Nikonghong

Home » Biakna » Leitung Biakna Lian Te Thu (Islam)

Leitung Biakna Lian Te Thu (Islam)

Islam te nah Christian te hong tel zawk ngawl bel thu khat om hi. Jesu um in saang po leang ngupna kinga thei ci thu ahi hi. Islam biakna ah ngupna sia mihing te ii upna haat maw haat ngawl, apha vawt maw asia vawt, ngamtat pha nei maw nei ngawl cite theampo taw thu khen hi. Pathian sia itna taw kidim in maw maina hong pia nuam hikale, ngamtatna pha nei ngawl mihingte ii mawna mai sak tuan ngawl hi (Yahiya Emerick, President of the Islamic Foundation of North America)

Leitungah biakna lian bel sung khat ahi Islam biakna taw kisai kikum tawng. Amate ii taangthu, upna le kalsuan zia te ih kikum tu hi. Islam ahibuale Muslim ci in ih heak biakna sungah thu ummi leitung buppi ah 1.4 pan 1.6 billion kiim bang om tu in kium a, thu ummi a khang bel biakna hi si hi. America ah Islam pawlpi mi 5 pan 7 million bang teang tu ci in kison hi.

Taangthu
Islam biakna hong piankhiatna founder pi sia Mohamed (AD 570-632) hi. Tuhun Saudi Arabia ngam Mecca khuaah suak a, Bedouin nam pan hi. A pa thi zawk ciang a pu taw nungta khawm a, tucing nasep pan sumleang mualsuak mama a suakto khat hi. Muslim te in ama sia vangtung pan hong tuak suk ci in saang ngawl a, vantung lalaang ahibuale ngumpa tanpa zong ci ngawl hi. Pathian sawltaak prophet a khaak bel khat hi ci uh hi.

Islam ci kammal sia Arabic kam hi a, “kipumapp” ahibuale, “ih uk theampo nusia in Pathian tung kiapp” a cina hi. Islam sia biakna min hi a, Muslim sia Islam biakna a zuipa/nu cina hi. “Buddhism” le Buddhist taw kibang hi.

Muslim te ii upna ah, Mohamed kum 40 kiim a phaak ciang Allah pathian kung pan mangmuna mu ci hi. Vantung lalaang Gabriel kungpan mangmuna thusuak tam mama a nga zawk AD 622 kum ciang Islam biakna phut kipan hi. TOPA Jesu pian zawk kum 622 kiim ciang Islam biakna piang cileang ih tel daan kician zaw tu um ing. Muslim te nah Mohamed sia biakna thak khat phutin kipan ci in tuat ngawl a, Abraham, Moses, David le TOPA Jesu te tungah Pathian ii son thute a puapha tu, a thian sua tu, Mecca khua le kiim ah om mihing te ii biakna sang lampui pipa, ahibuale Pathian tung pan hong pai prophet khaak bel ci in um hi. Mohamed sia biakna sangah siikan nasia mama a, midangte aana vet ngawl in ci vadeap, lang vadeap thei ahikom, Mohamed le nungzui te ii pawlpi sia tua hun lai Arabia peninsula sungah biakna tatuam le ngeina tatuam atu, a lipkhap huai mama pawlpi khat suak hi. Hun khat athet ciang Mecca khua ii saksang tai 280 khualana Medina cina munah kikhiin uh hi. Kum 8 zawk ciang Medina pan Mecca theng suk kik a, tua zawk ciang Islam biakna sung mihing tam mama tum hi.

AD 632 kum Mohamed thi zawk ciang Islam pawlpi khen 2 in kikhen a, Sunnis le Shi’as pawlpite hong piang hi. Shi’as pawlpi sia a taikhia pawl hi a, tuhun dan in ci leang a piangthak pawl hi. Shi’as te ii kal suan zia sia khaupai zaw, ngaat zaw bek tham ngawl, naing-ngan-zi kiukna theampo ngangawn biakna sang in lencip nuam hi. Ngam lutang, kumpi sia biakna khutnuai ah om tu hi a cite hi. Sunnis Muslim te ii upna sia biakna le kiukna atuam in kikhen tu hi ci hi. Tuhun ciang Sunnis Muslim sia Islam bup ii zakhen 85% pha a, a tam zaw hi. “Sufism” a kici pawlpi no mama khat zong om lai hi.

Islam biakna sia Pathian kung pan hong pai a maan bel, khat bek a om biakna hi a, tua ngawl biakna dang theampo sia Pathian thu a lelalam a mann ngawl in a saang a zui te hi ci in um uh hi. Judaism le Islam biakna a kibang pawl khat om a, anuai ateng hi.

  1. Pathian khat bek om
  2. Vantung lalaangte om
  3. Vantung ngam le Hell ngam om
  4. Pathian kamsaang prophet te thusim in zakta
  5. Taang lai a kiat Pathian kammal laizialte thusim zakta

Islam le Christian biakna a kibang pawl khat

  1. Jesu sia ngaknu thiangtho sung pan piang
  2. Pathian hong tuak tu a, thukhenna hun om tu
  3. Vantung ngam le Hell ngam om

Islam upna laingil pawl khat

  1. “Allah” pathian um
  2. Vangtung lalaang te om hi ci in um
  3. Allah pathian kammal “Quran” laithiangtho, “Sunnah” a kici prophet te zui tu thubu, “Hadith” a kici Allah pathian ii mangmuna a piak babang in Mohamed ii at thubu teng um hi. Tuteng zawk ciang, “Torah” a kici Abraham ii at Lai Thiangtho (Pianciilna, Pusuana, Thiampite, Ngamsung Vakna), David kumpipa at “Psalm Late” le “The Gospel of Jesus” zong um in zangh hi. Ahihang tuhun Christian te ii zak Lai Thiangtho sia a khial tam mama taw kidim hi ci in um hi.
  4. Jews le Christian te ii prophet in a saan Abraham, Moses, David, Solomon, Job le TOPA Jesu sia Pathian kungpan hong pai prophet mihing thiangtho te hi ci in um.
  5. Ni khaak bel hun ciang Allah pathian hong tuak tu a, thukhenna vawt tu ci in um.
  6. “Qadr” a nak Allah pathian ii mong nei ngawl thuneina um.
  7. Thina zawk ciang vantung ngam ahibuale, Hell ngam kitheng tu ci in um

Zui tu thu 5

Muslim theampo ii zui hamtang tu kisam a sak thu 5 om sak hi.

  1. Pathian le Mohamed kingawm in Pathian khat ci upna (oneness of God and Mohamed) “Shahadah”
  2. Ni khat sung 5 vei thungetna (Ni sua mahiat, zing sang, sun 12 zawk, nitum mahiat, khua ziin zawk) “Salah”
  3. Mizawngte piakhiatna taw huna “Zakat”
  4. Islam calendar ii tha 9 tha “Ramadan” tha sung ni sua hun pan ni tum dong an tang thungetna “Sawm”
  5. Mohamed sauna Mecca khuaah pathian bia in hawna. Sum nei ii ci a dam naale, khan sung khatvei tatei Mecca khua ah pathian biak tu pai hamtang tu. Meccan khua a pai uh ciang amate le amate kithiansua ci in kingaisun hi. “Hajj”
Mecca khua  Masjid al-Haram mosques leitung ah a lian bel. Mihing million 2 hun khat sungah biakpiakna vawt thei

Mecca khua Masjid al-Haram mosques leitung ah a lian bel. Mihing million 2 hun khat sungah biakpiakna vawt thei

Islam biakna taw kisai heaktu kilawm thu pawlkhat
Tuhun Muslim te kilaklaw a kinial bel uh thu khat sia “Jihad” ii khiakna phen dan hi. “Jihad” ii direct khiakna sia English in cileang “Struggle” a cina hi a, Sizang kam in “kisan” “hanciam” “phul” cina hi. Kilemna a lungngul (peaceful) Muslim te in “Jihad” ci kammal sia, “Allah pathian ii thuhilna babang ih zui zawk natu haksatna ziaetna theampo phul in hanciam tu” ci in phen hi. Amate ii siisan laithiangtho kammal sia Quran laithiangtho sungah a kiat “Allah pathian ii vawtsa mihing te ii nuntakna sia kuama in thu nungzuina taw sim ngawl that thathong thei ngawl tu hi” (Quran 6:151)

Ahihang radical Muslim (piangsual muslim) te in “Jihad” sia amate le amate Allah pathian tungah a kiap nuam ngawl thuum ngawl mihing te taw kisimna, kiphulna, kibuaina ci in phen hi. Amate ii siisan Quran laithiangtho kammal sia “Thuum ngawl mihing theampo na mu na papo ah sim vun” (Fight the unbeliever wherever you find them) ci kammal ahi hi.

Islam biakna sung tum natu “Shaha dah” a ci, tetti panna no khat taw kitum thei ziau hi. Hi Shaha dah sungah Allah pathian sia sim ngawl pathian dang a om bua hi, Mohamed sia Pathian ii kamsangpa hi ci in tetti pan tu hi tuak ziau hi. Shaha dah tetti panna vawt po le te a bosa hun sung na khialna, na mawna theampo Allah pathian in hong maisak hi ci in um uh hi. Islam biakna ii “Born again” vei ci tu ziam maw hi vak. Quran 2:254 ah mihing khat papo sia aana zangh in Islam biakna sung tum sak ngawl tu nu hi ci in kiat ci thu zong a tepte huai thu khat ahi hi.

Biak piakna
Nisim biak piakna a vawt uh ciang Mecca khua omna sang mai ngat in kun in bok in biak piakna vawt uh hi. Nipi zawk ninga nitak sim Bali (mosques) pai in biak piakna vawt uh hi. Mosques (bali) ii khiakna sia kun in bokna mun hi. Mosques ci kammal hong piankhiatna taangthu dan in a kison khat om hi. Spain kumpipa Ferdinan le a zi Isabella nah Muslim biak piak vawtna biakinn te thokaang (Mosquito) no khutme taw henmeakcip a, thalup bang in sutham siat tu khi hi ci in a thawmvau pan kipan mosques ki kammal hong piang ci hi.

Ni thupi pawl khat
Islam biakna ah a thupi bel ni 3 om hi.

  1. Ramadan (An tang thunget tha)
  2. Al-Hajj (Isaac ii O Abraham ii a salnu taw a tapa Ismail, Allah pathian nah ahu akep thu teptena taw a vawt uh hi a, hi hun sungah mihing zawng a cimaw te hu uh hi.
  3. Mawlid an-Nabvi (Prophet Mohamed ii suak ni)

Christian taw a kilamdanna

  1. Lai Thiangtho (Holy Bible) zangh ngawl a, Quran laithiangtho zangh hi. Allah pathian ii piak khialna mal khat zong a kihel ngawl ci in um uh hi. Mohamed ii at Hadith laibu te zong zangh hi.
  2. Allah pathian sia pathian khat bek hi a, thum ngawm pathian khat hi ngawl ci in um uh hi.
  3. Jesu in naa lamdang tam mama lak a numei thiangtho sung pan suak hi, ahihang pathian kung pan hong pai pathian tapa hi ngawl hi. Thinglamte tungah kithatlum takpi ngawl hi. Antichrist sim tu in hong tuak suk kik tu hi ci in um uh hi.
  4. Mihing theampo nah tha kinei hi. Pianpui mawna cibang om ngawl hi. Ih suak tuungin mawna kinei ngawl lai hi. Ahihang ih pumpi thi le sa pian zia le nganhing bang ngaisutna ih neite hangin maw nei mihing kisuak hi ci in um uh hi.
  5. Mihing theampo Allah pathian tungah kiapp thiang bup tu a, ih nuntak sung buppi Allah pathian atu naa seam tu hi.
  6. Ngupkhiatna sia Allah pathian bangza um ziam ci thu le, Islam thukhamte bangza zui zo ci thu zui in hong kikhensat tu hi. Ih mawna te sil thiang natu, “tawba” a kici maw silna vawt tu hi.
  7. Vantung ngam sia a omnop huai mama mun hi a, Islam thu ummi te atu hi a, hell sia a lau huai, a lipkhap huai mama mun hi a, maw neite pai natu mun hi.

Thawngno

Heaktu: Len Woods ii at “Handbook of World Religions (A bible-based review of 50 world faiths” ka doppha hi.

Advertisements

1 Comment

  1. Daniel Lian says:

    “Torah” a kici Abraham ii at Lai Thiangtho (Pianciilna, Pusuana, Thiampite, Ngamsung Vakna). “Torah” sia Moses ii at a hi zaw tu? lungdam!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,038 hits

A Lui Te

Live Trific

google-site-verification: googled172884ff34d55c0.html