Nikonghong

Home » Business » Namngim Manh Le Leitung

Namngim Manh Le Leitung

Namngim

Crude oil (namngim) manh leitungbup taakcitak taak ahikom ngam kumpi pawlkhat cimaw a, consumer tam mama in nuam sa vazai hi. Namngim manh khan le kiam sia a zanghbel ngam ahi, US le Sen ngam tungah tam mama kingaa hi.

Sen ngam ii kal suanzia zui in namngim manh khan hong kipat sia 2001 pan kipan hi. Sen ngam sipuazi haat tu hong kipat kiim 2001 kum in WTO (World Trade Organization) hong tum hi. Tuama namngim barrel 1 $ 20 kiim a manh sia hai ngawl barrel khat $ 100 dong khangto vahen hi. Tua hun lai Sen ngam ii namngim zakza sia, Japan le UK a kingawm saang hong tam zaw ahikom, namngim zii (oil market) ah namngim khanto kipatna thubulpi khat hi. 2013 kipat ciang Sen ngam ii namngim zakza USA saang hong tam zaw leleo a, tu laitak leitung namngim tam a leibel ngam hong suak hi. Sen ngam sung a zak namngim theampo ii zakhen 60% sia ngamdang pan a lei hi.

Ahihang Sen ngam sipuazi upmawkza khang ngawl ahikom, 2014 bo kuan khawng pan kipan Sen ngam ii namngim kisapna hong kiam hi. ANZ research te ii sonbang tatak ahile, 2015 sung Sen ngam ii sipuazi zakhen 6.8% bek khang tu ci a, tunung a muanmawk zakhen 7.4% saang tam mama tawm zaw hi.

Sen kumpi ngaisutna ah, 2009 pan 2013 kilaklaw investment sepna theampo sungpan, pawlkhat ahi, $ 6.8 trillion bang taw nasepna sia tel meal om vacin tatak ngawl in mu hi. Pawl khatte sumcip lai hi tuak hi. Motor car market ah a a kilei kumsim zakhen 10% bang a khang tawntung, 2014 sung zakhen 5% khang in khawng bek hi.

2014 December tha IEA ii oil market report ah namngim kisap (demand) sia, Sen ngam bek hingawl in Europe le Japan zong ah nasia tatak taak ci hi. Namngim manh taak ahikom, Sen ngam ii siipuazi kiamsuk tam mama nuamtuam tu ci in leitung business sang thiamte in son hi. Bank of America Merrill Lynch te ii sonbang ahile, namngim manh zakhen 10% a taak sim Sen ngam ii GDP zakhen 0.15% khang ci a, IMF (International Monetary Fund) te na, namngim manh taak hu, Sen ngam ii tu kum sipuazi GDP zakhen 0.4 pan 0.7 dong khang sakzo tu ci hi.

2013 sung Sen ngam na namngim metric ton 280 million lei a, $ billion 220 manh hi. Tu sung a kiamsuk namngim manh taw lei pheang tu hile, $ billion 30 bang nuamtuam tu ci in, Xianmen University ii China Center for Energy Economics research director Lin Boqian na son hi.

Namngim manh taak a meetlaw sia, nisim motor atu datsi lei consumers te, transportation company te hi a, a suplaw sia, namngim taw kisai sum zongte energy company te hi. Namngim manh le vanh manh tuatuam taak hu, Sen ngam in a sum manh a khep ngawl hong phamaw hi. Abosa kum 3 sung Sen vawt vanh manh theampo zakhen 10% kiim bang taaksuk hi ci in Australian Financial Review na son hi. Sen ngam inflation tawm mama aa, zakhen 1.5% bekma ahikom, vanh manh a kheam buale, deflation tu lau huai mama hi ci hi.

Politic point of view pan en leang namngim manh taak sia, western countries ahi, US le western Europe ngam teng a thawmvau tawntung ngam teng ii zawmna, haksatna hi. Namngim manh taak hu a cimawbel teng sia Russia, Iran, Saudi Arabia le Venezuela ci teng hi a, hi ngam teng ii ciimawkna in a muanhuai zaw leitung (safer world) hi ci in politicians te in ngaisun hi. Namngim manh taak hu a noptuamlaw ngam teng sia USA, EU, Japan, China le India ngam teng hi. Tutung namngim manh taak hu, US le Sen ngam in tu mama in tam mama noptuam nga zo tu hi ci in IEA na son hi. Ahihang kiam suak ngawl het tha tu hi, tawmvei zawk ciang hong khang kik tha tu hi ci in son hi.

TN
Dopha: The National Interest

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html