Nikonghong

Home » Leitung » A Ette Huai Japan Ngam

A Ette Huai Japan Ngam

Thuklai Christian Centenary | By Pa Khua Hen Pau (Japan, Tokyo)

Thu Patna

Ih biak Topa ompui na taw in, Japan ah 2005 kum March 24th ni in ka theng a, kum 6 val bang ka om sung, keima ii mu nabang, a ette huai thupawl khat kong hawmnuam hi. Tua ma in, Japan ngam thu Pawlkhat heak maksak tu kisam kasa hi.

Japan ngam ih ciciang, Tuikul lian khat hi a, 378000 Sq Kilo Meter zai hi. Prefecture (State) 47 om in, Governor khat tek ii ukna nuai ah om uh hi. Khua hun sia, 4 om a, Phalbi (Winter), Thingte no pian hun (Spring time), Khuakhal (Summer), Ngua zuh hun (Autumn ahibuale Fall (USA) Thingte pul hun) ci in khua hun 4 nei uh hi.

A ngam om dan, lei omdan sia, leitam (Plain) tam zaw a, mualzong tam mama hi. A mual te sia, ei Khamtung ngam bang hingawlin, a sang vavan cibang omngawl zaw hi. Japan ngam ah Mual asang bel sia Fuji mual hi a, 3776 Meter sang hi. Tua Fuji mual sia, a tawntung in huuk in tuamhi (khuakhaal hun sim ngawl). Khal sung tha 3 sung bang bek a dawn dong kika thei hi. Japan ngam sia mi namkim kiteang a, mihing tam citak a tam himai hi. Atenna khua te ih et ciang, Mualtung ah teangngawl zaw in, tui taw a kinai, lui hui, Ngun hui, Tuipi hui cibang, leitamna ah teang zaw hi.

Japan te khuapi sia, Tokyo hi a, Tokyo sungah Myone (Township) 23 om hi. Nidang in a khuapi sia, Kyoto hi a, Mual kawm ahiman, leitam a zaina ah khin in, Kyoto min bosak nuamngawl in Tokyo min phuak uh hi.

Fuji mual, Nikonghong Sizang magazine

Fuji mual a ngaal pan

Japan milui tatak te sia, eima Khamtung mi te bangma, a thatang sang omngawl in beam lingleng hi. A ci asa sia, a ngo tamzaw a, acivom bekbok sia tam ngawl hi. Puansil nikten sia, a nei sasun thiangsak sinsen in, hi sitset in om hi. Inn pua sang a pusua pah ciang, inn ompuan taw pusuak ngawl in, ahi sinsen, vakpuan taw pusuak se uh hi. Inn om puan khawng taw a pusuak te, bangma hong kici tuan ngawl ahihang hong en no pai lel hi.

Japan ngam sia, zinlingna lampi tung ah om ahiman, tu le tu in zinling tan hi. Magnitude, Richter scale 4, 4.5, 5 cibang sia om tawntung a, Japan, ah a om te in ngeina kise zo hi. 1911 March 11 ni sia, Tsunami taw hong ki thua ahiman, muntam ma in ngim kinga law mama hi. Mihing zong tam tatak ma thi hi. A khua bup in a bosiat zongh om a, khuangai huai kisa mama tek hi. Ngamdang mun tatuam pan, huna kipia a, Biakna sang a tatuam te zong in huna piatek hi. Japan te mama in a om namun pan huna pia a, paitek in a kisam babang seppui in diang tek hi. Huna a kipiak ciang, van zaksate taw hingawl in, van a thak set taw bek in kihu uh hi. A minam uh ki-it thei mama a, metvawt cibang omngawl het in, a tha nei zaza, a thinsung takpi taw kihu uh hi. Christian te ii ih biak Pathian thu um ngawl ahihang, Pathian deina bang in a ngamta, azui, Japan te ahi hi.

Maimuak dan thiam

Japan te in, kuama khen tuan ngawl zawngsak tuan ngawl in, maimuak uh hi. Nasepna khawng ah, ei sang a dinmun lian zaw ahihang, zawthawk thu taw kuama vawtsia ngawlhet hi. Pathian thu um mi ahingawl hang, thuman thutak taw na seam a, leilot thu cibang son ngawl hi. Haksatna a om ciang, huna ngen le atawp dong hong hu a, a kisam babang in hong hu hi. Met vawtna in kuama hu ngawl a, a thathong, (Free) tatak taw in ngual a hu te ahi uh hi.

Thianthona thupi sak

Japan te in amate pumpi tung bek thiangtho sak ngawl in, a omna, a tenna inn te a tawntung in thiangtho sak uh hi. A inn kiim a inn paam lampi teng zong a tawntung in thiang sak sinsen hi. Ninteak, thingte tak te, lopate bot thiang sitset in, thiangtho sak uh hi. Lampai kawm zaa tawp ngeingol in, zatawp natu mun nei sak a, a zatawngte, ninbung sungah vawk hamtang hi. Nin a kici peuma lampi tungah vawk papai ngawlin ninbung a om na dong toai in vawk uh hi. Ninbung a mubale zong a inn dong ciapui kik hi.

Cidamna thupi sak

Cidam natu a kisam sadat ahizong, ante lamsang te ahizong neak tu thupi sak hi. Sa lamsang pan ngasa ma tam neak bel uh hi. Nisim in a pumpi cidam natu in exercise vawt hamtang uh hi. Kumham khangham te bang lamseau (Jogging) vawt hamtang hi. Kum 50 a phak zawk uh ciang, cidamna kisit (Medical checkup) vawt hamtang uh hi. Ngam hau ahibangma kumpi te in a thong in cidamna sit sak uh hi.

Mite nawngkai sak ngawl

Inn kiim inn pam te in ngamlum hong sak ngawl tu in, ngamta uh a, Radio, Casset TV te zong a nging lei-in hong ngei ngawl hi. Nitak nai 8 zawk ciang, ngamlumna peuma vawt nawn ngawl uh hi. Ih om na inn sia, tawlngakna tu a kivawt ahi bangma, Inn ah kikhawm valum, biakna vawt, innpaam te nawngkai sak cibang in zangh ngei ngawl hi. A zazen in, eimi te dadiak, Christian ih hi bangma inn ah biakpiakna kivawt hamtang nuam ahiman, innpam tetung ah thu ki za sak hamtang hi. Inn sung ngamlum lei ciang, Singapore te bang in Police te sam liang ngawl ahihang, ngamlumna kisang ngawl hi ci-in hong kihesak hi. Inn kiim inn paam te ih nawngkai sak tawntung le inn neite in hong hawlkhia thei hi. Na ngamlum tawntung uh le mundang kikhin vun hong kici lian bek hi.

Tokyo khuapi, Nikonghong Sizang magazine

Tokyo khuapi, Rainbow bridge (Sangun lei)

Meileang tung, bus tungah ngamlum lialua in, ki paupui vazak ngawl uh hi. Ngual taw phone ki paupui cibang om ngawl in, phone hong kisam le zong, meileang tung, bus tungah om ing, dam in paupui kik tan ci in a phone khakkik pai hi. Meileang tung, bus tungah phone a pau a omte ih et ciang, ngamdang mite veu hi hamtang hi. Thu om ngawl in, kihaw ngawl a, ih kihaw nuam le thu kizasak phot in, ih haw nopna inn te in, hong haw tan hong ci zawk ciang kihaw thei pheang hi. Amate nasepna nawngkai sak ngawl hi.

Mite zaaktakna kinia

Japan te in amate sang a ham zaw ahinale zaatakna kipia hi. Nasepna khawng ah, amate sang ih pil zawk hang, a seam masa te thu kimang in, ki zakta uh hi. Thu dong hamtang zaw hi, a man ngawlna ih mu hang, khialzaw ni hi kici ngawl in, tubang vawt zaw leang a hoi zawtam cibang in thu kidong zaw hi.

Meileang tung bus tungah khangham sa khat hongpai le tona awn pai valian a, zaatakna pia hi. Sya te ahizong, Nu le Pa ahizong, ih Uu te ahizong zaatakna pia a, thu mang thei mama hi. Patang te bang, lampai thei papo le vanh pua sak pai a, amate le amate a din zawk natu in lamlak khol pai hi. Nu te Pa te zaatak natu thu hilkhol pai hi.

Hun (Time) thupi a nasep Hanciam mama

Japan te in hun thupisak mama uh hi. Ciam peal ngawl minit khat zong haizaw ngawl in hunlap in pa uh hi. Kikhopna khat papo ah a nai cinh ciang kipan valian hi. Mi kikim ngawl lai, mi kitam ngawl lai cibang in kingak ngawl in, a hun valian in kipan lel uh hi. Tavuan (Vaipuak) nei te bang kikhopma minit 15 bang in theng khol hi. Nasep nei te zong, a nai cinh ma minit 10 bang in theng khol zaw uh hi. Hun lap tu-in dam nilneal in pai ngawl in, tai ngawp liang hi. Hun thupi sak hi.

Hun thupi sak ngawl na in, na nasepna pan hong tawlnga sak tu a, na nuntakna zong hong kilamdang sak pai hi. Ngamdang mi Work Permit taw a om te, hun man ngawl hangin a ngam ah kicia sak hi. Nasep dang ih zon ciang zong haksa pai hi. Nasep lai tawntung zong, thumang ngawl, hun lap ngei ngawl hang in ki tawlnga sak hi vak ci-in ih vang zong kiamtuam mama hi. Cidam ngawlna hang, ahibuale ih paina, meileang, bus te kisia, tuakkhialna hang ahile zong ahunlap in phone taw thu kizasak hamtang hi. Ih thet hak, hunlap ngawlna thu ih lak thei kul hi.

Japan te in a hun valian taw na seam tek hi. Hun valsak thathong cibang om ngei ngawl hi. Japan ah Zum naseam te zong nasep tu kiman, sep tu om nawnngawl ahiciang inn cia pal thei tu cibang om ngawlin a hun cinh dong om uh a, a nai cinh lian ciang bekin cia pheang hi. Zum te ah tuni mihing hong pai tam mama ahiciang, zum hong pal tu ci bang om tuan ngawl in, a nai cinh ciang bek zum hong pheang a, hong pai te hun bosak ngawl in a kisam babang a manlang in vawtpui pai hi. A nasepna te ah, citak thuman uh a, leangna (Customer) te ii lungkim babang in zui uh a, maipuak thiam mama uh hi. Nasep hun in zum taw a kisai ngawlpo phone taw kipaupui, thuson khawm ci khawng om ngawl bek domngawl in, kipaupui sak thei ngawl hi. A nasepnate en leang citak in, hanciam thei mama hi. A hun ngawl in tawlnga pak cibang om ngawl hi. Hun taw na seam hi. Nasep laitak khawng, khat le khat kipaupui se ngawl in, nasepna thupi laak hi. Za du te zong nasep hun sung za tawp tu kham hi. Za ih tawp nuam leh tawlngak hunsung teng bek ah kitawp thei hi.

Omdan thiam

Japan numei te a to ciang, a peang te uh zep linlian in to a, kalkak biabua in to ngei ngawl hi. Kalkak ziazua in a to namule ngamdangmi te veu hi zaw hi. Om dan to dan thiam thei mama uh hi.

Pute/Pate ngeina thupi sak

Japan ah biakna a kim in om hi. Japan tatak te in Biakna tatak cibang nei ngawl a, a pianna a pu, a pa te thupi sak in, bia uh hi. A pu a pa te hangin thupha kisang hi ci-in thupi sak hi. Tunung kum 200 laihun pan tudong ma ngamkhang ngamhauna te na suak uh a, tudong ma in, leitung bupah a minthang na ngam khat a na hihi. Pute pate phawna in a hunhun in pawi vawt a, ngeina lap taw in lamdung ah vak kakawi in pawi vawt uh hi.

Thu tatuam

Thu tatuam sung ah ih thulu taw kisai ngawl het ahihang, heak tu kilawm sa kahiman pawlkhat hong belap ing. Sizang mi, Zomi, Khamtung (Chin) mi, Kawlmi te tam mama ngamdang ah kitheng tek a, ngambeal kiseau in a nungta kitam mama hi. Pawlkhat te bang, Kalemyo, Yangon zongh theng Ngei ngawl in, Yangon khuapi kantan in ngamdang a theng zongh kiom hi. Tuate in ngamdang a theng papo sia amate bangma veu in theng hi ci-in um uh a, lai he ngawl vive ma a theng tek hi tu um zazen hi. Ngamdang a thet uh ciang, ih paunak in “Nakhok Muthi suak” cibang vive hitek ahiman, kuama in mi a zaatak huai te zaatakna piaktu cibang meal kiom nawn ngawl thong hial hi.

Nikonghong Siyin online magazine

Japan ngeina inn

Akuamapo, ngamdang pai na sawm uh le na pai ma in, na pai natu munah a theng sa, mipui te ii contact number (phone number) khat peuma na makngil ngawl tu in tepte tu thupi mama hi. Tu hun ciangin mi kitheam tam mama a, a thetna a ki he ngawl zongh tam mama zo hi. Kipawlna khat papo ah na kihel hamtang tu thupi mama hi. Ei Sizang mite, Christian kitam zaw ahiman, biakna kipawlna ah Kawlngam pan na pusua ma-in thu dong hamtang in, he sak hamtang leang pha bel ka sa hi. Ngamdang na pai sia bang hi tu in pai niziam cisia, nangma le nangma na kiheak tu zong thupi a, sumle paai zong tu maw, biakna sang maw, Pilna sin tu maw cisia, a thupi bel sia taw ih kal suan thei tu thupi mama ka sa hi. Nangma paina thu sia ma number khat in koi in a, hun na nga ciang a dangte zong na hi thei zaza in maapang veve in. Ngamdang na pai khiatna thu mangil heak in.

Khuasangah a om lai ih nu ih pa, suapui sangngam te, be le phung, khuapui tuipui te ii nuntak zia te mangil heak in a, a hithei zaza in panpui tu ngaisun in. Ih pianna ngam ih pua tu sia Sizang mimal sim khat tek tungah tavuan (Vanpuak) kinei tek hi cisia kong phawk sak nuam hi. Ih mipuite taw a kizom ngawl te, mibo, mi mangthang te ih hi tu a, ih omna papo ah ih mipui te taw tonnkhawm, tuiton thei tu in ngaisun thei tek leang pha kasa hi. Sizang kipawlna khat papo ah ih kihel hamtang tu in kong hanthawn nuam hi.

Thu khupna

Sizang mipui te le keima pan kipan, in Japan te bangma, maimuak dan thiam natu ahizong, thianthona thupi saknate ahizong mite diksak ngawl tu, ngamlum lialua, a nging thathei in lasa, thungen, la ngai cikhawng zong kidop huai mama hi. Ih ngam pan bangma phamaw ngawl ahihang, mundang ngamdang na thet uh ciang kidop mama tu thupi kasa hi.

Hun (Time) sia thupi mama a, a hun valian in nasep kipan, kikhop vawt, a hun valian in manh tu hanciam cite ette huai mama kasa hi. Numeite to dan om dan thiam tu zong a thupi mama khat na hihi. Ih omna papo, ih thetna papo ah, amate ii ngamtat babang a kisam taciang ih zui zawk tu thupi mama a, ih thetna ngamte ii kampau le laite zong heak tu kisam mama hi.

Japan ngam ah ka om sung banghang Japan te hizata khangto ziam ci ka et (Study ciang Japan minam te-in Pathian um mi Christian 1% bangbek om ahihang a vekpi ahibua zong a tam zaw in, ih Lai Thiangtho sung athukham ombang Pathian deina bang a thumanna le citakna taw kalsuan uh ahiman a khangto uh hi ci-in ka mu hi. Tua ahiman, ei Sizang mipui te Pathian um Christian te veu ihhiman, Pathian deina bang citakna taw nungta, kalsuan in hi leang, ih biak Topa in thupha hong pia in a khangto mama tu te ih hihi. Mi te ii hong et niam ngawl tu in, Japan te ih ngamtat dan teng, hanciam dan teng phattuamna ih nga thei natu in ih biak Topa in thupha hong pia kim tek tahen.

Khup Hen Pau, Nikonghong Siyin online magazine

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to follow this blog and receive notifications of new posts by email.

Join 1,567 other followers

Blog Stats

  • 90,075 hits

A Lui Te

Live Trific

google-site-verification: googled172884ff34d55c0.html