Nikonghong

Home » Leitung » Leo Tolstoy, Pathian Na Thumann Mu Hi, Ahihang Ngaak In

Leo Tolstoy, Pathian Na Thumann Mu Hi, Ahihang Ngaak In

leo 3Leo Tolstoy sia laiat minthang mama Russiami hi. 1828 September 9 ni suak aa, November 20, 1910 ni thi hi. Laiat bek hi ngawl, philosopher, political thinker zong hi si aa, leitung bup ah laiat thiam nasiabel khat in kiciamte hi. Novel, short story le long story tam mama at aa, a laibu theampo sung pan “War and Peace” (1869), le “Anna Karenina” (1877) te 2 sia minthangbel hi. A short story at teng sung pan “The Kingdom of God is Within You”(1894), “Empy drum” (1891), le “The Three Hrmits” (1886) cite minthang mama hi. “God See the Truth, But Waits” sia 1859 kum a at hi aa, hisia ka sim ciang, TOPA Jesu a um Tapidaw kician mama khat ahikatawm ci in ka ngaisun hi.

leo

Vladimir khuaah Ivan Dmitrich Aksionov a kici, sumleangvawt khangno khat om hi. Ama in sumbuk 2 nei aa inn zong nei hi.

Aksionov sia a meal hoi mama, a sam pha mama, a talki ah tawm kiil pian, a thunuam mama khat hi aa, lasak zong a uk mama khat hi. A khangmoi zawk hunlai, nasep ngim a kisak ciang zu ne thei aa, zulaw nei hi. Ahihang a zi nei zawk ciang zu ten in, khat vavei bekma ne hi.

khuakhaal hun sung ni khat, a mealheakte kung haw kawm Nizhny poia ah vanh zuak tu pai a sawm le, a zi in “ Ivan Dmitrich awng, tu zaan ka mang sia mama va aw, tu ni pai awl lai lete hoi tu um thong ing” ci hi.

Aksionov nui valit in hibang zo kik hi, “Nizhny poai sung ka ukpo ka ngamtat thak tu patau na hi bua le?”

A zi in zo kik hi: “Ka patauna he cian bong, ahihang ka mang sia mama thong meak ve, ka mang sungah poai pan nangma hong cia kik ate, na lukhu na suut le na sam theampo kaang siat in mu thong khi ve.”

Aksionov nui laleao hi. “Kamphat mang ze” ci hi. “Ka vanh teng ka khawng siat bua nga-ngawle, letsong pha mama khat zong kong puak bua nga-ngawle, na en ngii-nge aw”

Tuazawkciang, a innkuanpui teng nukset in paikhia hi.

Lamkaalah, a kiheakpui sumleangvawt khat taw kimu aa, zintunbuuk khatah a 2 tung khawm hi. Niangtui a hawp khawm zawk uh ciang khaan kizom 2 ah lum uh hi.

Aksionov sia zingsang ngei mu thei ngeingawl ahibangma, khuavakma a siphuleang hawlpa phong aa, ding kik pai tu in kithoai sak hi.

Tua zawk ciang zintunbuuk nungsang huang sungah a teang, a neipa phong in zintun manh a piak zawk ciang ding pai hi.

Tai 25 bang a pai zawk ciang, a siphute an pia tu in tawlnga hi. Aksionov sia zintunbuuk khat ah toaitang in tawlnga hi. Tawm vei zawk ciang innmai hong pusuak in a guitar tum nuam ahikom khatna lasak hi.

leo 4Tualaitak, Troi khua pan siphuleang khat ngawlok nging vasial in hong theng aa officer khat le ngaalkap 2 hong tuak hi. Officer-pa in Aksionov a mu ciang zuan in thu dong hi. A min le koisung pan pai aa, koisung zuan sawm niziam ci in dong hi. Aksionov in a khualhawna thu cing dildel in son kik aa, niangtui hawp vetawng ci in paa hi. Ahihang officerpa in, thukhel pawl khat dong thua hi. “Zeinitak koisungah ngiak ni? Nangma nguak ni?, kua taw ngiak khawm ni? Tuzing, sumleangvawt khualhaw dang mu na nei le? Banghang zaan zintunbuuk pan khuavakma ding kik ni?”

A banghang peuma tubang thu hong dong valuap uh a hikatawm ci in Aksionov a lungmang mama in a ngaisut kawmma, ahi babang zo kikik hi. Tua zawk ciang ama in “Banghang nguta, damya khat thusit bang hial in thu hong dong nu ziam?” ci in dong kik hi.

Tasiaciang, officer-pa in “Kei sia hiak sung munah Palik mang pipa khi hi. Banghang tubang thu hong dong khiziam cile, tuzaan zintunbuukah na tunpui na lawmpa a ngawng kiat in a thisa kimu tuahang hi. Na vanh theampo tok nuam khi hi” ci hi.

Amate in Aksionov ii vanh theampo tok in zong uh hi. Thakhatthu, officer-pa in naam khat mu ahikom, hisia kua naam ziam ci in dong hi.

A thung sung pan thi a baang niknek naam khat hong dawkkhiat, Aksionov in a mu ciang lamdang sa in liinglawng hi.

“Koibang, thi baang bikbek naam hisia kei thung sung om thei peuma ziam?”

Aksionov in zo kik tu hanciam hi, ahihang a kam pan bangma paukhia thei ngawl in “he…he ngawl khi hi” ci awk vatut in zo hi. Officer-pa in “Na kiheakpui sumleangvawtpa, tuzing a ngawng kiat in a lupna tungah a thisa kimu hi. A that sia nangma ngawl kuama hi ngawl tu hi. Ziintungbuk zong a sungpan kikal aa, apua pan kuama luut thei ngawl tu hi. Noma 2 ngawl kuama dang zong om ngawl hi. Na thung sungah naam zong om aa, na maipuak zong hoi ngawl hi. Koibang thatlum aa, sum bangza laaksak niziam hong son tan”, ci thong hi.

Aksionov in, that vet ngawl khi hi, kiciam ngam liile tu khi hi, ci in nial ngawp hi. Zei nitak niangtui ka hawp khawm uh aa, tuazawk peuma mu nawn ngawl khi hi, ci hi. Inn pan kaken keima neisa rubles 8,000 ngawlpo sum zong bangma dang nei bong, naam hisia zong keima hi bo ci hi. Ahihang a kampau awk ngawp aa, a maitang zong patau in muan ngawp hi, mihing thatpa in a kimawsiat tu lau in patau ngawp ahikom a pum buppi ling vakil hi.

Officer-pa in Aksionov man in, siphuleang tung koi tu in a ngaalkap te 2 sawl hi. Aksionov ii peangte 2 pan khau taw hen in khi aa, Aksionvo lau in khuangai lei ahikom, kam vazak hi. A vanh le sum theampo kilaaksak aa, a naibel khua khatah thong taak tu in kipuak hi. Aksionov sia koibang mihing ziam ci in Vladimir khua vapai uh aa, a nungsang thu kan uh hi. Sumleang vawt dangte le, tuak khuami te in, ama sia nidang zu ne thei aa, zulaw nei ahihang khaaksang ciang mipha suak kik hi ci in son uh hi. Zum kongah thusit thukhen ni hong theng aa, Ryazan khuami sumleangvawt khat thatlum in a sum rubles 20,000 nguksak hi ci in thusit thuak hi.

A zi zong khuangai mama in aci-alaw he ngawl hi. A tate zong, no thei mama lai hi, khat in a nu noai tawp lai hi. A tate teng theampo keng in a pasal thong taakna khua-ah a pasal mu tu in pai hi. Amasa, a pasal taw kimu tu in kiawi ngawl hi, ahihang tam vei mama hesuak a nget vadel ciang kimu sak uh hi. Thong puan sil aa thikkol a kibul, mihing phangawl, ngina ngawlte taw thong a taak khawm a pasal a mu ciang thuak zo ngawl ahikom puuk in ngei hialma butthi hi. A khua phawk kik ciang a tate teng kaikhawm in a pasal hui ah to aa, a thu dong hi. Inn ah koibang nungta aa, bang thu teng piang cite son hi. Bang law tu hi ziam? ci in a pasal dong hi.

“Czar kumpipa tungah ih maw ngawlna zasak ii, hesuak ngen leang”

A zi in, Czar kumpipa tung laithak zo khi hi, hong awlmawk ngawl hi, ci in zo kik hi.

Aksionov in bangma zo kik ngawl in kun in om ngeongao hi.

A zi in hibang ci kik hi,”Ka mang sung na sam theampo kaang ngawp siat kong ci na ciamte lai le? Tasia ni ding bua ii tawlngakikpo lete pha mama tu ve” A pasal sam a khut taw zawt in dong kik hi: “ Vanya, kong it mama ka pasal awng, na zi tung thuman hong son tan, mihing that nang hi ngawl takpi ni?”

“Nang ngangawn na hong muang ngawl thong hi tate!” Aksionov na ci hi. A khut te 2 taw amaitang hum aa, kap vazuk hi. Tualaitak, ngaalkap khat hong tum in hun cing zo ahikom a zi le a tate pusuak sak hi. Aksionov na a zi le tate kimu khaakbek le a khan tawntung atu in nukset hi.

A zi le tate cia siat zawk ciang, Aksionov in a thuakna teng ngaisun kikik aa, a zi ii muanlaakna kampaute a ngaisutna sungah bo thei ngawl in suak kikik hi. Ama le ama hibang in kici hi, “Thumann tatak a he Pathian bekma om tuak thongta aa, Pathian tung bekma ko thei natu om lai, hesuakna zong Pathian tung ngawl kuama tung pan nga natu lam om nawn ngawl”.

Ciang, Aksionov in kuama tungah hesuak nget nawn ngawl tu le, Pathian tung bekma thungen in kal suan tato tong ci in a thiangtho in khensat hi.

Aksionov maw hi ci thukhensatna taw Kum 26 sitset Siberia kipuak hi. A samte vuk bang in hong kaang aa, a muukmulte sau thiapthuap in hong ngawm thilthel hi. Nuina le maituina in ama nusia hi. A kheal zong kun khiukheu in a lamseo ciang hai mamazo hi. Kuama taw thu son mameal ngawl in nui ngei nawn ngawl hi, ahihang Pathian tungah thungen tawntung hi.

leo 2Aksionov in peangdap vawt daan thong sungah sin in, sum tatawm thalaw thei aa, tua sum taw “The Lives of the Saints” (Mihing Thiangthote ii Nuntakna) a kici laibu lei hi. Thong sungah khuavaak hun sung tua laibu sisim hi; Ciang Nipi ni sim Lai Thiangtho sin aa, choir sa hi; a aw pha mama lai hi.

Aksionov sia thinsia nei meal ngawl ahikom, thongcing uliante in dik sa mama uh aa, a thong taakpuite ii zaatakna zong nga hi. Amate in “Grandfather” (Pu) ci in sam aa, “The Saint” (Mihing pha mihing thiangtho) ci in zong na thei hi. Thong taakte in thongcing uliante tung son nuap nget nuap a nei uh ciang Aksionov in sonsak, ngensak uh hi. Thongtaakte luang thusonpipa suak aa, thu kinialna kilem ngawlna a nei uh ciang, thukhenpi in zangh uh hi.

A innkuanpuite tung pan bangma thu zaakna nei ngei ngawl aa, a zi le a tate thi ziam nungta lai ziam ci zong he ngawl hi.

Hunkhat ciang, mihing phangawl pawl khat thong taak tu in theng hi. Nitak khuamial ciang thongtaak masate in hong thengthakte paupui in, koisung khua, koisung ngam pan nuziam, banghang thong taak nuziam, ci in dong siasua uh hi. Aksionov sia kiing khatah to aa, amate thuson a ngaal pan ngai hiithiat hi.

A thengthak khat sia, a thatang saang mama aa, kum 60 kiim bang hi pheang in haat tuak mama lai hi. Ama in mat a thuakna thu son hi.

“Lawmte awng,” ama in son hi, “Siphu leang tung a kikhi siphu khat khau suut in ka laak hu thong hong taak sak ziu thong hi. Inn ka thet mameang nuamna khat om tana, siphu a zangh pak bek khizam, inn thengpo leang siphu sia piakkik a sawmma khizam, ciang siphu neipa zong keima lawmpa ma hitana, kei a ngu in kingaisun ngawl khi hi, ka ci ma ve, amate in ‘Hi bo’ ngu ni hi, hong ci vatan. Nidang ka khang moi zawk lai hiaksungah thong taak thei natu, mawna khatvei vawt tha ngei ing. Tua hun lai hong kiman ngawl ate, tu ciang a thupi ngawl thu khat taw hiaksung thong taak tu hong kipuak… Eh Siberia theng ngei bong ka ci sia leilotthu hi, khat vei theng ngei khi hi, ahihang ngei om ngawl tawm vei bekma”.

“Koisung khua pan ni?” khat in dong hi.

“Vladimir khua pan. Ka pa sia tuak khua pan khang. Ka min Makar hi aa, Semyonich zong hong kina”.

Tasia ciang Aksionov zong kin mama aa, “Sumleangvawt Aksionov na he tha luilam le? A innkuanpuite a nungta lai uh le?” ci in dong vabuai hi.

“He kisa, he lalawm khi. Amate hau aa, nuam sa mama ve, a pa uh sia eima bangma Siberia ah thong taak hi tuak, Pu awng, nang e, hiaksung banghang theng ni?”

Akisionov in a thuak kamsiatnate a son kikik tu nuamsa ngawl in uk ngawl hi. A kam pan “Hmm” ci mau in, “Ka mawna hang kum 26 sitset thong taak khi hi” ci ziao hi.

“Na mawna bang zia?” Makar Semyonich na dong vatan hi.

Ahihang Aksionov na hibang zo kik ziao hi, “Ka thuak tu kilawm bang athuak hi thong kizam!” Ama in bangma son thua nawn ngawl hi, ahihang a lawmdang khat in Aksionov ii Siberia ah thong a taakna thu son hi.

Makar Semyonich na, a taangthu a zaak ciang Aksionov en phei aa, ama khupte 2 a khut taw saat hi, taciang, “Lamdang sa ing! Lamdang heau sa ing! Pu awng kum bangza pha zo niziam?” ci in dong hi.

Aksionov thu a sonpa in, banghang lamdang sa niziam, nidang mu ngei, he ngei niziam ci in a dokle, ama in zo kik ngawl in: “Hiak sung mun luilamah ih kimu sia, lamdang lawlawm sa ing!” ci vavan hi.

Aksionov in, ama awsuak daan a ngaisut ciang, mihing thatpa he tuak sa hi. Tua ahikom, “Semyonich awng, nangzong ka tuaksiatna thu za ngei ni ziam? Tua ahibuale, kei hong mu ngei niziam?” ci in dong hi.

“Ka thuzaakte nuizaak hui lei, thuak zawk pangbo, leitung sia ih uk tekpo thu kison siasua thong. Ahihang khuangei mamazo hitana mangil siat zo ing”

“Akua na that zaw hi, ci in za ngei na hi le?” Aksionov na dong hi.

Makar Semyonich nui in zo kik hi: “Nam a kimuna thung neipa ma hi lel ngawl tu ziam! khanglui paunaak khat sungah ‘Khat papo in nam a phual le, mat a thuak mateng nguta in kise thei ngawl hi’ ci ve. Na lukham nuai, na thung sung pan kua na, na mut hong phawng ngawl in a nam hong koi thei peuma tu ziam.”

Ama thuson a zaak ciang, ama in mihing thatpa hi nanaak tu ci in Aksionov thin sungah ngaisun hi. Ama ding in paikhia hi. Tua nitak zaan khuateak Aksionov mu thei ngawl hi. A om nuam thei vet ngawl in ngaisut tuatuam haucip hi. Inn pan khualhaw tu a din ni zaan a zi taw a pauna teng a mittha ah mu hi. A maitang tatakma a om bangin mu hi. A zi ii meal le mittangte zong mu sitset hi. A zi nui le pauna aw te zong za hi. Tuazawk ciang a tate mu hi, no thei mama lai hi, a mu khaakbel hun bang lian a mittha sung mu hi. Khat in puantual liitliat sil in a dangkhat a nu noai tawp in mu hi. Tuazawk ciang, ama le ama a khangmoi hunlai bangza maitui in, nuamsa khiziam ci thute a ngaisutna sung suak hi. Mat a thuak tu ni zing zintunbuuk mai ah nuamtak in guitar a tum phawk kik aa, bangzata in suaktakna nei aa, nuam kasak mama hunte hi thong ziam ci in ngaisun hi. Palikte ii mat a thuak lai mihon mai ah cimaw in a buaina teng zong a mittha sung suak aa, zumkongah thu sit athuakna le kum 26 sung Siberia thong sung nisim a nuntak dante a ngaisutna sungah suak tato hi. A khaakbel ama le ama a kithatlum ngam tuza ahi hunlam phawk hi.

“Hisiapa ii hong vawt hi vingveng thong ngawl khiziam!” ci in ngaisun aa, Makar Semyonich tung a thin uk citak uk in, ka thuak kik mai zong phamaw bo phulam kik nuam ing, ciza dong ngaisun hi. Zan khuateak tatsat ngawl in thungen hi, ahihang thin nuamna nga zo tuan ngawl hi. Sun hun ciang Makar Semyonich omna a neak thak ngawl tu hanciam aa, ahitheiza en ngawl tu hanciam hi.

Tubang in ni 4 hun hong bo hi. Aksionov zan mu thei tuan ngawl aa, aci alaw tu he ngawl in thinngim lungkham in om hi.

Zan khat mu thei ngawl ahikom lam a seo le thongtak khat ii lupna sangpan lei le suang hong kiniil vakhial mu hi. Lamdang sa ahikom en phei vakhial hi. Tasiale, leinuai dum kitona sung pan Makar Semyonich a boksa in hong dawkto mu liaan hi. Aksionov a mu ciang ling keak hi. Aksionov in bangma son ngawl in taisan tu a kipatle, Makar Semyonich in a khut pan kai aa, dum tou in taiku tu ka hanciam hi ci in son hi. Nisim dum tawna pan leihui le suangte boot sung khol in sunhun ciang huan sung naseam tu hong paisak ciang ka vawkku hi ci in son hi.

“Kuama tungah son heak in, puhuai awng, tuale nang zong suakta tu ni hi, nong khia peuma le, hong kiman tu hi, ahihang, hong kimatma, nangma hong thatlum masa tu khi hi” ci hi.

Aksionov na a ngaalpa en in a thin uk vaving ahikom, a ci a sa liing vakil hi. A khut dokkik in, “Kei suakta nuam tuan bong, kei nong thaalup zong kul bo; tuma kum tammama hunlai hong thatlum zo ni hi! kong khiak tule khiak ngawl tu sia, Pathian hong sawl babang hivak.”

Azing ciang huan sung naseam tu pusuak hun ciang, thongcing ngaalkapte in boot sung pan leihui huan sungah kinawnku ahihunlam phawk uh hi. Thongtaak theampo kicheck aa, ngaalkapte in leidum kitou mu hi. Governor-pa hong pai in dum a touku sia kua ziam ci in thongtaak theampo dong hi. Kuama in ka he ci ngawl hi. A he om le zong Makar Semyonich kiita ahikom, son ngam ngawl tha tu hi. Governor-pa in Aksionov sia midik mipha ci in he ahikom, khaakbel ciang Aksionov dong hi.

“Nang sia, thumann a son tawntungpa ni hi; dum hisia kuana tou ziam, Pathian mai ah hong son tan?”

Makar Semyonich a maw ngawl bang nginguma governor-pa en in, Aksionov en vet ngawl hi. Aksionov ii muk le khutte ling ngawp aa, ngei hialma pau thei ngawl in om hi. A ngaisutna sungah, “Ka nuntakna hong susiapa banghang hun tu khiaziam, ama ngamtatna ama thuak tu hi lel, ahihang son leang, ama kivawtsia tu aa, kei ii muanmawk thathong sia a khial zong hi thei cileang, kei atu bang phattuam om na tu ziam?”

“Pasalpa awn,” governor-pa au laleo hi, “Thong pang nuai ah dum tou kua ziam? Manntak in son tan?”

Aksionov na Makar Semyonich sang luheak in, “Hong son thei ngawl tu khi hi, topa awng, Pathian na son ngawl tu in hong dei hi! Nangma khut sung om khi hi, nong vawt nop bang in hong vawt tan.”

Governor-pa in hanciam in dong kikik hikale, Aksionov in son tuan peang ngawl ahikom, khensatna bangma vawt thei ngawl in a thu man hi.

Tua nitak Aksionov mu thei ngawl in a lupna tungah a om laitak, khat hong pai vakhial in a lupna nawlah to hi. Makar ahihunlam, khuazing sungma tel hi.

“Kei kungpan bang dei lalai ni?” Aksionov na dong hi. “Bang hi tu hong pai ni?”

Makar Semyonich pau ngawl in thiim diide hi. Hitana, Aksionov tho in “Bang uk ni? Taikhia, ahibuale, thongcingte sam tu khi hi!” ci hi.

Makar Semyonich in Aksionov tawm neak phei in, “Ivan Dmitrich awn, hong maisak tan”

“A bang hong maisak tu khi?” Aksionov in dongkik hi.

“Sumleangvawtpa thatlum sia keima khi hi. Atatak se nangma zong thalup hong sawm hiveang mihing aw ka zaak ciang, lau kahikkom, ka naam na vanh sung nusia in bangkua pan leang aa tai khi hi.”

Aksionov a son tu he ngawl ahikom, thiim diide hi. Makar Semyonich lupna tungpan tuak aa, suat tungah khup din in, “Ivan Dmitrich awng, hong maisak tan, Pathian na-itna taw hong maisak tan aa, sumleangvawtpa a thatlum keima khi hi ci in vuankhan tu khi hi, nang inn naciakik tan” ci hi.

“Tubang son tu sia nang atu ol mama hi, ” Aksionov in ci hi, “Ahihang, kum 26 sitset thuak valeak zo thong khi hi, inn ka cia kik hang, ka zi le thi zo aa om nawn ngawl, ka tate le na, hong tel tu hi vet nawn ngawl, koisung pai tuan thong tu khiziam…”

Makar Semyonich ding kik ngawl in, a lutang le suat khensuk hi. “Ivan Dmitrich awng, hong maisak tan, dan pia in hong kivel vadeap lai saang, na meal kong et ciang thuaklaa zaw khi hi… nang na kei hong ngum in hong hun lalai ni hi. Christ min suang in mihing taktai ngawl kei hong maisak tan” ci in hesuak ngen in kap vazuk hi.

Ama kap vazuk a zaak ciang, Aksionov zong thuak zo ngawl in kap hi. “Pathian na hong mai sak tu zam,” ci hi. “Keima zong nang saang ase zakhat mihing pha ngawl zaw ka hi nginge na kihe bo” ci hi. Tasia liaan zawk ciang a thin a lung vang in hong zaang hi. Inn le lo phawk in a lung zuan tawntung bo hi. Thong pan pusuak in mundang a pai nopna thinte bo vingveng in, a nuntakna tawpkhak hun bekma ngaak in om tu a thin sungah piang hi.

Aksionov in banbang ci hikale, Makar Semyonich in a mawna vuankhan hi. Ahihang, Aksionov suatakkik natu order hong thet hun in, Aksionov leitung nusia in thi zo hi.

Thawngno

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,568 other followers

Blog Stats

  • 91,686 hits

A Lui Te

Live Trific

google-site-verification: googled172884ff34d55c0.html