Nikonghong

Home » Biakna » Pawlpi Lian Le Pawlpi No

Pawlpi Lian Le Pawlpi No

Koisungpo ahizong a lianzaw theamp a phazaw hi papai tuan ngawl hi. Mitdal screw a kol hun ciang screw driver ano ih zong masa hi, screw driver liante kizangh thei vet ngawl hi. Pawlpi zong tubangma hi. TOPA Pathian in pawlpi liante a zakna mun a tuam hi. Pawlpi note sep zawk ngawl thu pawl khat pawlpi lian mamate in seamzo hi. Tabangma, pawlpi note in pawlpi liante sep thei ngawl thu pawlkhat seam thei hi.

America ngam ii pawlpite omzia encian leang, atamzaw sia pawlpimi 500 nuai phabek hi. A kicianzaw in sontu hileang, American pawlpi theampo ii zakhen 35% sia pawlpimi 100 pan 500 pha hi. Pawlpi theampo ii Zakhen 60% sia pawlpimi 99 nuai phabek hi. Tuni mega church a kici, pawlpi lian mamate ah a kikhawm pawlpi mi sia, American tapidaw theampo ii zakhen 2.5% pan zakhen 5% bang hibek hi. Zakhen 95% pan zakhen 97.5% sia pawlpi no tuatuam te ah pawlpimi hi zaw nginge hi. TOPA Pathian ii ngam le lei atu pawlpi note bangzata in thupi ziam cisia ih phawk, ih teltu thupi mama hi.

TOPA Pathian in a phusa pawlpite pawlpi no in phut aa, thupha a piak hunlam a nuai aa thu 3 teng en leang kitel hi.

1: Innkuan kipezopna (Family Connection): Pawlpi mi khat le khat kilaklaw mealheak vai kipezopna, kiitna, kikhualna le kideisakna cite sia pawlpi lian mamate sungah a omza saang pawlpi note sungah om zaw hi. Pawlpi note sia, innkuan 4 le 5 bang taw kal suan uh aa, pawlpi mi theampo khat le khat a kihe, a kitelsa hi siat hi. Choir member khat ii lasak thiam ngawl khawng, pawlpi upa khat ii tungah sonku vadul lete, a zi a pasal tung a ngen khawng na hi nginge hunlam a kitel ngawl zong hi thei hi.

Cinopna bulpi in pawlpi note sia pawlpi lian mamate saang innkuan vai, khat le khat kiitna, kikhualna tee zawk ngawl in om zaw in. Tua ahikom, pawlpimi sung ngupna a kician ngawl lai khawng om tha zazen hile zong, pawlpi mi bup in lam mann, thutak hilcian natu chance tam mama om hi. Pawlpi lian mamate sungah ngupna kician ngawl lai khawm om hile zong, kuama kiawlmawk ngawl in, tavuan a latu telmeal om ngawl in ki aw-awn thei hi.

Jeol Osteen Pawlpi

Jeol Osteen Pawlpi

2: Pastor le pawlpimi kipezopna (Friendship with the Pastor): Keima muna bang hile, hi thu sia pawlpi note bekma ii nei thei thu hoi mama khat hi. Pastor ka suakma ka pawlpi lui sia pawlpi mi a tam mama mega church khat ahi hi. Ka pastor luipa ka son siat nopna hi bo, ama sia a thiam mama, Pathian ii zak mama tucing lampui thiam mama khat hi cisia ka tel hi. A kikhawm tam lei ahikom hong kikhawm thak leangnate teltu hetu cithadaa, koma pawlpimi tetek zong ka kitel siatzo bua hi. Tucing pastorpa taw khutlen a kinukset ngei ngawl pawlpimi bang tam mama hi. Pawlpi note ah Pathian thu hong hil Pastorpa taw a kuamapo khut kilen in thu kikum in, thu kingetsak in om thei hi. Pawlpi note ah pawlpi keam pastor sia pawlpimite taw a kibangin nungta aa, pawlpimite ii sua ni, lungdam ni, nop ni le daa ni theampote ah lungdam khawm thei tha pia thei hi. Mega church pawlpi lian mamate ah tubang om thei ngawl hi.

Congressional pawlpi pastor Washington Gladden na, tuma kum 100 kiim hunlai hibang ci ngei hi. “Pulpit cisia pawlpimi theampo atu hi, hitana, pulpit sia pawlpimi theampo ii nopna, daana, khuangaina a omsim, pawlpimite omna mun ah vapai, vahaw tu aa, thapia in vaipuak a lak zawktu kisam hi” (Gladden, The Christian Pastor, Scribner 1911). Hi din mun sia pawlpi no ah a lampui tucing syate bekma in zuizo hi. Pawlpi lian mama mega church te sia, Internet le online khawng pan thuhilnate ngai in thalaak taw kibang hi. Hong sonkhiat, Thaa atu hong thapiaknate kingai thei, thaa kila thei aa, eima personal kisapna tatak dong muibun vacin in, hong ki-serve zo ngawl hi.

First Baptist Church of Jacsonville, Florida

First Baptist Church of Jacsonville, Florida

3: Mihingte taw kipezopna (Friendship with others): Koisung koisung pawlpi ih paizong, pawlpi note in, leangna thak hong kikhawmte maitui in, muak in paupui uh aa, nuamtak in muak zaw tawntung hi. Hi thu sia a simple mama thupaizia (simple logic) khat hi. Pawlpi no pawlkhat sia amate teng bek nuam sa in a puami awlmawk meal ngawl zong om thei hi. Tubang ih hi ngawltu thupi mama hi. Tubang hibuapo ii, leangna le hong kikhawm thakte itna taw nuamtak in muak thei, paupui thei leang, pawlpi note sia kiim le paamah ngupkhiatna thu son natu ahizong, TOPA itna ih lakna ahizong pawlpi liante saang muibun zaw in, kician zaw hi. Pastor in hong kikhawm theampo he in, hong kikhawm theampo zong in tha-an kician tatak in ne thei zaw hi. Ngaisun tatak leang, Pathian ii itna le ngupkhiatna thu kiim le paamah kician tatak in a hawmkhiazo zaw tu in pawlpi note tungah TOPA in vaipuak hong suan a hi ngingena thu kimu thei hi.

Pathian zak Pawlpi kician hi natu, pawlpimi tam mama kisam tuan ngawl aa, sum le pai financially in ngawptu zong kisam tuan ngawl hi. Pathian ngam atu a kipia ngam, naa a seam nuam mihing tawm bekma kisam hi. Banghangziam cile, TOPA in Lai Thiangtho “…. Ka min taw nii le thum kikhopna sungah amate taw ka om khawm hi,” (Matt 18:20) hong ci hi.

Thawngno

Note: Chris Surber ii at “Who Says Bigger Is Better? 3 Reasons I’m Convinced God Works Through Small Churches” ka doppha hi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html