London Olympic ah Zomi Khat In Bronze Medal Nga

Kum 4 khat vei aki vawt Khaal Olympic ii a 30 veina (XXX) sia, 2012 atu London khua ah July 27 pan August 12 ni dong ki vawt aa man zo hi. Leitung ngam 204 pan mihing 10,000 vaal kimaina tuatuam ah ki dem in ki hel hi. 1908 le 1948 kum lai zong London khua ah ki vawt ahikom London khua sia Olympic 3 vei inteak a seam masa khua hi si hi. Kawl ngam pan zong hi a 30 veina khaal Olympic ah mihing 6 ki hel aa, Nay Myo Aung (thal kap), Zaw Win Thet (Tai kidem), Ni Lar San (Tai kidem), Aye Aye Aung (Judo), Shwe Zin Lat (Ngunkuang hot) le Maung Kyu (Thau kap) teng hi. Medal ngana ih et ciang, USA in a khatna, atambel nga aa, kham, ngun, tau aki ngawm medal (104) nga aa, Sen ngam in medal (87) taw a 2na, inteak Great Britain in (65) taw a 3na nga hi. American tui op thiam Michael Phelps na tutung medal 2 nga ahikom abosa Olympic te pan anga medal 17 taw aki ngawm medal 19 nga ngei suak hi. Olympic kidemna pan medal tam bel a nga ngei pa suak hi.

Kawl ngam pan medal khat zong ki ngawl hikale, India pan akidem sung pan mualtung mi suan ahibuale, Zomi suan ih ci thei tu numei khat in boxing pan tau (bronze) medal nga ci ih zaak ciang, ki aangtang pui mama hi. A min sia Mangte Chungneijang Mary kom hi aa, India ngam Manipur state pan hi. Mary Kom ci in ki he aa, a pa Mangte Tonpa Kom, a nu Mangte Akham Kom hi. 1983 kum in suak hi. A pasal K Onler Kom hi aa, Rechungvar le Khupneivar aki ci tapa apiang 2 nei hi.

A no lai pan kipan kimaina a kin mama khat hi aa, boxing zong uk mama ahihang numei kimaina hi ngawl ci ngaisun ahikom, kimai ngawl hi. 2000 kum ciang, West Bengal numei boxing champion hong nga ciang mithang tu in kipan aa, kum 18 a phak ciang ngamtatuam level (international level) ah kidem tu in hong kipan hi.

Ngamtatuam level akimai phit sia 2001 kum USA ah aki vawt Women’s World Amateur Boxing Championship hi aa, hi leitungbup kidemna ah a 2na nga hi. 2002 Women’s World Amateur Boxing Championship Turkey ngam ah ki dem laleou aa, a khatna, champion nga hi.

Tutung London Olympic ah a pa le a nu in zui aa, a coach pa Charles Atkinson in Olympic khua ah zui thei ngawl hi. A coach pa in International Boxing Association te ii 3 star certification nei ngawl ahikom Olypic village ah zui thei ngawl ci in ki za hi. London Olympic pan tau (bronze) medal a nga hu in phat vawtna a nuai abang teng nga hi.

Rupee 5,000,000 (US$ 90,500) – Rajasthan Government
Rupee 5,000,000 (US$ 90,500) le leitang aika 2 – Manipur Government
Rupee 2,000,000 (US$ 36,200) – Assam Government
Rupee 1,000,000 (US$ 18,100) – Ministry of Tribal Affairs (India)
Rupee 4,000,000 (US$ 72,400) – North Eastern Council.

Ngamtatuam (international) kidemna ah anuai abang in ngual zawna nga ngei hi.

• 2001 second -Women’s World Amateur Boxing Championships (USA)
• 2002 first – Women’s World Amateur Boxing Championships (Turkey)
• 2002 first – Witch Cup (Hungary)
• 2003 first – Asian Women’s Championships (India)
• 2004 first – Women’s World Cup (Norway)
• 2005 first – Asian Women’s Championships (Taiwan)
• 2005 first – Women’s World Amateur Boxing Championships (Russia)
• 2006 first – Women’s World Amateur Boxing Championships (India)
• 2006 first – Venus Women’s Box Cup (Denmark)
• 2008 first – Women’s World Amateur Boxing Championships (China)
• 2008 Second – Asian Women’s Championships (India)
• 2009 first – Asian Indoor Games (Vietnam)
• 2010 first – Women’s World Amateur Boxing Championships (Barbados)
• 2010 first – Asian Women’s Championships (Kazakhstan)
• 2010 Third – Asian Games (China)
• 2011 first – Asian Women’s Cup (China)
• 2012 first – Asian Women’s Championships (Mongolia)
• 2012 Third – XXX Summer Olympic (United Kingdom)

Anuai aa phatvawtna (paktaoina) award teng zong ki pia hi.

• Arjuna Award (Boxing) – 2003
• Padma Shree (Sports) – 2006
• Contender for Rajiv Gandhi Khel Ratna Award – 2007
• People of the Year – Kimca Book of Records – 2007
• CNN-IBN & Reliance Industries’ Real Heroes Award – 2008
• Pepsi MTV Youth Icon – 2008
• Felicitation by ZOMI Students’ Federation (ZSF) – 2008
• Rajiv Gandhi Khel Ratna Award – 2009
• International Boxing Association’s Ambassador for Women’s Boxing – 2009
• Sportswoman of the year, Sahara Sports Award – 2010

Tutung London Olympic akimaina teng en ki leang, August 5 ni Poland pan Karolina Michalczuk taw ki dem aa, 19-14 taw zo hi. Azing ciang (August 6) Tunisia ngam pan Maroua Rahali taw ki dem laleou aa, 15-6 taw zo hi. August 8 ni UK pan Nicola Adam taw k idem aa 6-11 taw lel hi. Ahihang a 3na hong nga vave hi.

Mailam Zomi sung ah Mary Kom bang in sport thiam, minam le ngam a khai saang tu khangno hong papiang lai tahen….

TN

Doppha: Wikipedia online encyclopedia