Lai Thiangtho ih khiak ciang Leitung ah buaina tam mama piang hi.

UNO ah setvanh sang pilna nei Lynn White Jr. in Tapidaw te nasia takin hong mawsiat ngei hi. Tapidaw te in a Holy Bible uh sia a dei bang po in a khiakna a kai uh ciang kiim le paam kisiatna nasia takin piang hi. Kimlepaam khuahun omzia lalna sia setvanh tatuam khantona hang hi ngawl a, Tapidaw te ii a Lai Thiangtho kammal a deikai hang hi ci in nasia takin Tapidaw te mawsiat ngei hi. “Omnipresence” ci kammal sia Pathian mun theampo ah om cina hi a, thumaan hi. Ahizong biakinn pai vateal kul bo… ci in eima deikai thathong tu hi ngawl het tu ka um hi. Saul zongh Israel kumpi minthang mama, kumpi masabel hi. Ahizong Biakna sungah Laymen in a om nop ngawl manin Biakpiak tau ah Samuel ngak ngawlin ama thu in a ngamtat ciang ama kumpi tokhum tung pan Pathian in khiasuh hi. Ama bek taak ziam? Hi ngawl! Israel te ii political sungah bangzata haksat na piang ziam? Doctorate thuap nii keak ih nga hang, biakna sangah sinna ih nei leei bana le Laymen phot lilim leang, ih kiim le paam khuavak hong taang zaw ka tawm!

Medical huam

amatuer-professional 5Pathian naseam pawlkhat in ‘Upna’ huam (Scope) panin na hong sep ngawp uh ciang cina te atu zatang, zatui, syavuan syama kisamh nawn ngawl bang liang hong then ka leleau uh hi. Leitung sia natna, huaina, thina cite taw a kipeal ngawl tu ih hi hi. Zatang zatui, Syavuan, Syama kul bo ci taw hong kalsuan pui uh ciang, a dam kik sangin a thi, a bo tamzaw thei hi. Pathian in Syavuan syama te thupha a piaksa hi a, zatui zaha te thupha a piaksa ahi hunlam zongh phawk huai ka sa mama hi. Medical lamsang sinna a neite sia kum (7) vaset a sin uh ciang MBBS nga a, tua zawkciang cina bawl kipan pheang uh hi. Upmawk po bawl ngawp, muanmawk zatang khawng nesak ngawp hi ngawlin, kum (7) sung tawntung a sin uh mihing pumpi sungah a om thei natnate thu sin in, tua natna sia bang zatang, bang zatui taw bawl leang dam thei, bang hun a bawl ta, bang tanvei bawl tu cite a sin dikdek zawkciang Syavuan nasep seam pheang uh hi. A sin ngei ngawl, zaak ngei, mu ngei, laisung sim ngei, syavuante ii za piak en ngei, syavuan te taw kithawl khawm ngei… ngei tam mama taw hong bawl vazing a, sinna a nei ngawlte sia Kawlte in zann-kuh syavuan na ci uh hi.

Zann-kuh syavuan te ii hong bawl ciang zaphin khat taw kidam pai lian thei a, ahizong a nungsang ciang ih nat kik ciang syavuan te ii hong piak zatui, zaha te taw kidam vazeang nawn ngawl hi. Medical Doctor te zongh MBBS sia amate nak dan in ci leang General Medical Practitioner hi pheang a, M Med. Sc. khawng ma hong man uh ciang, a saang zaw hong zaw uh ciang Specialist kici pheang zen hi. Tua ahile Journal sung khawng ah ih mu ngei khat po taw ki professional sak bua lel ii ih heak ngawlna sia he ngawl ma ci ngam lel leang mihing thupi thinpuak ih neizaw hiat ka tawm. Zann-kuh tam pian ciang, azann pastor, azann ngaalkap bu, azann sumleang vawt, azann saang sya, azann politician, azann, azann, azann bebek… hong tam ciang thing le sa hel bang…. Ka heak sa, ka baallei… cite pawl hong pai hi. Reverend pastor na hi hial zong, ngaalkap general, millionaire keak na hi hialzong Medical taw kisai sia Laymen phot lilim leang ih khansau zaw hiat ta, ih sam kaang hakzaw hiat tu um ing.

Ngamthu huam

Ngam thu (Politic) ci sia ngam mite nuntakna tu a phazaw in koi bang ngeal tu ci sia ngam thu hi ci leang kicing ngawl lai kici bek tu a, khial ni hi hong ci tu om buan teh. Hi sang hun ciang Democracy hong hi leleau tana Party zong sia Ngalpapak bangma tam keei leleau bilbel. Pha ngawl cina tu zongh om tuan bo. Ahizong niangtui sai khawng a, ko party tuabang, amate party tuabang ci teng po, ngam uk luite phat ngawlna, ngalkap te tuabang ngamta ci khawng teng lui niknek politician kici vangu leei. ngam thu taw kisai laibu bu nii zongh sim ngei ngawl napi kiteal ciang Meekuang lui nuam leei, Khuasung teng ah lampi kong vawt sak tu, leih kong vawt sak tu…. cipaih … Ngaalkapte nasep teng ma sep tu son a, seam zo ngawl hi lai. Tuabang mihing MP suak zongh tam thong sawn vak. A suak zo ngawl tamzaw lalai tu um ing.

amatuer-professional 6Ngam thu taw kisai a sin valeng te ma hong pau ciang zong Kawlngam huam in hong pau zawhiat a, leitung midang te in ‘We are the world’ ci a hong au vahee kawm pan ‘We are the Chin’ ‘We are the Zomi’ ci tu zongh sia khat vevei ci khawng thak vadal le kilawm sa ing. Biakna sang pan Ph.D thuap 7 keak ih nga hang, mun theampo ah professional nuam paih bua leang a, a professional te ma in seamsak lel leang, laymen ih hina, ngamthu taw kisai ih limit kihe leang, Real Democracy ahi zaw ka tawm maw. Zomi (Chin) te ih vekpi ciang khut-hum khat kipha pheang napi sasee sat bang keak a, see sawm 70 khawngin ih ngaisutna a kiban thei ngawl sia Biakna sang mipilte ii Ngamthu ah ih Laymen nop ngawl hang ahi nginge tu zongh lauhuai mama hi.

Hi bangin lai at solnawn leang “Nang a bangza he kisa ni ziam? Nang po bang hi leei ni ziam?” ci sia bilsung thawlzo ngawl liangin hong kipau tu hi. “Tel pi a tel, pil pi a pil” ci sia se eima Zomi (Chin) te ii ih thaneamna hi luilam a, ih natna khat hi luilam hi. Biakna lampui te Ngamvai ih kin leih ciang, ih ngam a nop tu sangin “Thingkhua peauliip, …. kaangh” bang ahi hun tamzaw ahiciang ih sin ngawl thute ah Laymen ka lel ve tawng. Ih khialna a om ciang zong, ‘khial khi zei. hong kipua pha tong ngei’ ih ci tu sangin “Ka ci tu ka ci sa”, ih philosophy of life sung mama ah “Ngalh hapaak sa tum kik ngei ngawl” hi cinten pai ahiciang, ol hile ol buan teh. “Ngalh hapaaksa tum kik ngawl” cisia se citak kinken, principle nei, thunei kinken tu, thu sia khut tung lumlee bang a kheal vazial ngawl tu a cinopna hizaw tu ve, ahizong ih philosophy of life sungah zungthuk ma hong tha zo ahikom a pha lam a ih laak tu sangin a sialam a ih laak tu ol zaw thei thong hi. Ih sin ngawlna ah ki professional sak keei bualel po leang, ci nop huai vadal thathong.

Philosophy of Life huam

Tu zo kum (5) bang zawkciang tu a ih dinmun taw, minam liante taw liangko kikim tu sia hong haksa mama tu hi. Expert, Skillful technicians, te in mun hong nga tu a, “Heak ngawl nei ngawl, tel vaset nei ngawl” taw panmun lian ih nga tu sia ol nawn ngawl tu hi. Na thiam mama thu ah zongh Certificate (recognized) na khat peuma na nei buale suak thei nawn ngawl tu. Certificate na nei sawm vei hang, nangma ma in na expert buale suak thei nawn ngawl tu hi. Doctorate thuap nii keak ih nga hangin ih Degree laakna photo in bangma hong sepsak thei nawn ngawl tu hi. Ih expert ngawlna munte ah “Koi sin! Nang a nung pan maw” hong kici lel tu hi.

Nidang lai khat a Ngalngam le Hangsai a ci khat om, ci bang vaneal taw thu ih hil le zong khangthak te in ne zo nawn ngawl tu a, sa ahi le zong a tak liuleu ma hong ne nuam tu a, thu zongh thutak ma hong ci tu ahikom Pastor seam tu zongh Professional tatak te ma a maisang om bek tu hi. Saang sya te zongh in “Ih hil tu laite study ngawl het a, khua ul sa nealkai liang a, Saang khan sung ih om thei lai hang, tu zo kum 5 bang ciangin Schedule mama ih thupi sak buale sangpatang te ii a nungsang pan hong nunau tu hun hong theng tu hi. Music lamsang sinna nei ngawl bul, tonic solfa, staff notation le vocal beak tawm zongh sinna nei ngawl a, competition ah judge ih hi nging-ngung tu zongh, a hai ngawlin ki thasun huai mama dinmun hong theng tu hi. Motor, Bike cite hong tam vaial a, workshop seam leang sum nga tu ci in sangkaa ngawl patang khangnote workshop ah naseam siasua uh, motor ahizong bike ahizong pheltham thua kik ciciang taw nidang ciangin mun kinga nawn ngawl tu hi.

English sentence nii le thum khawng ngual thei a, nakthing vaphuu ngam tu hun hong bo tu a, dongin Mangkam hong pau hun takciang, kei… Degree ka nga hang Mangkam taw kisai Laymen hi thong tang a, ih ci ngawl tu sia thupi mama tu um ing. Tu hunciang Computer taw nasep hun, Information Communication Technology hun (Age of Knowledge) hun ahiciang hun in manh nei mama zo a, om khawlna mun po ah ciakniak in pau teaptuup cite ngual in hong cimtak tu hun hong theng tatak tu hi. Thina bona, biakkikhopna ah zongh 1:00 hrs (Nai khatsung) ih ci le nai khat sung ma ih man thei buale Gentlemen (Mithupi) te ei kungah hun pakvawt in hong pai nawn ngawl tu hun hong theng peetma tu hi. Tua ahiciang, “Kei koi sungteng ah professional hi a, koisung teng ah Laymen (Amateur) khi ziam? Ih professional na mun telin phattuam natu vawttawng. Ih laymen na mun tel in “Sin tu” hanciam tawng. (IQ, EQ, SQ) a thahat khangnote atu deisakna taw.

Heaktu: Khuavak Magazine 9 na pan a kila hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html